Wali wakiskir amtanakar puriñatakejja, ‘kun lurapjjañassa Jehová Diosajj muni’ ukwa amuytʼañasa, ukarjamaw lurañasaraki (Efes. 5:17). Jiwasar mä toqet yanaptʼañapatak Biblian wiñay yatichäwinakap thaqktan ukhajja, kunsa Jehová Diosajj uka toqet amuyi uk thaqataswa uñachtʼaytanjja. Biblian wiñay yatichäwinakaparjam lurasajja, suma amtanakaruw puriñäni. Supayajj aka mundon lurañanakapamp wali ocupatäsna, Diosar serviñatak jan tiemponïksna ukwa muni (1 Juan 5:19). Diosar kunaymanit serviñat sipansa, qollqeru, estudiañaru jan ukajj trabajor chuym uchañajj facilakïspawa. Jiwasatï ukanakak lurjjsna ukhajja, aka mundon amuyunakapamp apayasiskataswa uñachtʼayaspa. Cheqas ukanak lurañajj janiw kuna jan walïkisa, ukampis janiw ukanakakejj jakäwisan nayrankañapäkiti. w24.03 pág. 24 párrs. 16, 17

Uka textonjja aka pä wakiskir yatichäwinakaw utji: 1) cheqap sarnaqer jaqenakajj jan waltʼäwinakanwa uñjasipjje, 2) Jehová Diosaw uka jan waltʼäwinakat salvi. ¿Kunjamsa Jehová Diosajj uka jan waltʼäwinakat salvistu? Akapachanjja, jan walinakan uñjasikipuniñäniwa, uk amuyañatakiw yanaptʼistu. Jehová Diosajj nayar servisajj kusisitäpjjätawa sasins siskchistojja, ukajj janis jakäwisan jan walinakan uñjasksna ukham janiw sañ munkiti (Is. 66:14). Kunjamas jutïrin wiñayatak jakasjjañäni uka toqet lupʼiñaswa Diosajj muni, cheqas ukham jakasiñaswa jupajj muni (2 Cor. 4:16-18). Ukañkamajj sapüruw jupar serviskakiñasatak yanaptʼistu (Lam. 3:22-24). Bibliajj qellqaskäna uka tiempon Jehová Diosar jan jitheqtas servirinakapampita jichha tiempon servirinakapampit waljanakwa yateqsna. Cheqas mä akatjamatwa jan walinakan uñjassna. Ukampis Jehová Diosar confiyañäni ukhajja, jupajj katjjasipunistaniwa (Sal. 55:22). w23.04 págs. 14, 15 párrs. 3, 4

Joseampit Mariampit waljanakwa yateqsna. Jupanakatak jilïr autoridadanakar istʼañajj chʼamäkäna ukhasa, istʼañatakejj jankʼakïpjjänwa (Luc. 2:1-6). Mariajj niya llätunka phajjsinak usurëjjäna ukhajja, Joseampi Mariampejj istʼasirïpjjeti janicha ukwa uñachtʼayapjjañapäna. Uka tiemponjja, César Augusto emperadorajj censo lurasiñapatakiw mä decreto apsüna. Uka decretomp phoqañatakejj Joseampi Mariampejj Belén markaruw viajipjjañapäna. Ukatakejj 150 kilometronakwa qollunaknam viajipjjañapäna. Uka viajejj janiw faciläkänti, jukʼampis Mariatakiw wali chʼamäpachäna. Joseajj walpun Mariatsa wawatsa llakispachäna, Marias ukhamaraki. Mariatejj wawap ususispäna ukhajj ¿kamachapjjasapänsa? ¡Mariajj Mesiasäñapäkäna uka wawaruw ususiñapäna! ¿Uka razonat gobiernonakar jan istʼapjjañapajj walikïskasapänti? Joseampi Mariampejj llakisiñatak razonanïpkchïnsa, janiw uka laykojj uka leyir jan istʼapkänti. Jehová Diosasti istʼasirïpjjatapat jupanakar bendisïnwa: Mariajj sumakiw Belenar purïna, wawapas kʼumaraw nasïna, Biblian mä profeciap phoqasiñapatakiw yanaptʼarakïna (Miq. 5:2). w23.10 pág. 8 párr. 9; pág. 9 párrs. 11, 12