Мај

Биринҹи әсрдә «бүтүн јер үзүндә» бәрк гытлыг башлајанда бу, мәсиһиләрдән дә јан кечмәди. Јәгин, аилә башчыларыны дәрд ҝөтүрмүшдү ки, евдәкиләри неҹә доландыраҹаглар. Бәс хидмәтләрини ҝенишләндирмәк истәјән ҝәнҹләр барәдә нә демәк олар? Бәлкә дә онлар дүшүнүрдүләр ки, бу мәгсәдләрини бир мүддәтлик гыраға гојмалы олаҹаглар. Һәр неҹә олса да, мәсиһиләр вәзијјәтә ујғунлашдылар. Онлар тәблиғ ишиндә баҹардыглары гәдәр иштирак едирдиләр вә нәләри вар идисә, Јәһудијјәдәки диндашлары илә бөлүшүрдүләр (Һәв. 11:29, 30). Мадди јардым аланлар билаваситә Јеһованын гајғысыны дујдулар (Мәт. 6:31—33). Јәгин, онларын дадына чатан диндашлары илә мүнасибәтләри даһа да мөһкәмләнди. Ианә едәнләр, һәмчинин јардым ишинә һәр һансы јолла дәстәк оланлар исә вермәјин ҝәтирдији хошбәхтлији даддылар (Һәв. 20:35). w23.04 с. 16, абз. 12, 13

Бәзән Јеһова дуамыза ҹаваб олараг Она хидмәт етмәјән инсанлары бизә көмәк етмәјә тәшвиг едә биләр. Мәсәлән, Нәһәмја Јерусәлимә гајыдыб шәһәри бәрпа етмәк истәјирди. Јеһова Артаксеркс падшаһ васитәсилә онун бу истәјини јеринә јетирди (Нәһ. 2:3—6). Бу ҝүн дә Јеһова Она хидмәт етмәјән инсанлары тәшвиг едә биләр ки, Өз садиг хидмәтчиләринин дадына чатсын. Дуаларымыза алдығымыз ҹаваб һәмишә ҝөзәчарпан шәкилдә олмур. Амма алдығымыз ҹаваблар бизим Јеһоваја садиг галмағымыза көмәк едир. Она ҝөрә дә диггәтли олун ки, Јеһованын дуаныза вердији ҹавабы ҝөрәсиниз. Вахташыры Јеһованын дуаларыныза неҹә ҹаваб вердији барәдә дүшүнүн (Зәб. 66:19, 20). Иманымыз тәкҹә дуа етмәјимиздән ҝөрүнмүр. Јеһованын дуамыза вердији ҹавабы һәр тәгдирдә гәбул етмәклә дә иман ҝөстәририк (Ибр. 11:6). w23.05 с. 12, абз. 13; с. 12—13, абз. 15, 16

Өзүмүзү Јеһоваја һәср едәндә сөз вермишдик ки, Она ибадәт едәҹәјик вә ирадәсини јеринә јетирәҹәјик. Биз сөзүмүзүн үстүндә дурмалыјыг. Әһдимизә ујғун јашамаг ағыр дејил. Ахы Јеһова бизи јарадыб ки, ирадәсини јеринә јетирәк (Вәһј 4:11). О, дахилимизә Ону танымаг, Она ибадәт етмәк истәји гојуб вә бизи Өз бәнзәриндә јарадыб. Бунун сајәсиндә Она јахынлаша вә истәјини јеринә јетирмәкдән һәзз ала билирик. Бундан әлавә, Аллаһын ирадәсини јеринә јетирәндә вә Исанын нүмунәсини изләјәндә ҹанымыз тәравәтләнир (Мәт. 11:28—30). Одур ки, Јеһоваја мәһәббәтинизи мөһкәмләндирин. Бунун үчүн Јеһованын сизә артыг вердији вә ҝәләҹәкдә верәҹәји немәтләр барәдә дүшүнүн. Аллаһа мәһәббәтиниз артдыгҹа Она итаәт етмәк сизә даһа асан олаҹаг (1 Јәһ. 5:3). Иса Мәсиһ Јеһованын ирадәсини јеринә јетирә билмишди, чүнки Ондан көмәк истәјирди вә диггәтини алаҹағы мүкафата ҹәмләмишди (Ибр. 5:7; 12:2). Сиз дә онун кими дуада Јеһовадан ҝүҹ истәјин вә әбәди һәјат үмидинизи даима ағлынызда сахлајын. w23.08 с. 27—28, абз. 4, 5

Сәбирли инсаны ким севмәз? Нәјисә ҝөзләјәркән өзүндән чыхмајан инсанлары ҝөрәндә онлара һөрмәтимиз јараныр. Сәһвимизә бахмајараг бизимлә сәбирлә давранан инсанлара дәјәр веририк. Бизә Мүгәддәс Китабы өјрәдән мүәллимләримизә дә миннәтдарыг. Онларын сәбрини аз сынамамышыг. Биз Мүгәддәс Китабдакы һәгигәтләри өјрәнәнә, гәбул едәнә вә тәтбиг едәнә кими онлар нә гәдәр ҝөзләмәли олублар. Ән әсасы исә бизимлә сәбирлә давранан Јеһова Аллаһа миннәтдарыг! Инсанларда сәбир хүсусијјәтини дәјәрләндирсәк дә, бәзән өзүмүз сәбирли ола билмирик. Мәсәлән, тыхаҹда илишиб галанда сакитлији горумаг чәтин олур. Өзү дә ки, һараса ҝеҹикириксә, сәбримиз лап тарыма чәкилир. Јахуд да кимсә бизи гыҹыгландыранда һөвсәләдән чыхырыг. Бәзән исә Јеһованын вәд етдији јени дүнјаны ҝөзләмәјә сәбримиз чатмыр. Бунунла белә, биз бүтүн бу саһәләрдә сәбир ҝөстәрмәлијик. w23.08 с. 20, абз. 1, 2

