Зәбур

37 Шәр иш ҝөрәнләрдән өтрү ганыны гаралтма,

Һагсызлыг едәнләрин пахыллығыны чәкмә,

 2 Чүнки онлар от кими тез гурујаҹаг,

Јашыл чәмәнтәк саралыб-солаҹаглар.

 3 Сән Јеһоваја ҝүвән, јахшылыг ет,

Јер үзүндә јаша, сәдагәтлә аддымла.

 4 Гој сәадәтин Јеһова олсун,

О, гәлбинин мурадыны чин едәр.

 5 Јолуну Јеһоваја тапшыр,

Она ҝүвән, О, сәнин ишини һасил едәр.

 6 Салеһлијини сүбһ шәфәгитәк,

Әдаләтини ҝүнорта ҝүнәшитәк парладар.

 7 Јеһованын һүзурунда сүкут ет,

Ону сәбирлә ҝөзлә.

Фитнә-фәсадла уғур газанан

Адамдан өтрү ганыны гаралтма.

 8 Гәзәби бурах, һиддәтдән чәкин,

Дилхор олуб шәрә әл атма*.

 9 Писләрин көкү кәсиләҹәк,

Јеһоваја ҝүвәнәнләр исә јер үзүнә саһиб олаҹаг.

10 Аз галыб!

Артыг пис адам олмајаҹаг,

Јеринә бахаҹагсан, о, јохдур.

11 Һәлимләр јер үзүнә саһиб олаҹаг,

Әмин-аманлығын боллуғундан һәзз алаҹаглар.

12 Шәр адам салеһин гәсдинә дурур,

Она диш гыҹајыр.

13 Амма Јеһова она ҝүләҹәк,

Ахы билир ки, онун сону ҝәлир.

14 Шәр адамлар гылынҹ чәкир, каман ҝәрир,

Мәзлуму, фағыры јыхмаг үчүн,

Јолу дүрүст оланын ҹаныны алмаг үчүн.

15 Лакин гылынҹлары өз үрәкләринә батаҹаг,

Каманлары гырыг-гырыг олаҹаг.

16 Салеһин аз малы,

Чохлу шәр адамын сәрвәтиндән јахшыдыр.

17 Чүнки шәрләрин голу сынаҹаг,

Салеһләрә исә Јеһова арха дураҹаг.

18 Јеһова саф инсанларын нәләр чәкдијини билир,

Онларын мирасы даима дураҹаг.

19 Дара дүшәндә хәҹаләт чәкмәјәҹәкләр,

Аҹлыг ҝүнләриндә тох јашајаҹаглар.

20 Шәр адамлар исә јох олаҹаг,

Јеһованын дүшмәнләри әлван чәмәнтәк солуб ҝедәҹәк,

Думан кими дағылаҹаглар.

21 Шәр адам борҹ ҝөтүрәр, гајтармаз,

Салеһ адам исә сәхавәтлидир, әлиачыгдыр.

22 Аллаһын мүбарәк бәндәләри јерә саһиб олаҹаг,

Онун ләнәтләдији кәсләринсә көкү кәсиләҹәк.

23 Јеһова инсанын јолундан разы галанда

Онун аддымларыны јөнәлдир.

24 О инсан бүдрәсә дә јыхылмаз,

Чүнки Јеһова онун әлиндән тутур.

25 Ҹаванлығымдан бәри, бу гоҹа јашымадәк,

Нә салеһ адамын атылдығыны,

Нә дә өвладларынын чөрәк диләндијини ҝөрмәмишәм.

26 О, һәмишә сәхавәтлә борҹ верәр,

Өвладлары да хејир-бәрәкәт ҝөрәр.

27 Шәрдән гачыб јахшылыг етсән,

Әбәди јашајарсан.

28 Чүнки Јеһова әдаләти севир,

Садиг бәндәләрини тәрк етмәз.

Онлар даима һифз олунар,

Писләринсә нәсли кәсиләҹәкдир.

29 Салеһләр јерә саһиб олаҹаг,

Орада әбәди јашајаҹаглар.

30 Салеһ адамын ағзындан һикмәт төкүлүр,

Дилиндән әдаләт јағыр.

31 Аллаһынын гануну онун гәлбиндәдир,

Ајағы бүдрәмәз.

32 Шәр адам салеһи ҝүдүр,

Ону өлдүрмәк үчүн фүрсәт ахтарыр.

33 Лакин Јеһова салеһи шәр адамын әлинә салмаз,

Ону мәһкәмәдә тәгсирли чыхармаз.

34 Үмидини Јеһоваја бағла, Онун јолуну тут,

О, сәни јүксәлдәҹәк, јер үзүнә саһиб олаҹагсан,

35 Амансыз, залым адамы ҝөрдүм,

Јашыл ағаҹтәк гол-будаг атмышды өз торпағында.

36 Лакин гәфил солду, јох олуб ҝетди,

Ахтардым ону, тапмадым.

37 Камил адама фикир вер,

Әмәлисалеһә бах,

Белә адамын ҝәләҹәји әмин-аман олаҹаг.

38 Лакин асиләрин һамысы мәһв едиләҹәк,

Шәр адамларын ахыры јохдур.

39 Салеһләрин хиласы Јеһовадандыр,

Дар ҝүндә онларын пәнаһы Одур.

Онлары шәр адамын әлиндән гуртарыб ниҹат верәҹәк,

Чүнки Она сығыныблар.