Wayna jilatanaka, Marcosampit Timoteompit yateqasipjjam

1, 2. ¿Kunas Marcosampir Timoteompirojj Jehová Diosar jukʼamp serviñat jarkʼaspäna?

JUMATÏ mä wayna jilatästajja, Jehová Diosarojj jukʼamp serviñwa munpachätajja, congregacionarus jukʼampiw yanaptʼañ munarakpachätajja. Walja wayna jilatanakar jukʼamp serviñ munir uñjasajj wal kusistanjja (Sal. 110:3). Ukampis Diosar serviñatak jukʼampinak lurañajj janiw faciläkapuniti. Jupar jukʼamp servisajj kunjamsa jakasïta, kawkirus khitapjjätam uk jan yatisajj inas Diosar jukʼamp serviñ ajjsarayassta. “Uka lurañamp phoqañatakejj janiw wakichtʼatäkti” sasajj inas congregacionan uka lurañ jan katoqkstati. Jan llakisimti, janiw jumakejj ukham amuyasktati.

² Marcosampi Timoteompejj ukhamwa amuyasipjjarakïna, ukampis jupanakajj ajjsarayasipkchïnsa, jan ukajj janis experiencianïpkaspa ukhamsa amuyasipkchïnjja, Jehová Diosar jukʼamp serviñwa amtapjjäna. Kunapachatï apóstol Pablompi Bernabeampejj misionerjam nayrïr viajepar Marcosar invitapkäna ukhajja, inas jupajj mamapamp mä suma utan jakaschïna (Hech. 12:12, 13, 25). Ukampis Marcosajj wali sumas utapan jakaskchïnjja, Diosar jukʼamp serviñatakejj uk jaytañwa amtäna. Nayraqatajj Antioquía markaruw viajïna, ukjjarojj Pablompi Bernabeampiw yaqha jaya lugaranakar viajïna (Hech. 13:1-5). Pablojj jupamp chik viajiñapatak Timoteor invitäna ukhajja, inas Timoteojj tatap mamapamp jakarakchïna. Timoteotï wali waynitükaspasa janis experiencianïkaspa ukham amuyasispäna ukhajja, janiw Pablon invitacionapar iyawskaspänti (1 Corintios 16:10, 11 ukat 1 Timoteo 4:12 liytʼarakïta). Ukampis jupajj iyaw sänwa, walja bendicionanakwa katoqarakïna (Hech. 16:3-5).

3. 1) ¿Kunatsa Pablojj Marcosampir Timoteompirojj wali valoranit uñjäna sasajj sissna? (2 Timoteo 4:6, 9, 11; dibujonak uñjjattʼarakïta). 2) ¿Kawknïr jisktʼanakarjamas aka yatichäwin yatjjataskañäni?

³ Marcosampi Timoteompejj waynäkasaw congregacionan walja lurañanakamp phoqañ yateqapjjäna. Jupanakarojj wali valoranit Pablojj uñjäna, ukatwa jiwañapatak jukʼak faltjjäna ukhajj jupanakar jawsayäna (2 Timoteo 4:6, 9, 11 liytʼäta). ¿Kunatsa Pablojj Marcosarus Timoteorus wal munasïna? ¿Kunjamsa wayna jilatanakajj Marcosampit Timoteompit yateqasipjjaspa? ¿Kunjamsa Pablon ewjjtʼanakapajj wayna jilatanakar yanaptʼaspa?

MARCOSAT YATEQASISAJJ MAYNINAKARUW SERVISMA

4, 5. ¿Kunjamsa Marcosajj mayninakar yanaptʼañatak jankʼakïtap uñachtʼayäna?

⁴ ¿Mayninakar serviñajj kamsañsa muni? Mä qellqatarjamajja, mayninakar yanaptʼañatak wal chʼamachasiña, chʼamäkchi ukhas yanaptʼaskakiña sañwa muni. Ukwa Marcosajj luräna. Pablojj misionerot payïr viajipan jan irpañ munkäna ukhajja, Marcosajj wal chuym usuyaspachäna (Hech. 15:37, 38). Ukhamïpan ¿jupajj desanimasjjänti, janit jilat kullakanakarus yanaptʼjjäna? ¡Janiw ukhamäkänti!