Јеһованын бујруғу илә Ҹәдун ордунун сајыны 99 фаиздән чох азалтмышды. О белә дүшүнә биләрди: «Бу дәјишиклији етмәк чох ваҹибдир? Бунун һансыса хејри олаҹаг?» Бунунла белә, Ҹәдун Јеһованын ҝөстәришинә бојун әјди. Ағсаггаллар да тәшкилатдан ҝәлән дәјишикликләрә Ҹәдун кими јанашырлар (Ибр. 13:17). Јеһовадан алдығы тапшырыг Ҹәдун үчүн горхулу, тәһлүкәли оланда белә о, итаәт едирди (Һак. 9:17). Јеһова Ҹәдуну она дајаг олаҹағына дәфәләрлә әмин етмишди. Буна ҝөрә дә о архајын иди ки, Јеһова она халгы горумаға көмәк едәҹәк. Фәалијјәтимизин гадаған олундуғу әразиләрдә јашајан ағсаггаллар Ҹәдундан өрнәк ҝөтүрүр. Онлар ҹәсарәтлә јығынҹаға вә тәблиғ ишинә рәһбәрлик едирләр, һалбуки буна ҝөрә һәбс олуна, сорғу-суала тутула, ишләрини итирә вә ја гәддарлыгла үзләшә биләрләр. Бөјүк мүсибәт заманы ағсаггаллара ҹәсарәт лазым олаҹаг ки, һәтта тәһлүкәли олса белә ҝөстәришләрә әмәл етсинләр. w23.06 с. 5—6, абз. 12, 13

Јеһова баш каһин Јәһјадајын јахшы әмәлләрини бизә нәсиһәт олараг Мүгәддәс Китабда јаздырыб (Ром. 15:4). Јәһјадај өләндә исә Јеһова ону хүсуси бир шәрәфә лајиг ҝөрдү. «Ону Давуд шәһәриндә падшаһларын јанында дәфн етдиләр. Чүнки о, Исраилдә Аллаһ үчүн вә мәбәд үчүн јахшы ишләр ҝөрмүшдү» (2 Салн. 24:15, 16). Јәһјадајын әһвалаты һәр биримизә үрәјимиздә Аллаһ горхусу јетишдирмәјә көмәк едә биләр. Ағсаггаллар Јәһјадајдан нүмунә ҝөтүрәрәк јығынҹағы горујурлар (Һәв. 20:28). Јашлылар Јәһјадајын нүмунәсиндән өјрәнирләр ки, әҝәр онлар да Јеһовадан горхсалар вә Она садиг галсалар, Јеһова онларын васитәсилә Өз нијјәтини һәјата кечирәҹәк. Ҝәнҹләр исә Јеһованын Јәһјадајла рәфтарындан нүмунә ҝөтүрүрләр. Онлар јашлылара, әсас да узун илләрдир Јеһоваја хидмәт едән баҹы-гардашлара һөрмәт ҝөстәрирләр (Мәс. 16:31). Ҝәлин «рәһбәрлик едән» гардашлара дәстәк олаг. Буну онлара итаәткарлығымызла ҝөстәрә биләрик (Ибр. 13:17). w23.06 с. 17—18, абз. 14, 15

Јығынҹагда нә гәдәр әл галдыраҹағыныза гәрар верәркән һикмәтли олун. Әлинизи тез-тез галдырсаныз, ҝөрүшү апаран гардаш өзүнү мәҹбур биләҹәк ки, һәр дәфә сизә сөз версин. Онда сиз бир нечә дәфә шәрһ вердијиниз һалда, башгалары һеч шәрһ вермәјәҹәк. Нәтиҹәдә онлар руһдан дүшүб, әлләрини һеч галдырмајаҹаглар (Ваиз 3:7). Ола билсин, мүзакирә заманы чох адам әл галдырдығы үчүн истәдијиниз гәдәр шәрһ верә билмәјәсиниз. Һәтта бәзән ола биләр ки, сизә һеч сөз верилмәсин. Бу, хош дејил. Амма чалышмалыјыг ки, һәмин гардашын бизимлә гәсд-гәрәзлији олдуғуну дүшүнмәјәк (Ваиз 7:9). Әҝәр истәдијиниз гәдәр шәрһ верә билмирсинизсә, бәлкә, башгаларынын шәрһләрини диггәтлә динләјәсиниз вә ҝөрүшдән сонра онлары шәрһләринә ҝөрә тәрифләјәсиниз? Сизин тәриф сөзләриниз баҹы-гардашлары вермәк истәдијиниз шәрһ гәдәр руһландыра биләр. w23.04 с. 23—24, абз. 14—16

Аллаһын Кәламыны мүталиә едиб үзәриндә дүшүнүн. Ағаҹын көкү дәриндирсә, о, мөһкәм дајанаҹаг. Ејнилә бизим дә иманымыз мөһкәмдирсә, мәтин дура биләҹәјик. Ағаҹ бөјүдүкҹә көкү даһа да дәринә ҝедир вә шахәләнир. Биз дә Аллаһын Кәламыны мүталиә едәндә иманымыз мөһкәмләнир вә даһа да әмин олуруг ки, Онун ганун вә принсипләри мүкәммәлдир (Кол. 2:6, 7). Јеһованын өјүд-нәсиһәтләринин, вердији мүдафиәнин кечмишдә хидмәтчиләринә неҹә көмәк етдији барәдә дүшүнүн. Мисал үчүн, Һизгијал ҝөрүнтүдә мәләјин мәбәди өлчдүјүнү ҝөрмүшдү вә буна диггәт кәсилмишди. Бу ҝөрүнтү ону мөһкәмләндирди. Биз бу ҝөрүнтүдән өјрәнирик ки, Јеһованын пак ибадәт үчүн гојдуғу ганунлара неҹә риајәт етмәлијик (Һизг. 40:1—4; 43:10—12). Биз дә Аллаһын Кәламындакы дәринликләри мүталиә етмәк, үзәриндә дүшүнмәк үчүн вахт ајыранда бөјүк фајда әлдә едирик. Јеһоваја ҝүвәнмәјин сајәсиндә үрәјимиз мәтин ола биләр (Зәб. 112:7). w23.07 с. 18, абз. 15, 16

