“¿Kunatsa Diosajj jan yanaptʼkäna?”
“¿KUNATSA DIOSAJJ JAN YANAPTʼKÄNA? SASAW WAL JISKTʼASTA” (Auschwitz [Polonia] markan utjkäna uka campo de concentración visitkäna ukhaw papa Benedicto XVI [dieciséis] chachajj ukham säna).
¿JAN WALTʼÄWINAK PASIR UÑJASAJJ UKHAM JISKTʼASIRAKIRÏTATI? JAN WALTʼÄWIN UÑJASISAJJA, ¿“KUNATSA DIOSAJJ JAN YANAPTʼKPACHÏTU” SASIN SIRÏTATI?
Estados Unidos markan jakasiri Sheila sat warmejj Diosar creyiri familianwa jilsüna. Jupajj akham siwa: “‘Diosaw luririsajja’ sasaw jiskʼatpach Jupar creytjja. Ukampis janiw kunapachas Jupa jakʼan amuyaskayätti. Diosajj jayataksa uñjkitaspa ukhamwa amuyasirïta. ‘Diosajj janiw uñiskituti, janirakiw munaskituti’ sasaw sirïta”. ¿Kunatsa uka warmejj ukham amuypachäna? Jupajj akham saskakiwa: “Familiajajj kunayman jan waltʼäwinakanwa uñjasïna, Diosas janjamakiw yanaptʼapkitänti” sasa.
Jumajj Sheila warmjamarakiw taqe chʼamani Diosan utjatap creypachätajja, ukhamäkchisa inas akham jisktʼasta: “¿Jupajj nayat llakispachati?” sasa. Job chachajj ukhamarakiw jisktʼasïna, jupajj cheqaparjam sarnaqer jaqënwa, ‘Diosajj jachʼawa chʼamanïñansa, ukhamaraki yatiñansa’ sasaw confiyäna (Job 2:3; 9:4). Ukampis kunayman jan waltʼäwinakan uñjasisajja, janis jakañajj walëjjaspa ukhamwa amuyasïna, ukatwa Diosar akham jisktʼäna: “¿Kunataraki nayataki imantastasti? ¿Kunataraki nayar uñisirimarjama uñjistasti?” sasa (Job 13:24).
¿Bibliajj kamsisa? ¿Diosat tʼaqesiñanakat juchanïpacha? ¿Jaqenakat llakispachati? ¿Sapa maynirut uñtʼpachïstu, kunjamäsktansa uk yatpachati, jan waltʼäwinakan uñjasktan ukhas yanaptʼistaspati?
Aka yatichäwinakanjja, Diosan luratanakapasa Bibliasa kunjamsa Diosajj jiwasat llakisitap uñachtʼayistu ukwa uñjaskañäni (Romanos 1:20). Ukhamatwa jumajj taqe kun luriri Diosar jukʼamp uñtʼäta, Jupar jukʼamp uñtʼasasti, qhawqsa Jupajj munastam ukwa amuyarakïta (1 Juan 2:3; 1 Pedro 5:7).