Ијун

Јеһова биринҹи әсрдәки мәсиһиләрә јени вәзијјәтә ујғунлашдыгларына ҝөрә бол мүкафат верирди. Онлар тез-тез тәгиб олунурдулар. Бәзән исә бу, һеч ҝөзләмәдикләри вахтда олурду. Ҝәлин ҝөрәк Барнәба илә Булус Листрада тәблиғ едәркән башларына нә ҝәлмишди. Әввәл-әввәл шәһәрин сакинләри Булусҝили хош гаршылајыб, онлара гулаг асдылар. Амма сонра тәгибчиләр «ҹамааты гызышдырдылар» вә онлар Булусу даша басдылар, сонра да ону өлмүш саныб шәһәрдән кәнара атдылар (Һәв. 14:19). Буна бахмајараг, Барнәба илә Булус ҝедиб башга јердә тәблиғ етдиләр. Бәс нәтиҹә нә олду? Онлар «хејли шаҝирд» һазырладылар, үстәлик, сөзләри вә нүмунәләри илә диндашларыны мөһкәмләндирдиләр (Һәв. 14:21, 22). Бәли, Барнәба илә Булусун тәгибләр гаршысында тәслим олмамалары чох адама фајда ҝәтирди. Биз дә тәслим олмајыб Јеһованын бујурдуғу иши ҝөрсәк, немәт саһиби олаҹағыг. w23.04 с. 16—17, абз. 13, 14

Давуд падшаһын өмрү боју онун һәјатына тәһлүкә јарадан чохлу дүшмәнләри олуб вә о, һәмишә Јеһовадан дуада көмәк истәјирди. О әмин иди ки, Јеһова онун дуаларыны ешидир вә ҹавабландырыр. Сиз дә буна архајын ола биләрсиниз. Мүгәддәс Китаб бизи әмин едир ки, Јеһова проблемләрә дөзмәк үчүн бизә һикмәт вә ҝүҹ верә биләр. О һәмчинин руһани аиләмиз вә Она хидмәт етмәјән инсанлар васитәсилә дә бизә көмәк едә биләр. Дүздүр, Јеһова дуаларымыза һәмишә ҝөзләдијимиз тәрздә ҹаваб вермир, амма онлары ҹавабсыз да гојмур. О бизә нәјин нә вахт лазым олдуғуну јахшы билир. Одур ки, иманла дуа етмәјә давам един. Әмин олун ки, Јеһова һәм инди гејдинизә галаҹаг, һәм дә ҝәләҹәкдә јени дүнјада «һәр бир мәхлугу истәјинә» чатдыраҹаг (Зәб. 145:16). w23.05 с. 8—9, абз. 4; с. 13, абз. 17, 18

Чалышын мәгсәдинизә чатмағын хејри барәдә дүшүнәсиниз. Бунун сизә һансы хејри олаҹаг? Әҝәр мәгсәдиниз Мүгәддәс Китабы охумаг вә ја дуа етмәклә бағлыдырса, дүшүнүн ки, буна наил олсаныз, Јеһова илә достлуғунуз неҹә мөһкәмләнәҹәк (Зәб. 145:18, 19). Әҝәр мәгсәдиниз өзүнүздә һансыса мәсиһи хүсусијјәти јетишдирмәкдирсә, дүшүнүн ки, бу сизин башгалары илә мүнасибәтинизи неҹә јахшылашдыраҹаг (Кол. 3:14). Бәлкә, мәгсәдинизә чатмаг үчүн һансы сәбәбләринизин олдуғу илә бағлы бир сијаһы тутасыныз? Тез-тез бу сијаһыја ҝөз ҝәздирин. Һәмчинин сизи һәвәсләндирәҹәк инсанларла отуруб-дурун (Мәс. 13:20). Дүзүнү десәк, һамымызда елә ҝүнләр олур ки, өзүмүзү һәвәссиз һисс едирик. Бу о демәкдир ки, һәмин ҝүнләр мәгсәдимизә чатмаға ҹан атмамалыјыг? Хејр. Биз һәвәсимиз олмајанда белә, мәгсәдимизә чатмаг үчүн нәсә едә биләрик. Дүздүр, бу, бәзән асан олмур, амма мәгсәдинизә чатанда ҝөрәҹәксиниз ки, буна дәјәрди. w23.05 с. 27—28, абз. 5—8

Вердијимиз гәрара ҝөрә ҹавабдеһ олдуғумузу дәрк етсәк, ҝүнаһымызы бојнумуза алаҹағыг, сәһвимизи дүзәлдәҹәјик вә бир дә ону тәкрарламамаға чалышаҹағыг. Бу аддымлары атмаг һәјат уғрунда јарышда галмаға көмәк едәҹәк. Јанлыш гәрар вермисинизсә, гәбул един ки, олан-олуб, кечән-кечиб. Вахтынызы, ҝүҹүнүзү өзүнүзә бәраәт газандырмаға, јахуд да өзүнүзү вә башгаларыны ҝүнаһландырмаға сәрф етмәјин. Әксинә, сәһвинизи гәбул един вә индики вәзијјәтдә әлиниздән ҝәләни един. Әҝәр сәһвинизә ҝөрә өзүнүзү ҝүнаһкар һисс едирсинизсә, тәвазөкарлыгла Јеһоваја дуа един, сәһвинизи етираф един вә Ондан әфв диләјин (Зәб. 25:11; 51:3, 4). Инҹитдијиниз инсанлардан да үзр истәјин вә лазымдырса, көмәк үчүн ағсаггаллара јахынлашын (Јаг. 5:14, 15). Сәһвләриниздән нәтиҹә чыхарын вә онлары тәкрарламамаға чалышын. Онда архајын ола биләрсиниз ки, Јеһова сизә рәһм едәҹәк вә дајаг олаҹаг (Зәб. 103:8—13). w23.08 с. 28—29, абз. 8, 9

