Experienciani yatiyirinakat yateqapjjañäni
Tamasankir experienciani yatiyir jilat kullakanakarojj wal munastanjja. Yaqhepajj walja maranakaw Jehová Diosat jan jitheqtas servisipki. Yaqhepasti, inas jichhakiraki yatiyañ sum yateqawayapjjchi. Ukampis kunjamsa aka qhepa urunakan Jesusajj yatiyañan tamar yanaptʼaski, arkiripar tukupjjañapatakis yanaptʼaski, uk jupanakajj uñjawayapjjewa (Mat. 28:19, 20). Niyakejjay walja maranak yatiyasipkchejja, Diosan ‘jachʼa chʼamapwa’ katoqawayapjje, ukan yanaptʼapampiw yantʼanakarus atipjapjje (2 Cor. 4:7). Jupanakajj kuntï yatipki ukjja, taqe chuymaw mayninakar yatichapjje. Ukhamajja, jupanakat waljanakwa yateqsna (Sal. 71:18). ¿Kunjamsa uk lursna?
Yatiykasa. Jichhak yatiyir misturinakasa jan ukajj yatiyañan jan experiencianinakasa, sum yatiyañatakejj yanaptʼwa munapjje. Experienciani yatiyirinakajj kunjamsa yatiyapjje uk uñjasaw jupanakajj yateqasipjjaspa. (Yatiyañataki febrero 15, 2015 revistan “¿Kunjamsa kusisit chuymampi yatiyaskaksna?” siski uka yatichäwin kimsïr tʼaqapan “Jichhak yatiyir mistupki ukanakaruw yanaptʼañama” siski uka jiskʼa pʼeqeñchäwip uñjjattʼäta.) ¿Kunsa experienciani yatiyirinakat yateqawayta?
Experienciani mä yatiyirirojj jumampi yatiyañapatak ¿invittʼasmati? Yatiyiritï usutächi ukhajja, inas awisajj utapan Bibliat yateqerimampi yateqchisma. Yatichañ tukuyasajja, experienciani yatiyiriruw ewjjtʼanaka ukat yanaptʼanak mayisma.
Jupanakampïñatak tiemp apstʼasim. Experienciani yatiyirinakar uñtʼañatakiw chʼamachasiñama. Familjam Diosar yupaychañatakiw entrevistañatak invittʼasma. Ukanwa ¿kunjamatsa Diosan markapar uñtʼatayna? ¿Kuna bendicionanaksa katoqatayna? Markapan ¿kunjamsa Diosan Reinopat yatiyañajj wal jiljjattatayna? ¿Kunjamsa Jehová Diosar servisajj kusisiñ jikjjatatayna? Ukanak jisktʼasma. Usutächi ukhajja, utapanwa familjamajj Diosar yupaychapjjasma.
Jupanakajj qawqhtï yanaptʼirjamäki ukakwa yanaptʼistaspa, ukjja amuyañamawa. Experienciani yatiyirinakajj sapa mayniw yatiyañ toqet mayj mayja yatipjje (Rom. 12:6-8). Yaqhepanakajj chuymanëjjasajja, inas jiwasanakar jan sum yanaptʼirjamäjjapjjchiti. Ukampis experiencianakapajja, Jehová Diosar jan jitheqtas loqtañatakiw yanaptʼistaspa.