¿Kunjamsa Diosan apayanit suma yatiyäwinaka sat folletompejj Bibliat yatichsna?
Bibliat yatichañataki ukat jukʼamp yateqañ munapki ukanakar kuttʼañatakiw machaq folletojj yanaptʼistani
1. Bibliat yatichañataki ukat jukʼamp yateqañ munapki ukanakar kuttʼañatakejja, ¿kuna machaq folletsa “Chuymas jarkʼaqasipjjañäni” sat jachʼa tantachäwin katoqawaytan?
1 “Chuymas jarkʼaqasipjjañäni” sat jachʼa tantachäwinwa, Diosan apayanit suma yatiyäwinaka sat folleto wali kusisit katoqawaytanjja. Uka folletow Bibliat yatichañataki ukat jukʼamp yateqañ munapki ukanakar kuttʼañatak yanaptʼistani. Machaq folletojja, ¿Kunsa Diosax jiwasanakaru mayistu? sat follet kikpawa ukat uka lantirakiwa. Yatichäwinakapasa janiw jachʼäpkiti, ukhamajj uta punkunakwa utanir Bibliat yatichañ qalltsna. Maysa toqetjja, ¿Kunsa Diosax jiwasanakaru mayistu? sat folletojja, mä cristianojj kunjamsa sarnaqañapa ukwa qhanañchäna, ukampis yaqhep yateqerinakatakejj ukanakar jaysañajj chʼamakïnwa. Jichhajj machaq folletojja, Biblian jikjjataski uka suma yatiyäwinakwa jukʼamp qhanañchi (Hech. 15:35).
2. ¿Kunatsa Diosan apayanit suma yatiyäwinaka sat folleto apsusiñ amtasiwayi?
2 ¿Kunatsa uka machaq folleto apsusiñ amtasiwayi? Walja jilat kullakanakaw jaqenakaru cheqa yatichäwinak yatichañataki, jan chʼamtʼasa amuyapjjañapataki mä qellqat apsusiñap mayiwayapjje, ukhamat Kunsa yatichi sat librompi yatichañ qalltañataki, cheqas uka librompiw jaqenakar Bibliat yatichtanjja. Yaqhepanakajja, janiw mä librot yateqañ munapkiti, ukampis “aka folletompiw Bibliat yateqañäni” satajj iyawsapjjakispawa. Ukatjja, mä folleto walja arunakar jaqokipañajj janiw sinti chʼamäkiti.
3. Bibliat yatjjatañataki apsusiwayki uka qellqatanakampi ukat machaq folletompejja, ¿kunansa mayjäpjje?
3 ¿Kunjam lurtʼatasa? Bibliat yatjjatañataki apsusiwayki uka qellqatanakatjja, niya taqpachaw jaqenakan liytʼapjjañapataki ukat amuyapjjañapatak wakichtʼasiwayi, cheqas jan khitins yanaptʼataw sum amuyapjjaspa. Ukampis machaq folletojja, maynin yanaptʼapampi Bibliat yateqañatak lurtʼatawa. Ukhamajj uka folletomp yatiykañäni ukhajja, maya jan ukajj pä tʼaqanak sum yatjjatañaw utanimp wakisispa. Folleton tʼaqanakapajj janiw jachʼäpkiti, ukhamajj uta punkunakana, jan ukajj aljasisipki uka cheqanakan yatjjatañajj janiw chʼamäkaniti. Cheqansa, nayrïr yatichäwit yatichañ qalltañajj askiwa, ukampis machaq folletompejj kawkïr yatichäwitsa qalltasikispawa.
4. ¿Kunjamsa machaq folletojj pachpa Bibliat yatichañatak yanaptʼistu?
4 Niya taqpach qellqatanakasanjja, jisktʼanakan qhanañchäwinakapajj taqʼanakapanwa jikjjatasi. Ukampis machaq folletonjja, jisktʼanakan qhanañchäwinakapajj Biblianwa jikjjatasi. Cheqansa, kunsa Bibliajj yatichi ukwa jaqenakajj yatiñ munapjje, janiw kuntï qellqatanakasajj siski uk yatiñ munapkiti. Ukhamajj Biblian jiskʼa tʼaqanakapajj janiw folleton qellqattʼatäkiti. Pachpa Bibliatwa ukanakajj liytʼasiñapa. Ukhamatwa yateqerinakajj kuntï yateqapki ukajj Diosan jutatap amuyapjjani (Isa. 54:13).
5. ¿Kunatsa yatichirejj sum wakichtʼasiñapa?