Јуәс падшаһын јахшы инсан кими формалашмасында Јәһјадајын бөјүк әмәји олмушдур. Буна ҝөрә дә ҝәнҹ падшаһ Јеһованы разы салмаг истәјирди. Амма Јәһјадај өләндән сонра Јуәс Јеһовадан узаглашмыш әмирләрин сөзүнә гулаг асды (2 Салн. 24:4, 17, 18). Бу, Јеһоваја ағыр ҝетди. «Јеһова онларын јанына дөнә-дөнә пејғәмбәрләр ҝөндәрди ки, онлары Өз јолуна гајтарсын... Онларса гулаг асмырды». Онлар һәтта Јәһјадајын оғлу Зәкәријјәнин сөзүнә дә гулаг асмадылар. Зәкәријјә һәм Јеһованын пејғәмбәри, һәм дә Јуәсин дост-доғмаҹа бибиси оғлу иди. Буна бахмајараг, Јуәс падшаһ Зәкәријјәни өлдүртдү (2 Салн. 22:11; 24:19—22). О, Аллаһ хофуну горумады. Јеһова демишди: «Мәнә һәгарәт едәни Мән дә алчалдаҹағам!» (1 Ишм. 2:30). Арамиләрин кичик гошуну Јуәсин бөјүк бир ордусуну мәғлуб етди, онун өзүнү исә ағыр јараладылар (2 Салн. 24:24, 25). Јуәсин әјанлары суи-гәсд гуруб ону өлдүрдүләр вә Зәкәријјәнин гисасыны алдылар. w23.06 с. 18—19, абз. 16, 17

Һәвари Булус бир нечә ил әрзиндә Ефесдә хош хәбәри тәблиғ етмишди (Һәв. 19:1, 8—10; 20:20, 21). О, баҹы-гардашларыны чох севирди вә истәјирди ки, онлара Јеһоваја садиг галмаға көмәк етсин. Ефеслиләр бир заманлар јалан динин тәсириндә идиләр, мөвһуматлара инанырдылар. Ефесин ҹамааты чох әхлагсыз иди вә етдикләриндән утанмырды. Шәһәрин театрларында, һәтта дини тәдбирләрдә дә әдәбсиз данышыг ади һал алмышды (Ефес. 5:3). Әһалинин чоху «абыр-һәјаны бүсбүтүн [итирмишди]». «Абыр-һәјаны бүсбүтүн итирмәк» ифадәси һәрфи мәнада бир нөв «һеч бир ағры һисс етмәмәк, һиссијјатсызлыг һәддинә ҝәлиб чатмаг» демәкдир (Ефес. 4:17—19). Ефеслиләр Јеһованын ҝөзүндә нәјин доғру, нәјин јанлыш олдуғуну өјрәнмәздән әввәл етдикләри сәһв һәрәкәтләрә ҝөрә виҹдан әзабы чәкмирдиләр. Ҝөрүнүр, Булус буна ҝөрә барәләриндә белә демишди: «Онлар әглән гаранлыгдадырлар,.. Аллаһа мәхсус һәјата гаршы јадлашыблар». Амма ефеслиләрин бәзиләри зүлмәтдән чыхдылар. w24.03 с. 20, абз. 2; с. 20—21, абз. 4—6

Ҹәдуна бир һаким кими өһдәсинә дүшән ишләри ҝөрмәк үчүн чохлу ҝүҹ сәрф етмәк лазым иди. Мәсәлән, бир дәфә ҝеҹәјарысы олан дөјүшдә мәдјәниләр гачмышдылар. Ҹәдун Јизраил вадисиндән Иордан чајына гәдәр онлары тәгиб етмишди (Һак. 7:22). Бәс Ҹәдун Иордан чајына чатыб дајанды? Хејр. О вә јанындакы 300 нәфәр јорғун-арғын олса да, чајы кечиб дүшмәни тәгиб етмәјә давам етдиләр. Ахырда онлар мәдјәниләри тутдулар вә мәғлуб етдиләр (Һак. 8:4—12). Ҹәдун Јеһованын она ҝүҹ верәҹәјинә етибар едирди вә етибары боша чыхмады (Һак. 6:14, 34). Бир дәфә Ҹәдун адамлары илә бирликдә ики Мәдјән падшаһыны тәгиб едирди. Падшаһлар дәвәнин белиндә иди, онлар исә пијада (Һак. 8:12, 21). Јеһованын көмәји илә Ҹәдунҝил онлары тутуб галиб ҝәлдиләр. Ағсаггаллар да Ҹәдун кими әсла јорулмајан, тагәтдән дүшмәјән Јеһова Аллаһа ҝүвәнмәлидирләр. Јеһова онлара ҝүҹ верәҹәк (Әшј. 40:28, 29). w23.06 с. 6, абз. 14; с. 7, абз. 16

