Фәсил 17
Аиләдә Аллаһа сәдагәт ҝөстәрин
1. Аллаһын Кәламындакы рәһбәрлијә риајәт етмәк бир чох аиләләрә неҹә тәсир едиб?
ЈЕҺОВА никаһын Банисидир вә аилә үчүн ән јахшы рәһбәрлији Онун Кәламында тапмаг олар. Бир чохлары бу рәһбәрлијә риајәт етмәклә аиләдә сәадәтә говушмушлар. Тәрифәлајиг һалдыр ки, кәбинсиз јашајанлардан бәзиләри өз никаһларыны гануни шәкилдә гејдијјата салмышлар. Диҝәрләри никаһдан кәнар әлагәләрә сон гојмушлар. Һәјат јолдашы вә ушаглары илә кобуд рәфтар едән кишиләр, аилә үзвләри илә меһрибан вә мүлајим доланмағы өјрәнмишләр.
2. Мәсиһчиләр аилә һәјатында нәји нәзәрә алмалыдырлар?
2 Мәсиһчиләр аилә һәјатында бир сыра амилләри — никаһын өмүрлүк олмасыны, аиләдә өз мәсулијјәтләрини неҹә јеринә јетирдикләрини вә аилә үзвләри илә неҹә даврандыгларыны нәзәрә алмалыдырлар (Ефеслиләрә 5:33–6:4). Амма Мүгәддәс Китабын аилә һәјаты һагда нә дедијини билмәк бир шеј, онун мәсләһәтинә риајәт етмәк исә тамам башга шејдир. Бизләрдән һеч ким Аллаһын әмрләриндән бојун гачырдыгларына ҝөрә Исанын иттиһам етдији адамлара бәнзәмәк истәмәзди. О адамлар үздә мөминлик ҝөстәрмәјин кифајәт олдуғуну дүшүнәрәк јанылырдылар (Матта 15:4-9). Биз јалныз үздә Аллаһа сәдагәтимизи ҝөстәриб евдә бу кејфијјәти унутмаг истәмирик. Биз Аллаһа һәгигәтән сәдагәтли олдуғумузу ҝөстәрмәк истәјирик. Бу доғрудан да «бөјүк газанҹдыр» (1 Тимотејә 5:4; 6:6; 2 Тимотејә 3:5).
Никаһын өмрү нә гәдәр олмалыдыр?
3. а) Бир чох никаһлара нә үз верир, амма биз нәјә гәтијјәтли олмалыјыг? б) Мүгәддәс Китаб васитәсилә абзасдакы суаллара ҹаваб верин.
3 Бүтүн дүнјада никаһ телләри ҝетдикҹә зәифләјир. Бәзиләри узун илләр бирҝә јашадыгдан сонра, башга адамла аилә гурмаг үчүн һәјат јолдашындан бошанырлар. Һәмчинин, ҝәнҹләр арасында аилә гуруб тезликлә ајрылмаг артыг ади һала чеврилмишдир. Башгаларынын неҹә һәрәкәт етдикләринә бахмајараг, биз Јеһоваја мәгбул тәрздә јашамалыјыг. Она ҝөрә дә ҝәлин ашағыдакы суалларын вә ајәләрин үзәриндә дүшүнәрәк Аллаһын Кәламында никаһын өмрү һаггында нә дејилдијини арашдыраг.
Аилә гуран киши вә гадын бирликдә нә гәдәр јашамаға һазыр олмалыдырлар? (Марк 10:6-9; Ромалылара 7:2, 3).
Бошаныб башгасы илә евләнмәјә Аллаһын изн вердији јеҝанә сәбәб һансыдыр? (Матта 5:31, 32; 19:3-9).
Јеһова Аллаһ Мүгәддәс Китаба ҝөрә әсасы олмајан бошанма һалларына неҹә мүнасибәт бәсләјир? (Малаки 2:13-16, КМ).
Мүгәддәс Китаб аиләдәки проблемләри һәлл етмәк мәгсәдилә әрлә арвадын ајры јашамасына тәрәфдардымы? (1 Коринфлиләрә 7:10-13).
Әрлә арвадын ајры јашамасына һансы һалларда һагг газандырмаг олар? (Мәзмур 11:5; Лука 4:8; 1 Тимотејә 5:8).
