Marzo 17 urutwa Jesusan jiwäwip amtañatakejj invitación lakiraskañäni
1. ¿Marzo 17 uru saraqatarojj kuns lakiraskañäni?
1 Sapa maraw Jesusan jiwäwip amtañatakejj jaqenakar yatiyir sartanjja (1 Cor. 11:26). Ukatwa Jehová Diosajj kuntï jiwasar qhespiyañ laykojj lurawayki uk jaqenakajj jiwasamp chika istʼapjjañap muntanjja (Juan 3:16). Jichha marajja, marzo 17 uru saraqataruw invitación lakirañ qalltaskañäni. ¿Uka phajjsin jukʼamp irnaqtʼañatakejj jichhatpachti wakichasisktanjja?
2. ¿Kunjamsa invitacionanak chursna?
2 Kunjamsa invitación chursna. Jukʼa arunakampikiw parljjaytʼañasa. Inas akham sissna: “Kamisaraki. Aka invitación jumataki ukat familiamatak jayttʼañ munsma, abril 5 uru saraqataruw mä wali wakiskir tantachäwejj Oraqpachan apasiskani. Ukanjja, Jesusan jiwäwipampejj kunanakas jikjjatasiwayi ukat jichhürunakan kuns jupajj luraski ukaw mä arstʼäwin qhanañchtʼasiskani. Ukar mantañatakejj janiw qollqejj mayiskaniti. Akawjanwa kawkhansa apasini ukat kuna horanisa ukajj qhanañchasiski” sasa. Seman tukuy urunakajja, wakischini ukhajja revistanaksa churaraksnawa.
3. ¿Taqeni invitación katoqapjjañapatakejj kuns lursna?
3 Taqenir invittʼañäni. Jiwasamp chika Jesusan jiwäwip amtapjjañapatak qhawqhanirutï invitañjamäki ukatakiw chamachasiñ muntanjja. Ukhamajja, revisitanakaru, Bibliat yateqerinakasaru, familiasaru, yateqer jan ukajj irnaqer masinakasaru, uta jakʼankirinakasaru ukat yaqhanakarus invittʼaraksnawa. Ukampis taman irpir chuyman jilatanakaw kunjamsa invitacionajj lakirasini uk amtjjapjjani. Pasïr maranakanjja ukham irnaqtʼasajj wali askinakaw jikjjatasiwayi. Mä katoqtʼir jilatajj mä warmir mantanir uñjasajja, jankʼakiw khitis invittʼatayna uk thaqtañ yanaptʼäna. Ukampis jupajj janiw khitirus uñtʼkänti. Kunattejj ukürukiw utat uta visittʼasajj invittʼapjjatayna.
4. ¿Kunatsa invitacionanak taqe chuyma lakirañasa?
4 Jesusan jiwäwip amtañatak invittʼkañäni ukanakatjja inas maynikis jutchini. Jan ukhamäkchin ukhasa, taqe chuyma chʼamachasitasajja, Jehová Diosaruw jachʼañchani. Lakirkañäni uka invitacionaw Jesusajj mä jachʼa Reyejjatap qhanañchaskani. Ukat ukham taqe chuyma yatiyañäni ukhajja, jaqenakarus, jilat kullakanakarus Jesusan jiwäwipajj qhawqha valoranis jiwasatakejj uk uñachtʼayañäni. Jehová Diosarojj yamas wal kusisiyañäni (Col. 3:15).