¿Kusisit jakasiñajj utjaspati?

¡UKA arunakajj cheqäskapuniwa! Aka pachan jakañajj tʼaqhesiñanakampi ukat ‘jan waltʼañanakamp’ phoqhantatawa. Ukatwa, maynejj akham jisktʼasispa ¿jichhürunakan sum jakasiñajj utjaspati? sasa.

María sat warmit amuytʼañäni, jupajj kuns lurapunirïnwa; ukampis jichhajj 84 maranïsajj munaskchi ukhas janiw utat misturjamäjjeti. Ukhaman uñjasisajj ¿kunjamsa kusisit jakaspa?

¿Ukhaman uñjasiraktati? Inas akham sarakirïsta: ‘Trabajojansa sapüru ukak luraskta, janiw khitis chʼamachasitajj amuykiti’ sasa. Maysa toqet inas jakäwiman walja askinak jikjjatasksta, ukampis inas jutïr urunakat llakisisksta jan ukajj llakimp aynachtʼata, sapaki, jan ukasti familiaman jan waltʼäwinak utjchi. Ukat inas wali munat familiamat maynejj jiwjjchi. Cheqas ukaw André chachar pasatayna. Wali munat awkipaw usuntasin jiwjjatayna, ukaw juparojj wal aynachtʼayäna kunattejj awkipamp wali yatitänwa. Ukat akham sasaw amuyäna: ‘janiw khitis yanaptʼkitaspati’ sasa.

Kuna jan waltʼäwinakarusa jan ukajj llakinakarus saykatkchiñänejja, taqeniw kusisit jakasiñ muntanjja. Ukatakejj mä suma jaqen sarnaqäwipaw yanaptʼistani, jupajj Jesucristowa, jupan aka Oraqenkatapajj pä waranqa maranakaw pasawayjje. Cheqansa kuna jan waltʼäwinakan jikjjatasisasa sum jakasïna. Jiwasajj jupjam sarnaqañatak chʼamachasiñäni ukhajja, ukhamarakiw kusisit jakasirakiñäni.