4. Никаһы мөһкәм едән амилләр һансылардыр?
4 Бәзи никаһлар мүвәффәгијјәтли вә мөһкәмдир. Бунун сәбәби нәдәдир? Ваҹиб амилләрдән бири одур ки, аилә гурмаг үчүн киши вә гадын кифајәт гәдәр јеткин олмалыдырлар. Һәмчинин аиләдә марагларын охшарлығы вә ачыг үнсијјәт етмәк баҹарығы да ваҹибдир. Ән әсасы одур ки, никаһа ҝирән адамлар Јеһованы севмәли вә проблемләрин һәллини Онун Кәламында ахтармалыдырлар (Мәзмур 119:97, 104; 2 Тимотејә 3:16, 17). Аилә һәјаты арзу етдикләри кими алынмаса, беләләри истәдикләри вахт ајры јашајаҹагларыны вә ја бошанаҹагларыны дүшүнмәјәҹәкләр. Онлар һәјат јолдашларынын нөгсанларыны бәһанә ҝәтирмәклә өз вәзифәләриндән бојун гачырмајаҹаглар. Әксинә, белә адамлар чәтинликләрлә үзләшәндә онларын өһдәсиндән ҝәлмәјә чалышаҹаглар.
5. а) Јеһоваја сәдагәт аиләдә һансы јери тутмалыдыр? б) Мүгавимәтлә үзләшәндә белә, Јеһованын нормаларына садиг галмаг инсана һансы хејир-дуалары ҝәтирә биләр?
5 Шејтан иддиа едир ки, биз дара дүшәндә Јеһованын јолларыны тәрк едәҹәјик (Әјјуб 2:4, 5; Сүлејманын мәсәлләри 27:11). Һәрчәнд, Јеһованын Шаһидләринин әксәријјәти һәјат јолдашларынын һәгигәтә мүгавимәт ҝөстәрдикләринә ҝөрә әзијјәт чәксәләр дә, өз никаһ әһдләрини позмамышлар. Онлар Јеһоваја вә Онун әмрләринә садиг галмышлар (Матта 5:37). Бәзиләринин дөзүмлүлүјү илләр өтдүкдән сонра мүкафатланмышдыр: һәјат јолдашлары Јеһоваја ибадәтдә онлара гошулмушлар! (1 Петер 3:1, 2). Лакин бәзи мәсиһчиләрин әр јахуд арвадлары өз бахышларыны дәјишмәмиш вә ја һәјат јолдашлары Јеһоваја хидмәт етдикләринә ҝөрә онлары атмышлар. Белә баҹы-гардашларымыз аиләдә Аллаһа сәдагәтли галдыглары үчүн хејир-дуа алаҹагларына әминдирләр (Мәзмур 55:22; 145:16).
Аиләдә һәр кәсин өз ролу вар
6. Никаһын уғурлу олмасы үчүн һансы принсипә һөрмәт ҝөстәрмәк лазымдыр?
6 Әрлә арвадын бир-бириндән ајрылмамасы никаһы өз-өзлүјүндә уғурлу етмир. Онларын Јеһованын гојдуғу башчылыг принсипинә һөрмәт ҝөстәрмәси чох ваҹибдир. Бу һалда аиләдә гајда-ганун јараныр, аилә үзвләри өзләрини тәһлүкәсиз һисс едирләр. 1 Коринфлиләрә 11:3 ајәсиндә охујуруг: «Һәр әрин башы Мәсиһ, арвадын башы әр, Мәсиһин башы исә Аллаһдыр».
7. Аиләдә башчылыг неҹә иҹра олунмалыдыр?
7 Ајәнин әввәлиндәки фикрә диггәт јетирдин? Бәли, һәр әрин Башы Мәсиһдир вә әрләр Мәсиһә табе олмалыдырлар. Бу о демәкдир ки, әр Мәсиһә хас кејфијјәтләрлә башчылыг етмәлидир. Мәсиһ Јеһоваја табедир, јығынҹағы үрәкдән севиб онун гајғысына галыр (1 Тимотејә 3:15). Мәсиһ һәтта «онун уғрунда өзүнү фәда етди». Иса тәкәббүрлү вә егоист дејил, әксинә ‘һәлим вә гәлбдән тәвазөкардыр’. Онун башчылығы алтында оланлар ‘ҹанларына раһатлыг тапырлар’. Әр аиләси илә бу ҹүр даврананда Мәсиһә табе олдуғуну ҝөстәрир. О заман мәсиһчи гадына әри илә әмәкдашлыг етмәк хош олаҹаг, о, әрин башчылығына табе олмағын фајдасыны ҝөрәҹәк (Ефеслиләрә 5:25-33; Матта 11:28, 29; Сүлејманын мәсәлләри 31:10, 28).
