Tunkïr plaga

Moisesajja, ‘janiw mayampsa jutjjäti’ sasaw faraonar säna. Ukatsti janïr sarkasajj akham sänwa: ‘Chika arumarojja, taqe jilïr wawanakaw Egipto markan jiwarapjjani. Faraonan jilïr wawapasa, esclavonakan jilïr wawanakapas jiwarapjjarakiniwa’ sasa.

Jehová Diosajj israelitanakar akham sänwa: ‘Mä suma manqʼa wakichasipjjam. Mä marani mä oveja, jan ukajj mä cabrito kharisipjjam. Ukatsti uka wilampiw punkunakamar jawsupjjäta. Uka aycha kankasajj jan levadurani tʼantʼamp manqʼapjjäta. Sarjjañatakejj listokïpjjañamawa, suma isthaptʼata, wiskhus suma uchtʼata. Jichha arumaw Egiptot salvapjjäma’ sasa. ¿Israelitanakajj kunja kusisitäpjjpachänsa uk amuyasmati?

Chika arumäjjäna ukhajja, Jehová Diosan angelapaw Egiptonkir taqe utanakar saräna. Kawkïr punkutï wilamp jan jawsutäkäna uka utanjja, jilïr wawanakajj jiwapjjänwa. Ukampis wilampi jawsutäkäna uka utanakanjja, angelajj janiw kunsa jilïr wawanakar lurkänti. Egiptonjja, wali qamiri familianakansa, pobre familianakansa taqeninwa mä wawajj jiwäna. Ukampis israelitanakanjja janiw mä wawas jiwkänti.

Faraonan jilïr wawapas jiwarakïnwa. Faraonajj janiw uk aguantirjamäjjänti, ukatwa Moisesampir Aaronampir akham säna: ‘¡Sarjjapjjam! ¡Sarjjapjjam, Diosamar adoranipjjam! ¡Animalanakamsa apasjjapjjam!’ sasa.

Uka arumajj wali phajjsi qhanänwa. Israelitanakajj familianakarjama tribunakarjam suma organizataw Egipto markat sarjjapjjäna. 600.000 chachanakampi, walja warminakampi wawanakampiw sarjjapjjäna. Jan israelitäpkäna ukanakatsa waljaniw Jehová Diosar adorirejj jupanakamp chikajj sarjjapjjarakïna. ¡Israelitanakajj librëjjapjjänwa!

Kunjamsa Jehová Diosajj israelitanakar salväna uk amtañatakejja, sapa maraw uka pachpa manqʼa wakichapjjañapäna. Ukajj Pascua sasin uñtʼatänwa.