Kusisit jakasiñatakejj Jesusaw thaki uñachtʼayistu

KUNJAMTÏ yatjjataniwayktanjja, Jesusajj kusisitaw jakasïna. Jiwasatï ukham jakasiñ munstanjja, sarnaqäwipat yateqasis ukat ewjjanakaparjam istʼas sarnaqañasawa.

Kunjamtï alay qellqatan siskejja, Jehová Diosajj ukham sarnaqañaswa muni. Jesusjam jakañajja, yatichäwinakaparjama ukat sarnaqäwinakaparjama sarnaqaña sañ muni. Ukhamtï lurañänejja, Jehová Diosampejj askit uñjatäñäni ukat kusisitarakiw jakasiñäni.

Jesusajj jupat yateqasiñasatakejj Wali Uñtʼat Arstʼäwipanwa walja aski yatichäwinak yatichawayistu. Ukanakat kimsa uñjañäni, ukat kunjamsa jakäwisan yanaptʼistaspa uk amuyarakiñäni.

YATICHÄWI: “Kusisiñanïpjjew khitinakatejj ajay toqen aynachtʼatäpjjatap amuyasipjje ukanakajja” (Mateo 5:3).

UKA YATICHÄWEJJ KUNJAMSA YANAPTʼISTASPA:

Jaqenakajj Diosat yatjjatañatak lurtʼatäpjjewa, uk Jesusajj amuytʼayaskäna. Ukatwa aka jisktʼanakat yatjjatañ munapuntanjja, ¿kunatsa akanktanjja? ¿Kunatsa tʼaqhesiñajj utjpacha? ¿Diosajj jiwasat llakispachati? ¿Jiwatat jakañajj utjaskakpachati? Ukanakat yatjjatasakiw kusisit jakassna. Cheqas taqe uka jisktʼanakan qhanañchäwip Diosan Arupanakwa jikjjatsna, uk Jesusajj sum yatïna. Ukatwa oracionapan akham säna: “Arunakamasti cheqawa” sasa (Juan 17:17). ¿Diosan Arupajj ajay toqet yanaptʼistaspati?

SARNAQÄWI:

Esa sat waynat parltʼañäni, jupajj wali uñtʼat grupon cantirïna ukat rock sat música cantasajj wali uñtʼatäjjasapänwa. Ukampis janiw kusisitäkanti. Jupajj akham siwa: “Grupojampiñ wals munkchiyätjja, kusisit jakasiñ munayäta” sasa. Tiempompejj Jehová Diosan mä qhanañchiriparuw uñtʼäna, ukat “walja jisktʼanakwa jupar jisktʼasiyäta. Ukat uka jisktʼanakarojja Bibliampipuniw qhanañchtʼitäna, ukatwa jupamp Bibliat yateqañ qalltawayta” sasaw Esa sat waynajj qhanañchi. Kuntï yateqkän ukajj chuymaparupuniw purtʼäna ukatwa Jehová Diosar jakäwip katuyasjjäna. Ukat jupajj saskakiwa: “Nayrajj kunayman jan waltʼäwinakaruw mitisiyäta, mä jan waltʼäw askichasajj yaqha jan waltʼäwinwa uñjasirakirïta. Jichhasti, jakäwijajj janiw ukhamäjjeti, kusisitaw jakasjjta” sasa.a

YATICHÄWI: “Kusisiñanïpjjew khitinakatejj khuyapayasirïpki ukanakajja” (Mateo 5:7).

UKA YATICHÄWEJJ KUNJAMSA YANAPTʼISTASPA:

Khuyaptʼayasiñajj mayninakar munasiñampi ukat sinttʼasiñamp uñjañawa, ukat ukarakiw mayninakar yanaptʼañatak chʼamañchtʼistu. Jesusajj pisinkirinakar khuyaptʼayirïnwa. Ukatwa jupajj walja jaqenakar jan yanap mayitas wali munasiñamp khuyaptʼayirïna (Mateo 14:14; 20:30-34). Jesusjamatï khuyaptʼayasirïñatak chʼamachasiñänejja, kusisitaw jakasiñäni (Hechos 20:35). Jiwasajj ukhamarakiw taqenir luratanakasampi arsutanakasamp khuyaptʼayasirïtas uñachtʼaysna. Ukampis inas maynejj akham jisktʼaschispa: “¿Cheqapunit mayninakar khuyaptʼayasajj kusisit jikjjatasiristjja?” sasa.

