Marzo 1 urutwa Jesusan jiwäwip amtañatakejj invitación lakiraskañäni
1. ¿Kunürutsa Jesusan jiwäwip amtañatakejj invitación lakiraskañäni ukat kunatsa aka marajj walja urunak lakiraskañänejja?
1 Jesusan jiwäwipajja, marzo 26 uru saraqataruw amtasiskani. Ukhamajj uk amtañatakejja, marzo 1 urutwa invitación lakiraskañäni. Cheqas pasïr maranakat sipanjja, walja urunakaw lakiraskañäni. Ukhamajja, tamasantï territoriopajj jachʼächi ukhajja, walja jaqenakar invittʼañatakejj tiempojj utjistaniwa.
2. ¿Kunjamsa territoriosan taqenir invitacionanak lakiraskañäni ukat kunjamsa invitación apstʼasiñasa?
2 ¿Kunjam waktʼayatänisa? Irpir chuymaninakaw kunjamsa taqenir purtʼañatakejj irnaqtʼasini ukat jan utapankapki ukanakarus kunjamsa invitación jaytsna uk qhanañchasipkani. Taqe utanakar invitación jaytjjstan ukat jiltʼaskchistu ukhajja, kawkhantï walja jaqenak utjki ukawjanakanwa lakiraraksna. Ukat yatiyañ toqet irpir chuyman jilataw kawkhantï Bibliat apstʼat qellatanak uchaski ukawjan invitacionanak apstʼasiñatakejj uskuñapa. Ukat kawkhankanisa, kuna horanisa ukajj invitacionan qelltʼatañaparakiwa. Ukhamat yatiyir jilat kullakanakajj qhawqhtï munapkani uk apstʼasipjjañapataki. Jilatajj janirakiw mä pita taqpach uskuñapäkiti. Ukat yatiyir jilat kullakanakajj semanan qhawqhsa lakirapjjaspa ukakwa aptʼasipjjañaparaki.
3. Invitacionanak lakirkasajja, ¿kunsa amtañasapuni?
3 Kunjamsa invitación chursna. Jukʼa arunakampikiw parljaytʼañasa ukhamatwa walja jaqenakaru invittʼañäni. Qhep qhepa jananwa kunjamsa jaqenakar invitación chursna ukajj qhanañchasiski. Ukat utanitï, sum istʼistani jan ukajj jisktʼistani ukhajja, jaypachaw parltʼaraksna. Ukat seman tukuyanakasa invitacionamp chikjja, wakischini ukhajj revistanak jayrataksnawa. Marzo 2 uru saraqatarojja, Bibliat yatichañ qalltañat sipansa invitación lakirañatakiw chʼamachasiñäni.
4. ¿Kunatsa invitacionanak taqe chuyma kusisita lakirañasa?
4 Jesusan jiwäwip amtañatak walja jaqenak jutapjjaspa uk muntanjja. Ukat arstʼäwinjja, kunas Jesusan cheqpach luräwipajja ukaw qhanañchasiskani (1 Cor. 11:26). Ukat Jesusan jiwäwipajj kunjamsa yanaptʼistu uksa yatjjatarakiñäniwa (Rom. 6:23). Ukat kunatsa Jesusat amtañasajj wali wakiskiri uksa amtayarakistaniwa (Juan 17:3). Ukhamajj taqeni invitacionanak taqe chuyma kusisita lakirapjjañäni.