Һансы сынагла үзләшириксә үзләшәк, үрәјимиз мәтин ола биләр. Одур ки, Јеһоваја етибар етмәлијик. Ҝәлин ҝөрәк Бәрәг Јеһованын ҝөстәришинә етибар етдији үчүн неҹә уғур газанды. Һәмин вахт өлкәдә нә бир галхан, нә бир низә ҝөзә дәјмирди. Амма Јеһова Бәрәгә бујурду ки, Кәнан ордусунун башчысы олан Сисара гаршы чыхсын. Сисарын ордусу јахшы силаһланмышды (Һак. 5:8). Пејғәмбәр Дәбурә Бәрәгә деди ки, дүзәнҝаһа ениб Сисар вә онун 900 арабасы илә гаршы-гаршыја дурсун. Бәрәг билирди ки, дүзәнҝаһда арабалара гаршы вурушмаг чох чәтин олаҹаг. Буна бахмајараг, о, итаәт етди. Исраиллиләр Табур дағындан енән вахт Јеһова ҝүҹлү лејсан ҝөндәрди. Она ҝөрә дә Сисарын арабалары палчыгда илишиб галды вә Јеһова Бәрәгә гәләбә верди (Һак. 4:1—7, 10, 13—16). Ејнилә әҝәр биз Јеһовадан вә Онун тәшкилатындан ҝәлән ҝөстәришләрә етибар етсәк, Јеһова бизә гәләбә газандыраҹаг. w23.07 с. 18—19, абз. 17, 18

Хилас олмағымыз үчүн сәбирли олмаг мүтләгдир. Јеһованын кечмишдәки садиг хидмәтчиләри кими биз дә Онун вәдләрини ҝерчәкләшдирәҹәји вахты сәбирлә ҝөзләмәлијик (Ибр. 6:11, 12). Мүгәддәс Китабда бизим вәзијјәтимиз әкинчинин вәзијјәтинә бәнзәдилир (Јаг. 5:7, 8). Әкинчи мәһсулу әкмәк вә суламаг үчүн чох әзијјәт чәкир, амма чох шеј ҝүнәшдән вә јағышдан асылы олдуғу үчүн онун дәгиг нә вахт јетишәҹәјини билмир. Буна ҝөрә дә о, сәбирлә ҝөзләјир вә әминдир ки, бир ҝүн әкдијини бичәҹәк. Ејнилә биз дә Ағанын «һансы ҝүн ҝәләҹәјини» билмәсәк дә, ибадәтимизлә бағлы ишләрлә мәшғул олуруг (Мәт. 24:42). Биз сәбирлә ҝөзләјирик, әминик ки, вахты чатанда Јеһова бүтүн вәдләрини јеринә јетирәҹәк. Әҝәр сәбирсиз олсаг, ҝөзләмәкдән јоруларыг вә јаваш-јаваш һәгигәтдән узаглашарыг. Һәмчинин сәбирсиз давраныб бизә инди һәзз верәҹәк шејләрин далынҹа ҝедәрик. Лакин сәбирли олсаг, ахыра кими дөзүб хилас олаҹағыг (Мик. 7:7). w23.08 с. 22, абз. 7

Дәнјал 2:41—43 ајәләриндәки пејғәмбәрлији «Дәнјал» вә «Вәһј» китабындакы диҝәр пејғәмбәрликләрлә тутушдуранда белә гәнаәтә ҝәлирик ки, ајаглар дүнјанын апарыҹы дөвләтләри олан Бөјүк Британија илә Бирләшмиш Штатлары тәмсил едир. Дәнјал пејғәмбәр бу иттифаг барәдә демишди ки, о, «гисмән мөһкәм, гисмән көврәк» олаҹаг. Бәс нәјә ҝөрә гисмән көврәк? Чүнки о, садә халга (јумшаг ҝилә) ҝөрә там ҝүҹү илә фәалијјәт ҝөстәрә билмир. Нәһәнҝ һејкәлин тәсвириндән ваҹиб дәрсләр өјрәнирик. Биринҹиси, Бөјүк Британија илә Бирләшмиш Штатлар гүдрәтли бир иттифаг олдуғуну сүбут едиб. Мәсәлән, Биринҹи вә Икинҹи Дүнја мүһарибәсиндә онлар галиб ҝәлән дөвләтләрин сырасында иди. Лакин вәтәндашлары арасында ҝедән дахили чәкишмәләрә ҝөрә бу дөвләтләр зәифләјиб вә зәифләмәјә давам едир. Икинҹиси, Аллаһын Падшаһлығы бүтүн инсан һөкумәтләринә сон гојмаздан әввәл Бөјүк Британија илә Бирләшмиш Штатлар һакимијјәт сүрән сон гүдрәтли дөвләтләр олаҹаг. w23.08 с. 10—11, абз. 12, 13

Давуд јашадығы проблемләр, үзләшдији сынаглар уҹбатындан һәрдән мәјус олурду (Зәб. 18:4, 5). Амма Јеһованын мәһәббәти, гајғысы она гүввәт верирди. Јеһова проблемләрдән тәнҝә ҝәлмиш достуну «јашыл отлагларда динҹәлдир», «јахшы суварылан сакит јерләрә апарыр»ды. Бунун сајәсиндә Давуд јенидән ҝүҹ топлајыб Јеһоваја хидмәтини давам етдирә билирди (Зәб. 18:28—32). Биз дә сынагларла, чәтинликләрә үзләшәндә «Јеһованын мәһәббәти» сајәсиндә дөзә билирик (Мәрс. 3:22; Кол. 1:11). Давудун һәјаты тез-тез тәһлүкәдә олурду. Онун чохлу ҝүҹлү дүшмәнләри вар иди. Амма Јеһованын мәһәббәти сајәсиндә о өзүнү тәһлүкәсизликдә һисс едирди. Давуд Јеһованын һәр вәзијјәтдә онунла олдуғуну һисс едирди, буна ҝөрә дә үрәји раһат иди. Елә бу сәбәбдән о демишди: «[Јеһова] мәни бүтүн горхулардан азад етди» (Зәб. 34:4). Давудун горхулары әбәс јерә дејилди. Амма Јеһованын мәһәббәти сајәсиндә о бу горхуларына галиб ҝәлди. w24.01 с. 30, абз. 15—17

