Август

Бу мәзмурда ики ваҹиб фикир вар: 1) Салеһ инсанлар проблемләрлә үзләшир, 2) Јеһова онлары бу проблемләрдән гуртарыр. Неҹә? Мәсәлән, һәјата реал бахмаға көмәк едир. Јеһова хидмәтимиздән севинҹ дујаҹағымыза сөз верир, амма бу дүнјада һәјатымызын проблемсиз олаҹағына зәманәт вермир (Әшј. 66:14). О истәјир ки, биз үмидимизи ҝәләҹәјә — вәд етдији әбәди һәјата бағлајаг (2 Кор. 4:16—18). О вахта гәдәр исә Јеһова бизә һәр ҝүн Она хидмәт етмәјә көмәк едәҹәк (Мәрс. 3:22—24). Һәм кечмишдәки, һәм дә бизим дөврүмүздәки иманлы инсанларын нүмунәсиндән нә өјрәнә биләрик? Ола биләр ки, ҝөзләмәдијимиз проблемләрлә үзләшәк. Амма Јеһоваја бел бағласаг, О мүтләг бизә дајаг олаҹаг (Зәб. 55:22). w23.04 с. 14—15, абз. 3, 4

Јусифлә Мәрјәм бизим үчүн ҝөзәл нүмунәдир. Бу әр-арвад онлар үчүн асан олмајанда белә һөкумәтә табе олурду (Лука 2:1—6). Мәрјәмин һамиләлијинин тәхминән доггузунҹу ајында онларын итаәткарлығы сынанды. Рома императору Сезар Август әһалинин сијаһыја алынмасы үчүн фәрман верди. Јусифлә Мәрјәм дағлы-тәпәли јолларла һарадаса 150 километр гәт едиб Бејтләһмә ҝетмәли иди. Бу һеч дә асан сәјаһәт олмајаҹагды, әсас да Мәрјәм үчүн. Јәгин, онлар һәм Мәрјәмин, һәм дә доғулмамыш көрпәнин сағламлығына ҝөрә нараһат идиләр. Бирдән јолда Мәрјәмин доғуш санҹылары тутсајды, неҹә олаҹагды? Ахы о, бәтниндә ҝәләҹәк Мәсиһи дашыјырды. Бу онлара һөкумәтин әмринә итаәтсизлик етмәјә һагг газандырарды? Јусифлә Мәрјәмин нараһат олмаг үчүн јетәринҹә сәбәби олса да, онлар гануна табе олду. Јеһова да онларын итаәтини гијмәтләндириб гејдләринә галды. Мәрјәм сағ-саламат Бејтләһмә чатды, сағлам ушаг дүнјаја ҝәтирди, һәтта Мүгәддәс Китаб пејғәмбәрлијинин јеринә јетмәсиндә пај саһиби олду! (Мик. 5:2). w23.10 с. 8, абз. 9; с. 9, абз. 11, 12

Шәрһ вермәјин ады ҝәләндә һәјәҹан сизи бүрүјүр? Јахшы һазырлашмағын сизә көмәји дәјә биләр (Мәс. 21:5). Мөвзу илә јахшы таныш оланда шәрһ вермәк инсана даһа асан олур. Һәмчинин гыса шәрһләр верин (Мәс. 15:23; 17:27). Гыса шәрһ верәндә инсан о гәдәр дә һәјәҹанланмыр. Өз сөзләринизлә гыса шәрһләр версәниз, ҝөстәрәҹәксиниз ки, јахшы һазырлашмысыныз вә мөвзу барәдә анлајышыныз вар. Ола билсин, бу мәсләһәтләрә әмәл етсәниз дә, јенә һәјәҹан кечирирсиниз, бир-ики дәфәдән артыг шәрһ верә билмирсиниз. Бу заман әмин ола биләрсиниз ки, Јеһова әлиниздән ҝәләни етдијинизи ҝөрүр вә гијмәтләндирир (Лука 21:1—4). Әлиниздән ҝәләни етмәк ҝүҹүнүз чатмајан шеји етмәк демәк дејил (Филип. 4:5). Нәјә ҝүҹүнүзүн чатдығыны мүәјјән един, ону етмәк үчүн мәгсәд гојун вә Јеһоваја дуа един ки, сизә һәјәҹанынызы боғмаға көмәк етсин. Кимиси үчүн илк мәгсәд бир гыса шәрһ вермәк ола биләр. w23.04 с. 21, абз. 6—8

