Фәсил 18
«Онлар дүнјадан дејилләр»
1. а) Иса өлүмүндән габаг нә һагда дуа етмишди? б) ‘Дүнјадан олмамаг’ нәјә ҝөрә бу гәдәр ваҹибдир?
ЕДАМ олунмасындан габагкы ҝеҹә Иса шаҝирдләри үчүн дуа етди. Онларын Шејтан тәрәфиндән ҝүҹлү тәзјигә мәруз галаҹағыны биләрәк Иса Атасына деди: «Мән хаһиш етмирәм ки, Сән онлары дүнјадан ҝөтүрәсән. Хаһиш едирәм ки, онлары шәрдән горујасан. Мән дүнјадан олмадығым кими, онлар да дүнјадан дејилләр» (Јәһја 17:15, 16). Нә үчүн дүнјадан кәнар дурмаг бу гәдәр ваҹибдир? Чүнки дүнјаны Шејтан идарә едир. Мәсиһчиләр онун һакимијјәти алтындакы дүнјанын бир һиссәси олмаг истәмирләр (Лука 4:5-8; Јәһја 14:30; 1 Јәһја 5:19).
2. Иса һансы мәнада дүнјадан дејилди?
2 Исанын дүнјадан олмамасы, һеч дә онун башгаларыны севмәдијини билдирмирди. Әксинә о, хәстәләрә шәфа верир, өлүләри дирилдир вә һамыја Аллаһын Падшаһлығы һаггында данышырды. Иса һәтта өзүнү инсанларын јолунда фәда етди. О, Шејтан дүнјасынын руһуну ачыг-ајдын тәзаһүр етдирәнләрин јарамаз бахышларыны вә ишләрини севмирди. Буна ҝөрә дә инсанлары әхлагсыз истәкләрдән, мадди шејләрә јөнүмлү һәјат тәрзиндән вә шан-шөһрәт ахтармагдан чәкиндирирди (Матта 5:27, 28; 6:19-21; Лука 20:46, 47). Тәәҹҹүблү дејил ки, Иса бу дүнјанын сијасәтинә дә гарышмырды. Өзү јәһуди олса да, Рома империјасы илә јәһудиләр арасындакы сијаси чәкишмәләрдә һеч бир тәрәфи тутмурду.
«Мәним Падшаһлығым бу дүнјадан дејилдир»
3. а) Јәһудиләрин дин рәһбәрләри Пилатын гаршысында Исанын әлејһинә һансы иттиһамлары ирәли сүрдүләр вә нә үчүн? б) Исанын јердә падшаһлыг етмәк нијјәтиндә олмамасы нәдән ҝөрүнүр?
3 Ҝәлин бахаг јәһудиләрин дин рәһбәрләри Исаны һәбс едиб Рома валиси Понти Пилатын јанына ҝәтирәндә нә баш верди. Иса о рәһбәрләрин ријакарлығыны ифша етдији үчүн онлар әл-ајаға дүшмүшдүләр. Вали, Исаја гаршы ҹәза тәдбири ҝөрсүн дејә, дин рәһбәрләри белә бир иттиһам ирәли сүрдүләр: «Биз бу адамы халгы јолдан чыхармагда, гејсәрә верҝи вермәји гадаған етмәкдә вә Өзүнә Һөкмдар Мәсиһ адыны вермәкдә тәгсирли тапдыг» (Лука 23:2). Бу ағ јалан иди, чүнки бир ил өнҹә халг Исаны падшаһ гојмаг истәјәндә о имтина етмишди (Јәһја 6:15). О билирди ки, ҝәләҹәкдә ҝөјдә Падшаһ олаҹаг (Лука 19:11, 12). Бундан әлавә, ону тахта инсан јох, Јеһова чыхармалы иди.
4. Верҝиләрлә әлагәдар Иса һансы мөвгени тутурду?
4 Исанын һәбсиндән үч ҝүн әввәл фәрисејләр верҝи өдәмәк мәсәләсиндә ону сөздә тутуб ҝүнаһландырмаға ҹәһд ҝөстәрдиләр. Иса буну анлајыб деди: «“Мәнә бир динар [рома сиккә пулу] ҝөстәрин: онун үзәриндә олан сурәт вә јазы киминдир?” Онлар ҹаваб вердиләр: “Гејсәрин”. Иса онлара деди: “Беләликлә гејсәринкини гејсәрә, Аллаһынкыны Аллаһа верин”» (Лука 20:20-25).