Јуәсин пис гәрарларындан ибрәт ҝөтүрүн. Баш каһин Јәһјадај өләндән сонра Јуәс пис инсанларла достлуг гурду (2 Салн. 24:17, 18). О, Јеһованы севмәјән Јәһуда әмирләринин сөзү илә отуруб-дурмаға башлады. Разы оларсыныз ки, Јуәс бу хатакар инсанлардан узаг дурмалы иди. О исә әксинә, онларын дедији илә отуруб-дурурду. Һәтта бибиси оғлу Зәкәријјә она сәһвини дејәндә Јуәс ону өлдүртдү (2 Салн. 24:20, 21; Мәт. 23:35). Дәһшәтә, ағылсызлыға бир бах! Јуәс јахшы башламышды, амма әфсуслар олсун ки, ахырда дөнүк вә гатил олду. Сонда өз хидмәтчиләри ону өлдүрдү (2 Салн. 24:22—25). Әҝәр Јуәс Јеһоваја вә Ону севәнләрә һәмишә гулаг ассајды, һәјаты тамам башга ҹүр оларды! w23.09 с. 9, абз. 6

Иса билирди ки, Бутрус садиг гала биләр. Она ҝөрә дә меһрибанҹасына Бутруса демишди: «Горхма!» Иса она инанырды. Бу да Бутрусун һәјатыны бүсбүтүн дәјишди. Сонралар Бутрус вә гардашы Андреас балыгчылығын дашыны атдылар вә бүтүн вахтларыны Мәсиһин ардынҹа ҝетмәјә сәрф етдиләр. Нәтиҹәдә хејли мүкафат алдылар (Марк 1:16—18). Мәсиһин давамчысы олдуғу үчүн Бутрусун һәјатында мөһтәшәм һадисәләр баш вермишди. О, Исанын хәстәләрә шәфа вердијини, ҹинләри говдуғуну, һәтта өлүләри дирилтдијини ҝөрдү (Мәт. 8:14—17; Марк 5:37, 41, 42). Үстәлик, Падшаһлыг ҹалалында ҝәлән Исанын ҝөрүнтүсү назил оланда о да орада иди. Јәгин, бу һадисә онун јаддашына өмүрлүк һәкк олунду (Марк 9:1—8; 2 Бут. 1:16—18). Бәли, Бутрус һеч ағлына белә ҝәлмәјән һадисәләрин шаһиди олду. О чох хошбәхт иди ки, өзү илә бағлы мәнфи һиссләрә үстүн ҝәлиб бүтүн бу немәтләри алды. w23.09 с. 21—22, абз. 4, 5

Һәвари Бутрус биринҹи мәктубунда гејд едир ки, һәрарәтлә севмәк бир нечә јох, «чохлу ҝүнаһын үстүнү өртүр» (1 Бут. 4:8). Јәгин, Исанын илләр өнҹә Бутруса бағышламагла бағлы дедији сөзләр онун һәлә дә јадында иди. Һәмин вахт Бутрус Исаја гардашыны «једди дәфә» бағышламаға һазыр олдуғуну демишди. Бәлкә дә о елә билирди ки, бу онун ҹомәрд олдуғуну ҝөстәрир. Амма Иса Бутруса изаһ етди ки, «лазым ҝәлсә, лап 77 дәфә» бағышламалыдыр, јәни бағышламағын һәдди јохдур (Мәт. 18:21). Исанын бу нәсиһәти бизә дә аиддир. Әҝәр бу ҹүр давранмаг сизә чәтин ҝәлирсә, үрәјинизи сыхмајын. Гејри-камил олдуглары үчүн бу, Јеһованын бүтүн хидмәтчиләринә бәзән чәтин олур. Индики мәгамда әсас одур ки, гардашынызы бағышламаг вә онунла аранызда сүлһү бәрпа етмәк үчүн баҹардығынызы едәсиниз. w23.09 с. 29, абз. 12

Јунус балығын гарнында олан вахт әмин иди ки, Јеһова бу пешман бәндәсинин дуасыны динләјәҹәк вә она көмәк олаҹаг. Јеһова Јунусу балығын гарнындан гуртарды, артыг о, алдығы тапшырығы јеринә јетирмәјә һазыр иди (Јун. 2:10—3:4). Олуб ки, чәтинлијиниз олан заман нараһатлыгдан дуада нә дејәҹәјинизи билмәмисиниз, ја да мүталиә етмәјә тагәтиниз олмајыб? Унутмајын ки, Јеһова сизин вәзијјәтинизи чох јахшы баша дүшүр. Һәмин вахт гыса дуа етсәниз дә, әмин ола биләрсиниз ки, Јеһова сизә лазыми көмәји ҝөстәрәҹәк (Ефес. 3:20). Әҝәр физики вә ја емосионал ағрыја ҝөрә охумаг, мүталиә етмәк чәтиндирсә, Мүгәддәс Китабын вә ја она әсасланан нәшрләрин аудиојазысына гулаг асын. Һәмчинин jw.org сајтындан һансыса маһныны динләјә вә ја видеоја баха биләрсиниз. Дуа едәндә вә нәшрләримиздән дуамыза ҹаваб ахтаранда санки Јеһоваја дејирсиниз: «Мәни ҝүҹлү ет». w23.10 с. 13, абз. 6; с. 14, абз. 9

