Tunkaniw qollatäpjjäna, maynikiw yuspäräna

Sanedrinankirinakajja Jesusar jiwayañwa amtapjjäna, ukatwa Jesusajj Efraín markar sarjjäna, uka markajj Jerusalenat inti jalsu toqet aynach toqenkiwa, ukanwa discipulonakapampi quedasïna. Enemigonakapatsa jayankapjjänwa (Juan 11:54). Ukampis niyaw 33 maran Pascua amtañajj jakʼachasinjjäna. Ukatwa Jesusajj Samaria marka pasawayasajj Galilear saräna. Jiwañapajj jakʼachasinjjatap laykojja, Jesusajj qhep qhepa kutiw Galilear sarjjäna.

Mä markat yaqha markar sarkasasti Jesusajj lepra usuni tunka jaqenakampiw jikisïna. Uka usojja jukʼat jukʼatwa jañchirojj tukjaspa, amparankir kayunkir lukʼananakarusa jan ukajj jiñchurusa tukjaspawa (Números 12:10-12). Jehová Diosan Leyiparjamajja, lepra usuni jaqejj “qʼañütwa, qʼañütwa” sasaw arnaqasiñapäna, ukatjja sapakirakiw jakasiñapäna (Levítico 13:45, 46).

Ukatwa lepra usuni tunka jaqenakajj Jesusar jan jakʼachasipkänti, ukampis wali jachʼatwa Jesusar akham artʼapjjäna: “Jesús, Yatichiri, nanakat khuyaptʼayasipjjeta” sasa. Jesusajj jupanakar uñjäna ukhajja, akham sarakïnwa: “Sacerdotenakamp uñjayasir sarapjjam” sasa (Lucas 17:13, 14). Ukham sasajja Jesusajj Diosan Leyip respetatapwa uñachtʼayäna. Leyirjamajja, sacerdotenakaw lepra usut qollatäjjapjjäna uka jaqenakarojj qʼomäjjewa sasin sapjjañapäna. Ukhamatwa mayni jaqenakampi chikajj jakasipjjaspäna (Levítico 13:9-17).

Uka tunka jaqenakajja, Jesusajj milagronak lurañataki chʼamanïtapat janiw pächasipkänti. Ukatwa sacerdotenakan ukar sarapjjäna, janïras qollatäpkchïnjja sarapjjänwa. Thak sarkasasti jukʼat jukʼatwa jañchinakapajj kʼumaraptjjäna. Jesusar confiyapjjatapatwa ukham qollatäjjapjjäna.

Lepra usupat qollasirinakatjja, llätunkanejj thak sarasipkakïnwa. Ukampis mä jaqejj Jesusan ukaruw kuttʼanïna. Jupajj samaritano jaqënwa. ¿Kunarus kuttʼanïna? Qollatäjjatap laykuw Jesusar wal yuspärañ munäna. Diosajj kunjamsa jupar qolläna uk yatisajj “arnaqtʼasisaw Diosar jachʼañchäna” (Lucas 17:15). Jesusampi jikisipjjäna ukhajja, oraqer puriñkam altʼasisaw jupar yuspäräna.

Jesusajj jupa jakʼankir jaqenakarojj akham sänwa: “¿Janit tunka chachanakar qollaskänjja? ¿Kawkinkapjjarak llätunkanisti? ¿Janit jupanakat maynis Diosar jachʼañchirejj kuttʼanipki? Yaqha markankir jaqekirakis kuttʼanejjä” sasa. Ukjjarojj samaritano jaqerojj akham sänwa: “Sartasin sarjjam, Diosar confiyatam laykojj walikëjjtawa” sasa (Lucas 17:17-19).

Uka lepra usuni tunka jaqenakaru qollasajja, kunjamsa Jehová Diosajj jupar yanaptʼaskäna ukwa uñachtʼayäna. Lepra usunïpkäna uka tunkanitjja, maynejj janiw Jesusan yanaptʼapamp qollatakejj uñjaskänti, jan ukasti jakañ thakiruw sarjjatjjpachäna. Jichha tiemponjja, janis Diosajj nayra tiempjam Jesusampi qollaykchejja, jiwasatï Jesusar creyiñäni ukhajja, jakañ thakiruw sarjjatañäni, wiñay jakañwa katoqarakiñäni. Jiwasajj samaritano jaqjamarakiw yuspärasirïñasa.