5. а) Иса һәбс заманы шаҝирдләринә нә өјрәтди? б) Иса өз һәрәкәтини неҹә изаһ етди? в) Мәһкәмәнин нәтиҹәси неҹә олду?
5 Иса гәтијјән халгы дүнјәви һакимијјәтләрә гаршы үсјан галдырмаға өјрәтмирди. Әсҝәрләр вә диҝәр адамлар Исаны һәбс етмәјә ҝәлдикдә Петер хәнҹәрини чәкиб о адамлардан биринин гулағыны кәсди. Амма Иса она деди: «Гылынҹыны јеринә гој, чүнки гылынҹ тутанларын һамысы гылынҹдан һәлак олаҹагдыр» (Матта 26:51, 52). Нөвбәти ҝүн өз һәрәкәтини Пилата изаһ едәндә Иса гејд етди: «Мәним Сәлтәнәтим бу дүнјадан дејилдир; әҝәр Мәним Сәлтәнәтим бу дүнјадан олсајды, нөкәрләрим ҹәһд едәрдиләр ки, Мән јәһуди идарәчиләрә тәслим едилмәјим» (Јәһја 18:36). Пилат Исада һеч бир ҝүнаһ тапмадығыны бојнуна алды, лакин ҹамаатын тәзјигинә тәслим олуб Исаны дирәјә мыхлатдырды (Лука 23:13-15; Јәһја 19:12-16).
Шаҝирдләр Исанын нүмунәсини изләјирләр
6. Еркән мәсиһчиләр дүнјанын руһунун тәсири алтында олмадыгларыны, ејни заманда инсанлары севдикләрини неҹә ҝөстәрирдиләр?
6 Исанын шаҝирдләри дүнјадан олмамағын һансы мәна кәсб етдијини баша дүшүрдүләр. Бу, дүнјанын аллаһсыз руһундан вә ишләриндән, о ҹүмләдән Рома сиркләриндә вә театрларында нүмајиш етдирилән зоракылыг вә әхлагсызлыгдан кәнарда дурмағы билдирирди. Белә ишләрдән кәнарда дурдуглары үчүн мәсиһчиләри бәшәр нәслинин дүшмәнләри адландырырдылар. Лакин онлар инсанларла дүшмәнчилик етмир, әксинә, Аллаһын бәшәријјәти хилас етмәк үчүн тәгдим етдији васитәдән башгаларынын да фајдаланмасына вар гүввәләри илә көмәк едирдиләр.
7. а) Еркән мәсиһчиләр бу дүнјадан олмадыглары үчүн нәјә мәруз галырдылар? б) Онлар дүнјәви һакимијјәтләрә вә верҝи өдәмәјә неҹә мүнасибәт бәсләјирдиләр вә нә үчүн?
7 Вахтилә дөвләт мәмурлары Исаны јанлыш мәлуматлар әсасында тәгиб етдикләри кими, онун шаҝирдләрини дә беләҹә тәгиб едирдиләр. Буна бахмајараг, ерамызын тәхминән 56-ҹы илиндә һәвари Павел Ромадакы мәсиһчиләрә јаздығы мәктубда онлары «һакимләрә» [дүнјәви һакимијјәтләрә] табе олмаға чағырырды, «чүнки Аллаһ тәрәфиндән олмајан һаким јохдур». Бу о демәк дејил ки, Јеһова дүнјәви һакимијјәтләри Өзү тәјин едир, садәҹә јер үзәриндә Онун Падшаһлығы бәргәрар олана гәдәр онларын мөвҹүдлуғуна изин верир. Буна ҝөрә дә Павел мәсиһчиләри дүнјәви һакимијјәтләрә һөрмәт етмәјә вә верҝи өдәмәјә тәшвиг едирди (Ромалылара 13:1-7; Титуса 3:1, 2).
8. а) Мәсиһчиләр дүнјәви һакимијјәтләрә нә дәрәҹәдә табе олмалыдырлар? б) Еркән мәсиһчиләр Исанын нүмунәсини неҹә изләјирдиләр?