5 Machaq folletojj janiw Biblian jiskʼa tʼaqanakap taqpachpun qhanañchkiti, ¿kunatsa? Yateqerejj jisktʼanak lurañapataki ukat yatichirejj kunjamtï yatichañ yatki ukhamarjam sum yatichañapatak waktʼayatawa. Ukhamajj sum wakichtʼasiñaw wakisi. Ukampis ak amtañasapuniwa: janiw jiwasak parlañasäkiti, cheqansa, Bibliat yatichañ wal muntajja, ukampis Biblian mä jiskʼa tʼaqapajj kamsañs muni uk pachpa yateqerin qhanañchañapaw jukʼamp askejja. Sum amuytʼasisa jisktʼañäni ukhajja, mä jiskʼa tʼaqajj kamsañs muni uk amuyañapatakiw yateqerir yanaptʼañäni (Hech. 17:2, NM).
6. ¿Kunjamsa machaq folletompejja, 1) Diosaru ukat Bibliar jan creyiri jaqenakar yatiysna? 2) utat uta sarasa yatiysna? 3) cheqak Bibliat yatichañ qalltsna? 4) Bibliat jukʼamp yateqañ munapki ukanakar kutʼssna?
6 Janisay uka phajjsejj uka qellqatamp yatiykchiñänejja, Bibliat yatichañataki qellqatanakjja kunapachas jaytaksnawa, machaq folletompejj ukhamarakïniwa. Walja jilat kullakanakaw machaq folletompejj cheqak Bibliat yatichañ qalltapjjani. Ukat kunjamtï kimsa uru jachʼa tantachäwin qhanañchasiwaykejja, “aka folletojj revisitanak lurañatakejj mä suma yanaptʼapuniwa” (5 janat 7 janakam jikjjataski uka recuadronak uñjjatʼma).
7. ¿Kunjamsa machaq folletompejj Bibliat yatichañ qalltsna?
7 ¿Kunjamsa Bibliat yatichañ qalltsna? Chʼiyartʼayat jisktʼa liytʼañasawa ukat kuntï tʼaqajj siski ukwa liytʼañasaraki. Ukatjja, “Liytʼäta” siski uka jiskʼa tʼaqanak liytʼañasarakiwa. Ukatjja, uka jiskʼa tʼaqanakajj kamsañs muni uk amuytʼañapatakejja, wali amuyumpiw utanir jisktʼsna. Janïr yaqha tʼaqar paskasajja, yateqerejj cheqapunit amuyawayi janicha uk yatiñatakejja, mayampiw chʼiyartʼayat jisktʼa liytʼarapsna, ukat “¿qhanañchtʼasmati?” sasaw jisktʼsna. Maynir yatichañ qalltañäni ukhajja, chʼiyartʼayat mä jisktʼa qhanañchañakiw wakisispa. Inas tiempompejj mä yatichäwi tukuyañkam yatichsna.
8. Bibliat liytʼañ munañäni ukhajja, ¿kamsañasäspasa, ukat kunatsa?
8 “Liytʼäta” siski uka jiskʼa tʼaqanakajja, chʼiyartʼayat jisktʼanakaruw qhanañchi. Bibliat liytʼañ munañäni ukhajja, janiw “apóstol Pablojj akham qellqäna”, jan ukajj “Jeremías profetajj akham sänwa” sañajj askïkaspati. Jaqenakan amuyunakapaksa liytʼasksna ukhamwa utanejj amuyaspa. Antisas “Diosan Arupajj akham siwa”, jan ukajj “Bibliajj akham qhanañchi” sañaw jukʼamp askïspa.
9. Folletompi yatichkasajja, ¿Biblian jiskʼa tʼaqanakapjja taqpachat liytʼañasäspa?
9 ¿“Liytʼäta” siski uka jiskʼa tʼaqanakakit liytʼasiñapa, jan ukajj yaqha jiskʼa tʼaqanakajj uñstki ukanak liytʼasirakispacha? Bibliat apstʼat jiskʼa tʼaqanakajj mä amtampiw sapa yatichäwin uchasiwayi, janiw aleq ukhamatak uchatäpkiti. Ukhamajj ukanak liytʼañajj wal yanaptʼistaspa. Ukampis awisajj taqpach liyiñatakejj janiw tiempojj utjkaspati, jan ukajj awisajj yateqerejj janiw taqpach liytʼañ munkaspati, jan ukasti janiw sum liytʼasiñ yatkaspati. Ukhamïpanjja, “Liytʼäta” siski uka jiskʼa tʼaqanakakwa liytʼañasäspa.
10. ¿Kunapachas Kunsa yatichi sat librompi yatichañ qalltsna?