Мүгәддәс Китабда өрнәк ҝөтүрәҹәјиниз чохлу мөмин инсанларын нүмунәси вар. Гәдимдә јашамыш бу кишиләр Аллаһын јолу илә ҝедир вә Онун халгынын гајғысына галмаг үчүн мүхтәлиф ишләр ҝөрүрдүләр. Бундан башга, аиләниздәки вә јығынҹағыныздакы јеткин мәсиһи гардашлардан да өрнәк ҝөтүрә биләрсиниз (Ибр. 13:7). Ән әсасы исә Иса Мәсиһин мүкәммәл нүмунәсини изләјә биләрсиниз (1 Бут. 2:21). Бу инсанларын һәјатларына нәзәр салдыгҹа онларын ҝөзәл кејфијјәтләри барәдә фикирләшин (Ибр. 12:1, 2). Сонра исә дүшүнүн ҝөрүн онлара бәнзәмәк үчүн нә едә биләрсиниз. Сағламдүшүнҹәли инсан тез-тәләсик гәрар вермир, аддымларыны јүз өлчүб бир бичир. Одур ки, бу хүсусијјәтә јијәләнмәк вә ону горумаг үчүн вар ҝүҹүнүзлә чалышын. Мүгәддәс Китаб принсипләрини өјрәнин вә онлара әмәл етмәјин фајдасы барәдә дүшүнүн. Сонра өјрәндијиниз принсипләри тәтбиг едәрәк Јеһованы разы салан гәрарлар верин (Зәб. 119:9). Бу, јеткин мәсиһилијә доғру атылан бөјүк бир аддымдыр (Мәс. 2:11, 12; Ибр. 5:14). w23.12 с. 24—25, абз. 4, 5

Валидејнләр өвладларына өјрәдә биләр ки, кимсә онларын етигады илә разы олмадығыны дејәндә мүлајим ҹаваб версинләр (Јаг. 3:13). Бәзи валидејнләр аиләви ибадәт заманы буну мәшг едир. Онлар мәктәбдә јарана биләҹәк һансыса бир мөвзуну сечир, ону мүзакирә едир вә неҹә ҹаваб вермәји сәһнәләшдирирләр. Һәмчинин өвладларына мүлајим, хош шәкилдә данышмағы өјрәдирләр. Практики мәшғәләләр мәсиһиләрә тутарлы дәлилләр ҝәтирмәјә көмәк едир. Һәмчинин онларын өзләри дә әмин олур ки, инандыгларынын әсаслы сәбәбләри вар. Бизим jw.org сајтымызда «Ҝәнҹләрин суаллары» силсилә мәгаләләри вә јенијетмәләр үчүн чалышма вәрәгәләри јерләшир. Бу вәрәгәләр елә тәртиб олунуб ки, ҝәнҹләр етигадларына даһа да әмин олсунлар вә өз сөзләри илә ҹаваб һазырласынлар. Бу мәгаләләри вә чалышма вәрәгәләрини аиләликҹә арашдырмаг һамымыза көмәк едә биләр ки, иманымызы мүлајимликлә, хош шәкилдә мүдафиә едә биләк. w23.09 с. 17, абз. 10; с. 18—19, абз. 15, 16

Нә вахтса олуб ки, гаршыныза руһани мәгсәд гојасыныз, амма она чатмагда чәтинлик чәкәсиниз? Белә вәзијјәтлә чохлары үзләшиб. Мәсәлән, Филип адлы бир гардаш мәгсәд гојмушду ки, дуаја тез-тез вахт ајырсын вә дуаларыны јахшылашдырсын. Амма о, дуа етмәк үчүн вахт тапмаға чәтинлик чәкирди. Ерика баҹынын мәгсәди о иди ки, тәблиғ ҝөрүшләринә вахтында ҝетсин. Амма о, јенә дә, демәк олар ки, һәр ҝөрүшә ҝеҹикирди. Ола билсин, сиз дә гаршыныза һансыса мәгсәд гојмусунуз, амма һәлә бу мәгсәдинизә чатмамысыныз. Дүшүнмәјин ки, даһа мәгсәдинизә чата билмәјәҹәксиниз. Ән садә мәгсәдә белә чатмаг бир ҝүнүн ичиндә мүмкүн дејил. Бунун үчүн вахт вә зәһмәт чәкмәк лазымдыр. Мәгсәдинизә һәлә дә ҹан атмағыныз ҝөстәрир ки, Јеһова илә мүнасибәтләриниз сизин үчүн әзиздир вә Онун үчүн әлиниздән ҝәләнин ән јахшысыны етмәк истәјирсиниз. Јеһова сизин ҹәһдләринизи гијмәтләндирир. Әлбәттә, О сиздән баҹарығыныздан артығыны ҝөзләмир (Зәб. 103:14; Мик. 6:8). Одур ки, гаршыныза чата биләҹәјиниз мәгсәд гојун. Шәраитинизи нәзәрә алын. w23.05 с. 26, абз. 1, 2

