‘Khitirus servipjjäta uk jichhürpach ajllisipjjam’

1. Cheqpach kusisit jakasiñatakejj ¿kunsa lurañasa, ukat kunatsa uk lurañasa? (Isaías 48:17, 18).

ALAJJPACHANKIR Awkisajj wal munasistu, ukatwa jichhürunsa jutïrinsa kusisit jakasiñas muni (Ecl. 3:12, 13). Taqeniw mä kuns sum lurañ yattanjja, Jehová Diosaw ukham lurawayistu. Ukampis janiw jiwas pachpa apnaqasiñasatakisa, ni kunatï walïki jan walïkaraki uk jiwas pachpa amtirsa lurawaykistuti (Ecl. 8:9; Jer. 10:23). Jehová Diosajj ak sum yati, cheqpach kusisit jakasiñasatakejja, juparuw serviñasa istʼañasaraki (Isaías 48:17, 18 liytʼäta).

2. ¿Kun amuyañassa Supayajj muni, ukat kunsa Jehová Diosajj luräna?

² Jaqenakajj jupanak pachpa apnaqasiñ puedipkaspasa, kusisitäñatakejj janis Jehová Diosan yanaptʼapajj wakiskaspa ukhamwa Supayajj amuyayañ munistu (Gén. 3:4, 5). Kʼarïtap uñachtʼayañatakejja, Jehová Diosajj jupanak pachpa apnaqasipjjañapatakiw jaqenakar mä tiempo jaytawayi. Jaqenakamp apnaqatäsajj kuna jan walinakansa uñjastan uk taqeniw uñjtanjja. Biblianjja Jehová Diosar serviri walja chachanakampita warminakampitwa parli, jupanakajj wali kusisitaw Diosar servipjjäna, jukʼampis Jesucristow wali kusisit servïna. Nayraqatjja, kunatsa Jesusajj Jehová Diosar serviñ amtäna ukwa uñjañäni. Ukjjarojja, kunatsa alajjpachankir Awkisan adoratäñapajj wakisi ukwa yatjjatarakiñäni. Tukuyañatakejj kunatsa Jehová Diosar serviñ ajlliwaytan ukanakwa amtarakiñäni.

¿KUNATSA JESUSAJJ DIOSAR SERVIÑ AMTÄNA?

3. ¿Kunsa Supayajj Jesusar churañ munäna, ukat kun lurañsa Jesusajj amtäna?

³ Jesusajj aka oraqenkäna ukhajja, khitirus servini ukwa ajlliñapäna. Bautisaskäna uka qhepatjja, jumatï mä kutiki adoritäta ukhajj aka oraqpachankir taqe markanakwa churäma sasaw Supayajj Jesusar säna. Ukampis Jesusajj akham sänwa: “¡Saram akat Supaya! Qellqatarakiwa: ‘Jehová Diosamaruw adorañama, jupa saparukiw serviñama’” sasa (Mat. 4:8-10). ¿Kunatsa Jesusajj Diosar serviñ amtäna? Uk mä qhawqhanak yatjjatañäni.

4, 5. ¿Kuna razonanakatsa Jesusajj Jehová Diosar serviñ ajllïna?

⁴ Jesusajj jan kun suyasaw Awkipar taqe chuym munasi, ukatwa jupar serviñ amtäna (Juan 14:31). Janiw ukakïkiti, jupatakejj Diosar serviñajj wakisirakiwa (Juan 8:28, 29; Apoc. 4:11). Jehová Diosaw jakañ vida churistu, jupajj wali wajjtʼasiriwa, confiykañarakiwa (Sal. 33:4; 36:9; Sant. 1:17). Jehová Diosajj kunatï cheqaki ukpunwa Jesusar sirïna, kunanakatï Jesusan utjkäna ukanaks Awkipaw churäna (Juan 1:14). Ukampis Supayajja, taqe jaqenakaruw jiwañar aptʼäna, kʼarisiri, envidiasiri, jupatakik taqe kuns muniri ukhamarakiwa (Juan 8:44). Niyakejjay Jesusajj Jehová Diosar sum uñtʼchejja, Supayarus uñtʼarakchejja, jupajj janipuniw Supayjamajj Jehová Dios contra saytʼañ munkänti (Filip. 2:5-8).

⁵ Maysa toqetjja, Jesusatï Jehová Diosat janipun jitheqtaspäna ukhajja, walja bendicionanakwa jikjjataspäna (Heb. 12:2). Janiw ukakïkiti, Diosat jan jitheqtasajj Awkipan sutipwa jachʼañchaspäna, jiwañsa juchsa chhaqtayarakispänwa.

¿KUNATSA JEHOVÁ DIOSAR ADORAÑAJJ WAKISI?

6, 7. 1) ¿Kunatsa walja jaqenakajj Jehová Diosar jan servipki? 2) ¿Kunatsa Jehová Diosar adorañajj wakisi?

