Jesusan jiwäwip amtañataki taqinir jawstʼapxañäni
1. ¿Jesusan jiwäwip amtañatakix kunas Uraqpachan lurasini?
1 “Akxa nayat amtasisin lurapxam” sasaw Jesusax säna (Luc. 22:19). Uka arunakar phuqañatakiw Jehová Diosan Qhanañchirinakapax aka maranxa, marzo phaxsit 30 urunak saraqatarux Jesusan jiwatap amtañataki yaqhanakampi tantachasipxani. Ukatakixa mä invitacionaw Uraqpachan lakirasini, marzo phaxsin 13 urut 30 urukamaw uka invitacionanakax jaytasini.
2. ¿Jesusan jiwatap amtañatakix kunjamsa invitacionanak chursna?
2 Kunjamsa churañäni. Uka invitación uñxattʼayasin churasaxa, akham sasaw utanir sasma: “Marzo phaxsit 30 urunak saraqataruw waljanix Uraqpachan Jesusan jiwatap amtañatak tantachasipxani, inti jalantxaruw uka tantachäwix apasini. Familiamampitakiw aka invitación jayttʼañ munsma. Amigonakamas jutapxarakispawa” sasa. Ukatxa, kawkinsa ukat kuna horas uka tantachäwix apasini ukwa qhanañchtʼäta, ukat kunatsa Jesusan jiwatap amtañax wakisi uksa Bibliat Lucas 22:19 uñxattʼayarakismawa. Ukampis niyakixay uka invitacionxa taqinir jaytañ munstanxa, janiw jaya parlañax wakiskaspati.
3. ¿Khitinakarus invitacionanak churañäni?
3 Taman yatiyañapäki uka chiqanakax jachʼächi ukat yaqhipax janirak utankapkchiti ukhaxa, inas irpir chuymaninakax uka utanakarux jaytasinapawa sasin sapxarakchini. Ukat wakisini ukhaxa, revistanakwa uka invitacionanakamp chikax jaytaraksna. Ukatsti, Bibliat yatiqirinakatsa, familiaranakatsa, yatiqir jan ukax irnaqir masinakatsa, uta jakʼan qamasirinakatsa ukat yaqhanakatsa janiw armasiñasäkiti, jupanakarux uka invitación churañasarakiwa.
4. ¿Jehová Diosar yuspäratas uñachtʼayañatakix kuns lurañäni?
4 Jichhatpach wakichasipxañäni. Jesusan jiwatapax amtaskani uka urunakan Diosatak jukʼamp irnaqañax wali askïniwa. ¿Jumax precursor auxiliarjam irnaqañataki wakichasismati? Ukat wawanakamas jan ukax Bibliat yatiqirinakamas yatiyir mistuñatakix wakichatäxapxchi ukhaxa, irpir chuymaninakar jakʼachasiñamawa. Janïr bautisat yatiyirjamax tamamp chik irnaqapxaspati janicha ukxa jupanakaw uñjxapxani, ukhamatwa jupanakas invitacionanak lakirapxarakispa. Jehová Diosax munasiñatwa munat Wawapar jiwas layku khitanitayna; jiwasatix ukar wali askit uñjstan ukhaxa, Jesusan jiwatap amtañatakix uka tantachäwir sarañäniwa, ukat yaqhanakar jawstʼañatakis chʼamachasirakiñäniwa (Juan 3:16).