Ҹәсарәтли инсан горху һисси кечирә биләр, амма бу она дүзҝүн давранмаға мане олмур. Дәнјал чох ҹәсур бир ҝәнҹ иди. О, пејғәмбәрләрин јаздыгларыны, о ҹүмләдән Әрәмјанын пејғәмбәрликләрини мүталиә едирди. Бунун сајәсиндә о, мүәјјән етмишди ки, јәһудиләр узун сүрән Бабил әсарәтиндән тезликлә азад олунаҹаглар (Дән. 9:2). Дәнјал Јеһованын сөзүнүн дүз чыхдығыны ҝөрәндә Она етибары мөһкәмләнди. Инсанда Аллаһа мөһкәм етибар оланда исә онда гејри-ади ҹәсарәт олур. (Ромалылара 8:32, 37—39 ајәләри илә әлагәләндирин.) Ән әсасы Дәнјал дуадан галмырды (Дән. 6:10). О, Јеһоваја ҝүнаһларыны етираф едирди, бүтүн үрәјини Она ачырды. Һәмчинин Ондан көмәк истәјирди (Дән. 9:4, 5, 19). Дәнјал бизим кими ади инсан иди, о, ҹәсарәт хүсусијјәти илә доғулмамышды. О бу хүсусијјәти мүталиә, дуа вә Јеһоваја етибар сајәсиндә јетишдирмишди. w23.08 с. 2—3, абз. 4; с. 4, абз. 7

Һөкумәтә табе олмағын һәм өзүмүзә, һәм дә башгаларына хејри вар. Мәсәлән, гануну позмадығымыз үчүн ҹәза алмырыг (Ром. 13:1, 4). Һәмчинин итаәткарлығымыз сајәсиндә һөкумәт Јеһованын Шаһидләри барәдә јахшы фикирдә олур. Мисал үчүн, узун илләр әввәл Ниҝеријада әсҝәрләр ҝөрүш вахты ибадәт евинә дахил олмушду. Онлар верҝијә гаршы олан гијамчылары ахтарырды. Амма рәис «Јеһованын Шаһидләри верҝи әлејһдарлары дејил» дејиб әсҝәрләрә әмр етди ки, залы тәрк етсинләр. Һәр дәфә һөкумәтин ганунларына табе оланда Аллаһын халгынын репутасијасыны даһа да јахшылашдырырсыныз. Бу исә ҝүнләрин бир ҝүнү диндашларынызы горуја биләр. w23.10 с. 9, абз. 13

Јеһованын хидмәтчиләринин бәзиләри Шејтан дүнјасынын сонунун ҝәлмәсини узун илләрдир ҝөзләјир. Адама елә ҝәлә биләр ки, Јеһованын вәди ҝеҹикир. Јеһова хидмәтчиләринин бу ҹүр һиссләр кечирдијини билир. Одур ки, Һәбгуг пејғәмбәрә демишди: «Вахты чатанда бу вәһј ҝерчәкләшәҹәк, о, иҹрасына тәләсир, јалан чыхмајаҹаг. Ҝеҹикән кими ҝөрүнсә белә, ону ҝөзлә, чүнки мүтләг ҝерчәкләшәҹәк. Ҝеҹикмәјәҹәк!» (Һәб. 2:3). Бәс бу сөзләр тәкҹә Һәбгуг пејғәмбәрә аид иди? Јохса бизим үчүн дә һансыса мәнаны кәсб едир? Һәвари Булус Јеһованын бујруғу илә бу сөзләри јени дүнјанын интизарында олан мәсиһиләрә аид етмишди (Ибр. 10:37). Бәли, тамамилә әмин ола биләрик ки, гуртулушумуз ҝеҹикирмиш кими ҝөрүнсә дә, «мүтләг ҝерчәкләшәҹәк. Ҝеҹикмәјәҹәк!» w23.04 с. 30—31, абз. 16

Хејли исраилли Мусанын Јеһованын елчиси олдуғуну ҝөстәрән ајдын факты данды (Сај. 14:10, 11). Онлар Јеһованын Мусаја вердији сәлаһијјәти дәфәләрлә рәдд етдиләр. Нәтиҹәдә, Јеһова һәмин нәслин Вәд едилмиш дијара дахил олмасына изин вермәди (Сај. 14:30). Амма исраиллиләрин арасындан Јеһованын бујругларына ујғун даврананлар да вар иди. Мәсәлән, Јеһова демишди: «[Калиб] ҹан-дилдән Мәнә итаәт едир» (Сај. 14:24). Јеһова Калибә мүкафат верди, һәтта она Вәд едилмиш дијарда истәдији әразидә мәскунлашмаға изин верди (Јуш. 14:12—14). Сәһрада өлән исраиллиләрдән төрәјәнләр дә Јеһованын ҝөстәрдији јолла ҝедирди. Јушә Мусанын јеринә исраиллиләрин башчысы тәјин олунанда онлар Јушәјә «бүтүн өмрү боју еһтирам бәсләдиләр» (Јуш. 4:14). Нәтиҹәдә, Јеһова исраиллиләри мүкафатландырды, онлар Вәд едилмиш дијара дахил олдулар (Јуш. 21:43, 44). w24.02 с. 21, абз. 6, 7