⁶ Jichha tiemponjja, walja jaqenakajj janiw Jehová Diosar uñtʼapkiti, ukatwa juparojj jan servipkiti. Diosajj kunja suma chuymanisa kunanaksa jupanak laykojj lurawayi uks janiw yatipkiti. Ukham jaqenakaruw apóstol Pablojj Atenas markan predicarakïna (Hech. 17:19, 20, 30, 34).

⁷ Pablojj cheqpach Diosaw “taqenirus jakañsa, samansa, taqe kunsa churi” sasaw qhanañchäna. “Jupïpanwa jakasktanjja, sarnaqasktanjja, utjaskaraktanjja” sasaw sarakïna. Ukatjja “mä sapa jaqetakwa taqe markankir jaqenak luri” sasaw qhanañcharakïna. Ukhamajj niyakejjay jupajj Luririsächejja, jupakiw adoración katoqañatakejj derechoni (Hech. 17:25, 26, 28).

8. ¿Kunsa Jehová Diosajj janipun lurkaspa?

⁸ Niyakejjay Jehová Diosajj Luririsächejja, Taqe Kunjjar Munañani Diosarakïchejja, jupar servipjjañapatakejj jaqenakar obligaspawa. ¡Ukampis janipuniw uk lurkaspati! Antisas walja jaqenakajj jupan amigopäsin wiñayatak jakasipjjaspa ukwa muni (1 Tim. 2:3, 4). Ukatwa jupan utjataparu, jiwasar wal munasitapar creyiñasatakejj walja razonanak churistu. Ukatarakwa Jehová Diosajj jiwasar wali sum yatichistu, ukhamat kuna bendicionanaktï jupajj jaqenakatak apankani, kunjamsa uk lurani ukanak yaqhanakar yatichañasataki (Mat. 10:11-13; 28:19, 20). Ukhamarus Diosar adorañasatakejj mä congregación taypinktanwa, ukanwa ancianonakajj munasiñampi yanaptʼapjjestu (Hech. 20:28).

9. ¿Kunjamsa Jehová Diosajj munasiñap uñachtʼayi?

⁹ Jehová Diosajja, khitinakatï jupan utjatapar jan creyiñ munapki ukanakarojj sumanak churasaw munasiñap uñachtʼayi. Nayra maranakatpachajja, walja jaqenakaw kunatï walïki kunatï jan walïki ukanak jupanak pachpa amtawayapjje. Ukampis Jehová Diosan wali munasirïtapatjja, kunatï kusisit jakasiñatakejj wakiski taqe ukanakwa jaqenakar churawayi (Mat. 5:44, 45; Hech. 14:16, 17). Jupïpanwa mä familianïpjjaspa, wawanakanïpjjaspa, amigonakanïpjjaspa, wal trabajtʼapjjatapats kusistʼapjjarakispa (Sal. 127:3; Ecl. 2:24). Alajjpachankir Awkisajj taqe jaqenakaruw munasi, janiw ukat payachasktanti (Éx. 34:6). Jichhajja, kuna razonanakatsa jiwasanakajj Jehová Diosar serviñ ajlliwaytan, ukat kunjamsa jupajj bendisistu ukwa yatjjatarakiñäni.

¿KUNATSA JEHOVÁ DIOSAR SERVIÑ AJLLIWAYTAN?

10. 1) ¿Kunatsa Jehová Diosar serviñ ajlliwaytanjja? (Mateo 22:37). 2) ¿Kunjamsa Jehová Diosajj jumar pacienciamp uñjawaytam? (Salmo 103:13, 14).

¹⁰ Jiwasajj Jesusjamarakiw Jehová Diosarojj taqe chuym munastanjja, ukatwa juparojj sirvtanjja (Mateo 22:37 liytʼäta). Jehová Diosajj kunja suma chuymanisa uk yatisajja, jukʼampiw jupar jakʼachastanjja. Amuytʼañataki, jupajj wali pacienciampiw jiwasarojj uñjistu. Israelitanakajj jupar jan istʼapkäna ukhajja, Jehová Diosajj akham sasaw jupanakar ruwtʼirïna: “Mirä amp suma, jan wali thakinakamat kuttʼanjjapjjam” sasa (Jer. 18:11). Jehová Diosajj laqʼat luratätas amtasiwa (Salmo 103:13, 14 liytʼäta). Jupan paciencianïtapata, kunja suma chuymanisa uk pienstan ukhajj ¿janit wiñayatak jupar serviñ munktanjja?

11. ¿Kuna razonanakatsa alajjpachankir Awkisar serviñ ajlliwaytanjja?