⁵ Marcosajj Bernabé primopampiw yaqha lugarar servir sarjjäna. Mä 11 maranak qhepatjja, Pablojj Roma markan carcelan llawintatäkäna ukhajj Marcosaw jupar yanaptʼir saräna (Filem. 23, 24). Ukatwa Pablojj yanaptʼapat wal yuspäräna, Marcosajj ‘wal chuymachtʼitu’ sasaw sarakïna (Col. 4:10, 11).

6. ¿Kunjamsa Marcosarojj experienciani jilatanakampïñajj yanaptʼäna? (Nota liytʼarakïta).

⁶ Marcosarojj experienciani jilatanakampïñaw experiencianïñatak yanaptʼäna. Roma markan Pablompïsajja, Pedrompïñatakiw Babilonia markar saräna. Pedrompejj wali amigöjjapjjänwa, ukatwa “jupajj wawajäkaspas ukhamawa” sasin Marcosat sarakïna (1 Ped. 5:13). Niyakejjay Marcosajj Pedromp chikächïnjja, kunjamsa Jesusajj aka oraqen jakäna, Diosan arunakaps yatiyäna uk wali sum Marcosar qhanañchpachäna. Tiempompejj ukwa Marcosajj sutip apki uka Evangelior qellqarakïna.a

7. ¿Kunsa mä jilatajj Marcosat yateqasisajj luräna? (Foto uñjjattʼarakïta).

⁷ Marcosajj wali ocupataw Jehová Diosar servïna, experienciani jilatanakampiw chikachasirïna. ¿Kunjamsa jupat yateqasisma? Jumatï congregacionan mä privilegio katoqañ munsta, ukampis janïr uk churapkstam ukhajja, paciencianïñamawa, Jehová Diosampir jilat kullakanakampir yaqha toqenakat yanaptʼañatakejj chʼamachasiskakim. Seung-Woo jilatat amuytʼañäni, jupajj ancianot jichhajj serviski. Waynitükäna ukhajja, jupa mita masinakapampiw igualasirïna. Kunjamsa jupanakajj congregacionan jupat sipans privilegionak nayraqat katoqapjjäna uk uñjasajja, janis jupar yäqapkaspa ukhamwa amuyasïna. Ukatwa qhepat ancianonakamp uka toqet parläna. Mä ancianojja, janis khitis amuykchinejj mayninakar yanaptʼañapatakiw chʼamañchtʼäna. Ukatwa jilatajj jilïr jilat kullakanakar yanaptʼañataki, khitinakatï tantachäwinakar sarañatak yanaptʼa munapki ukanakar yanaptʼañ amtäna. Jupajj ukanak amtasajj akham siwa: “Kunjamsa mayninakar cheqpachapun yanaptʼasispa ukwa yateqayäta, mayninakar kunjamtï munapki ukham yanaptʼasajj wali kusisitäyätwa” sasa.

TIMOTEOT YATEQASISAJJ MAYNINAKAT LLAKISITAM UÑACHTʼAYAM

8. ¿Kunatsa Pablojj jupamp chik viajiñapatak Timoteor ajllïna? (Filipenses 2:19-22).

⁸ Kawkjanakantï jupa contra saytʼapkäna uka lugaranakar kuttʼäna ukhajja, Pablojj jan ajjsarir jilatanakampiw kuttʼäna. Nayraqatajj wali experienciani Silas jilataruw ajllïna (Hech. 15:22, 40). Qhepatjja Timoteo waynaruw ajllirakïna. ¿Kunatsa jupar ajllïna? Mä toqetjja, Timoteojj suma jaqet uñtʼatänwa (Hech. 16:1, 2). Maysa toqetjja, Pablojj ak sum yatïna, Timoteojj taqe chuymaw mayninakat llakisirïna (Filipenses 2:19-22 liytʼäta).

9. ¿Kunjamsa Timoteojj jilat kullakanakat taqe chuym llakisitap uñachtʼayäna?