Неҹә ки һәким нәбзимизи јохлајыб үрәјимизин сағламлығы илә бағлы мәлумат әлдә едир, ејнилә биз дә диндашларымыза олан севҝимизи јохлајыб Јеһоваја мәһәббәтимизин ҝүҹлү олуб-олмадығыны ҝөрә биләрик. Әҝәр ҝөрсәк ки, баҹы-гардашларымыза мәһәббәтимиз зәифләјиб, әввәлки кими дејил, демәли, Јеһоваја да мәһәббәтимиз зәифләмәјә башлајыб. Лакин диндашларымыза мүтәмади мәһәббәт ҝөстәририксә, бу, Јеһоваја мәһәббәтимизин ҝүҹлү олдуғундан хәбәр верир. Баҹы-гардашлара мәһәббәтимизин зәифләдијини ҝөрәндә һәјәҹан тәбили чалмалыјыг. Нәјә ҝөрә? Чүнки бу, Јеһова илә мүнасибәтимизин тәһлүкәдә олдуғундан хәбәр верир. Һәвари Јәһја бу фикирлә бағлы демишди: «Ҝөрдүјү гардашыны севмәјән адам ҝөрмәдији Аллаһы севә билмәз» (1 Јәһ. 4:20). Бурадан ваҹиб бир шеј өјрәнирик: јалныз «бир-биримизи» севдијимиз һалда Јеһова биздән разы галыр (1 Јәһ. 4:7—9, 11). w23.11 с. 8, абз. 3; с. 9, абз. 5, 6

Јуәс ушаг оланда атасыны итирди. Садиг баш каһин Јәһјадај ону һимајәсинә ҝөтүрүб өз оғлу кими бөјүтдү. Јуәс ағыллы давранды, Јәһјадајын вердији нәсиһәтләри гәбул етди. О, Јәһјадајдан өрнәк алараг Јеһоваја гуллуг етди вә халгы да буна сәсләди. Һәтта Јуәс Јеһованын мәбәдинин тәмир олунмасы үчүн тәдбир ҝөрдү (2 Салн. 24:1, 2, 4, 13, 14). Әҝәр сизә Јеһованы севмәк, Онун нормаларына ујғун јашамаг ашыланырса, буну гијмәтләндирин, бу сизә верилән бир һәдијјәдир (Мәс. 2:1, 10—12). Валидејнләр өвладларына мүхтәлиф јолларла тәлим-тәрбијә верир. Мүгәддәс Китаб әсасында верилән мәсләһәтләрә әмәл етсәниз, валидејнләринизин үрәји даға дөнәҹәк. Ән әсасы, Јеһованын гәлби севинәҹәк вә достлуғунуз мөһкәмләнәҹәк (Мәс. 22:6; 23:15, 24). Елә бу сәбәбләрә ҝөрә Јуәсин ушаг вахты гојдуғу нүмунәни изләмәјә дәјәр! w23.09 с. 8—9, абз. 3—5

Јеһова дуаларымызы ешидәҹәјинә сөз верир. О, садиг хидмәтчиләрини севдији үчүн онларын дуасына һеч вахт лагејд јанашмаз (Зәб. 10:17; 37:28). Амма бу о демәк дејил ки, Јеһова бизим бүтүн хаһишләримизи јеринә јетирәҹәк. Ола билсин, Јеһовадан хаһиш етдијимиз шејләрин бәзиләрини јалныз јени дүнјада алаг. Јеһова дуаларымызы динләјәндә Өз нијјәтини дә унутмур (Әшј. 55:8, 9). Јеһованын бир нијјәти одур ки, Јер үзүндә Онун һакимијјәтини үрәкдән гәбул едән инсанлар јашасын. Шејтанын фикринҹә исә инсанлар өзләри-өзләрини идарә етсәләр, даһа хошбәхт оларлар (Јар. 3:1—5). Шејтанын јаланыны ифша етмәк үчүн Јеһова инсанлара бир-бириләри үзәриндә һакимијјәт сүрмәјә изин верди. Нәтиҹә ҝөз габағындадыр: дүнја проблемләр ичиндә боғулур (Ваиз 8:9). Баша дүшүрүк ки, Јеһова бүтүн бу проблемләри бу дәгигә арадан галдырмајаҹаг. w23.11 с. 21, абз. 4, 5

Јеһова Ибраһимә вәд етмишди ки, онун васитәсилә «чохлу халглары» мүбарәк гылаҹаг. Амма иш онда иди ки, Ибраһимин артыг 100, Саранын исә 90 јашы вар иди, вәд едилмиш өвладлары исә һәлә олмамышды. Инсан ҝөзү илә баханда Ибраһимлә Саранын бундан сонра чәтин ки өвлады оларды. Һәр һалда, бу, Ибраһим пејғәмбәр үчүн дә бөјүк бир сынаг иди, амма «о, үмидини үзмәди, иман етди ки, чохлу халгларын атасы олаҹаг» (Ром. 4:18, 19). Ибраһимин үмиди боша чыхмады: узун илләр һәсрәтиндә олдуғу оғлу Исһаг дүнјаја ҝәлди (Ром. 4:20—22). Ибраһим пејғәмбәр кими биз дә Аллаһын разылығыны газаныб Онун досту ола биләрик. Булус да бу фикрә тохунмушду: «“Салеһ сајылды” сөзләри јалныз Ибраһим үчүн јазылмајыб, бу сөзләр һәм дә салеһ сајылаҹаг бизләрдән өтрү јазылыб, чүнки биз Ағамыз Исаны дирилдән Аллаһа инанырыг» (Ром. 4:23, 24). Демәли, Ибраһим пејғәмбәр кими бизим дә һәм иманымыз, һәм ҝөзәл әмәлләримиз, һәм дә үмидимиз олмалыдыр. w23.12 с. 7, абз. 16, 17