Һәвари Булус бизи ојаг олан јараг-јасаглы әсҝәрә бәнзәдир. Һәрби хидмәтдә олан әсҝәр һәр ан дөјүшә һазыр олмалыдыр, ејнилә биз дә. Биз иман вә мәһәббәт зиреһини ҝејинмәклә вә үмид дәбилгәсини башымыза гојмагла Јеһованын ҝүнүнә һазыр ола биләрик. Зиреһ әсҝәрин үрәјини горујурду. Иман вә мәһәббәт дә бизим мәҹази үрәјимизи горујур. Онлар бизә даима Јеһоваја хидмәт етмәјә вә Исанын ардынҹа ҝетмәјә көмәк едир. Иманымыз сајәсиндә әминик ки, бүтүн гәлбимизлә Јеһованы ахтарсаг, О бизи мүкафатландыраҹаг (Ибр. 11:6). Иман көмәк едәҹәк ки, чәтинликләрә дөзмәли олсаг белә, Рәһбәримиз Исаја садиг галаг. Бәс иманымызы неҹә мөһкәмләндирә биләрик? Тәгибләр вә мадди чәтинликләр гаршысында садиглијини горујан баҹы-гардашларын нүмунәси барәдә дүшүнмәклә. Һәјатыны садәләшдириб Падшаһлығы һәр шејдән үстүн тутан баҹы-гардашлардан өрнәк ҝөтүрмәк исә бизә маддијјат тәләсинә дүшмәмәјә көмәк едә биләр. w23.06 с. 10, абз. 8, 9

Өзүнә һаким олмаг һиссләри, һәрәкәтләри идарә етмәк баҹарығыдыр. Мәгсәдимизә чатмаг үчүн өзүмүзә һаким олмалыјыг, хүсусилә дә гојдуғумуз мәгсәдә чатмаг чәтин оланда вә ја буна һәвәсимиз олмајанда. Билдијимиз кими, өзүнә һаким олмаг руһун бәһрәсидир. Она ҝөрә дә Јеһовадан мүгәддәс руһ истәјин ки, бу хүсусијјәти јетишдирмәјә сизә көмәк етсин (Лука 11:13; Гал. 5:22, 23). Мүкәммәл шәраитин јаранаҹағы вахты ҝөзләмәјин. Бу дүнјада чәтин ки белә шәраит јарансын. Әҝәр һәр шејин мүкәммәл олмасыны ҝөзләсәк, мәгсәдимизә һеч вахт чатмарыг. Ола билсин, һәвәсимизин аз олмасына сәбәб гојдуғумуз мәгсәдә чатмағын бизә чәтин ҝөрүнмәсидир. Әҝәр сиздә дә беләдирсә, бәлкә, гаршыныза бөјүк мәгсәдләрә апаран хырда мәгсәдләр гојасыныз? Мәсәлән, мәгсәдиниз өзүнүздә һансыса хүсусијјәти инкишаф етдирмәкдирсә, бәлкә, бу хүсусијјәти әввәлҹә кичик јолларла ҝөстәрәсиниз? Әҝәр мәгсәдиниз Мүгәддәс Китабы башдан ахыра гәдәр охумагдырса, бәлкә, буна әввәлҹә гыса вахт ајырасыныз? w23.06 с. 20, абз. 1, 2; с. 21, абз. 5

Ахырзаман боју Јеһова тәшкилаты васитәсилә даима бол руһани гида тәгдим едиб ки, һамымыз «Мүгәддәслик јолу»нда јеримәјә давам едә биләк (Әшј. 35:8; 48:17; 60:17). Дејә биләрик ки, Аллаһын Кәламыны өјрәнмәјә башлајан һәр бир инсан «Мүгәддәслик јолу»на гәдәм гојур. Бәзиләринин бу јолда сәфәри гыса чәкир, сонра онлар бу јолла ҝетмирләр. Диҝәрләри исә гәти гәрарлыдырлар ки, та мәнзилбашына чатана кими бу јолда галсынлар. Бәс бу јол һара ҝедиб чыхыр? «Мүгәддәслик јолу» ҝөјдә јашамаг үмиди оланлары ҝөјдә «Аллаһын ҹәннәти»нә апарыр (Вәһј 2:7). Јер үзүндә јашамаға үмид едәнләри исә бу јол миниллијин сонунда алаҹаглары камиллијә апарыр. Әҝәр сиз һал-һазырда бу јолла јеријирсинизсә, гәтијјән ҝери бојланмајын. Јени дүнјаја апаран бу сәјаһәти тамамлајана кими бу јолда галын. w23.05 с. 17—19, абз. 15—18

