Mä wakiskir invitacionaw lakirasini
1. Kimsa uru jachʼa tantachäwitakejj ¿qawqha seman faltkipansa invitacionanak lakiraskañäni?
1 Wal chʼamachasisa, walja qollqe gastasa mä suma manqʼa amigonakasataki, jan ukajj familiarasatak phaytʼaraptan ukhajja, wali kusisitaw invitʼtanjja. Kimsa uru jachʼa tantachäwitakejj ukhamarakiw ajay toqet suma manqʼanak wakichtʼañatakejj wal chʼamachasiwayapjje. Uka jachʼa tantachäwitakejj kimsa semana faltkipanwa invitacionanak lakiraskañäni. Ukhamajj invitacionanak taqe chuyma lakirañatakejj ¿kunas yanaptʼistani?
2. Invitacionanak taqe chuyma lakirañatakejj ¿kunas yanaptʼistani?
2 Jachʼa tantachäwinakan kunjamsa Jehová Diosajj sapa maynir yanaptʼistu ukanakat lupʼiñänejja, invitacionanak taqe chuymaw lakirañäni (Isa. 65:13, 14). Invitación lakirasajj sapa maraw walja askinak jikjjatawaytanjja (“Askinakaw jikjjatasi” siski uka recuadro uñjjattʼäta). Invitkañäni ukanakatjja, yaqhepajj tantachäwir sarapjjaspawa. Ukhamajj jachʼa tantachäwir waljanis sarapjjchini janisa, chʼamachasitasajj Jehová Diosaruw jachʼañchani ukat khuyapayasiñapas qhanaw amuyasirakini (Sal. 145:3, 7; Apo. 22:17).
3. ¿Kunjamsa invitacionanak lakiraskañäni?
3 Sapa tamanjja, irpir chuymaninakaw kunjamatsa invitacionanak jukʼamp lakirasispa uk amtjjapjjañapa. Walja jaqenak utjki ukhanakana jan ukajj jan utapan jikjjatktan ukanakar invitación lakirasiniti janicha uksa, jupanakaw amtjjapjjañapa. Seman tukuyanakajja, wakiskani ukhajj revistanakamp chikaw invitación jaytañasa. Jehová Diosajj ajay toqet chʼamañchtʼatäñatak manqʼa wakicharapistu, ukar walja jaqenak jutapjjañapataki taqe chuyma invitación lakiratasatjja, kusisitaw jikjjatasiñäni.