Сизи горхуја салан сынагла үзләшәндә јадда сахлајын ки, Јеһова сизин һал-һазырда нәләр јашадығынызы, һансы һиссләри кечирдијинизи ҝөрүр. Мәсәлән, Јеһова исраиллиләрин Мисирдә тәкҹә һансы һагсызлыгларла үзләшдикләриндән јох, «нә чәкдикләриндән» дә аҝаһ иди (Чых. 3:7). Амма сиздә суал јарана биләр: «Ҝөрәсән, мәни горхуја салан сынагла үзләшәндә Јеһова мәнә неҹә дајаг олур?» Јеһованын дәстәјини ҝөрмәк үчүн Ондан көмәк истәјин (2 Пад. 6:15—17). Сонра исә дүшүнүн: «Јығынҹагда һансыса нитг вә ја шәрһ сизи мөһкәмләндириб? Һансыса нәшр, видео вә ја маһны сизи руһландырыб? Кимсә сизинлә руһландырыҹы фикир вә ја ајә бөлүшүб?» Баҹы-гардашларын севҝисини, алдығымыз руһани гиданын дәјәрини бәзән унудуруг. Амма бунлар Јеһованын вердији бәнзәрсиз бәхшишләрдир (Әшј. 65:13; Марк 10:29, 30). Бунлар Јеһованын бизим гајғымыза галдығыны сүбут едир (Әшј. 49:14—16). Һәмчинин Онун етибара лајиг олдуғуну ҝөстәрир. w24.01 с. 4—5, абз. 9, 10

Иса Мәсиһ ҝөјә галхмаздан әввәл шаҝирдләринә хатырлатды ки, онлар «Јерусәлимдә, бүтүн Јәһудијјәдә вә Сәмәријјәдә, һәтта јерин уҹгарларынадәк» онун һаггында шаһидлик вермәлидирләр (Һәв. 1:8; Лука 24:46—48). Бунун үстүндән чох кечмәмиш јәһуди дин рәһбәрләри һәвари Бутрусу вә Јәһјаны тутуб Синедрионун өнүнә ҝәтирдиләр вә онлардан тәләб етдиләр ки, даһа тәблиғ етмәсинләр, һәтта онлары һәдәләдиләр (Һәв. 4:18, 21). Бутрусла Јәһја исә онлара белә деди: «Өзүнүз фикирләшин: Аллаһын гаршысында Аллаһы гојуб сизә гулаг асмаг нә дәрәҹәдә дүзҝүндүр? Биз ҝөрдүјүмүз вә ешитдијимиз шејләр барәсиндә данышмаја билмәрик» (Һәв. 4:19, 20). Бутрусла Јәһја азадлыға бурахыланда шаҝирдләр Јеһоваја дуа едиб Онун ирадәсини јеринә јетирмәк үчүн көмәк истәдиләр. Јеһова онларын бу сәмими дуасына ҹаваб верди (Һәв. 4:31). w23.05 с. 5, абз. 11, 12

Јеһова милјардларла ил севимли Оғлу илә бирҝә вахт кечириб. Бу илләр әрзиндә араларында мөһкәм мәһәббәт јараныб. Онларын мүнасибәти Каинатдакы ән гәдим мүнасибәтдир. Бу ҝүнүн ајәсиндән охудуғумуз кими Јеһова ајдын шәкилдә Исаны севдијини билдирмишди. Јеһова истәсәјди, садәҹә белә дејә биләрди: «Мән ондан разыјам». Амма О, Исаны «Мәним севимли Оғлум» адландырмышды, чүнки ону нә гәдәр чох севдијини билмәјимизи истәјирди. Јеһова Иса илә фәхр едирди, онун тезликлә атаҹағы аддыма ҝөрә гүрур дујурду (Ефес. 1:7). Иса Атасынын севҝисинә зәррә гәдәр дә шүбһә етмирди. Иса үчүн Јеһованын мәһәббәти о гәдәр ҝерчәк иди ки, буну үрәјинин дәринлијинә кими һисс едирди. Буна ҝөрә дә Атасынын ону севдијини дәфәләрлә демишди (Јәһ. 3:35; 10:17; 17:24). w24.01 с. 28, абз. 8

Белә бир вәзијјәти тәсәввүр един: сизә јахын олан бири барәниздә дәһшәтли шејләр данышыр. Сиз бунларын јалан олдуғуну билирсиниз. Амма бәзиләри буна инаныр, һәлә үстәлик, ҝедиб буну башгаларына да јајырлар, онлар да инаныр. Бу сизә неҹә тәсир едәрди? Бөјүк еһтимал ки, һаггынызда данышылан јаланлар ганынызы гаралдаҹаг. Бу нүмунә ҝөстәрир ки, адына гара јахылмасы Јеһоваја пис тәсир етмишди. Јеһованын руһани оғулларындан бири илк гадын олан Һәвваја Онун барәдә јалан данышмышды. Һәвва бу јалана инанды. О, әри Адәмлә бирҝә Јеһоваја үсјан етди. Бу да инсанлара ҝүнаһ вә өлүм ҝәтирди (Јар. 3:1—6; Ром. 5:12). Дүнјада ҝөрдүјүмүз бүтүн проблемләр — өлүм, мүһарибәләр вә әзаб-әзијјәт Шејтанын јајдығы јаланын уҹбатындандыр. Тәбии ки, барәсиндә сөјләнилән јаланлар вә бунун ҝәтирдији нәтиҹәләр Јеһоваја ағыр ҝедир. Бунунла белә, Јеһова аҹыглы, киндар дејил. Һәр шејә рәғмән, О јенә дә «хошбәхт Аллаһ»дыр (1 Тим. 1:11). w24.02 с. 8, абз. 1, 2

