Jehová Diosar servisajj wali sum jakasiwayta

FAMILIAJAMP JAKASITAJA

Nayajj 1934 maran nasirïtwa. Tataj mamajajj Suiza markat jutasaw Timmins jiskʼa markan quedasipjjäna, minan uka markajj Ontario (Canadá) markankiwa. 1939 maranakan mamajajj Yatiyañataki revista liyiñwa qalltäna, Jehová Diosan Testigonakapan tantachäwinakaparuw sararakïna. Jupajj nayampir sojjta jil kullakanakajampiruw irpapjjetäna. Jankʼakiw bautisasjjarakïna.

Tatajatakejj mamajan Testigöjjatapajj janiw walïkänti, ukampis mamajajj Jehová Diosaruw serviñ munäna. 1940 maranakan Canadá markan predicañajj jarkʼatäkchïnsa, Jehová Diosarojj jan jitheqtasaw serviskakïna. Tatajajj jan wali arunakampis toqerïkchïnjja, mamajajj munasiñampi respetompipuniw jupar uñjirïna. Mamajan yateqaskañ sarnaqatapaw nayarus jil kullakanakajarus Testigöñatak yanaptʼapjjetäna. Ukampis tiempompejja, tatajajj janiw nayrjamäjjänti, munasiñampiw familiajar uñj-jjäna.

SAPÜRUNJAMAW DIOSAR SIRVJJAYÄTA

1950 maranjja, Nueva York markan “Aumento de la Teocracia” sat asamblearuw sarayäta. Oraqpachankir jilat kullakanakar uñtʼasasa, Escuela de Galaad ukar saririnakar entrevistanak istʼasas jukʼampiw Jehová Diosar serviñ munayäta. Ukatwa nayrat sipans Diosar sapürunjam serviñ wal munayäta. Utar purjjasajj jankʼakiw precursor regularat serviñatak mä solicitud qellqayäta. Ukampis Canadá markankir sucursalajj nayraqat bautisasiñajatakiw chʼamañchtʼitäna. Ukatwa 1 de octubre de 1950 maran bautisasiyäta. Mä phajjsi pasatat precursor regularäjjayätwa, Kapuskasing sat jiskʼa markaruw khitapjjarakitäna, ukajj utajat wali jayankänwa.

1951 maranjja, francés aru parlirinakarojj Quebec provinciar jakir sarañatakiw sucursalajj invitapjjetäna. Ukan Testigonakajj jukʼanikïnwa. Niyakejjay francés ukat inglés arunak yatchiyätjja, uka invitacionar iyaw sayätwa, Rouyn sat lugararuw khitapjjarakitäna. Janiw khitirus ukan uñtʼkayätti. Kunjamtï qalltan siskayätjja, dirección mayakiw utjitäna. Ukampis sumakiw ukar puriyäta. Marcel jilatampejj wali suma amigöjjapjjayätwa, kusisitaw Quebec markan mä pusi maranak jakayäta, qheparojj precursor especialäjjarakiyätwa.

GALAAD ESCUELAMPI YAQHANAK SUYTʼATAJAMPI

Quebec markankaskayäta ukhajja, South Lansing (Nueva York) markan Escuela de Galaad clase 26 ukaruw invitapjjetäna, ukajj wali kusiskañänwa. 12 de febrero de 1956 maranwa graduasiyäta, ukat África Occidental uksaruw khitapjjetäna, jichhajj Ghana satäjjewa.b Ukampis janïr uksar viajkasajja, documentonak qʼomachañatakejj Canadá markaruw kuttʼayäta, “mä qhawqha semananakakïniwa” sasaw kuttʼayäta.