¹¹ Maysa toqetjja, Jehová Diosar serviñajj wakisiwa, ukatwa juparojj serviraktanjja (Mat. 4:10). Ukhamarus Jehová Diosat jan jitheqtkañäni ukhajja, sutipwa jachʼañchañäni, Supayan kʼarïtapwa uñachtʼayañäni, alajjpachankir Awkisan chuymaps kusisiyarakiñäniwa. Jumatï jichhürpach Jehová Diosar serviñ amtäta ukhajja, wiñayatakiw jupar servisma (Juan 17:3).

12, 13. ¿Kunsa Jane ukat Pam kullakanakan experienciapat yateqsna?

¹² Jiskʼatpachaw Jehová Diosarojj taqe chuym munassna, maranak pasipansa, uka munasiñajj janiw chhaqtkaspati. Jane ukat Pama kullakanakat parltʼañäni. Jupanakajj Bibliat yateqañ qalltapkäna ukhajja, maynejj 11 maranïnwa, maynisti 10 maranirakïnwa. Tatap mamapajj janisay Bibliat yateqañ munapkchïnjja, wawanakaparojj Testigonakamp Bibliat yateqapjjañapatakejj permis churapjjänwa. Ukampis ukatakejj kawkïr iglesiarutï familiapampejj seman tukuyanakajj sarapkäna ukaruw sarapjjañaparakïna. Jane kullakajj akham siwa: “Compañer masinakajat waljaniw droganakamp qolljasipjjäna, qʼañu juchanaks lurapjjäna. Testigonakamp Bibliat yateqañajj ukanakat jitheqtañatakiw yanaptʼawayitu” sasa.

¹³ Qʼajjo tawaqetäjjapjjäna ukhajja, jupanakajj publicadoräjjapjjänwa. Mä qhawqha maranak qhepatjja, precursoranakäjjapjjänwa, jilïr tatap mamaparus uñjapjjarakïnwa. Taqe ukanak amthapisajj Jane kullakajj akham siwa: “Jehová Diosajj amigonakaparojj wali sumpun uñji, ukwa naya pachpajj uñjawayta. Kunjamtï 2 Timoteo 2:19 texton siskejja, ‘Jehová Diosajja jupankirinakarojj uñtʼasiwa’” sasa. Cheqas khitinakatï Jehová Diosar munasiña serviña ajllipki ukanakarojja, wali sumwa jupajj uñji.

14. ¿Kunjamsa Jehová Diosan sutip arjjatsna? (Fotonak uñjjattʼarakïta).

¹⁴ Jehová Diosat kunatï cheqäki uk jaqenakan yatipjjañapwa muntanjja. Jumajj wali munasiri, wajjtʼasiri, perdonasir mä amigonïkasmas ukham sañäni. Maynitï uka amigomat parlasajj “jupajj kʼarisiriwa, jan wali jaqewa” sasin saspa ukhajj ¿kunsa lurasma? ¿Janit jupar arjjatkasma? Niya ukhamarakiwa, kunapachatï Jehová Diosat kʼarinak parlir istʼtan ukhajja, juparojj taqe chuymaw arjjattanjja. Kunatï jupat cheqäki ukwa arsuraktanjja (Sal. 34:1; Is. 43:10). Parlatasampi luratasampiw Jehová Diosar taqe chuym serviñ munatas uñachtʼaytanjja.

15. Apóstol Pablojj kuntï jakäwipan lurañ amtkäna ukanak jaytasajj ¿kuna bendicionanaksa katoqäna? (Filipenses 3:7, 8).

¹⁵ Jehová Diosar kusisiyañatakisa, jupar jukʼamp serviñatakisa, kunanaktï jakäwisan lurañ munkayätan ukanak mayjtʼayañatakejj jankʼakïtanwa. Apóstol Pablojj ukhamwa luräna, jupajj judío religionan wali aytat jaqëñat sipansa, Criston arkiripäña ukat Jehová Diosar serviñwa amtäna (Gál. 1:14). Ukham luratapatjja, wali kusisitaw jakasïna. Jesucristomp chikaw alajjpachan apnaqañaparakïna. Apóstol Pablojj Jehová Diosar serviñ ajllitapat janipuniw arrepentiskänti, jiwasas ukhamaraki (Filipenses 3:7, 8 liytʼäta).

16. ¿Kunsa Julia kullakan experienciapat yateqsna? (Fotonak uñjjattʼarakïta).