Мүгәддәс чадырын вә сонралар Јерусәлимдә тикилән мәбәдләрин ич гурулушу ејни иди. Һәр биринин ичиндә ики бөлмә вар иди: «Мүгәддәс јер» вә «Ән мүгәддәс јер». Онлары бир-бириндән пәрдә ајырырды (Ибр. 9:2—5; Чых. 26:31—33). Мүгәддәс јердә гызыл чырагдан, бухур гурбанҝаһы вә һүзур чөрәји үчүн маса вар иди. Јалныз «мәсһ едилмиш каһинләр» Мүгәддәс јерә дахил олуб өз мүгәддәс вәзифәләрини иҹра едә биләрдиләр (Сај. 3:3, 7, 10). Ән мүгәддәс јердә исә Јеһованын һүзуруну тәмсил едән гызыл әһд сандығы вар иди (Чых. 25:21, 22). Пәрдәнин о тәрәфинә — Ән мүгәддәс јерә илдә бир дәфә кәффарә ҝүнү јалныз баш каһин дахил ола биләрди (Лав. 16:2, 17). О, ора һәм өзүнүн, һәм дә бүтүн халгын ҝүнаһыны јумаг үчүн һејванларын ганы илә дахил олурду. Сонралар Јеһова бүтүн бунларын әсл мәнасыны ачыглады (Ибр. 9:6, 7). w23.10 с. 27, абз. 12

«Бир-биринизи... севин». Аллаһын Кәламында бу әмр дөнә-дөнә вурғуланыр (Јәһ. 15:12, 17; Ром. 13:8; 1 Салон. 4:9; 1 Бут. 1:22; 1 Јәһ. 4:11). Бир шеји нәзәрә алмаг лазымдыр ки, мәһәббәт үрәкдә гәрар тутмуш, инсанын дахилиндә олан бир хүсусијјәтдир вә һеч бир инсан үрәјимиздәкиләри ҝөрә билмәз. Бәс баҹы-гардашларымыз онлара дујдуғумуз севҝини ҝөрсүн дејә нә едә биләрик? Бу, сөзләримиздән вә әмәлләримиздән ҝөрүнәҹәк. Баҹы-гардашлара мәһәббәт ҝөстәрмәјин јоллары чохдур. Мәсәлән: «Бир-биринизә һәгигәти сөјләјин» (Зәк. 8:16). «Бир-биринизлә меһрибан олун» (Марк 9:50). «Һөрмәт ҝөстәрмәкдә бир-биринизи габаглајын» (Ром. 12:10). «Бир-биринизи гәбул един» (Ром. 15:7). «Бир-биринизи үрәкдән бағышлајын» (Кол. 3:13). «Бир-биринизин јүкүнү дашыјын» (Гал. 6:2). «Даима бир-биринизә тәсәлли верин» (1 Салон. 4:18). «Бир-биринизи мөһкәмләндирин» (1 Салон. 5:11). «Бир-бириниздән өтрү дуа един» (Јаг. 5:16). w23.11 с. 9, абз. 7, 8

Һәр ҝүн ирили-хырдалы гәрарлар веририк. Бу гәрарларымыз дост, әјләнҹә, тәһсил, никаһ, ушагларымыз вә дүнјәви ишимизлә бағлы олур. Гәрарлар верәркән бизә мөһкәм иман лазымдыр. Бу суаллар үзәриндә дүшүнүн: «Әминәм ки, бу дүнја ҝәлди-ҝедәрдир вә јени дүнјанын бир аддымлығындајам? Вердијим гәрарлардан бу ајдын ҝөрүнүр? Јохса “өлүм һәр шејин сонудур” дејиб, бу дүнјадан икиәлли јапышан инсанлар кими гәрарлар верирәм?» (Мәт. 6:19, 20; Лука 12:16—21). Әҝәр јени дүнјанын овуҹумузун ичиндә олдуғуна иманымызы мөһкәмләндирсәк, онда даһа јахшы гәрарлар верәҹәјик. Һәмчинин сынаглар заманы да бизә ҝүҹлү иман лазымдыр. Ола билсин, тәгибләрлә үзләшәк, хроники хәстәлијимиз вә ја бизи руһдан салан башга чәтинлијимиз олсун. Әввәл-әввәл бизә елә ҝәлә биләр ки, үзләшдијимиз сынаға таб ҝәтирә биләҹәјик. Амма бу ҹүр проблемләр адәтән узун мүддәт давам едир. Буна ҝөрә дә иманымыз ҝүҹлү олмалыдыр ки, дөзүм ҝөстәрәк вә Јеһоваја хидмәтдә севинҹимизи итирмәјәк (1 Бут. 1:6, 7). w23.04 с. 27, абз. 4, 5

Јеһова дуаларымыза ујғун давранмағымызы истәјир. Мәсәлән, бир гардаш топлантыда иштирак едә билмәк үчүн мүдириндән иҹазә алмалыдыр. О бу барәдә Јеһоваја дуа едир. Бәс Јеһова она һансы јолла ҹаваб верә биләр? Ола билсин, О, гардаша мүдиринә јахынлаша билмәси үчүн ҹәсарәт верәҹәк. Амма гардаш да дуасына ујғун давраныб мүдиринә јахынлашмалыдыр. Бәлкә дә о буну бир нечә дәфә етмәли олаҹаг. О башга ишчи илә нөвбәсини дәјишмәји, јахуд да өз һесабына мәзунијјәт ҝөтүрмәји тәклиф едә биләр. Јеһова нараһатлығымыз барәдә дурмадан дуа етмәјимизи истәјир. Исанын да сөзләриндән ҝөрмәк олар ки, биз бәзи хаһишләримизә дәрһал ҹаваб алмајаҹағыг (Лука 11:9). Она ҝөрә дә руһдан дүшмәјин. Һәрарәтлә, дөнә-дөнә дуа един (Лука 18:1—7). Бунунла Јеһоваја һәмин мәсәләнин сизин үчүн нә гәдәр ваҹиб олдуғуну ҝөстәрәҹәксиниз. Һәмчинин Јеһованын сизә көмәк етмәјә гадир олдуғуна иман етдијинизи сүбут едәҹәксиниз. w23.11 с. 22—23, абз. 10, 11

