¡Yuspärasirïpjjañäni!
Jesusan jiwäwip amtaskani ukhaw yuspärasirïtas uñachtʼaysna
1. ¿Kunjam chuymampis Jesusan jiwäwip amtañasa?
1 Jesusan jiwäwipajj abril 14, lunes uruw Inti jalantjjaru amtasiskani, uka urojja wali wakiskiripuniwa, uk amtkasajja, yuspärasir chuymanïñatakiw chʼamachasiñasa, ukat luratanakasampiw yuspärasirïtasjja uñachtʼayañasaraki. Lucas 17:11-18 qellqatanjja, yuspärasirïñajj Jehová Diosatakisa, Jesusatakisa kunja askisa ukwa qhan uñachtʼayistu. Jesusajj tunkaniru lepra usut qollkäna ukanakatjja, maynikiw yuspärañatakejj kuttʼäna. Jesusajj jiwasanakar qhespiyañ layku jiwatapatwa jutïrin taqe jan waltʼäwinakajj tukusjjani ukat wiñay jakañsa katoqarakiñäni. Ukatjja, sapürupuniw Jehová Diosar taqe bendicionanakapat yuspärañäni. Ukhamajj ¿kunjamsa yuspärasirïtas jutïr semananakan uñachtʼaysna?
2. Jesusajj kuntï jiwasar qhespiyañ layku lurawayki ukar yuspärañasatakejj ¿kunas yanaptʼistani?
2 Yuspärasirïñataki chʼamachasiñäni. Yuspärasiñajja, chuymatwa mistu. Ukatwa Jesusajj jiwasar qhespiyañatak jiwawayki ukar wali askit uñjañasatakejj uka urunakan Biblia liyiñatak wakichasiwayi. Uka wakichäwejj walja cheqanakanwa utji, sañäni: Diosan Arupat sapüru yatjjatañataki folletona, ukat calendariona. Familpacha liytʼañatak chʼamachasiñasawa, ukhamtï lurañänejja, Jesusan loqtasïwipar jukʼamp askit uñjañatakiw yanaptʼistani ukat sarnaqäwisansa yanaptʼarakistaniwa (2 Cor. 5:14, 15; 1 Juan 4:11).
3. Jesusan jiwäwip amtaskani uka phajjsinakan ¿kunjamanakatsa yuspärasirïtas uñachtʼaysna?
3 Yuspärasiritas uñachtʼayapjjañäni. Yuspärasirïtasajj luratanakasanwa qhan uñjasi (Col. 3:15). Lepra usut qollaskäna uka chachajj jupaw Jesusar yuspärañatakejj thaqäna. Ukat kunjamsa mä milagro toqe qollasïna ukjja, taqeniruw wali kusisita yatiypachäna (Luc. 6:45). Ukhamajj Jesusan jiwäwip amtaskani uka phajjsinakan yuspärasirïtas laykojja, invitacionanak lakirañatakejj taqe chuyma chʼamachasiñäni. Ukatsti, precursor auxiliarjam irnaqtʼasa jan ukajj jukʼamp horanak yatiyasaw yuspärasirïtas uñachtʼayaraksna. Jesusan jiwäwip amtañatak jutapkani ukanakar sum katoqtʼasa ukat jisktʼanakapar qhanañchtʼasaw yuspärasirïtas uñachtʼayaraksna.
4. Jan qhepat amtasiskañamatakejja, ¿kunsa Jesusan jiwäwipa amtaskani uka phajjsinakan lursna?
4 ¿Jesusan jiwäwip amtañajj janit mayampsa utj-jjpachäni? (1 Cor. 11:26.) Janiw yatktanti. Aka maratï Jesusan jiwäwip amtañataki qhepïri maräjjaspa ukhajja, janiw aka yatichäwin parlawayktan ukham yuspärañajj qhepat utj-jjaspati. Ukhamajja, ¿yuspärasirïtas uñachtʼayañäniti? Arunakasasa ukat lupʼïwinakasasa Jehová Diosan chuymapar purtʼkirïñapawa. Kunattejj Jupaw jiwasar qhespiyañatakejj Yoqapar aka Oraqer khitaniwayi (Sal. 19:14).