KUNJAMSA UÑISISIÑAR ATIPJASISPA

4 | Diosan yanaptʼap thaqam

Bibliajj akham siwa:

“Espíritu santon achupajj akanakawa: munasiña, kusisiña, sumankaña, paciencianïña, suma chuymanïña, khuyapayasirïña, Diosar confiyaña, llampʼu chuymanïña, munañasampi jan apnaqayasiña” (GÁLATAS 5:22, 23).

¿Ukajj kamsañsa muni?

Uñisiñarojja Diosan yanaptʼapampiw atipjsna. Espíritu santow suma chuymanïñatakejj yanaptʼistaspa. Ukhamajja, uñisiñaru jiwas pachpa atipjañat sipansa, Diosan yanaptʼapwa thaqañasa. Ukham lurañäni ukhajja, apóstol Pabljamarakiw akham sañäni: “Khititejj nayar chʼam churkitu ukan chʼamapampejja taqe kunatakiw nayajj chʼamanïta” sasa (Filipenses 4:13). “Jehová Diosaw yanaptʼitani” sasaw sarakiñäni (Salmo 121:2).

Akwa lurasma:

“Nayrajj wali qhoru jaqëyatwa. […] Jehová Diosaw suma chuyman jaqëñajatakejj yanaptʼawayitu” (WALDO).

Jehová Diosaruw espíritu santop taqe chuyma mayisiñama. Suma jaqëñatakejja, juparuw yanaptʼa mayiñamaraki (Lucas 11:13). Uñisiñar atipjañatakejj munasiña, sumankaña, paciencianïña, munañasampi jan apnaqayasiña ukanakaw yanaptʼistaspa. Ukhamajja, ukanak toqetwa Bibliat yatjjatañama, ukham jaqëñatakiw sapüru chʼamachasiñamaraki. Khitinakatï ukham jaqëñatak chʼamachasisipki ukanakampiw chikachasiñamaraki. Ukhamatwa ‘munasiñaru suma luräwinak lurañaru’ chʼamañchapjjätam (Hebreos 10:24).

Experiencia (WALDO)

Uñisiñarusa nuwasiñarusa atipjawayiwa

Waldo chachajj uñisiri familianwa jilsuwayäna. Jupajj akham siwa: “Callenakan nuwasipki ukanjja, droga aljirinakampiw nuwasirïta [...]. Mä urojja, mä pandillajj jan ajjsaras jaqenak jiwayir mä chacharuw nayar jiwayañapatak pagapjjatayna, cuchillompis khartʼkchitänjja, jupat qhesptwa” sasa.

Esposapajj Jehová Diosan Testigonakapampi Bibliat yatjjatañ qalltäna ukajj janiw Waldo chacharojj gustkänti. Jupajj akham siwa: “Uk uñjasajj wal jupanakatak colerirïta ukat jan wali arunakampiw arnaqjjerïta. Ukampis jupanakajj suma arumpiw parljjayapjjeritu” sasa.

Qhepatjja, Waldojj Bibliat yatjjatañ qalltjjarakïnwa. Jupajj akham siwa: “Yateqatarjam lurañajj chʼamakïnwa. Kunjam jaqëktï uk janjakiw apanukkäti sasaw amuyasiyäta” sasa. Ukampis kuntï Bibliat yateqkäna ukaw cambiañatak yanaptʼäna.

Waldojj akham siwa: “Alejandro jilataw Bibliat yatichitäna, jupajj Gálatas 5:22, 23 qellqat liytʼam sasaw situ [...]. Ukham jaqëñatakejj Diosan qollan ajayuparuw confiyañama, janiw chʼamamaruk confiyañamäkiti sasaw sitäna. Uka arunakaw yanaptʼawayitu” sasa.

Diosan yanaptʼapampiw Waldojj uñisisiñar atipjawayi. Jupajj akham siwa: “Familiaranakajasa ukat nayra amigonakajas jan qhoru jaqëjatajj uñjasajj wal muspharapjje” sasa. Jupajj akham saskakiwa: “Nayrajj wali qhoru jaqëyatwa. […] Jehová Diosaw suma chuyman jaqëñajatakejj yanaptʼawayitu” sasa.