Јеһованын сизин үчүн етдији һәр бир шеј барәдә дүшүнсәниз, Она миннәтдарлығыныз артаҹаг вә беләҹә, һәјатынызы Она һәср етмәк истәјәҹәксиниз (Зәб. 116:12—14). Мүгәддәс Китабда «һәр бир ҝөзәл пај вә һәр бир камил немәт»ин Јеһовадан назил олдуғу дејилир (Јаг. 1:17). Јеһованын ән бөјүк һәдијјәси исә Өз Оғлуну — Иса Мәсиһи бизим үчүн гурбан вермәсидир. Бир дүшүнүн, фидјә сајәсиндә бизим Јеһова илә јахын достлуг мүнасибәтләри гурмаг имканымыз јараныб. Һәмчинин өнүмүздә әбәди һәјата гапы ачылыб (1 Јәһ. 4:9, 10). Тарих боју ҝөстәрилмиш мәһәббәтин ән бөјүк тәҹәссүмүнә — фидјәјә ҝөрә, һәмчинин Јеһованын бизә бәхш етдији диҝәр немәтләрә ҝөрә миннәтдарлығымызы билдирмәјин ән јахшы јолу өзүмүзү Она һәср етмәкдир (Ган. 16:17; 2 Кор. 5:15). w24.03 с. 5, абз. 8

Бу дүнјанын әхлаг дәјәрләри чох ашағы дүшүб. Буна ҝөрә дә өзүмүзү Аллаһын салеһ бәндәси олан Лут кими һисс едирик. О, «ганун танымајан адамларын азғынлығына ҝөрә» әзаб чәкирди, чүнки билирди ки, Јеһова бу шәр әмәлләрә нифрәт едир (2 Бут. 2:7, 8). Үрәјиндә Аллаһ хофу вә Аллаһ севҝиси олдуғу үчүн Лут әтрафдакы инсанларын әхлагсыз давранышына икраһла јанашырды. Бизим дә әтрафымыздакы инсанлар Јеһованын әхлаг гајдаларына демәк олар ки, мәһәл гојмур. Буна бахмајараг, әҝәр биз Аллаһа севҝимизи горусаг вә үрәјимиздә Аллаһ хофу јетишдирсәк, бу дүнјада әхлаги ҹәһәтдән тәмиз гала биләрик. Буна наил олмаг үчүн Јеһова «Мәсәлләр» китабы васитәсилә бизи доғру јола јөнәлдир. Кишили-гадынлы, бөјүклү-кичикли һәр бир мәсиһи бурадакы мәсләһәтләрин хејрини ҝөрә биләр. Јеһовадан горхмаг бизә көмәк едир ки, пис әмәлләрә бәраәт газандырмајаг. w23.06 с. 20, абз. 1, 2; с. 21, абз. 5

Ола билсин, сиз аилә үзвләринизин тәгиби илә үзләшмисиниз, јахуд Јеһованын ишини биринҹи јерә гојмаг үчүн мүәјјән мадди гурбанлар вермисиниз (Мәт. 6:33). Әмин олун ки, имандан ирәли ҝәләрәк етдикләриниз Јеһованын нәзәриндән јајынмыр (Ибр. 6:10). Чох јәгин ки, Исанын нөвбәти сөзләринин доғрулуғуна өз тәҹрүбәниздә әмин олмусунуз: «Мәним јолумда вә мүждә уғрунда евини, баҹы-гардашыны, анасыны, атасыны, ушагларыны, јахуд тарлаларыны гојуб ҝәлән мүтләг бу дөврдә тәгибләрлә јанашы јүзгат артыг ев, гардаш, баҹы, ана, ушаг вә тарла, ҝәләҹәкдә исә әбәди һәјат алаҹаг» (Марк 10:29, 30). Бәли, алдығыныз немәтләр вердијиниз истәнилән гурбандан гат-гат дәјәрлидир (Зәб. 37:4). w24.03 с. 9, абз. 5

Јәһудијјәдәки мәсиһиләр аҹлыгдан әзијјәт чәкәндә Антакја јығынҹағындакы баҹы-гардашлар «гәрарлашдырдылар ки, һәр кәс Јәһудијјәдә јашајан гардашлара ҝүҹү чатан гәдәр јардым ҝөстәрсин» (Һәв. 11:27—30). Аҹлыгдан әзијјәт чәкән баҹы-гардашлар узагда јашасалар да, Антакјадакы мәсиһиләр онлары көмәксиз гојмадылар (1 Јәһ. 3:17, 18). Биз дә диндашларымызын фәлакәтлә үзләшдијини ешидәндә шәфгәт ҝөстәририк, дәрһал онларын дадына чатмаға чалышырыг. Мәсәлән, ағсаггаллара јардым ишиндә иштирак етмәк истәдијимизи билдиририк, үмумдүнја ишинә ианә едирик вә ја фәлакәтдән зәрәрчәкәнләр үчүн дуа едирик. Ола билсин, баҹы-гардашларымыз зәрури тәләбатларыны өдәмәк үчүн көмәјә еһтијаҹ дујаҹаглар. Арзу едирик ки, Падшаһымыз Иса Мәсиһ һөкмүнү иҹра етмәјә ҝәләндә шәфгәт ҝөстәрдијимизи ҝөрсүн вә бизи Падшаһлығы мирас алмаға дәвәт етсин (Мәт. 25:34—40). w23.07 с. 4, абз. 9, 10; с. 6, абз. 12

