Kunjamatsa Diosarux suma churäwipat yuspärsna
1. ¿Kunatsa Jehová Diosarux wal yuspärtanxa?
1 Jehová Diosan taqi churäwinakapatxa, munat Yuqap tuqi qhispiyawaykistu ukaw jukʼamp suma churäwixa (Sant. 1:17). Qhispiyäwi tuqiw walja bendicionanak katuqtanxa, maynïrix juchanakasat perdón jikxatañawa (Efe. 1:7). Ukatwa jiwasax wal yuspärtanxa. Jesusan jiwäwip amtktan uka urunakaw uka tuqit jukʼamp lupʼtanxa.
2. ¿Kunjamatsa jiwasasa, familiasasa qhispiyäwir jukʼamp yuspäratas uñachtʼaysna?
2 Jukʼamp yuspärapxañäni. Aka maranxa, marzo phaxsit 30 urunak saraqataruw Jesusan jiwäwipax amtasini. Diosan churäwipat jukʼamp yuspärañatakixa, Jesusan jiwäwip amtañ jakʼa urunakaw Familiana Diosar Yupaychañataki Aruma sat wakichäwin qhispiyäwi tuqit jukʼamp yatxatsna. Uka urunakana, Biblia liyiñataki mä suma wakichäwix utjki ukxa liyiñasarakiwa. Kunjamsa qhispiyäwix yanaptʼistu, qhispiyäwi churatapat kunjam Diosätapsa amuytan ukat qhispiyäwi utjatapatxa jumapachpatsa, yaqhanakatsa ukat jutïr urunakatsa kuns amuytan ukwa sapa maynix lupʼiñasa. Ukatxa, ¿Jesusan jiwäwip amtañataki pä machaq qʼuchunak qʼuchkañäni uk yatiqañax janit wakiskarakispa? Ukanakax 8 ukat 109 uka qʼuchunakawa (Sal. 77:12).
3. ¿Kunjamatsa yuspäratas uñachtʼaysna?
3 Yuspärañasawa. Qhispiyäwirux wali askirjamaw uñjtanxa, ukatwa jachʼa munasiñapat Jehová Diosax Yuqap jiwasar qhispiyañataki khitanki ukxa jaqinakar wal yatiyañ muntanxa (Sal. 145:2-7). Ukatwa yaqhipax familiapan maynikisa marzo, abril ukat mayo phaxsinakan precursor auxiliarjam irnaqtʼañatak wakichtʼasipxi. Precursorjam jan irnaqtʼirjamäksta ukhaxa, ¿Diosan Arupat jukʼamp yatiyañatakix ‘tiempo apstʼasismati’? (Efe. 5:16, MT). Qhispiyäwirux wali askirjamaw uñjtanxa, ukatwa jaqinakarux Jesusan jiwäwip amtiri jutapxañapatakix kunaymanit yanaptʼañäni (Apo. 22:17). Jichhjatwa khitinakarus jawstʼäta uk qillqtʼasiñama, revisitanakaru, Bibliat yatiqirinakaru, familiaranakamaru, irnaqir masinakamaru ukat uta jakʼankirinakamarusa. Ukat Jesusan jiwäwip amtañataki invitación lakirañatakis tiempo apstʼasiñamarakiwa.
4. ¿Kunjamatsa Jesusan jiwäwip amtaskani uka tiempxa wali askirjam uñjsna?
4 Marzo, abril, ukat mayo phaxsinakanwa qhawqsa Jehová Diosarux jaqinakar qhispiyatapat yuspärtan uk uñachtʼaysna. Ukhamasti uka phaxsinakax qhispiyäwi utjatapata ukat “Criston jan jaktʼkañ qamir kankañapat” yuspäratas uñachtʼayapxañäni (Efe. 3:8).