Suma yatiyäwinaka sat folletompi yatichapjjañäni
1. Diosan apayanit suma yatiyäwinaka sat folletojj ¿kunjam lurtʼatasa?
1 Kunjamtï julio phajjsin Diosan Apnaqäwipat Yatiyañataki sat qellqatan qhanañchaskänjja, Diosan apayanit suma yatiyäwinaka sat folletojj jaqenakar yatichañatakejj wali askiwa. Uka folleton tʼaqanakaparojja, Biblian jiskʼa tʼaqanakapajj janiw copiasiwaykiti, ukhamat jaqenakajj pachpa Bibliapat liytʼapjjañapataki. Jilapart Bibliat apstʼat qellqatanakasajja, mayni pachpa yatjjatañapataki waktʼayatawa, ukampis uka folletojja, mä yatichirin yanaptʼapampi yatjjatañatak lurtʼatawa. Ukhamasti, uka folleto jaqenakar jaytkañäni ukhajja, kunjamsa uka folletot yatjjatasi uk qhanañchtʼañasa, ukhamat Biblian suma yatiyäwinakapajj kunja sumasa uk amuyañapataki (Mat. 13:44).
2. Nayrïr kuti visitkasajja, ¿kunjamsa uka folletompi yatiysna?
2 Nayrïr kuti visitkasa. Akham sasaw qalltsna: “Waljaniw kunas akapachampejj pasani sasin jisktʼasipjje, ¿jumajj kamsarakismasa? [Kamsanis uk istʼäta.] Biblianjja, walja suma yatiyäwinakaw jikjjatasi, ukajj wal chuymachtʼiristam, ukanakat yaqhepajj akanakawa” sasa. Utanirojj folleto churäta, ukatjja kuna toqet yatjjatañsa munani uk folleton qhepa janapat ajlltʼasiyäta. Ukjjarojja, kunjamsa uka folletot yatjjatasi ukwa nayrïr tʼaqaparjam qhanañchtʼäta. Jan ukajja, jumaw uka folleton yatichäwiparjam mä wakiskir jisktʼa lurasma, ukatjja kunjamsa uka folletojj jisktʼapar Bibliampi qhanañchi ukwa uñachtʼayarakisma. Yaqhep yatiyirinakajja, Internetan jw.org sat cheqan uka toqet parlir mä video uñtayapjjaraki.
3. ¿Kunjamsa Suma yatiyäwinaka sat folletompejj jaqenakar Bibliat yatichsna?
3 Kunjamsa uka folletompi Bibliat yatichsna. 1) Chʼiyartʼayatäki uka jisktʼanak liytʼäta, ukhamat kuna toqetsa parlaski uk utanejj amuyañapataki. 2) Tʼaqa liytʼäta. 3) “Liytʼäta” siski uka jiskʼa tʼaqanak utanitak liytʼarapïta, ukatjja kunjamsa Bibliajj uka jisktʼar qhanañchi uk amuyañapatakiw yanaptʼäta. 4) Walja tʼaqanakajj mä jisktʼanikïchi ukhajja, 2 ukat 3 ewjjtʼanakarjamaw wasitat lurarakïta. Uka jisktʼarjam qhanañchir mä video utjchi, ukampis janïra uk uñtayksta ukhajja, ukwa uñtayarakisma. 5) Ukjjarojja, jisktʼar qhanañchañapatakiw mayïta, ukhamat amuyiti janicha uk yatiñataki.
4. ¿Kunas aka folleto wali sum apnaqañat yanaptʼiristam?
4 Aka folleto suma uñtʼañataki chʼamachasim. Wakiskani ukhajj uka folletompi yatiyam. Janïr yatichañ qalltkasajja, kunjamsa yateqeriru Biblian jiskʼa tʼaqanakapampi amuytʼayasma uka toqet lupʼiñama (Pro. 15:28; Hech. 17:2, 3). Uka folletompi sapa kuti jaqenakar yatichäta ukhajja, wali sum apnaqañsa, yatichañsa yatjjäta, ukatjja inas uka folletompi kunatï cheqäki uk jaqenakar yatichañ wal munjjarakchïta.