Faraonar uñjiriw sarapxi

MOISESAX Egiptor kuttʼxän ukhaxa Aarón jilaparuw milagronakat yatiyäna. Ukat kunapachatï uka milagronak Moisesampi Aaronampix israelitanakaru uñachtʼayapkäna ukhaxa, taqiniw Jehová Diosan khitataparjam katuqapxäna.

Ukatxa Moisesampi Aaronampix Faraón uñjiriw sarapxäna. Ukat akham sapxänwa: ‘Israelan Jehová Diosapax akham siwa: “Markaj khitma, wasaran kimsür nayar yupaychir sarapxañapataki” sasa’. Ukat Faraonax sänwa: ‘Janiw nayax Jehová Diosamar uñtʼkti. Janiw Israel markarux khitkiristi’ sasa.

‘Israelitanakax Jehová Diosar yupaychañ laykuw irnaqäwinakap jaytañ munapxi’ sasaw Faraonax wal colerasïna. Ukatwa jukʼampi irnaqayäna. Ukat israelitanakaxa Moisesatakiw parlxapxäna, jupan juchapatwa akham tʼaqhistanxa sasa, ukat Moisesax wal llakisïna. Ukampis Jehová Diosax jan llakisimti sänwa. ‘Nayaw Faraonan amparapat markaj irpsüxa’ sasa.

Moisesampi Aaronampixa Faraón ukarux wasitampiw sarapxäna. Ukatsti mä milagro lurapxäna. Aaronasti thujrupwa uraqir jaqnuqäna, uka thujrusti mä jachʼa asiruruw tuküna. Faraonan yatirinakapasti thujrunakap jaqnuqapxarakïnwa, ukat uka thujrunakapax asirunakaruw tukurakïna. Ukampis ¿uñjtati? Aaronan asirupaw yatirinakan asirupar manqʼthapiski. Uk uñjkasasa Faraonax janiw israelitanakar khitañxa munkänti.

Faraonan yatiñapataki tiempüxänwa. ¿Kunjamsa Jehová Diosax uk luräna? 10 jan waltʼäwinak Egipto markar apayäna.

Jan waltʼäwinak uñjxasaxa, Faraonax Moisesaruw jawsayäna, ‘aka jan waltʼäw apaqxma, israelitanakarux khitxäwa’ sasa. Ukampis jan waltʼäw apaqxän ukhaxa, janiw khitañ munxänti. 10 jan waltʼäwinak pasxäna ukhakiw sarxapxam sänxa.

¿Uka 10 jan waltʼäwinakat yattati? Janakipaskakim ukanwa kawkïrinakas uk uñjañäni.