Јусиф кими сиз дә неҹә гәтијјәт ҝөстәрә биләрсиниз? Ҝүнаһа сүрүкләјән вәзијјәтлә үзләшәндә нә едәҹәјинизи индидән гәрарлашдырмагла. Јеһованын нифрәт етдији шејләрә «јох» демәји өјрәнин, бу шејләри һәтта ағлынызын уҹундан белә кечирмәјин (Зәб. 97:10; 119:165). Онда тәләјә дүшүб ҝүнаһ етмәјәҹәксиниз. Һәгигәти тапдығыныза әмин олсаныз да, Јеһоваја бүтүн гәлбинизлә ибадәт етмәк истәсәниз дә, ола билсин, һәлә дә нәләрсә сизи вәфтиз олунмагдан сахлајыр. Сиз дә Давуд падшаһ кими Јеһоваја јалварыб белә дејә биләрсиниз: «Худаја, мәни јохла, гәлбими өјрән, мәни имтаһан ет, нараһат дүшүнҹәләрими бил, ҝөр мәндә пис мејил вармы. Әбәдијјәт јолунда мәнә бәләдчи ол!» (Зәб. 139:23, 24). Јеһова «Ону ҹидд-ҹәһдлә ахтаранлара» мүкафат верир. Сиз дә вәфтизә доғру аддымламагла мәһз Ону ахтардығынызы ҝөстәрмиш олурсунуз (Ибр. 11:6). w24.03 с. 6—7, абз. 13—15

Гәдимдә баш каһин халгы Аллаһын өнүндә тәмсил едирди. Мүгәддәс чадыр тәсис олунанда Јеһова Һаруну Исраилин илк баш каһини тәјин етди. Лакин һәвари Булусун дедији кими «өлүм каһинләрин вәзифәдә галмасына мане олдуғундан чохлары каһин олуб бир-бирини әвәз етмәли олурду» (Ибр. 7:23—26). Үстәлик, баш каһинләр гејри-камил иди вә өз ҝүнаһлары үчүн дә гурбан ҝәтирмәли идиләр. Елә бу сәбәбдән Исраилин баш каһинләри илә али баш каһин Иса Мәсиһ арасында кәскин фәрг вар. Баш каһинимиз Иса «инсан әлинин дејил, Јеһованын гурдуғу һәгиги чадырда» хидмәт едир (Ибр. 8:1, 2). Булус изаһ етмишди ки, Иса «әбәди јашадығы үчүн ону әвәз едән каһин олмајаҹаг». Һәмчинин о, Исанын «пак, ҝүнаһлылардан фәргләнән» баш каһин олдуғуну демишди. Исраилдә хидмәт едән баш каһинләрдән фәргли олараг, онун өз «ҝүнаһларына ҝөрә һәр ҝүн гурбан тәгдим етмәсинә еһтијаҹ јохдур». w23.10 с. 26, абз. 8, 9

«Көһнә ҝөј» Шејтан вә ҹинләринин тәсири алтында олан сијаси һөкумәтләрдир (Мәт. 4:8, 9; 1 Јәһ. 5:19). Мүгәддәс Китабда «јер» дејиләндә бәзән јер үзүнүн сакинләри нәзәрдә тутулур (Јар. 11:1; Зәб. 96:1). Демәли, «көһнә јер» бу ҝүн јер үзүндә јашајан шәр инсанлардыр. Јеһова бу көһнә «ҝөјү» вә «јери» дүзәлтмәјә чалышмајаҹаг. Әксинә, онлары тамамилә мәһв едиб, «јени ҝөј»лә, јәни јени һөкумәтлә вә «јени јер»лә, јәни салеһ инсанларла әвәз едәҹәк. Јеһова Јер күрәсини дә, инсанлары да мүкәммәллијә чатдыраҹаг. Әшија пејғәмбәрин дә дедији кими бүтүн Јер күрәси ҹәннәтә, Әдән бағына чевриләҹәк. Јеһова һәмчинин һәр биримизи физики ҹәһәтдән сағлам едәҹәк. Ахсаглар, корлар, карлар сағалаҹаг, һәтта өлүләр дә дириләҹәк (Әшј. 25:8; 35:1—7). w23.11 с. 4, абз. 9, 10

«Бөјүк мүсибәт» гәфил башлајаҹаг (Мәт. 24:21). Амма бу бизим үчүн ҝөзләнилмәз олмајаҹаг. Чүнки диҝәр фәлакәтләрдән фәргли олараг, биз онун ҝәләҹәјини билирик. Тәхминән 2000 ил бундан әввәл Иса Мәсиһ давамчыларыны һәмин ҝүнә һазыр олмаға сәсләмишди. Әҝәр һазырлыглы олсаг, һәмин ағыр дөнәмдән һәм биз өзүмүз даһа раһат кечәҹәјик, һәм дә башгаларына көмәк едә биләҹәјик (Лука 21:36). Дөзүм бизә көмәк едәҹәк ки, Јеһоваја итаәт едәк вә Онун бизи горујаҹағына етибар едәк. Баҹы-гардашларымыза мадди зәрәр дәјсә вә ја онлар һәр шејләрини итирсәләр, нә едәҹәјик? (Һәб. 3:17, 18). Шәфгәтдән ирәли ҝәләрәк онлара јардым әли узадаҹағыг. Милләтләр бирлијинин һүҹуму заманы бир мүддәт баҹы-гардашларла бир јердә јашамалы олсаг, буна неҹә јанашаҹағыг? (Һизг. 38:10—12). Үрәјимиздә онлара бәсләдијимиз ҝүҹлү мәһәббәт сајәсиндә бу чәтин дөврдән кечә биләҹәјик. w23.07 с. 2, абз. 2, 3

