Nayrïr kimsa plaganaka

Israelitanakajj esclavöpjjänwa, egipcionakajj chʼama trabajonak lurapjjañapatakiw obligapjjäna. Ukatwa Jehová Diosajj Moisesampir Aaronampirojj faraonar akham sanipjjañapatak khitäna: ‘Markajarojj wasaran nayar adorapjjañapatak khitam’ sasa. Faraonajj jachʼa jachʼa tukusaw akham säna: ‘Kunsay Jehová Diosajj saskpan, janiw importkituti. Janiw israelitanakar khitkäti’ sasa. Ukatsti jukʼamp chʼama trabajonak lurapjjañapatakiw faraonajj obligäna. Ukampis Jehová Diosaw istʼasiñapatak yatichañapäna. ¿Kunjams uk luräna? Tunka plaganakampiw Egipto markar castigäna. Jehová Diosajj Moisesar akham sänwa: ‘Faraonajj janiw istʼkituti. Qharür alwajj Nilo jawirankaskaniwa. Ukar sarasajj akham sätawa: markajar jan khitatamatwa aka jawirajj wilar tukuni sasa’. Ukatwa Moisesajj faraonan ukar saräna. Faraonajj Aaronaruw thujrupamp Nilo jawirar jawqʼatatir uñjäna, umajj wilaruw tuküna. Ukatsti jawirajj wal thujsjjäna, janiw umtʼañjamäjjänti, chawllanakas jiwarjjänwa. Ukhampachas faraonajj janiw israelitanakar khitañ munkänti.

Paqallqo urunakatjja, Diosajj wasitatwa Moisesarojj faraonar akham saniñapatak khitäna: ‘Markajar jan khitkäta ukhajja, Egiptorojj kʼayranakaw phoqantani’ sasa. Faraonajj janiw istʼkänti, ukatwa Aaronajj thujrup altor aytäna, markarusti kʼayranakaw phoqantäna. Utanakansa, manqʼa platonakansa, ikiñansa, ¡taqe cheqanwa utjäna! Faraonajj Moisesar akham sänwa: ‘Aka castigo tukusjjañapatak Jehová Diosar ruwtʼam, israelitanakar khitjjäwa’ sasa. Diosajj uka mayitar istʼänwa, egipcionakajj jiwat kʼayranakjja montón montón apthapipjjäna, wal thujsarakïna. Ukampis faraonajj janirakikiw israelitanakar khitañ munkänti.

Jehová Diosajj akham sasaw Moisesar säna: ‘Aaronajj thujrupamp oraqer jawqʼatatpan. Uka laqʼa polvojj jiskʼa chhichhillankhanakaruw tukuni’ sasa. Jawqʼatatäna ukhajja, cheqapuniw jiskʼa chhichhillankhanakajj taqe cheqan aqantäna. Yaqhep egipcionakajj faraonar akham sapjjänwa: ‘¡Aka castigojj Diosatwa juti!’ sasa. Ukhampachasa faraonajj janiw israelitanakar khitañ munkänti.