8 Дүнјәви һакимијјәтләрә табечилик мүтләг јох, нисби олмалыдыр. Инсан ганунлары Јеһованын ганунларына зидд ҝәләндә Аллаһын хидмәтчиләри Онун ганунларына табе олмалыдырлар. Ҝәлин бахаг бир китабда еркән мәсиһчиләр һагда нә дејилир: «Мәсиһчиләр Рома вәтәндашларынын мүәјјән вәзифәләрини иҹра етмәкдән имтина едирдиләр. Мәсиһчиләр... һәрби хидмәтә ҝетмәји өз иманларына хәјанәт кими һесаб едирдиләр. Онлар сијаси вәзифәләр тутмур, императора пәрәстиш етмирдиләр» («Он тһе Роад то Ҹивилизатион—А Wорлд Һисторј»). Јәһуди али мәһкәмәси шаҝирдләрә тәблиғ етмәји гәти гадаған етдикдә онлар белә ҹаваб вердиләр: «Инсанлардан артыг, Аллаһа итаәт етмәк ҝәрәкдир» (Һәвариләрин ишләри 5:27-29).
9. а) Нә үчүн ерамызын 66-ҹы илиндә Јерусәлимдәки мәсиһчиләр абзасда шәрһ едилдији кими һәрәкәт етдиләр? б) Онларын нүмунәси бизә һансы фајданы ҝәтирә биләр?
9 Сијаси вә һәрби гаршыдурмаларда мәсиһчиләр там битәрәф идиләр. Ерамызын 66-ҹы илиндә јәһудиләр гејсәрә гаршы гијам галдырдылар. Рома ордусу дәрһал Јерусәлими мүһасирәјә алды. Бәс шәһәрдәки мәсиһчиләр нә етдиләр? Онлар Исанын Јерусәлими тәрк етмәк барәдәки сөзләрини унутмамышдылар. Ромалылар бир мүддәтә ҝери чәкиләндә, мәсиһчиләр Иордан чајынын о тајындакы дағлыг әразијә, Пелла шәһәринә гачдылар (Лука 21:20-24). Онларын битәрәф мөвгеји бу ҝүнәдәк садиг мәсиһчиләр үчүн ҝөзәл өрнәкдир.
Ахыр ҝүнләрдә мәсиһчи битәрәфлији
10. а) Јеһованын Шаһидләри һансы ишлә фәал сурәтдә мәшғулдурлар вә нә үчүн? б) Онлар һансы мәсәләдә битәрәфдирләр?
10 Ахыр ҝүнләрдә еркән мәсиһчиләрин нүмунәсини изләјиб там битәрәф мөвге тутан инсанлар вармы? Тарих нә дејир? Бәли, вар. Бу адамлар Јеһованын Шаһидләридир. Бүтүн бу вахт әрзиндә онлар салеһлији севәнләрә јалныз Аллаһын Падшаһлығынын һәгиги сүлһ, фираванлыг вә хошбәхтлик ҝәтирәҹәјини усанмадан тәблиғ едирләр (Матта 24:14). Милләтләр арасындакы мүнагишәләрдә Јеһованын Шаһидләри һәмишә там битәрәф олублар.
11. а) Јеһованын Шаһидләринин битәрәф мөвгеји руһаниләрин мөвгејиндән неҹә фәргләнир? б) Јеһованын Шаһидләри башгаларынын сијасәтә гарышмасына неҹә јанашырлар?
11 Јеһованын Шаһидләринин там әксинә олараг, дүнја динләринин руһаниләри фәал сурәтдә сијасәтә гарышырлар. Бәзи өлкәләрдә руһаниләр сечкигабағы кампанијаларда иштирак едир, бу вә ја диҝәр намизәдләри ја дәстәкләјир, ја да әлејһинә чыхырлар. Бәзи руһани лидерләр һәтта сијаси вәзифәләр тутурлар. Диҝәрләри исә руһаниләрин хејир-дуа вердији лајиһәләри гәбул етдирмәк үчүн сијаси хадимләрә тәзјиг ҝөстәрирләр. Лакин Јеһованын Шаһидләри сијасәтә гошулмурлар. Ејни заманда онлар һеч кимә сијаси партијалара дахил олмаға, сијаси вәзифә тутмаға вә ја сечкиләрдә иштирак етмәјә мане олмурлар. Иса демишди ки, онун давамчылары дүнјадан олмајаҹаг, она ҝөрә дә Јеһованын Шаһидләри сијасәтә гәтијјән гарышмырлар.
12. Дүнја динләринин тәрәфкешлији нәјә ҝәтириб чыхарыр?