¹⁶ Jehová Diosar servis ocupatäñäni ukhajja, jichha tiemponsa jutirinsa, walja bendicionanakwa katoqañäni. Julia kullakan experienciapat parltʼañäni. Jupajj jiskʼäkäna ukhajja, iglesiapanwa cantirïna. Jupar wali sum cantir istʼasajja, ópera cantiri wali yatjjattʼat mä chachaw jupar jukʼamp yatichäna. Mä jukʼa tiempotjja, Juliajj wali uñtʼatäjjänwa, conciertonakanwa cantarakïna. Wali uñtʼat mä escuelan música toqet yateqkasajja, mä compañero masipaw juparojj Diosat parläna, Diosajj Jehová sutiniwa sasaw qhanañcharakïna. Mä jukʼa tiempotjja, semanan pay kutiw Bibliat yateqäna. Uka qhepatjja, música toqet wali yatjjattʼatäñat sipansa, Jehová Diosar serviñwa amtäna. Ukham amtañajj janis jupatak faciläkchïnjja, akham siwa: “Walja jaqenakajja, wali sum cantirïtam ina chʼusaruw aptʼasktajja, sasaw sapjjetäna, ukampis nayajj Jehová Diosaruw serviñ munayäta” sasa. Ukhat 30 maranakaw pasawayjje, ¿kunsa Julia kullakajj ukham amtatapat amuyi? Jupajj akham saskakiwa: “Wali kusisitätwa, jutïrinjja Jehová Diosajj kunanaktï chuymajajj munki ukanakwa churitani, janiw ukat payachaskti” sasa (Sal. 145:16).

JEHOVÁ DIOSAR SERVISKAKIM

17. Akapachan tukusiñapatak jukʼa tiempok faltatapajj ¿kun amuyañatakis Diosar servirinakarusa Diosar jan servinakarus yanaptʼi?

¹⁷ Akapachan tukusïwipajj wali jakʼankiwa. Apóstol Pablojj akham sasaw qellqäna: “‘Mä jukʼa tiempompitjja’, ‘khititï jutaski ukajj purininiwa, janiw qheptʼankaniti’” sasa (Heb. 10:37). ¿Uka arunakajj kamsañsa muni? Mä toqetjja, jaqenakan Jehová Diosar serviñ ajllipjjañapatakejj jukʼa tiempokiw utj-jje (1 Cor. 7:29). Maysa toqetjja, Jehová Diosar serviñ ajllitasat yantʼanakans uñjaskchiñänejja, ‘mä jukʼa tiempokïniwa’, uk sum yattanjja.

18. ¿Jehová Diosampi Jesusampejj kun lurañassa munapjje?

¹⁸ Jesusajj jupan discipulopäpjjañapataki, jupar arkasipkakiñapatakiw jaqenakar chʼamañchtʼäna (Mat. 16:24). Ukhamajj jiwasatï Jehová Diosar walja maranak servisktanjja, jan qarjtapjjañäniti. Cheqas jupar serviñatakejj chʼamachasiñasawa, awisajj janiw ukajj faciläkaspati. Ukhamäkchisa Jehová Diosar servitasat jichhürunakan kusisitätanwa, bendicionanaks katoqaraktanwa (Sal. 35:27).

19. ¿Kunsa Gene jilatan experienciapat yateqsna?

¹⁹ Jehová Diosar servisajj janiw kusisitäksnati sasaw yaqhepajj amuyapjje. Jumatï wayn tawaqöstajja, Jehová Diosar serviñ ajllisajj ¿mä kun lurañatakejj jarkʼatas uñjaskasma ukhamtï amuyasta? Gene sat mä wayna jilatajj akham siwa: “Testigonakajj mä kun lurañatakejj janis librëpkaspa ukhamwa amuyayäta. Nayamp chika jilsupkäna uka waynanakajja, fiestanakar sarasasa, tawaqonakamp uñtʼasisasa, nuwasiñanakani videojuegonak anatasasa, kusisitäpkaspas ukhamwa amuyayäta, ukañkamasti nayajj tantachäwinakaru ukat predicacionaruw sarañajäna” sasa. ¿Kunas ukham amuyatapat Gene jilatarojj pasäna? Jupajj akham siwa: “Uka waynanakjamaw jan walinak lurjjayäta. Mä qhawqha tiempojj ukanak lurasajj kusisitäkchiyätsa, janiw cheqpach kusisitäkayätti. Ukatjja Biblian yatichäwinakapatwa amtarakiyäta, ukarjam sarnaqañajj kunjamsa yanaptʼitaspa ukwa lupʼirakiyäta. Ukhaw Jehová Diosarojj taqe chuym serviñ ajlliyäta. Ukhat aksarojj Jehová Diosajj taqe oracionanakajar istʼatapwa amuyarakiyäta” sasa.

20. ¿Kun lurañsa amttanjja?

²⁰ Mä salmistajj akham sasaw Jehová Diosar cantäna: “Khitirutï jumajj ajlliskta, juman ukar irpanirakta ukajj kusisitawa, juparuw pationakaman jakañapatakejj ajllistajja irpaniraktajja” sasa (Sal. 65:4). Jiwasajj Josué chachat yateqasisajja, akham sasin taqe chuym sapjjarakiñäni: “Nayasa familiajasa Jehová Diosaruw servipjjäjja” sasa (Jos. 24:15).