BIBLIA TOQET JISKTʼANAKA
¿Oraqpach apnaqer mä gobiernojj utjaspati?
¿Kunjamsa Oraqpach apnaqer mä gobiernojj taqe jaqenakar mayachthapispa? (ISAÍAS 32:1, 17; 54:13.)
Utjaspa ukajj taqe jaqenakatakejj wali askïspawa. Jichhürunakanjja, walja jaqenakaw pobrëpjjatap laykojj tʼaqhesipjje, ukampis mä jukʼanejja walja qollqenïpjjarakiwa. Oraqpachar apnaqer mä gobiernojj kuntï taqe jaqenakajj munapki ukanak yatispa ukat yanaptʼarakispajja, walipunïspawa. ¿Jaqenakajj ukham mä suma gobierno uttʼayapjjaspati? (Jeremías 10:23 liytʼäta.)
Nayra tiempotpachwa gobiernonakajj jaqenakar jan walinak lurapjje, jukʼampis pobrenakaruw ukham lurapjje. Yaqhep gobiernonakajj jan sinttʼasirïpjjewa (Eclesiastés 4:1; 8:9). Ukampis Taqe Chʼamani Diosajja, ‘taqe gobiernonak lantejj mä sapa gobiernokiw utj-jjani’ sasaw arsuwayi. Ukat mayniruw uttʼayawayi, jupaw jaqenakarojj yanaptʼani. (Isaías 11:4 ukat Daniel 2:44 liytʼäta.)
¿Diosan Reinopajj kunanaksa lurani?
Jehová Diosajj uka Reinon apnaqañapatakejj Jesucristo Yoqaparuw ajlliwayi. Jupakiw sum apnaqaspa (Lucas 1:31-33). Aka Oraqenkkäna ukhajja, taqe jaqenakatwa llakisïna. Jichhajj Reyejjasajja, taqe kasta markankir jaqenakaruw mayachthapini ukat tʼaqhesiñanaksa tukjarakiniwa. (Salmo 72:8, 12-14 liytʼäta.)
¿Taqenit Jesusar Reyiparjam uñjapjjani? Janiwa. Ukampis Jehová Diosajj paciencianiwa (2 Pedro 3:9). Ukatwa Jesusar Reyiparjam uñjapjjañapatak jaqenakar tiempo churaski. Niyaw jan wali lurir jaqenakar Jesusajj tukj-jjani, ukat aka Oraqpacharuw sumankañ apanini, janirakiw ajjsarañas utj-jjaniti. (Miqueas 4:3, 4 liytʼäta.)