8. а) Нә үчүн елә ҝөрүнә биләр ки, бәзи аиләләрдә мәсиһчи үсуллары ишә јарамыр? б) Белә вәзијјәтә дүшәндә нә етмәк лазымдыр?
8 Проблемләр һөкмән баш галдыраҹаг. Ола билсин, аилә үзвләриндән кимдәсә башгаларынын ҝөстәришләринә гулаг асмамаг вәрдиши Мүгәддәс Китаб принсипләрини тәтбиг етмәкдән габаг дәрин көк салмышдыр. Арабир елә ҝөрүнә биләр ки, ширин дил вә хош рәфтар ишә јарамыр. Мүгәддәс Китаб дејир ки, биз «һиддәт, гәзәб, чығырты» вә тәһгирамиз сөзләри өзүмүздән узаглашдырмалыјыг (Ефеслиләрә 4:31). Бәс аилә үзвләриндән кимәсә санки башга һеч бир шеј тәсир етмирсә, онда неҹә? Иса она һәдә-горху ҝәләнләрә вә ону сөјәнләрә тај олмурду, әксинә Атасына ҝүвәнирди (1 Петер 2:22, 23). Буна ҝөрә дә аиләдә чәтинлик јарананда бу дүнјанын инсанлары кими давранма, дуада Јеһовадан көмәк дилә. Бу јолла Аллаһа сәдагәтли олдуғуну нүмајиш етдирәҹәксән (Сүлејманын мәсәлләри 3:5-7).
9. Јерли-јерсиз ирад тутмаг әвәзинә, бир чох әрләр һансы јахшы јолу сечибләр?
9 Дәјишикликләр өзүнү тез бүрузә вермир, амма Мүгәддәс Китаб мәсләһәтинә сәбирлә вә сәјлә әмәл етмәк мүтләг бәһрә ҝәтирәҹәк. Бир чох әрләр гејд едирләр ки, Мәсиһин јығынҹагла неҹә даврандығыны дәрк етдикдән сонра аиләләриндә аб-һава јахшылашыб. Јығынҹаг камил инсанлардан ибарәт дејил. Бунунла белә, Иса јығынҹағы чох севир, она јахшы нүмунә ҝөстәрир вә Мүгәддәс Јазыларын васитәсилә онун јахшылашмасына көмәк едир. О, јығынҹаг уғрунда өзүнү фәда етди (1 Петер 2:21). Исанын нүмунәси бир чох мәсиһчи әрләри јахшы аилә башчысы олмаға вә аилә һәјатларынын јахшылашмасы наминә мәһәббәтлә чалышмаға тәшвиг едиб. Бунун күсмәкдән вә јахуд јерсиз ирадлардан даһа чох хејри олур.
10. а) Һәтта мәсиһчи әр вә ја арвад белә, аиләдә башгалары үчүн неҹә чәтинлик јарада биләрләр? б) Вәзијјәти дүзәлтмәкдән өтрү нә етмәк олар?
10 Бәс әҝәр әр аиләсинин емосионал тәләбатларына бармагарасы бахыр, Мүгәддәс Китабын аиләви өјрәнилмәси вә диҝәр тәдбирләри тәшкил етмәк үчүн тәшәббүс ҝөстәрмирсә, нә етмәли? Јахуд арвад Аллаһа мәгбул итаәткарлыг ҝөстәрмәјиб әри илә әмәкдашлыг етмәкдән бојун гачырырса, онда неҹә? Бәзиләри аиләдә јаранмыш проблемләри һөрмәтҹил формада мүзакирә етмәклә јахшы нәтиҹәләр әлдә едибләр (Јарадылыш 21:10-12; Сүлејманын мәсәлләри 15:22). Нәтиҹә ҝөзләдијимиз кими олмаса да, һәр биримиз һәјатымызда Аллаһын руһунун сәмәрәсини јетишдирмәклә вә аилә үзвләри илә меһрибанҹасына рәфтар етмәклә аиләдә аб-һаванын јахшылашмасына тәсир ҝөстәрә биләрик (Галатијалылара 5:22, 23). Уғур башгаларынын аддым атмасыны ҝөзләјәндә дејил, Аллаһа сәдагәтимизи аиләдә өз вәзифәмизи иҹра етмәклә ҝөстәрәндә ҝәләҹәк (Колослулара 3:18-21).
