Sojjta plaganakampi

Moisesampi Aaronampejj Diosan arunakapwa faraonar akham sasin yatiyapjjäna: ‘Markajar jan khitkätajja, tábano sat achusir chhichhillankhanakwa markamar apayanëjja’ sasa. Waranq waranqa achusir chhichhillankhanakaw egipcionakan utapar mantäna, qamirïpasa pobrëpasa taqenin utaparuw markpachan phoqantäna. Ukampis israelitanakajj jakapkäna uka Gosén markanjja, janiw mayas utjkänti. Uka pusïr plagasa, ukjjar jutkäna uka plaganakasa, egipcionakarukiw tʼaqesiyäna, israelitanakarojj janiw kamachkänsa. Ukatwa faraonajj Moisesar akham sasin ruwtʼäna: ‘Aka achusir chhichhillankhanak chhaqtayjjañapatak Jehová Diosar ruwtʼam, ukatsti sarjjapjjasmawa’ sasa. Diosajj chhaqtayjjäna ukhajja, faraonajj janiw khitañ munjjänti. ¿Faraonajj qhepat Diosar istʼjjpachaniti?

Jehová Diosajj akham sänwa: ‘Faraonatï markajar jan khitkanejja, egipcionakan animalanakapajj usuntasaw jiwarapjjani’ sasa. Qhepürojj ukhamapuniw Diosan arupajj phoqasïna, israelitanakan animalanakapakiw jan usuntapkänti. Ukhampachas jan istʼasir jaqëtap laykojj janiw istʼkänti.

Diosajj Moisesar akham sänwa: ‘Faraonan ukar sarasin qhell altor willtanim’ sasa. Willtäna ukhajja, qhellajj wal polvotatäna, taqe egipcionakaruw chʼamaktʼayarakïna. Jenqʼechir llaganakwa egipcionakarus animalanakaparus mistuyäna. Ukampis faraonajj wasitatwa israelitanakar khitañ jan munkänti.

Jehová Diosajj wasitatwa faraonar akham sañapatak Moisesar khitäna: ‘Jichhakamaw markajar jan khitktati, ukatwa qharürojj wal chhijchhintani’ sasa. Diosajj cheqapuniw chhijchhimpi, qʼejjo qʼejjompi, ninampi purintayäna. Janipuniw nayrajj ukham purintirïkänti, chhijchhejj alinak qʼal kʼutsüna. Gosén markansti janiw kunas paskänti. Ukatwa faraonajj akham säna: ‘Jehová Diosar ruwtʼapjjam ukhamat pasarjjañapataki, ukat sarjjapjjätawa’ sasa. Chhijchhis jallus pasarjjäna ukhajja, janiw khitañ munjjänti.

Ukatwa Moisesajj akham säna: ‘Jichhasti chhijchhejj jiltʼayki uka alinakjja, langostanakaw qʼal manqʼantapjjani’ sasa. Waranq waranqa langostanakaw jiltʼir alinak qʼal manqʼthapipjjäna. Ukatsti faraonajj akham sasaw Moisesar ruwtʼasïna: ‘Langostanak chhaqtayjjañapatak Jehová Diosar ruwtʼam’ sasa. Jehová Diosajj langostanak chhaqtayjjän ukhajja, faraonajj janirakikiw Diosar istʼañ munjjänti.

Jehová Diosajj Moisesar akham sänwa: ‘Amparam altor loqtam’ sasa. Ukatsti jankʼakiw wal chʼamakthapïna. Egipcionakajj kimsa urunakaw jan kuns uñjapkänti. Israelitanakan utanakapanakwa qhanajj utjäna.

Faraonajj Moisesar akham sänwa: ‘Jumasa markamasa sarjjapjjasmawa, animalanakamakwa akar jaytapjjäta’ sasa. Moisesajj sarakïnwa: ‘Diosar adorañatak sacrificiot loqtañatakiw animalanakaj apasipjjäjja’ sasa. Faraonajj wali colerataw jachʼat akham säna: ‘¡Saram akata! Mayamp uñjäma ukhajj jiwayämawa’ sasa.