Јеһова досту Ибраһимә белә бир вәд вермишди: «Јер үзүнүн бүтүн халглары сәнин өвладын васитәсилә мүбарәк олаҹаг» (Јар. 15:5; 22:18). Ибраһимин Јеһоваја иманы ҝүҹлү олдуғу үчүн о бу вәдин ҝерчәкләшәҹәјинә әмин иди. Анҹаг Ибраһимин 100, Саранын 90 јашы олса да, онларын һәлә дә оғуллары дүнјаја ҝәлмәмишди (Јар. 21:1—7). Бунунла белә, Мүгәддәс Китабда дејилир: «[Ибраһим] үмидини үзмәди, иман етди ки, чохлу халгларын атасы олаҹаг» (Ром. 4:18). Билдијимиз кими, Ибраһим пејғәмбәрин үмиди ҝерчәкләшди. Онун узун илләрдир һәсрәтиндә олдуғу оғлу Исһаг дүнјаја ҝәлди. Ибраһим пејғәмбәрдә Јеһованын вәдләринин ҝерчәкләшәҹәјинә әминлик һарадан иди? Ибраһим пејғәмбәрин Јеһова илә сых достлуг мүнасибәти вар иди. Буна ҝөрә дә о, там әмин иди ки, Аллаһ вердији вәди јеринә јетирәҹәк (Ром. 4:21). Јеһова Ибраһимдән разы галды вә иманына ҝөрә ону салеһ сајды (Јаг. 2:23). w23.12 с. 8, абз. 1, 2

Етибарлы ҝәнҹ гардаш она тапшырылан бүтүн мәсулијјәтләри ҹанла-башла ҝөрүр. Ҝәлин Исанын гојдуғу мүкәммәл нүмунәјә бахаг. О, лагејд, мәсулијјәтсиз инсан дејилди. Јеһованын она һәвалә етдији тапшырыглары чәтин оланда белә јеринә јетирирди. Иса Мәсиһ инсанлары, хүсусилә дә давамчыларыны севирди, һәтта онлар үчүн һәјатыны да гурбан вермишди (Јәһ. 13:1). Исадан өрнәк ҝөтүрәрәк сизә тапшырылан истәнилән иши ҝөрмәк үчүн әлиниздән ҝәләни един. Әҝәр һансыса бир иши неҹә ҝөрәҹәјинизи дәгиг билмирсинизсә, тәвазөкар олуб јеткин гардашлардан көмәк истәјин. Һеч вахт аз иш ҝөрүб она гане олмајын (Ром. 12:11). Әксинә, ҝөрдүјүнүз һәр иши «инсанлар үчүн јох, Јеһова үчүн» ҝөрүн (Кол. 3:23). Әлбәттә, сиз камил дејилсиниз, бәзән сәһвләр едәҹәксиниз. Она ҝөрә дә тәвазөкар олун вә сәһвинизи бојнунуза алын (Мәс. 11:2). w23.12 с. 26, абз. 8

Вәфтиз олунуб Јеһованын аиләсинин бир үзвү олмаг инсана бөјүк севинҹ бәхш едир. Јеһовајла бу ҹүр јахын мүнасибәтләр гурмаг бизим үчүн шәрәфдир. Мәзмурчу Давудун бу сөзләринә биз дә шәрикик: «[Јеһова,] һәјәтиндә јашамаг үчүн сечдијин, Өзүнә јахынлашдырдығын инсан нә хошбәхтдир» (Зәб. 65:4). Јеһова һеч дә һамыны һәјәтиндә јашамаг үчүн сечмир. О Она јахынлашмаг истәјән инсанлары сечир (Јаг. 4:8). Өзүнүзү Јеһоваја һәср едиб вәфтиз олунанда әмин ола биләрсиниз ки, бундан сонра Јеһова башыныздан бол немәт төкәҹәк (Мәл. 3:10; Әрм. 17:8). Вәфтиз садәҹә башланғыҹдыр. Сиз ҝүнаһа тәһрик едән шејләрлә, јахуд иман сынағы илә үзләшсәниз, әлиниздән ҝәләни едиб һәсролунма әһдинизә ујғун јашамаға чалышаҹагсыныз (Ваиз 5:4, 5). Һәмчинин Иса Мәсиһин шаҝирди кими, онун изи илә ҝедәҹәк вә әмрләринә бағлы галаҹагсыныз (Мәт. 28:19, 20; 1 Бут. 2:21). w24.03 с. 8, абз. 1—3

Бәзи әр-арвадлар бир-бириләри илә вахт кечирмәји хошламыр. Бу заман нә етмәк олар? Тонгал нүмунәсинә бахаг. Тонгал јанмаға башлајанда әввәл-әввәл ҝур јанмыр. Бунун үчүн ора әввәлҹә хырда одун парчалары, сонра исә бөјүк одун парчалары атмаг лазымдыр. Ејнилә сиз дә чалышын һәр ҝүн һәјат јолдашынызла аз да олса, вахт кечирәсиниз. Икинизин дә хошуна ҝәлән шејләрлә мәшғул олун (Јаг. 3:18). Бу ҹүр кичик аддымлардан башлајыб, нәтиҹәдә, севҝинизи аловландыра биләрсиниз. Никаһда һөрмәтин ваҹиб ролу вар. Бу санки тонгалын јанмасына көмәк едән оксиҝен кимидир. Оксиҝен олмајанда алов чох кечмәмиш сөнүр. Ејнилә һөрмәт олмајанда әр-арвад арасындакы севҝи тез бир заманда сојујур. Амма бир-бириләринә һөрмәт ҝөстәрән әр-арвадлар араларындакы севҝини горујурлар. Бир шеји дә нәзәрә алын: ола билсин, һәјат јолдашыныза һөрмәт етдијинизи дүшүнүрсүнүз. Бәс һәјат јолдашыныз һансы фикирдәдир? О өзүнә гаршы һөрмәт һисс едир? w23.05 с. 22, абз. 9; с. 24, абз. 14, 15