10 ¿Kunapachas Kunsa yatichi sat librompi yatichañ qalltsna? Jiwasatï Diosan apayanit suma yatiyäwinaka sat folletompi maynir walja kuti Bibliat yatichawaystan ukhajja, Kunsa yatichi sat librompi yatichañ qalltjjsnawa, jan ukajj folleto tukuyañkamaw yatichaskaksna. Kunapachas yaqha qellqatampi yatichañ qalltapjjaspa uk yatiñatakejj sapa jilat kullakaw sum amuytʼasjjañapa. Kunsa yatichi sat librompi yatichañ qalltasajja, ¿nayrïr yatichäwipatpunti qalltañasäspa? Janiw “ukhamapunïñapaw” sisksnati. Jaqenakajj mayj mayjäpjjewa, ukhamajj ukarjamaw amuytʼasjjañasa. Ukampis kuntï folleton yateqawayki, uka pachpa yatichäwinaka libron sumpach yateqañajj yateqeritakejj jukʼamp askïniwa.
11. ¿Kunatsa machaq folleto sum apnaqañatak chʼamachasiñasäspa?
11 Aka ñanqha pachanjja suma yatiyäwinakajj janiw añch istʼasjjeti, ukampis jiwasajj suma yatiyäwinakwa jaqenakar yatiytanjja, ¡Diosan Reinopajj apnaqjjewa, uka reinow mä suma machaq Oraqe uttʼayani, uka Oraqenjja taqe kunas cheqapapunïniwa! (Mat. 24:14; 2 Ped. 3:13.) Uka suma yatiyäwinak istʼirinakajja, akham sapjjaniwa: “¡Kunja kusiskañas qollu patanakanjam jutaskir uñjañajja, khititejj mä suma yatiyäwi apanki ukan taktʼatanakapajja, jupajj sumankañ yatiyäwinaka apani, suma kusiskañ yatiyäwinak apani, qhespiyasiñ yatiyäwinak apani, Sión markarusti siwa: ‘Diosamajj reyiwa’ sasa” (Isa. 52:7). Bibliat wal yateqañ munapki uka jaqenakaru Diosan apayanit suma yatiyäwinakapa yatiyañatakejja, machaq folleto sum apnaqañatak chʼamachasiñäni.
[13 janan recuadropa]
Kawkhantï jaqenakajj Diosaru ukat Bibliaru jan creyipki uka cheqanakana:
● Yaqhep cheqanakanjja, jaqenakajj “Diosata” jan ukajj “Bibliat” parlir istʼapjje ukhajja, janiw istʼañ munjjapjjeti. Ukhamajj kuntï jaqenakar llakisiyki uka toqenakatwa uka cheqanakan parltʼsna. Sañäni, mä suma gobiernonïñata, kunas familianakar yanaptʼaspa ukat kunas jutïr urunakan pasani uka toqenakata. Ukhamajj “Diosajj utjapuniw” sasajj kunatsa sistan ukat kunatsa Bibliar atinisiñasäspa uka toqenakat walja kut parljjañäni ukhaw Diosan apayanit suma yatiyäwinaka sat folletompi inas yatichañ qalltsna.
[14 janan recuadropa]
Utat uta sarasa:
● “Kunsa Diosajj jutïritak jaqenakatakejj amti uk yatiñajj janiw chʼamäkiti, uka toqet parliriw jutta. Kamsasmasa, ¿Diosajj tʼaqhesiñanak chhaqtaypachäniti? [Kamsanis uk istʼäta.] Kawkhansa Bibliajj uka jisktʼar qhanañchi ukwa aka folletojj uñachtʼayaski. [Folleto utanir churäta. 1 yatichäwin nayrïr tʼaqapa ukat Jeremías 29:11 qellqat liytʼäta.] Ukhamajj ¿‘Diosajj mä jutïrin sum jakasiñas muni’ sasin amuyañajj walikïskaspati? [Kamsanis uk istʼäta.] Munasma ukhajj aka folleto jaytirismawa. Ukat mayanwa, ¿kunjamsa Diosajj tʼaqhesiñanak chhaqtayani?, siski uka jisktʼarojj kunjamsa Bibliajj qhanañchi, ukwa payïr tʼaqat yatjjatasajj yateqañäni.” Utanitï tiemponiskäni ukhajja, folleton payïr tʼaqapa ukat Biblian kimsa jiskʼa tʼaqanakapwa liytʼasma. Parlañ tukuyasajja, mayan kuttʼañataki ukat payïr jisktʼat yateqañatakiw utanimp amtäta.