Ukampis paqallqo phajjsinakaw documentonakaj laykojj Toronto markan quedasiyäta. Uka phajjsinakajj Cripps matrimoniow utapar alojtʼapjjetäna, jupanakajj Sheila sat mä phuchanïpjjänwa. Jupamp nayampejj munasjjapjjayätwa, ukampis casarasiñäni sañ amtaskayäta ukhaw viajiñatak visa churjjapjjetäna. Sheilamp Diosar orasisajj asignacionaj phoqer sarañajatakiw amtapjjayäta. Ukampis carta toqejj parlasipkakiyätwa, ukhamat casarasipjjeristti janicha uk amtañataki. Janiw uk amtañajj faciläkänti, ukampis tiempompejj sum amtapjjatajwa amuyapjjayäta.

Trenata, carganakan barcota, avionat mä phajjsi viajisajja, Ghana markan Accra sat capitalaparuw puriyäta. Ukarojj superintendente de dristritot serviñajatakiw asignapjjetäna. Ukatakejj taqpach Ghana mark viajiñajänwa, Costa de Marfil ukat Togolandia markanakarus sarañajarakïnwa, jichhajj Togo satäjjewa. Sucursalan churat mä autompiw viajirïta. Jilapartejj sapakiw viajirïta, visitañajj kusiskañarakïnwa.

Seman tukuyanakajj asamblea de circuito ukanakanwa yanapayäta. Janiw Salones de Asambleas ukanakajj utjapkitänti. Ukatwa jilat kullakanakajj chʼiwtʼayasiñatakejj bambú sat cañanakampi palmera laphinakampejj mä techo lurapjjerïna. Refrigeradoranak jan utjipanjja, asamblear jutirinakar manqʼayañatakejj listok animalanak suyayapjjerïta, ukat wakiski ukarjamaw jiwarayapjjeri.

Awisanakajj laruñanakjamaw uka asambleanakan pasiri. Mä kutejja, Herb Jenningsc sat misionero jilatajj mä discurso arstʼaskäna, ukhamaruw mä torillojj escaptʼaniri. Plataforma nayräjjaruw tʼijuntanirakiri. Herb jilatajj ukharukiw parlañ suytʼiri, torillojj janirakiw kawksar sarañs puedirïkiti. Ukampis pusi jilatanakaw katuntasajj kawkjankkäntï ukar kuttʼayañatak apapjjeri, tantachasirinakajj wal tʼajjllirapjjarakiri.

Uka semananakan jan asambleäkäna uka urunakanjja, uka jakʼankir jiskʼa markanakan La Sociedad del Nuevo Mundo en acción sat video uñtayirïta. Uk uñtayañatakejj pä posteru jan ukajj pä qoqanakaruw mä janqʼo sábana chinkatirïta. ¡Markachirinakarojj wal uka videojj gustäna! Jilapartejj ukhapuniw mä video uñtapjjatayna. Jaqenakajj bautisasipki uka cheq uñtasajj kusisiñat wal tʼajjllirapjjeri. Uka videojj waljaniruw oraqpachankir mayachtʼat mä markakïtas amuyapjjañapatak yanaptʼawayi.

Pä maranak África toqenkasajja, 1958 maran Nueva York markan apaskäna uka asamblea internacionalaruw sarayäta. ¡Sheilamp jikisiñajj wali kusiskañänwa! Jupajj Quebec markat ukar jutäna, precursora especialat ukan serviskarakïna. Jupampejj carta toqew parlasipkayäta, ukampis niyak ukan jikisisajj “casarasjjañäni” sasaw sayäta, jupajj “iyaw” sarakitänwa. Knorrd jilatarojj “¿Sheila kullakajj Galaad escuelar saraspati, ukhamat África toqen nayamp chik serviñapataki?” sasaw mä cartan jisktʼayäta. Jilatajj “iyaw” sanirakitänwa. Ukhamatwa Sheilajj Ghana markar purinïna. 3 de octubre de 1959 maranwa Accra markan casarasipjjayäta. Kunjamsa Jehová Diosar nayrar uchapjjatajat jupajj bendisipjjetäna ukwa amuyapjjarakiyäta.