⁹ Pablomp chik viajiñ qalltäna ukhajja, Timoteojj qalltatpachaw jupa pachpat llakisiñat sipans mayninakat llakisitap uñachtʼayäna. Ukhamïpanjja Berea markankir machaq discipulonakar chʼamañchtʼañapatakejj confianzampiw Pablojj Timoteor jaytäna (Hech. 17:13, 14). Uka tiempon waljanak Timoteojj Silasat yateqpachäna. Tiempompejja Pablojj Tesalónica markankir congregacionankirinakar chʼamañchtʼañapatakiw Timoteor sapak khitarakïna (1 Tes. 3:2, nota). Uka qhepat mä 15 maranakatjja, Timoteojj walpun jilat kullakanakar munasïna, ukatwa jupanakamp chikas jachirïna (Rom. 12:15; 2 Tim. 1:4). ¿Kunsa wayna jilatanakajj Timoteot yateqasipjjaspa?

10. ¿Kunjamsa mä jilatajj mayninakat jukʼamp llakisiñ yateqäna?

¹⁰ Woo Jae sat jilatajj mayninakat jukʼamp llakisiñwa yateqäna, jukʼamp waynitükäna ukhajja, jilïr jilat kullakanakamp parltʼasiñajj jupatak chʼamakïnwa. Ukatwa jupanakamp Salonan jikisisajj aleqak aruntirïna. Jilïr jilat kullakanakamp parltʼasiñ qalltañapatakejja, kunas jilat kullakanakat jupar gusti uk jupanakar sañapatakiw mä ancianojj chʼamañchtʼäna. Kuna toqets jupanakajj parlañ munapjjaspa uk amuytʼañapatakiw chʼamañchtʼarakïna. Woo Jae jilatajj uka ancianon arunakapar istʼänwa, jichhajj ancianöjjewa, akham sarakiwa: “Jichhajj qhawqha maranïskpansa maynimpejj parltʼasikiristwa, mayninakan llakinakap amuyasajj sumakiw jikjjatasta, ukhamatwa kuntï necesitapki ukarjamajj jilat kullakanakar yanaptʼarakta” sasa.

11. ¿Kunjamsa wayna jilatanakajj jilat kullakanakat llakisiñ yateqapjjaspa? (Foto uñjjattʼarakïta).

¹¹ Wayna jilata, jumajj mayninakat llakisitam uñachtʼayañ yateqarakismawa. Tantachäwinakanjja menos maranimpis jila maranimpis taqenimpiw parltʼasisma. Kunjamäsipkisa uk jisktʼasajja, kamsasas jaysätam uk sum istʼañamawa. Tiempompejj kunjamsa jupanakar yanaptʼasma uks amuyjjarakïtawa. Inas mä jilïr jilat kullakampin JW Library^® sat aplicación apnaqañatak yanaptʼa munatap yatchïta, jan ukajj jan khitimp predikir mistuñ pueditap yatchïta. ¿Janit celularapa jan ukajj tabletap apnaqañapatak yanaptʼkasma, jan ukajj jupanakamp predikkasma? Jumatï mayninakar chuymamat yanaptʼäta ukhajja, congregacionatakejj yateqaskañäyätawa.

PABLON EWJJTʼANAKAPAJJ YANAPTʼIRISTAMWA

12. Pablojj Timoteor qellqkäna uka ewjjtʼanakampi yanaptʼayasiñatakejj ¿kunsa wayna jilatanakajj lurapjjaspa?

¹² Pablojj wawaparjamaw Timoteor munasïna, ukatwa kusisit jakasiñapatakisa Diosar phoqatpach serviñapatakis ewjjtʼäna (1 Tim. 1:18; 2 Tim. 4:5). Ewjjtʼanakapajj jumar yanaptʼarakiristamwa, ¿kunsa ukatakejj lurasma? Pablojj Timoteor qellqkäna uka pä cartanakapjja, jumarus qellqkiristam ukhamwa liytʼañama, ukat kunjamsa uka ewjjtʼanakarjam sarnaqasma ukwa amuytʼañamaraki. Ukanakat jichhajj mä qhawqha uñjañäni.

13. ¿Kunas Dios chuymäñatak yanaptʼätam?

