¿Chiqapuniti Diosax sum jakasiñas munpacha? sat folletomp yatiyapxañäni
1. ¿Kuna qillqatampis noviembre phaxsin yatiyaskañäni, ukat kuna amtampisa?
1 Khä 1992 maranxa, “Portadores de luz” sat kimsa uru jachʼa tantachäwinx mä machaq folletow mistuwayäna, ¿uk amtasktati? Uka folleton pʼiqiñchäwipax akänwa: ¿Chiqapuniti Diosax sum jakasiñas munpacha? (Español aruta). Jïsa, uka folletompiw noviembre phaxsin yatiyaskañäni, ukax wali wakiskiripunïniwa. ¿Kunjamsa uka folletox jaqinakar yanaptʼani? Niya taqiniwa khitinakatï jan cristianüpki ukanakatx Bibliat jan sum yatipkiti, ukampisa folleto liytʼasaw kuna yatichäwinakanis Bibliax uk jukʼamppach amuytʼapxani.
2. ¿Kunjamsa uka folletompi yatiysna?
2 Uka folletomp yatiyañataki. Inas akham sischisma: “Kunsa aka arunakat amuyta uk yatiñ munirista [2 Timoteo 3:16 liytʼarapïta]. Taqi khitinakampitï parlkta uka jaqinakaxa kuntï akan siski ukax chiqapuniskiw sasaw sapxi, ukampis yaqhipaxa mä suma librokïkaspas ukham amuyapxi. ¿Kuns jumax Bibliat amuyta? [Kamsanis uk istʼäta.] Kunarusay iyaw saskstan ukampis sapa mayni Bibliat yatxatañax wali wakiskiripuniwa [9 janat 4 tʼaqa liytʼäta]. Ukat aka folleto liytʼaskakïta ukhaxa, Bibliax kuna tuqits parli ukat kunsa yatichi ukwa amuytʼäta” sasa.
3. Kawkhantï yatiyktan uka chiqantï jaqinakax jan cristianüpkchi ukhaxa, ¿kunjamsa yatiyaraksna?
3 Jan cristianüpki uka jaqinakatï yatiyktan uka chiqan walj utjani ukhaxa, akham sasaw yatiyaraksna: “Kuntï aka Qullan Qillqatan siski uka arunakat kunsa amuyta uk yatiñ munirista [Salmo 37:11 liytʼäta]. Uka profecía phuqasxani ukhaxa, ¿kunjamänis aka uraqix uk amuyasmati? [Kamsanis uk istʼäta.] Liytʼawayktan uka arunakaxa, kunjamsa jaqinakax Bibliat mä suytʼäwi ukat chuymachtʼäwi katuqapxaspa ukwa uñachtʼayistu” sasa. Ukatxa, 27 janat 22 tʼaqa liytʼarapïta ukat aka folleto jaytawayäma sasaw sarakisma.
4. ¿Kunjamsa folletompix Bibliat yatichañ qalltsna?
4 Bibliat yatichañ qalltañataki. Wasitat kuttʼañäni ukhaxa, kuna tuqits parlawayta uka tuqitwa parltʼañama ukat ukarjamaw maya jan ukax pä tʼaqanak folletot yatxattʼapxasma, ukatxa jana tukuyxan utjki uka jiktʼanakwa jisktʼañama. Jumatï Kunsa yatichi sat libromp mäki yatichañ munsta ukhaxa, folletotwa 31 janat 18 tʼaqa liytʼarapïta. Ukat libro churasaxa, kawkïr yatichäwitsa yatxatañ munasma sasaw jisktʼañama, ukat maya jan ukax pä tʼaqwa uka yatichäwit yatxatapxasma. Noviembre phaxsin uka folletompi yatiyañatak taqini chʼamachassna ukhaxa, ¡wali askipunïspawa!