SARNAQÄWI:

Mariampit ukat Carlompit parltʼañäni, jupanakajj wali khuyaptʼayasir chacha warmipjjewa. Marian tatapajj viudöjjewa, ukat niyakejjay diabetes usunïchejja, janiw sartirjamäkiti ukatwa sum uñjañatakejj Mariampi Carlompejj utapar apasjjapjje. Walja arumanakarakiw jupamp chika jan suma ikis qhantatipjje ukat walja kutirakiw tatapan jan waltʼirjamätapat hospitalarus apapjje. Uk lurasajj wal qaripjje, ukampis kusisitaw jikjjatasipjje kunjamtï Jesusajj siskäna ukhama, kunattejj Marian tatapar yanaptʼañatakejj kunatï wakiski ukhampun lurasipki ukatwa kusisitäpjjaraki.

YATICHÄWI: ‘Kusisiñanïpjjew sumankirinakajja’ (Mateo 5:9).

UKA YATICHÄWEJJ KUNJAMSA YANAPTʼISTASPA:

‘Sumankirinaka’ sasin jaqokipatäki uka griego arojja, ‘sumankayirinaka’ sañwa muni. Ukajj ¿kunjamsa kusisit jakañatakejj yanaptʼistaspa? Kunapachatï sumankañ utjañapatak chʼamachasktan ukhajja, taqenimpiw sum apastanjja. Ukatwa aka ewjjtʼarjam sarnaqañasa: “Kawkikamatejj jumanakan chʼamanakamajj utjki, ukakamajj taqenimpis sumankapjjam” (Romanos 12:18). ‘Taqenimpi’ siski uka arojja, familiaranakasampi ukat khitinakatï jan jiwasjam iyawsäwinïpki ukanakamp sum apasiña sañ munaraki. Ukhamajj ‘taqenimp sumankas’ jakasiñäni ukhajja, kusisitaw jikjjatasirakiñäni.

SARNAQÄWI:

Nair sat warmitakejj familiapan sumankañ utjañapatakejj chʼamapunïnwa. Chachapan jaytjatapatjja, tunka phesqan maranakaw pasawayjjäna, ukat sapakiw wawanakapar uywawayi. Maynïr yoqapajj droganakamp qolljasirïnwa ukat sapakutiw coleramp atipayasisajj mamitaparu ukat kullakapar jan wali arunakamp toqenoqerïna. Nair sat warmejj jan waltʼäwinakans jikjjatasiwaykchejja, Bibliat yateqatapaw familiapan sumankañ utjañapatakejj chʼamañchtʼäna uk jupajj qhan amuyasïna. Jan wakiskirinakat chʼajjwaskañata ukat toqesiskañat sipansa, munasirïñataki ukat sumankayirïñatakiw wal chʼamachasiski (Efesios 4:31, 32). Ukham sumankayirïña yateqasajja, familiapampi ukat yaqha jaqenakampis wali sum apasjjaraki.

KUNA SUYTʼÄWIS UTJISTU

Jesusan yatichäwinakaparjamatï sarnaqañänejja, kusisitaw jakasiñäni. Ukampis cheqpach kusisitäñatakejj kuna suytʼäwis jutiritak utjistu uk yatiñaw wakisispa. Ukampis jichhürunakanjja, taqeniw usunttänjja, chuymankipsttänjja, ukat jiwaraktanjja ukanak yatisajj janiw kusisit jakasiñjamäkiti.

Ukampis suma yatiyäwinakaw utji. Jesusjam jakañatak chʼamachasiñäni ukhajja, Jehová Diosajj walja bendicionanakwa churistani. Diosajj niyaw mä suma machaq Oraqe churistani, ukanjj kunjamtï qalltan Jehová Diosajj amtkäna ukhamanwa aski jaqenakajj jakasipjjani: jan usuntasa ukat wiñayataki. Arupan akham siwa: “¡Akajjay, Diosajj jichhajj jaqenak taypinwa jaki! Jupanakampiw jakani, jupanakasti markapäniwa. Dios kipkarakiw jupanakampïni, jupanakan Diosaparakïniwa. Diosajj taqe jachanakapwa nayranakapatjja picharani, janirakiw jiwañas, jachañas utjkjjaniti, warariñasa ni usuyasiñasa. Taqe kunanakatï nayrajj utjkän ukanakajj tukusjjewa” sasa (Apocalipsis 21:3, 4).

Kunjamtï qalltan 84 maran María sat warmit yatjjataniwayktanjja, jupajj uka arunak phoqhasir wal uñjañ muni. ¿Jumasti? ¿Kunas cheqpach jakasiñajj uk Diosan Reinopan uñjañ munasmati? (1 Timoteo 6:19). Ukhamächi ukhajja, Jehová Diosan Qhanañchirinakapampiw kawkhantï jakaskta ukan parltʼasma, jan ukajj kawkhantï aka qellqatajj luraski ukharuw qellqtʼarakisma.b