Jisktʼäwinaka

◼ Mä yatiyiriru bautisasiñatak wakichtʼatäjjtawa sasin janïr siskasinjja, tantachäwir saratapampis ukat yatiyir mistutapampis ¿kuns uñachtʼayañapa?

Maynin bautisasiñ munatapajj wali khusapuniwa. Ukat janïr irpir chuymaninakan bautisasiñatakejj wakichtʼatäjjtawa sapjjañapkamajja, bautisasiñ munki ukajj kunsa Diosajj jupat suyi uk amuyañapawa. Ukat Diosan kamachinakaparjam sarnaqañ munatapsa uñachtʼayañaparakiwa.

Cristianonakjamajj tantachäwirojj sarañasapuniwa, ukhamajj bautisasiñ munki ukajj ukham lurañaparaki (Heb. 10:24, 25). Ukat tantachäwinkkasajj arstʼañaparakiwa. Diosan Arunakap Yatiyañatak Escuela satäkis ukan inas qellqayasirakchini, cheqas ukan qellqayasiñajj janiw bautisasiñatak mayiskapuniti.

Ukat cristianonakjamajj Diosan arunakap yatiyir sarasajj Jesusan arkiripwa tukuyapjjañasa, ukhamasti, bautisasiñ munirejj yatiyir sarañaparakiwa (Mat. 24:14; 28:19, 20). ¿Qawqha phajjsinakas janïr bautisaskasin maynejj yatiyir mistuñapa? Phajjsit phajjsitjam Diosan arunakap taqe chuyma yatiyañ munatap uñachtʼayañatakejj tiempow wakisi, ukhamajj yatiyirejj mistuskakiñapawa (Sal. 78:37). Ukampis janiw walja tiempo suyañapapunejj wakiskaniti; inas mä qawqha phajjsinakak wakischispa. ¿Qawqha horanakas phajjsin informañapa? Ukatakejj janiw mä mayitajj utjkiti. Ukhamajj irpir chuymaninakaw uka toqenakat sum amuytʼjjapjjañapa (Luc. 21:1-4).

Niyakejjay taqenis mayj mayjastanjja, kuna mayitanakatï bautisasiñatak utjki uk bautisasiñ munirejj phoqhaskit janicha, uk sum irpir chuymaninakajj (jan ukajj jukʼa irpir chuymaninakanïpki uka taman irpir chuymaninakan yanapirinakapajj) amuytʼapjjañapa. Ukhamajj bautisasiñ munirejj Jehová Diosan Qhanañchiripäñ munatapsa, markapampi tantachtʼasiñ wali askirjam uñjatapsa ukat yatiyir mistuñarus wali askit uñjatapsa uñachtʼayañaparakiwa. Ukat bautisasiñ munirejj janiw walja maranak bautisatäpki uka jilat kullakanakjam taqe kuns lurapkapunispati, uk irpir chuymaninakajj sum amuyapjje. Ukhamajj irpir chuymaninakatï bautisasiñatak jan wakichtʼatätap amuyapjjanejja, munasiñampiw kunatsa jan wakichtʼatäki uk amuytʼayapjjañapa, ukat ajay toqet kunanjjay yanaptʼañajj wakischini ukans yanaptʼapjjañaparakiwa.