● “Walja jaqenakaw Diosat mayisiñ yatipjje, yämas jan waltʼäwinakan jikjjatasipjje ukhajj jukʼampiwa. ¿Jumajj mayisirakirïtati? [Kamsanis uk istʼäta.] ¿Diosajj taqe mayisïwinakat istʼpacha, jan ukajj janikicha? [Kamsanis uk istʼäta.] Kunjamsa Bibliajj uka jisktʼanakar qhanañchi ukwa aka folletojj uñachtʼayaski. [Folleto utanir churäta. Ukat 12 yatichäwita, nayrïr tʼaqapa ukat “Liytʼäta” siski uka jiskʼa tʼaqanakwa liytʼäta.] Diosajj mayisïwinakas istʼatap yatiñajj ¿janit wali kusiskañäki? Ukampis Diosan munañaparjam mayisiñatakejja, Jupar sum uñtʼañasawa. [2 yatichäwi thaqtäta ukat pʼeqeñchäwinakap uñjjattʼayäta.] Munasma ukhajj aka folleto jaytirismawa, ukat mayanwa kunjamsa Bibliajj aka jisktʼanakar qhanañchi uk yatjjatsna.”
● “‘Aka pachajj kunarukis purtʼasini’ sasaw walja jaqenakajj llakisipjje. Amuyumarjamajja, ¿jan waltʼäwinakajj chhaqtpachäniti? [Kamsanis uk istʼäta.] Mä suma suytʼäwinïñasatakiw Bibliajj suma yatiyäwinak apani, uk yatjjatasajj walja jaqenakaw wal muspharapjje. Kunjamsa Bibliajj yaqhep jisktʼanakar qhanañchi ukwa aka folletojj uñachtʼayaski.” Folleto utanir churäta, ukat qhepäjj tapan jikjjataski uka jisktʼanak uñjjattʼayasajja, ‘kawknïritsa yateqañ munasma’ sasaw sasma. Ukat uka jisktʼar qhanañchir yatichäw thaqhasajja, kunjamsa Bibliat yatjjataspa ukwa uñachtʼayäta. Parlañ tukuyasajja, mayan kuttʼañataki ukat uka yatichäwin payïr jisktʼat yateqañatakiw utanimp amtäta.
[15 janan recuadropa]
Cheqak Bibliat yatichañ yantʼam:
● “Kunjamsa Bibliat yateqasma uk uñachtʼayañatakiw mä rat jutaskayäta. Aka folletojj 15 yatichäwinakaniwa ukat kunjamsa Bibliajj wali wakiskir jisktʼanakar qhanañchi ukwa uñachtʼayaski. [Folleton tatapa ukat qhepäjj tapap uñjjattʼayäta.] ‘Bibliajj kamspachasa’ sasin ¿jisktʼasirïtati? [Kamsanis uk istʼäta.] Folleton yatichäwinakapat amuyañajj janiw chʼamäkiti, uk uñachtʼayañ munirisma. [3 yatichäwita, kimsïr jisktʼan nayrïr tʼaqapa ukat Apocalipsis 21:4, 5 qellqat liytʼäta. Wakisispa ukhajja, payïr tʼaqa ukat “Liytʼäta” siski uka jiskʼa tʼaqanakwa liytʼarakisma.] Munasma ukhajj aka folleto jaytirismawa. May kutiks Bibliat yateqasma ukhajj wali askipunïspawa. ¡Yateqaskakismawa! Aka mayanjja, folleton nayrïr yatichäwipatwa yateqsna, kunjamtï uñjtajja mä janankakiwa.”
[15 janan recuadropa]
Jukʼamp yateqañ munapki ukanakar kuttʼasa:
● “Walik mayamp jikistanjja. Mä folleto apanirapsma, kunjamsa Bibliajj walja wakiskir jisktʼanakar qhanañchi ukwa aka folletojj uñachtʼayaski. [Folleto utanir churäta ukat qhepäjj tapap uñjjattʼañapatak mayïta.] Aka yatichäwinakatjja, ¿kawknïris yateqañ munasma? [Kamsanis uk istʼäta. Ukat ajlliwayki uka yatichäw thaqtäta.] Kunjamsa Bibliajj uka jisktʼar qhanañchi ukwa aka folletompi uñachtʼayañ munirisma.” Kunjamsa Bibliat yateqaspa ukwa maya, jan ukajj pä tʼaqanakat yatjjatasa ukat “Liytʼäta” siski uka jiskʼa tʼaqanak liytʼasajj uñachtʼayasma. ¡Bibliat yatichañ qalltjjätawa! Folleto utanir jaytasajja, mayan kuttʼañatakiw amtapjjäta. Mä yatichäw tukuyasajja, kawknïr yatichäwtï utanejj ajllisini ukwa yateqapjjasma, jan ukajj qalltatpachwa yateqañ qalltapjjarakisma.