Мүгәддәс Китабда Аллаһын садиг хидмәтчиләринин бәзән дүшмәнләрин тәгибиндән вә ја башга чәтинликләрдән долајы горхдуғу, тәлаш кечирдији дејилир (Зәб. 18:4; 55:1, 5). Биз дә мәктәбдә, ишдә, аиләдә чәтинликләрлә үзләшә биләрик, һөкумәт бизи тәгиб едә биләр, сәһһәтимиз уҹбатындан һәтта өлүмлә үз-үзә ола биләрик. Бу ҹүр анларда, ола билсин, өзүмүзү балаҹа ушаг кими көмәксиз һисс едәк. Бәс белә анларда Јеһова бизә неҹә көмәк едир? О бизә тәсәлли верир, овудур. Буна ҝөрә дә Јеһоваја дуа едәрәк вә Кәламыны охујараг Онунла мүнтәзәм вахт кечирин (Зәб. 77:1, 12—14). Әҝәр буну өзүнүздә вәрдишә чевирсәниз, онда чәтинликләрлә үзләшәндә илк нөвбәдә Јеһоваја үз тутаҹагсыныз. Горхуларынызы, нараһатлыгларынызы Јеһова илә бөлүшүн. Јеһованын сизинлә данышмасы, сизә тәсәлли вермәси үчүн исә Онун Кәламыны охујун (Зәб. 119:28). w24.01 с. 24—25, абз. 14—16

Руһани мәгсәдләримизә чатмагда мотивасија мүһүм рол ојнајыр. Мотивасија оланда инсанын мәгсәдинә доғру ирәлиләмәк үчүн ҝүҹлү истәји олур. Мотивасијамыз нә гәдәр ҝүҹлү олса, мәгсәдимизә чатмаг еһтималымыз бир о гәдәр чох олаҹаг. Бәс мотивасијаны неҹә артырмаг олар? Бунун үчүн Јеһовадан көмәк истәјин. Јеһова мүгәддәс руһу илә сизи мәгсәдинизә чатмаға һәвәсләндирә биләр. Бәзән билирик ки, филан шеји етмәлијик, она ҝөрә гаршымыза мәгсәд гојуруг. Бу, јахшыдыр. Амма, ола билсин, һәмин мәгсәдә чатмаг үчүн истәјимиз елә дә ҝүҹлү дејил. Јеһованын сиздән өтрү етдикләри барәдә дүшүнүн (Зәб. 143:5). Һәвари Булус Јеһованын она нә гәдәр бөјүк лүтф ҝөстәрдији барәдә дүшүнмүшдү вә бу ону тәшвиг етмишди ки, Јеһова үчүн чох иш ҝөрсүн (1 Кор. 15:9, 10; 1 Тим. 1:12—14). Ејнилә сиз дә Јеһованын сиздән өтрү етдикләри барәдә нә гәдәр чох дүшүнсәниз, мәгсәдинизә чатмаг үчүн һәвәсиниз бир о гәдәр чох олаҹаг (Зәб. 116:12). w23.05 с. 27, абз. 3—5

Сәмави Атамызын адыны мәдһ едәндә Ону севиндиририк (Зәб. 69:30, 31). Бәс бу о демәкдир ки, Күлли-Ихтијар Јарадан гејри-камил инсанлартәк өзүнә әминлијини артырмаг, руһланмаг үчүн киминсә тәрифинә мөһтаҹдыр? Әлбәттә јох! Биз Јеһованын адыны уҹалданда Шејтанын башга бир иддиасынын да јалан олдуғуну сүбут едирик. О иддиа едир ки, һеч бир инсан ахыра гәдәр Аллаһын адыны мүдафиә етмәјәҹәк, сынагла үзләшәндә сәдагәтсизлик едәҹәк. Шејтанын дедијинә ҝөрә, өз хејри наминә һәр кәс Аллаһдан үз дөндәрәр (Әјј. 1:9—11; 2:4). Амма Әјјуб пејғәмбәр Аллаһа сәдагәтини горујараг Шејтанын јаланчы олдуғуну ҝөстәрмишди. Онун кими сиз дә Јеһоваја садиг галаҹагсыныз? Һәр биримиз Јеһоваја сәдагәтлә гуллуг едәрәк Онун адыны мүдафиә едә вә гәлбини севиндирә биләрик (Мәс. 27:11). Бу, доғрудан да бөјүк шәрәфдир! w24.02 с. 8—9, абз. 3—5