Әр-арвадлар Аквилас вә Прискилладан чох шеј өјрәнә биләр. Биринҹи әсрдәки мәсиһиләрин онлара бөјүк һөрмәти вар иди (Ром. 16:3, 4). Онлар бирликдә ишләјирди, тәблиғ едирди вә башгаларына көмәк едирди (Һәв. 18:2, 3, 24—26). Үмумијјәтлә, Мүгәддәс Китабда Аквилас вә Прискилланын ады һәмишә бирликдә чәкилир. Әр-арвадлар онларын нүмунәсини неҹә изләјә биләр? Ҝүндәлик һәјатда һәр икинизин ҝөрәҹәји чох иш олур. Бәлкә, бәзи ишләри ајрылыгда ҝөрмәк әвәзинә, бир јердә едәсиниз? Мәсәлән, Аквилас вә Прискилла бир јердә тәблиғ едирди. Сиз дә мүнтәзәм белә едирсиниз? Һәмчинин Аквилас вә Прискилла бир јердә ишләјирди. Ола билсин, ејни јердә ишләмирсиниз. Бәс ев ишләрини бир јердә ҝөрә биләрсиниз? (Ваиз 4:9). Һансыса иши бир јердә ҝөрәндә бир команда кими олурсунуз вә сөһбәт етмәк имканыныз олур. w23.05 с. 22—23, абз. 10—12

Горху һисси һәр кәсдә олур. Мәсәлән, Талут падшаһ Давудун изинә дүшүб ону өлдүрмәк истәјирди. Буна ҝөрә дә Давуд ҹаныны ҝөтүрүб филиштлиләрин Ҹат шәһәринә гачмышды. Чох кечмәмиш орада да Ҹат падшаһы Ахыш өјрәнмишди ки, Давуд иҝид дөјүшчүдүр, һәтта он минләрлә филиштлини гырмасы илә бағлы онун адына нәғмә бәстәләниб. Давуд бундан бәрк горхмушду, чүнки Ахышын она нә едәҹәјини билмирди (1 Ишм. 21:10—12). Бәс Давуд горхуларына неҹә галиб ҝәлди? 56-ҹы мәзмурда Давуд Ҹатда оларкән кечирдији һиссләри ифадә едир. О бу мәзмурда горхусунун сәбәбини вә буна неҹә үстүн ҝәлдијини ачыглајыр. Давудун үрәјиндә горху олса да, о, Јеһоваја етибар едирди (Зәб. 56:1—3, 11). Бу, әбәс јерә дејилди. Јеһованын көмәји илә о, гејри-ади, амма ишә јарајан бир фәнд ишләтди: өзүнү дәлилијә вурду. Бајаг Давуду өлдүрмәк истәјән Ахыш инди ону өнүндән говур, беләҹә, Давуд ҹаныны гуртарыр (1 Ишм. 21:13—22:1). w24.01 с. 2—3, абз. 1—3

Ҝүнүн ајәсиндә сөһбәт кимләрдән ҝедир? Дирилмиш мәсһ олунмуш мәсиһиләрдән. Демәли, бөјүк мүсибәтин сонуна јахын онлардан ахырынҹысы да ҝөјә галханда алаҹаглары илк тапшырыг дөјүшмәк олаҹаг. Мәсһ олунмуш мәсиһиләр ҝөјә галхандан сонра Мәсиһлә вә онун мүгәддәс мәләкләри илә бирликдә Аллаһын дүшмәнләринә гаршы сонунҹу мүһарибәдә дөјүшәҹәкләр. Бир дүшүнүн: Јер үзүндә јашајан мәсһ олунмушларын бәзиләри чох јашлыдыр, тагәтдән дүшүб. Амма ҝөјдә јашамаг үчүн дириләндә онлар гүдрәтли, өлмәз руһани варлыглар олаҹаглар, Ҹәнҝавәр Падшаһ Иса Мәсиһлә бирликдә вурушаҹаглар. Армаҝеддон мүһарибәси битәндән сонра исә Иса илә чијин-чијинә хидмәт едиб инсанлара камилләшмәјә көмәк едәҹәкләр. Онлар ҝөјдә оланда дәјәрли баҹы-гардашларына јер үзүндә олдуглары вахтдан гат-гат даһа чох көмәк едә биләҹәкләр. w24.02 с. 6—7, абз. 15, 16

Бәзиләри вәфтиз олунмаға һазыр олсалар да, мүәјјән тәрәддүдләри вар. Кимсә дүшүнә биләр: «Бирдән вәфтиздән сонра ҹидди ҝүнаһ едиб јығынҹагдан кәнар едиләрәм». Әҝәр сиздә дә бу горху варса, әмин олун ки, Јеһова Онун адына лајиг јашајыб Ону там разы салмағыныз үчүн сизә көмәк едәҹәк (Кол. 1:10). Һәмчинин О, дүзҝүн давранмағыныз үчүн сизә ҝүҹ верәҹәк. Јеһова артыг чохларына көмәк етмәклә буну сүбут едиб (1 Кор. 10:13). Елә јығынҹагдан, демәк олар ки, чох аз адамын кәнар едилмәсинин бир сәбәби дә будур. Бәли, Јеһова халгына иманда мөһкәм галмаға көмәк едир. Биз ҝүнаһлы инсанлар пислијә мејиллијик (Јаг. 1:14). Амма бу мејилә ујуб-ујмамаг сечим мәсәләсидир вә бу сечими сиз едирсиниз. Реаллыг одур ки, неҹә јашајаҹағыныз, һәр бир һалда, сизин әлиниздәдир. Амма бу ҝүн бәзи инсанлар иддиа едиб дејир: «Инсанлар өз һиссләрини, һәрәкәтләрини идарә етмәјә гадир дејил». Бу, јанлыш фикирдир! Инсан јанлыш истәкләрини ҹиловлаја биләр. w24.03 с. 5—6, абз. 11, 12