¹³ “Dios chuymäñatak wal chʼamachasim” (1 Tim. 4:7b). Maynejj Dios chuymäki ukhajja, janiw Jehová Diosat jitheqtkiti, kunatï jupar gustki uk lurañwa munaraki. Ukampis janiw ukham chuyman nasktanti, ukhamäñatakejj wal chʼamachasiñasawa. ¿Kunjamsa uk lursna? Pablojj “chʼamachasim” sasaw säna. Griego arunjja, uka arojj kunjamsa tʼijurinakajj atipañatak wali chʼam tukus practicapjjañapa uk qhanañchañatakiw apnaqasirïna. Tʼijurinakajj kawkirutï puriñ munapki ukar puriñatakejja, kunatï wakiski ukanak lurañarojj yatintatäpjjañapänwa. Jiwasajj ukhamarakiw kunatï Jehová Diosamp jukʼamp sum apasiñatak yanaptʼkistaspa ukanak lurañarojj yatintatäñasa.

14. ¿Kuna amtampis Biblia liytʼañasa, ukat kunjamsa uk lursna?

¹⁴ Kunanakatï lurañ wakiski ukanakatjja, mayajj Biblia sapür liyiñawa. Amtapunim, Jehová Diosamp jukʼamp sum apasiñatakiw liytʼañama. Kunjamsa uk lurasma uk amuytʼañatakejja, Jesusajj mä qamir waynamp parlkäna uksa Biblian liytʼkasma ukham sañäni (Mar. 10:17-22). Qamir waynajj Jesusan Mesiasätap creykchïnsa, janiw jupan discipulopäñatakejj jupar taqe chuym confiykänti. Ukhamäkchïnsa Jesusajj munasiñampiw jupar parläna. ¿Kunatsa Jesusajj uka waynar wali munasiñamp parläna? Uka waynajj Diosar wali kusisit servispa ukwa Jesusajj munäna. Uk amuytʼañajj ¿kunsa Jehová Diosat yatichtam? Niyakejjay Jesusajj Awkipjamächejja, qhawqsa Jehová Diosajj uka waynar munasïna ukwa yateqpachätajja (Juan 14:9). Maysa toqetjja, uka waynat parlir qellqat liytʼasasa kunsa jumajj luraskta uka toqet lupʼisasa, akham sasaw jisktʼasisma: “¿Kunsa Jehová Diosar jukʼamp jakʼachasiñatakisa mayninakar serviñatakis luriristjja?” sasa.

15. ¿Kunatsa wayna jilatanakajj yateqaskayäñatak chʼamachasipjjañapa? (1 Timoteo 4:12, 13).

¹⁵ ‘Diosar taqe chuyma servirinakatakejj yateqaskayäñamawa’ (1 Timoteo 4:12, 13 liytʼäta). Pablojj janiw sum liytʼirïñapataki, suma yatichirïñapatakik Timoteor chʼamañchkänti, jan ukasti suma chuymanïtap uñachtʼayañapatakiw chʼamañcharakïna. Ukatakejj munasirïñapänwa, Diosar confiyirïñapänwa, sum sarnaqañaparakïnwa. Kuna laykutejj arunakasat sipansa, kuntï lurktan ukaw jukʼamp chʼamanejja. Kunjamanakats predicacionan jukʼampinak lursna uka toqets mä discurso arstʼañamäkasma ukham amuytʼañäni. Jumatï predicañatak chʼamachasïta ukhajja, janiw uka toqet arstʼasajj phenqʼaskätati, qhawqsa predicañatak chʼamachasiskta uk uñjasajja, jumar istʼirinakajj arunakamarjam lurañwa munapjjarakini (1 Tim. 3:13).

16. 1) ¿Kuna phesqa toqenakansa wayna jilatanakajj yateqaskañäpjjaspa? 2) ¿Kunsa mä wayna jilatajj parlatapan yateqaskayäñatak luraspa?

