Abril phaxsit 2 uru saraqataruw invitación lakirañax qalltasini
1. Jesusan jiwäwip amtañatakixa, ¿kunürutsa invitación lakiraskañäni? ¿Ukham lakiratasatx jaqinakax jutapxiti?
1 Aka marax abril 2, sábado urut abril 17, domingo urukamaw Jesusan jiwäwip amtañatak invitacionax lakirasiskani. Pasïr maranakanx ukham invitación lakiratasatxa waljaniw Jesusan jiwäwip amtañatak jutawayapxi. Mä kutixa, Jesusan jiwäwip amtañ urupuniw mä warmix akham sasin sucursalar jawsatayna: “Añchhitaw utajar purisin mä invitación punkujan jikxatta. Uka tantachäwir sarañ muniristwa, ukampis kuna horänisa uk janiw sum yatkti” sasa. Ukat khititï telefonot jayskäna jupaw kawkhansa uka horax qhanañchtʼasiski uk säna, ukat akham sasaw uka warmix satayna: “¡Uka tantachäwir sarapuniwa!” sasa.
2. ¿Kamsasas invitación chursna?
2 Kunjams lakirasini. Kawkhanaktï tamax yatiyki uka chiqanakan taqinir invittʼañatakix jan walja tiempo utjatapatxa, mä qhawqha arunakamp parltʼañakiw wakisispa. Inas akham sissna: “Kamisaki. Aka invitación familiamatak jaytawayañ munsma. Mä wakiskir tantachäwitakiwa, ukax may kutikiw maran Uraqpachan apasi. Aka maraxa, abril 17, domingo urüniwa [invitación churäta]. Uka uruw Jesusax jiwatayna, ukat Bibliat apstʼat mä arstʼäwinwa kuna askinaksa Jesusan jiwäwipat katuqsna uk qhanañchasiskani. Ukar mantañatakix janiw qullqix mayiskiti. Aka invitacionanwa kawkhankanisa ukat kuna horanisa ukax qhanañchasiski” sasa.
3. Kawkhantï yatiyktan uka chiqankirinakar invittʼañatakixa, ¿kuns lursna?
3 Kawkhantï tamax yatiyki ukatï jachʼächixa, inas irpir chuymaninakax jan utankirinakarux kawkhantï yaqha jaqinakax jan uñjapkaspa ukawjar invitación jaytasiñapatak qhanañchtʼapxchispa. Ukampisa, familiaranakamaru, irnaqir masinakamaru, Bibliat yatiqirinakamaru, Bibliat yatiqañ munapki ukanakaru ukat khitinakarutï uñtʼkta taqi ukanakar invittʼapxañamatakiw chʼamañchtʼanipxsma. Sabadomp domingompix invitacions jaytkchïtaxa, wakisirjamäni ukhax revistanak churarakismawa. ¿Ukat janit uka phaxsinakan precursor auxiliarjam irnaqtʼkasma?
4. ¿Kunatsa Jesusan jiwäwip amtañatak yaqhanakan jutapxañap muntanxa?
4 Uka tantachäwir sarapkani ukanakaxa, wali askinakwa yatiqapxani. Kunjamsa Jehová Diosax Yuqapar khitanisax munasiñap uñachtʼäwayi ukwa istʼapxani (Juan 3:16). Kunjamsa Diosan Apnaqäwipax jaqinakatak askinak apanini ukwa yatiqapxani (Luc. 22:29). Bibliat jukʼamp yatxatañ munapkani ukanakarux katuqtʼir jilatanakar sapxañapatakiw chʼamañchtʼasini. Invitación lakiratasat waljani jutapxaspa ukat jiwasamp chik Jesusan jiwäwip amtapxaspa ukatakiw Diosar mayisipktxa.