Kunjamatsa machaq yatiyirinakarux yanaptʼsna
1. ¿Utat uta yatiyañ qalltawaykayäta ukhax kunjamakis jikxatasiyäta?
1 ¿Utat uta yatiyañ qalltawaykayäta uk amtasisktatï? Wal axsarpachäyätaxa. Ukampis Bibliat yatichirimasa jan ukax yaqha jilat kullakanakas jumar yanaptʼapxatamatxa, ¡wal kusispachäyätaxa! Jichhax Diosan Apnaqäwipat yatiyañatakix wali experiencianïxtawa; ukat machaq yatiyirinakar yatichañatakis wakichtʼatäxaraktawa.
2. ¿Machaq yatiyirinakax kunsa yatiqapxañapa?
2 Machaq yatiyirinakax kunjamatsa utanimpix parlañ qalltapxaspa, utat uta yatiyasax Bibliampi yatiyapxaspa, Bibliat yatiqañ munirinakan utanakapar wasitat yatichir kuttʼapxaspa ukat Bibliat yatichxapxaspa ukanak yatiqapxañapawa. Janiw ukakïkiti jan ukasti callenakana, negocionakana ukat yaqha chiqanakan yatiyañsa yatiqapxañaparakiwa. ¿Kunjamatsa jupanakar yanaptʼasma? Jumaw nayraqat sum yatiyañatakix chʼamachasiñama ukat jupanakan sum yatiyapxañapatakis iwxtʼañamarakiwa.
3. ¿Kunjamatsa machaq yatiyirinakarux yanaptʼsna?
3 Jumatwa yatiqasipxaspa. Kunjamsa yatiyapxañapäna ukwa Jesusax arkirinakapar uñachtʼayäna (Luc. 8:1; 1 Ped. 2:21). Mä machaq yatiyirimpi yatiyir sarktan ukhaxa, jupan yatiqasiñapatakix janiw chʼama arunakampix parlañasäkiti, Bibliat apstʼat qillqatanakan utjki ukanakatwa ukham parlañatakix wakichtʼassna. Yatiykasaxa, jupan istʼañapatakix jumaw nayraqat maya jan ukax pä utan parltʼañama, ukatsti parltʼatajax amuyañjamäskiti sasaw machaq yatiyirirux jisktʼañama. Ukhamatwa kunatsa jilat kullakanakamp yatiyañax wali aski uk amuyani, ukat yatiyxäni ukhax kuna iwxtʼanaktï churkäta ukarus istʼarakiniwa.
4. ¿Machaq yatiyirix parlañ tuktʼayxani ukxarux kunjamatsa yanaptʼsna?
4 Iwxtʼarakismawa. Kunjamsa arkirinakapax yatiyapxañapäna, Jesusax uks yaticharakïnwa (Mat. 10:5-14). Jumax ukham yanaptʼarakismawa. Kunapachatï machaq yatiyirix yatiykani ukhax sum istʼañamawa. Parlañ tukuyxani ukhaxa, inas jan sum qhanañchtʼatap amuysta, ukampis kuna tuqitxay sum parltʼawaychi uk wali sum parltʼtaxa sañamawa. Janïr iwxtʼkasaxa; mayni utanimpix kunjamsa parltʼi ukarjamaw yanaptʼañama. Inas parltʼañ axsaraskchïna. Ak amtañamapuniwa, taqiniw mayj mayja yatiyañ yattanxa, ukampis taqiniw suma yatiyäwinak chiqapar yatiyaskaraktanxa (1 Cor. 12:4-7).
5. ¿Machaq yatiyirir yanaptʼañatakix kun lurañasäspasa?
5 Awisax machaq yatiyir pachpaw sum yatiyañatakix iwxtʼanak mayïtamxa. Janitï maykätamxa, jumaw wali amuyumpi nayraqat yanaptʼañama. ¿Kunjamats yanaptʼasma? Yaqhip yatxattʼat yatiyirinakax akham sasaw jisktʼañ yatipxi: “¿Yanaptʼirismatï?”, jan ukax “¿Ukham parltʼasax kunjamsa jikxatasta?” sasa. Jan ukasti akham sarakismawa: “Yatiyañ qalltkayäta ukhax nätakix chʼamänwa ..., ukampis akaw yanaptʼawayitu...” sasa. Awisax Razonamiento librot uñakiptʼapxañamaw wakisirakispa. Ukampis janiw walja tuqinakat yatichañamäkiti, jan ukasti kuna tuqitsa parltʼani ukakwa parltʼapxañama.
6. Diosan arunakap sum yatiyañatakixa, ¿kunjamatsa maynit maynikam yanaptʼassna?
6 Maynit maynikamaw yanaptʼassna. Timoteox Diosan arunakap yatiyañatakix wali yatxattʼatänwa, ukampis sum yatichañatakisa nayrar sartañatakis chʼamachasiskakim sasaw Pablox iwxtʼäna (1 Tim. 4:13, 15). Yatiyañ qalltkayäta ukhat aksarux inas walja maranak pasawayxchi, ukampis jukʼamp sum yatiyaskakiñamatakix chʼamachasiskakiñamawa. Khitinakampitï yatiyir mistkta ukanakat yatiqasiñamawa, janis jumjam experiencianïpki ukanakats yatiqasirakismawa. Ukat mayni jilat kullakanakarus munasiñamp yanaptʼañatakis jankʼakïñamawa, yämas machaq yatiyirinakarux jukʼamp yanaptʼañama, ukhamatwa Diosan arunakapat sum yatiyapxarakini (Pro. 27:17).