CAMERÚN MARKAN SERVIPJJTA

1961 maran Camerún markaruw khitapjjetäna. Ukan mä machaq sucursal uttʼayasiñapatak yanaptʼañajatakiw mayipjjetäna, wali ocupatäjjayätwa. Siervo de sucursaljam ukhak uttʼayatäsajj walja yateqañaw faltaskitäna. Ukat 1965 maran Sheila esposajajj usurëjjänwa. Qhana arunjja, wawanïpjjañaj amuyañajj janiw faciläkänti. Ukampis wawanëjjañäniwa sasin wali kusisit Canadá markar kuttʼañ amtasipkayäta ukhajja, mä jan waliw pasapjjetäna.

Wawajaw janïr naskasin jiwjjäna. Doctorajj wawamajj yoqall wawänwa sasaw yatiyapjjetäna. 50 maranakas pasjjchejja, jichhakamaw uk amtasisipkta. Uk pasipan wali llakitäpkchiyätsa, wal gustapkitäna uka asignacionampejj uka markan phoqasipkakiyätwa.

Camerún markankir jilat kullakanakajj politicar jan mitisipjjatapat walja kutiw arknaqatäpjjerïna. Uka markan presidente ajlliñampïsipkäna ukhajj jukʼamp jan waltʼäwinakanwa uñjasipjjeri. 13 de mayo de 1970 maran kuntï wal ajjsarapkayäta ukaw pasäna: Testigonakajj predicañatak jarkʼatäjjapjjänwa. Machaq sucursalajj gobiernon katuntatäjjänwa, phesqa phajjsinakakiw ukankasipkayäta. Taqe misioneronakarojj mä semananak uka markat alisnukupjjetäna. Jilat kullakanakar jaytañajj chʼamakïnwa, kuna laykutejj wal jupanakar munasipjjayäta, kunatï jupanakar paskaspa ukats wal llakisipjjayäta.

Sojjta phajjsinakaw Francia markankir sucursalan quedasipjjayäta. Ukanwa Camerún markankir jilat kullakanakarojj kuntï necesitapkäna ukanakamp yanaptʼaskayäta. Uka maran diciembre phajjsin Nigeria markankir sucursalaruw asignapjjetäna, uka sucursalaw Camerún markan predicación sarayäna. Uka markankir jilat kullakanakajj wali munasiñampiw katoqtʼapjjetäna, walja maranakaw ukan kusisit servipjjarakiyäta.

MÄ AMTAR PURIÑAJJ CHʼAMAKÏNWA

1973 maran mä amtar puriñajj chʼamakïnwa. Sheila esposajajj wali usutäjjänwa. Nueva York markan mä asambleankasipkayäta ukhajja, jachtʼasisaw akham sitäna: “Janiw puedjjtti, qaritakëjjtwa, usutakëjjaraktwa” sasa. África Occidental uksa toqen 14 jila maranakaw nayamp chikajj sirvjjäna. Diosar ukham servitapat wali kusisitäyätwa, ukampis mä qhawqha cambionak lurañaw wakisïna. Uka toqet parlakiptʼasasa Jehová Diosar orasisas Canadá markar kuttʼañwa amtapjjayäta, ukanwa jupajj jukʼat jukʼat waliptjjaspäna. Misionerot serviñ jaytañasa Diosar sapürunjam serviñ jaytañas nanakatak wali chʼamapunïnwa.

Canadá markar purjjapjjayäta ukhajja, Toronto markat alay toqen mä amigojaw autonak aljañatak trabajor katoqetäna. Mä departamento alquilasipjjayäta, merqʼe mueblenak alasipjjayäta, ukhamatwa jan kuna manunïsajj ukar jakir sarjjapjjayäta. Kunatï wakiski ukampik jakañwa amtapjjayäta, ukhamat mä urojj wasitat Diosar sapürunjam sirvjjañataki. Mä jukʼa tiempot cheqapuniw ukajj pasäna.