12 Исанын дедији кими, милләтләр даим мүһарибәләр апармышлар. Тарихдә нечә-нечә вәтәндаш мүһарибәләри олмушдур (Матта 24:3, 6, 7). Руһани лидерләр демәк олар һәмишә вурушан тәрәфләрдән бирини дәстәкләмиш вә өз тәрәфдарларыны да буна тәшвиг етмишләр. Бу нә илә нәтиҹәләниб? Ејни динин нүмајәндәләри садәҹә ајры-ајры милләтләрә вә ја гәбиләләрә мәнсуб олдугларындан бир-бирини гырырлар. Бу, Аллаһын ирадәсинә зиддир (1 Јәһја 3:10-12; 4:8, 20).
13. Фактлар Јеһованын Шаһидләринин битәрәфлији һаггында нә дејир?
13 Амма Јеһованын Шаһидләри бүтүн чәкишмәләрдә там битәрәф олмушлар. «Ҝөзәтчи Гүлләси»нин 1939-ҹу ил 1 нојабр сајында јазылмышды: «Рәббин тәрәфиндә оланларын һамысы, вурушан халглара гаршы битәрәф галаҹаглар». Јеһованын Шаһидләри бүтүн өлкәләрдә вә һансы шәраитдә олурса олсунлар, битәрәф мөвгеләрини индијәдәк горујуб сахламышлар. Онлар јол вермирләр ки, дүнјанын нифаг салан сијасәти вә мүһарибәләри онларын бејнәлхалг гардашлығыны дағытсын. Јеһованын Шаһидләри артыг ‘гылынҹларындан котан, низәләриндән исә дәрјаз дүзәлтмишләр’. Битәрәф олдуглары үчүн онлар савашмағы өјрәнмирләр (Јешаја 2:3, 4; 2 Коринфлиләрә 10:3, 4).
14. Јеһованын Шаһидләри дүнјадан олмадыглары үчүн нәләрлә үзләширләр?
14 Јеһованын Шаһидләринин битәрәф мөвгеји дүнјада һансы әкс-сәда доғурур? Иса демишди: «Дүнјадан дејилсиниз... бунун үчүн дүнја сизә нифрәт едир» (Јәһја 15:19). Јеһованын Шаһидләриндән бир чоху Аллаһа хидмәт етдикләри үчүн һәбсханалара салыныб. Бәзиләри ишҝәнҹәләрә мәруз галмыш вә ја биринҹи әср мәсиһчиләри кими өлдүрүлмүшләр. Бунун сәбәби одур ки, «бу әсрин танрысы» Шејтан, дүнјадан олмајан Јеһованын хидмәтчиләри илә дүшмәнчилик едир (2 Коринфлиләрә 4:4; Вәһј 12:12).
15. а) Бүтүн милләтләрин агибәти неҹә олаҹаг? б) Дүнјадан кәнарда дурмаг нә үчүн олдугҹа ваҹибдир?
15 Јеһованын хидмәтчиләри дүнјадан олмадыгларына ҝөрә чох севинирләр, чүнки бүтүн милләтләрин Һар-Меҝидонда баша чатаҹаг сону јахынлашыр (Даниел 2:44; Вәһј 16:14, 16; 19:11-21). Биз дүнјадан кәнарда дурдуғумуз үчүн онларын агибәтинә шәрик олмајаҹағыг. Биз бир халг кими јалныз Аллаһын сәмави Падшаһлығына сәдагәтлијик. Дүнјадан олмадығымыз үчүн биз ришхәнд вә тәгибләрә мәруз галырыг. Амма бу чох тезликлә битәҹәк, чүнки Шејтанын пис дүнјасы әбәдилик јох едиләҹәк. Јеһоваја хидмәт едәнләр Онун Сәмави Падшаһлығынын идарә етдији салеһ јени дүнјада әбәди јашајаҹаглар (2 Петер 3:10-13; 1 Јәһја 2:15-17).
Тәкрар үчүн суаллар
• Иса ‘дүнјадан олмамағын’ мәнасыны неҹә ачыглады?
• Еркән мәсиһчиләр а) бу дүнјанын руһу, б) дүнјәви һакимијјәтләр, в) верҝи өдәмәк барәдә нә дүшүнүрдүләр?
• Мүасир дөврдәки Јеһованын Шаһидләринин битәрәф мөвгеји нәдән бәлли олур?
[165-ҹи сәһифәдәки шәкил]
Иса изаһ етди ки, өзү вә шаҝирдләри «дүнјадан дејилләр»