Mä wakiskir invitacionaw lakirasini
1. Jachʼa tantachäwinakatakejj ¿qawqha seman faltkipansa invitacionanak lakiraskañäni?
1 Wal chʼamachasisa ukat walja qollqe gastasa mä suma manqʼa amigonakasataki jan ukajj familiarasatak phaytʼaraptan ukhajja, wali kusisitaw invittanjja. Ukhamarakiw 2014 maran apaskani uka kimsa uru jachʼa tantachäwitakisa ukat walja markanakat jachʼa tantachäwi utjki ukatakis ajay toqet suma manqʼanak wakichtʼañatakejj wal chʼamachasiwayapjje. Uka jachʼa tantachäwir jutapjjañapatakejj kimsa semananak faltkipanwa invitacionanak lakiraskañäni, ukham invittʼañajj wali askipunïniwa. Ukhamajj invitacionanak taqe chuyma lakirañatakejj ¿kunas yanaptʼistani?
2. Invitacionanak taqe chuyma lakirañatakejj ¿kunas yanaptʼistani?
2 Jachʼa tantachäwinakan kunjamsa Jehová Diosajj sapa maynir yanaptʼistu ukanakat lupʼiñäni ukhajja, invitacionanak taqe chuymaw lakirañäni (Isa. 65:13, 14). Invitación lakirasajj sapa maraw walja askinak jikjjatawaytanjja. Invitkañäni ukanakatjja, yaqhepajj tantachäwir sarapjjaniwa. Ukhamajj jachʼa tantachäwir waljanis sarapjjchini janisa, chʼamachasitasajj Jehová Diosaruw jachʼañchani ukat khuyapayasiñapas qhanaw amuyasirakini (Sal. 145:3, 7; Apo. 22:17).
3. ¿Kunjamsa invitacionanak lakiraskañäni?
3 Sapa tamanjja, irpir chuymani jilatanakaw kunjamatsa invitacionanak jukʼamp lakirasispa uk amtjjapjjañapa. Walja jaqenak utjki ukhanakana jan ukajj jan utapan jikjjatktan ukanakar invitación lakirasiniti janicha uksa, jupanakaw amtjjapjjañapa. Seman tukuyanakajja, wakiskani ukhajj revistanakamp chikaw invitacionanak jaytañasa. Uka phajjsintï nayrïr sábado urun Bibliat yatichañ qalltañ waktʼchi ukhajja, invitación lakirañatakiw jukʼamp chʼamachasiñasa. Jehová Diosajj ajay toqet chʼamañchtʼatäñasatak manqʼa wakicharapistu, ukar walja jaqenak jutapjjañapataki taqe chuyma invitación lakiratasatjja, kusisitaw jikjjatasiñäni.