Norval (Ontario) markan mä Salón de Asambleas ukaw lurasiskäna, ukanwa sabadonakajj voluntariot trabajiñ qalltayäta. Mä qhawqha tiempotjja, superintendente de Salón de Asambleas ukham serviñatakiw mayipjjetäna. Niyakejjay esposajajj waliptaskchïnjja, uka asignacionarojj iyaw sapjjayätwa. Ukatwa junio de 1974 maran ukar jakir sarjjapjjayäta. ¡Diosar wasitat ukham servisajj wali kusisitäpjjayätwa!

Esposajajj jukʼampiw waliptaskäna. Pä maranakat circuitot serviñatakiw iyaw sapjjayäta. Ukatakejj Canadá markankir wali chʼuchʼu Manitoba provinciar viajipjjañajänwa. Ukampis ukankir jilat kullakanakajj wali munasirïpjjänwa. Kawkjansay sirvchiñänejja, Jehová Diosar serviskakiñaw jukʼamp importantejja, ukwa yateqapjjayäta.

MÄ WAKISKIR EWJJTʼA KATOQAYÄTA

Walja maranak circuitot servisajja, 1978 maran Canadá markankir Betelan serviñatakiw invitapjjetäna. Ukat mä jukʼa tiempotjja, chuym ustʼaykchitän ukhas wali wakiskir mä ewjjtʼa churapjjetäna. Montreal markan mä reunión especialaw apasïna, ukan francés arut mä hora chikataniw mä discurso arstʼañajäna. Ukampis arstʼatajajj janiw istʼirinakan chuymapar purtʼkänti ni suma amuyañjamäkänsa, ukatwa Departamento de Servicio ukankir mä jilatajj ewjjtʼitäna. Cheqpachans amuyasiñajänwa, ukampis ewjjtʼitäna ukhakiw jan suma arstʼirïtaj amuyasiyäta. Janirakiw uka ewjjtʼap sum katoqaskayätti. Jilatampejj janiw sum parltʼasipkayätti, nayar chʼamañchtʼañat sipans discursojan pantjasitajaks thaqkaspa ukhamwa amuyasiyäta. Uka ewjjtʼat sum amuytʼañat sipansa, kunjamsa ewjjtʼitäna, kunsa jilatat amuyayäta ukarukiw chuym uchayäta.

Mä qhawqha urunakatjja, Comité de Sucursalankir mä jilataw uka toqet parltʼitäna. Uka ewjjtʼa jan sum katoqasitajwa reconosiyäta, arrepentisirakiyätwa. Ukatsti ewjjtʼkitäna uka jilatampiw parlayäta. Jupajj munasiñampiw perdonitäna. Ukhaman uñjasitajajj humildëñajj qhawqha wakiskirisa ukwa yatichitäna, janipuniw uk armkäti (Prov. 16:18). Walja kutiw uka toqet Jehová Diosar orasiyäta, jichhat uksarojj ewjjtʼatajj katoqtʼasipunïwa sasaw amtayäta.

Canadá markankir Betelan 40 jila maranakaw sirvjjta, 1985 marat aksaruw Comité de Sucursalan yanaptʼaskarakta. Febrero de 2021 maranwa munat esposajajj jiwañan iktʼawayjje, jupatjamajj llakisiskaktwa. Ukhamarus usutakirakïtwa. Ukampis Jehová Diosar servisajj wali ocupatätwa, kusisitarakïtwa, ‘urunakajj kunjamsa jankʼak pasaski uk janiw amuykti’ (Ecl. 5:20). Jakäwijan kunayman jan walinakans uñjasiwaykstjja, jukʼamp kusiskañ experiencianakaw utjaraki. Jehová Diosar nayrar uchañasa, 70 maranak jupar serviñas wali kusiskañapuniwa. Wayna jilatanakasa tawaq kullakanakas Jehová Diosar nayrar uchapjjañapatakiw orasta. Jupanakajj Jehová Diosar serviñ nayrar uchasajj ukhamarakiw wali kusisita sum jakasipjjaspa.