¹⁶ Kunjamanakatsa mä wayna jilatajj yateqaskañäspa ukjja, Pablojj 1 Timoteo 4:12 textonwa phesqa toqet qhanañchtʼi. ¿Janit Bibliat sapak yatjjatkasajj ukanakat yatjjatkarakisma? ‘Parlatamans’ mejorañ munkasma ukham amuytʼañäni. Ukatakejj kamsasas mayninakar chʼamañchtʼasma uk amuytʼam. Jumatï tatam mamamamp jakasksta ukhajj ¿janit kunanaktï juma layku lurapki ukanakat sapa kut yuspärkasma? ¿Janit tantachäwinakan pachpa arunakamamp comentarionak arstʼañatak chʼamachaskasma? Tantachäwi tukuyatarojj ¿janit mä jilatarusa jan ukajj mä kullakarus kunas asignacionapat gustawaytam uk siskasma? Jumatï parlataman yateqaskayäñatak wal chʼamachasïta ukhajja, mayninakajj Jehová Diosar serviñan nayrar sartaskatamwa uñjapjjani (1 Tim. 4:15).

17. ¿Kunanakas mä wayna jilatarojj Jehová Diosar jukʼamp serviñatak yanaptʼaspa? (2 Timoteo 2:22).

¹⁷ ‘Kunanaktï maynejj waynäkasin munki ukanakat jitheqtam, antisas cheqaparjam sarnaqañatak chʼamachasim’ (2 Timoteo 2:22 liytʼäta). Kunanakatï Jehová Diosar jukʼamp serviñat jarkʼkaspa, jupamp sum apasitap jan waltʼaykarakispa ukanak jan lurañ munañapatakiw Pablojj Timoteor ewjjtʼäna. Inas jumajj kunanakatï kusistʼayktam ukanakar tiempo aptʼasiskatam amuyassta, ukhamïpan janirakiw Jehová Diosar jukʼamp serviñatak tiemponëjjasmati. Ejercicionak lurañatakisa, internet apnaqañatakisa, jan ukajj video juegonak anatañatakis qhawqha tiemps apstʼasta uk amuytʼam. ¿Janit Jehová Diosar jukʼamp serviñatakisa jilat kullakanakar jukʼamp serviñatakis tiemp apstʼaskarakisma? Inas Salonaman mantenimiento lurañatakisa jan ukajj carritomp predikir sarañatakis chʼamachaschisma. Uk lurañajja, Jehová Diosar jukʼamp servir amigonakanïñatakiw yanaptʼätam, jupanakajj jukʼamp serviñatakiw yanaptʼapjjarakïtam.

MAYNINAKAR SERVISAJJ BENDICIONANAKWA KATOQÄTA

18. Marcosampi Timoteompejj wali kusisitaw jakasipjjäna, walja bendicionanakwa katoqapjjarakïna sasajj ¿kunatsa sissna?

¹⁸ Mayninakar serviñ laykojja, Marcosampi Timoteompejj kunayman sacrificionakwa lurapjjäna, ukhamatwa wali kusisit jakasipjjäna, walja bendicionanakwa katoqapjjarakïna (Hech. 20:35). Marcosajj jilat kullakanakar yanaptʼañ laykojj walja lugaranakaruw viajïna, Jesusan jakäwipat wali musparkañwa qellqarakïna. Timoteojj Pabloruw congregacionanak uttʼayañapataki, jilat kullakanakar chʼamañchtʼañapatak yanaptʼarakïna. Qhawqsa Marcosampi Timoteompejj jupar serviñatak chʼamachasipjjäna uk uñjasajja, Jehová Diosajj wal kusisïna.

19. ¿Kunatsa wayna jilatanakajj Pablon ewjjtʼanakaparjam sarnaqapjjañapa, ukat ukham lurasajj kunsa jikjjatapjjani?

¹⁹ Pablojj Timoteor qellqkäna uka cartanakajj ¿kunsa yatichistu? Mä toqetjja, Pablojj Timoteo wayna amigoparojj wal munasïna. Maysa toqetjja, Jehová Diosajj jumar wal munasiraktamjja, jupar servisajj kusisit jakasisma ukwa munaraki. Ukatpï apóstol Pablon ewjjtʼanakaparjam sarnaqañamasa, jilat kullakanakar serviñatak chʼamachasiñamas wali wakiskirejja. Ukhamtï lurätajja, wali kusisitaw jichhajj jakasïta, jutïrinsti ‘cheqpach jakañwa’ jikjjatarakïta (1 Tim. 6:18, 19).