KUNJAMSA UÑISISIÑAR ATIPJASISPA

2 | Jan vengasimti

Bibliajj akham siwa:

“Jan khitirus jan walit jan walimpi kuttʼayapjjamti [...]. Kawkhakamay wakischini ukhakamajj taqe jaqenakampi sumankapjjam. Munat jilatanaka, jan vengasipjjamti [...], kunjamtï qellqatäkejja: ‘Nayaw vengasiskäjja, nayaw ukhamat ukham kuttʼayaskäjja’ siw Jehová Diosajja” (ROMANOS 12:17-19).

¿Kamsañsa muni?

Maynin jan wal luratajja, colerasismawa ukampis Diosajj janiw vengasiñam munkiti. Antisas jupar suytʼañamwa muni, jupajj taqe jan walinak niyaw askichjjani (Salmo 37:7, 10).

Akwa lurasma:

Maynit vengastan ukhajja, uñisisiñ jukʼamp utjañapatakiw chʼamañchtanjja. Maynitï jan wal lurstam ukhajj janiw ukhamat ukhama kuttʼayañamäkiti. Janiw jankʼak colerasiñamäkiti, pacienciampiw suytʼañama, awisajja armjjañaw wakisi (Proverbios 19:11). Jan ukajj uka toqet parlañaw awisajj wakisirakispa. Sañäni, jumarutï jan wal lurapjjstam ukhajja, policiaru jan ukajj autoridadanakaruw yatiyasma.

Vengasiñajja mayni pachparuw jan waltʼayi

Jan sumat askichañjamäkchi, jan ukajj sumat askichañatak chʼamachasisas jan askichañjamäkchi ukhajj ¿kunsa lurasma? Janiw vengasiñamäkiti, ukham lurasma ukhajja, jukʼamp uñisisiñaruw chʼamañchasma, antisas uñisisiñ jan utj-jjañapatakiw chʼamañchañama. Diosaw askichani sasaw confiyañama. Bibliajj akham siwa: “Jupar confiyam, jupasti juma favoraw saytʼani” sasa (Salmo 37:3-5).

Experiencia (ADRIÁN)

Janiw vengasirëjjeti

Qʼajjo waynaskäna ukhajja, Adrianojj callenakan nuwasiri, vengasiri ukhamänwa. Jupajj akham siwa: “Wali phiru jan ukajj qhoru waynäyätwa ukat walja kutiw jan walinakan uñjasirïta. Awisajja wilararaw callen jaqosiskirïta, ukat jiwatäjjpachawa sasaw amuyapjjerïna” sasa.

Jupajj 16 maranïskäna ukhaw Bibliat yatjjatañ qalltäna. Jupajj akham saskakiwa: “Bibliat yatjjatasajja, jakäwejjan walja mayjtʼäwinak lurañajjaw wakisïna” sasa. Adrianojj uñisisiñsa nuwasiñsa jaytjjañapänwa. Romanos 12:17-19 texton jan vengasiñ toqet kuntï qhanañchi ukaw jupar yanaptʼäna. Jupajj akham sarakiwa: “Jehová Diosaruw jan walinak askichañajj waktʼi, Jupaw horasapar askichani uk amuyañatakiw uka qellqatanakajj yanaptʼawayitu. Ukhamasti jukʼat jukʼatwa jan walinak jaytjjayäta” sasa.

Mä arumajja, pandillankkäna ukapachajj enemigopäpkäna uka pandillaw Adrianorojj nuwjapjjäna. Ukatsti uka grupon pʼeqtʼiripajj “¡arjjatasimaya!” sasaw Adrianor säna. Jupajj akham siwa: “Chuymajan wal jupanakar nuwjañ munayäta” sasa. Ukampis nuwjañat sipansa Jehová Diosaruw mayisïna ukatsti escapawayjjänwa.

Adrianojj akham saskakiwa: “Qhepürojja, nuwjkitäna uka waynaw thakin sapak jutaskäna, walpun colertʼasta ukat nuwjañ munayäta. Ukampis Jehová Diosaruw uka toqet mayampi mayisirakiyäta. Uka waynajja jakʼachasisin akham sitänwa: ‘Kunatï masür arumajj paski ukat pampachtʼita. Nayajj jumjamaw sum jakasiñ munarakta, Bibliat yatjjatañ munta’ sasa. Walikpun ukhamat ukham jan kuttʼaykatätti sasaw kusisiyäta, qhepatsti jupajj Bibliat yateqañ qalltäna” sasa.