Муса вә Јушәдән сонра Јеһова халгына рәһбәрлик етмәк үчүн һакимләр тәјин етди. Сонра исә падшаһларын дөврүндә халга дүз јолу ҝөстәрмәк үчүн пејғәмбәрләр ҝөндәрди. Јеһоваја садиг олан падшаһлар пејғәмбәрләрин мәсләһәтинә гулаг асырды. Мәсәлән, Натан пејғәмбәр Давуд падшаһа сәһвини ҝөстәрәндә Давуд буну тәвазөкарлыгла гәбул етмишди (2 Ишм. 12:7, 13; 1 Салн. 17:3, 4). Јәһушафат падшаһ Јаһәзил пејғәмбәрин дедији кими давранмышды вә халгы тәшвиг едиб демишди: «[Аллаһын] пејғәмбәрләринә инанын» (2 Салн. 20:14, 15). Һизгијјә падшаһ чәтинликдә оланда көмәк үчүн Әшија пејғәмбәрә үз тутмушду (Әшј. 37:1—6). Падшаһлар һәр дәфә Јеһованын ҝөстәрдији јолла ҝедәндә хејир тапырдылар, халг да тәһлүкәсизликдә олурду (2 Салн. 20:29, 30; 32:22). Ајдын иди ки, Јеһова Өз халгына пејғәмбәрләр васитәсилә бәләдчилик едир. w24.02 с. 21—22, абз. 8

Шејтан бизим Јеһованын әхлаг гајдаларына бағлы галмағымыза мане олаҹаг инсанларла достлуг етмәјимизи истәјир. Јадда сахламалыјыг ки, киминләсә мүнасибәт гурмаг јалныз үзбәүз ҝөрүшүб вахт кечирмәк демәк дејил. Бура һәмчинин сосиал медиа васитәсилә үнсијјәт гурдуғумуз инсанлар да дахилдир. Биз дүнјанын тәсиринә, натәмиз әмәлләрин мәгбул олдуғу фикринә гаршы мүбаризә апармалыјыг. Бунун сәһв олдуғуну јахшы билирик (Ефес. 4:19, 20). Амма јенә дә өзүмүзү јохламалыјыг: «Јеһованын нормаларына һөрмәт етмәјән иш јолдашларым, синиф јолдашларым вә башгалары илә лазымсыз үнсијјәтдән гачмаға гәтијјәтлијәм? Бәзиләри мәни “зәиф” адландырса да, ҹәсарәтлә Јеһованын әхлаг нормаларыны үстүн тутурам?» 2 Тимутијә 2:20—22 ајәләриндә јазылыб ки, биз һәтта мәсиһи јығынҹағында дост сечәркән белә чох еһтијатлы олмалыјыг. Јадда сахламалыјыг ки, бәзиләри Јеһоваја садиг галмағымыза мане ола биләр. w24.03 с. 22—23, абз. 11, 12

Јеһованын ҝөрүнүшү неҹәдир? Һеч бу барәдә дүшүнмүсүнүз? Јеһова ҝөзәҝөрүнмәз олса да, Мүгәддәс Китаб Ону мүхтәлиф ҹүр тәсвир едир. Јеһова «ҝүнәш», «сипәр», «јандырыб-јахан алов» адланыр (Зәб. 84:11; Ибр. 12:29). Онун һүзуру ҝөј јагута, шөлә сачан гызылла ҝүмүшә, парылтылы ҝөј гуршағына бәнзәдилир (Һизг. 1:26—28). Јеһованы ҝөрә билмәдијимиз үчүн Онун бизи севдијинә инанмаг чәтин ҝәлә биләр. Бәзиләри дүшүнүр ки, Јеһова онлары һеч вахт севмәз. Буна сәбәб онларын кечмишдә јашадыгларыдыр. Јеһова һансы һиссләри кечирдијимизи вә нәјә ҝөрә Она јахынлаша билмәдијимизи баша дүшүр. Она ҝөрә Кәламы васитәсилә бизә неҹә ҝөзәл, меһрибан Аллаһ олдуғуну ачыглајыр. Бир сөз вар ки, Јеһованы там шәкилдә ифадә едир: мәһәббәт. Мүгәддәс Китабда дејилир: «Аллаһ мәһәббәтдир» (1 Јәһ. 4:8). Јеһованын ҝөрдүјү һәр бир ишин архасында мәһәббәт дурур. Онун мәһәббәти о гәдәр бол, о гәдәр ҝүҹлүдүр ки, тәкҹә Ону севәнләрә јох, Ону севмәјәнләрә дә бәс едир (Мәт. 5:44, 45). w24.01 с. 26, абз. 1—3

Јеһова Исраил халгыны Мисирдән чыхармаг үчүн Муса пејғәмбәри тәјин етмишди вә бунунла бағлы сүбут да вермишди. О, ҝүндүзләр булуд сүтуну, ҝеҹәләр исә алов сүтуну илә јол ҝөстәрирди (Чых. 13:21). Сүтун һара ҝедирдисә, Муса да онун архасынҹа ҝедирди. Беләҹә о вә халг ҝәлиб Гырмызы дәнизә чатды. Амма Мисир ордусу онлары тутмаг үчүн архаларынҹа дүшмүшдү. Буна ҝөрә дә халг тәләдә олдуғуну дүшүнүб бәрк горхду. Чүнки бир тәрәфләриндә дәниз вар иди, о бири тәрәфләриндә исә Мисир ордусу. Амма бу, сәһвән олмамышды. Јеһова Муса пејғәмбәр васитәсилә халгы биләрәкдән ора ҝәтирмишди (Чых. 14:2). Аллаһ онлары мөҹүзәви шәкилдә хилас етди (Чых. 14:26—28). Муса пејғәмбәр сәһрада Аллаһын халгына бәләдчилик етмәк үчүн нөвбәти 40 ил әрзиндә дә булуд сүтунунун ҝөстәрдији јолла ҝетди (Чых. 33:7, 9, 10). Јеһова сүтундан Муса илә данышырды, о да Аллаһын бујругларыны халга чатдырырды. Исраиллиләр ачыг-ашкар ҝөрә биләрдиләр ки, Јеһова онлара Муса васитәсилә бәләдчилик едир. w24.02 с. 21, абз. 4, 5