Ҹавабы һарадан тапмаг олар
11, 12. Аиләләрин хошбәхтлији үчүн Јеһова Аллаһ нә тәгдим едир?
11 Инсанлар аилә мәсәләләри илә бағлы мәсләһәт үчүн мүхтәлиф мәнбәләрә мүраҹиәт едирләр. Лакин биз билирик ки, ән јахшы мәсләһәтләри Аллаһын Кәламында тапмаг олар. Јеһоваја миннәтдарыг ки, О ҝөрүнән тәшкилаты васитәсилә бизә бу мәсләһәтләрә әмәл етмәји өјрәдир. Сән бу көмәкдән там истифадә едирсән? (Мәзмур 119:129, 130; Микеја 4:2).
12 Јығынҹаг ҝөрүшләринә ҝәлмәклә јанашы, Мүгәддәс Китабын мүнтәзәм аиләви өјрәнилмәсинә вахт ајырырсан? Бу, аиләнизи Јеһоваја ибадәтдә бирләшдирәҹәк. Аллаһын Кәламындакы мәсләһәтләри өз шәраитиниздә тәтбиг едәндә аиләниз даһа да мөһкәмләнәҹәк (Ганунун тәкрары 11:18-21).
13. а) Аилә мәсәләләри илә бағлы суаллара ҹаваблары һарадан тапа биләрик? б) Гәбул етдијимиз гәрарлар нәјә шәһадәт етмәлидир?
13 Јәгин ки, аилә һәјаты илә бағлы суалларын вар. Мәсәлән, аиләни неҹә планлашдырмалы? Аборта һансыса һалларда бәраәт газандырмаг олармы? Руһани шејләрә мараг ҝөстәрмәјән ушагдан аилә илә бирликдә ибадәтдә нә дәрәҹәдә иштирак етмәји тәләб етмәк олар? Бу нөв суаллардан бир чоху Јеһованын Шаһидләринин нәшрләриндә мүзакирә едилмишдир. Ҹаваблары Мүгәддәс Китаб нәшрләринин вә индексин көмәји илә тапмағы өјрән. Индексдә истинад едилән нәшрләр сәндә јохдурса, Падшаһлыг Залындакы китабханаја бах. Бәлкә бу нәшрләри компүтер васитәсилә охумаг имканын вар. Суалларыны һәм дә јығынҹагдакы јеткин баҹы вә гардашларла мүзакирә едә биләрсән. Анҹаг һәр суала «олар» вә ја «олмаз» ҹавабы ҝөзләмә. Чох вахт гәрары сән өзүн вә ја әр-арвад кими икиниз бир јердә вермәлисиниз. Гој гәбул етдијиниз гәрарлар ҝөстәрсин ки, сиз јалныз үздә дејил, аиләдә дә Аллаһа сәдагәтлисиниз (Ромалылара 14:19; Ефеслиләрә 5:10).
Тәкрар үчүн суаллар
• Јеһова Аллаһа вә һәјат јолдашына гаршы сәдагәт бир-бири илә неҹә бағлыдыр?
• Аиләдә чәтинликләрлә үзләшәндә Аллаһа мәгбул тәрздә давранмағымыза нә көмәк едәҹәк?
• Аиләдә аб-һаванын јахшылашмасы үчүн башгалары бир шеј етмәјәндә белә, биз нә едә биләрик?
[155-ҹи сәһифәдәки шәкил]
Әр Мәсиһә хас кејфијјәтләрлә башчылыг етмәлидир
[157-ҹи сәһифәдәки шәкил]
Мүгәддәс Китабын мүнтәзәм аиләви өјрәнилмәси аиләни бирләшдирир