Иса Мәсиһ Јеһовадан өрнәк алараг дәрракәли давранырды. Билдијимиз кими Јеһова ону јер үзүнә «Исраил евинин итмиш гојунлары»на тәблиғ етмәк үчүн ҝөндәрмишди. Амма бу тәјинаты јеринә јетирәркән о, дәрракәли давранырды. Мәсәлән, бир дәфә исраилли олмајан бир гадын Исаја јалвармышды ки, онун гызыны сағалтсын, чүнки ҹинләр гызына зүлм едирди. Исанын гадына рәһми ҝәлди вә онун хаһишини јеринә јетирди, гызыны сағалтды (Мәт. 15:21—28). Башга бир нүмунәјә бахаг. Даһа өнҹә Иса белә сөзләр демишди: «Ким... мәни данса, мән дә... ону данаҹағам» (Мәт. 10:33). Бәс Бутрус Исаны үч дәфә дананда Иса ону данды? Хејр. О ҝөрүрдү ки, Бутрус иманлы инсандыр вә етдији һәрәкәтә ҝөрә пешмандыр. Дириләндән сонра Иса Бутруса ҝөрүндү вә чох јәгин ки, ону бағышладығына вә һәлә дә севдијинә әмин етди (Лука 24:33, 34). Јеһова Аллаһ вә Иса Мәсиһ дәрракәлидир. Бәс бизим барәдә нә демәк олар? Јеһова бизим дә дәрракәли олмағымызы истәјир. w23.07 с. 21—22, абз. 6, 7

Јеһованын Ҹәннәтлә бағлы вәдинин јеринә јетәҹәјинә инанмаг үчүн тутарлы сәбәбләримиз вар. Бәс әҝәр кимсә бу вәдә етибар етмирсә, онлара неҹә көмәк едә биләрик? Бу үч әсасы ҝәтирмәк олар: Биринҹиси, вәди верән Јеһованын Өзүдүр. «Вәһј» китабында дејилир: «Тахтда отуран деди: “Будур, Мән һәр шеји тәзә едирәм”». Нијјәтини һәјата кечирмәк үчүн Јеһованын һикмәти дә вар, ҝүҹү дә вар, истәји дә вар. Икинҹиси, Јеһова вәдинин ҝерчәкләшәҹәјинә о гәдәр әминдир ки, онун артыг јеринә јетдијини сөјләјир. Мәһз буна ҝөрә О демишди: «Бу сөзләр доғру вә етибарлыдыр... Онлар јеринә јетди!» Үчүнҹүсү, Јеһова нәјисә етмәјә башлајыбса, О буну мүтләг ахыра чатдырыр. Чүнки О демишди: «Мән Алфа вә Омегајам» (Вәһј 21:6). Бәли, Јеһова сүбут едәҹәк ки, Шејтан јаланчыдыр вә Она нијјәтини јеринә јетирмәјә мане ола билмәз. Ола билсин, кимсә белә десин: «Ҝөзәл сөзләрдир, амма чәтин ки белә шеј олсун». Бу заман она Вәһј 21:5, 6 ајәләрини охујуб изаһ едә биләрсиниз. Гој һәмин инсан ҝөрсүн ки, Јеһова вәдини јеринә јетирәҹәјинә зәманәт вериб, бир нөв сөзүнүн алтына Өз имзасыны атыб (Әшј. 65:16). w23.11 с. 7, абз. 18, 19

Јеһова бу вәди верәндә Ибраһим пејғәмбәр 75 јашында иди. Бәс о бу вәдин јеринә јетдијини ҝөрдү? Там јох. Фәрат чајыны кечдикдән вә 25 ил ҝөзләдикдән сонра мөҹүзәви шәкилдә оғлу Исһаг дүнјаја ҝәлди. Бундан 60 ил сонра исә нәвәләри Ејслә Јагуб анадан олду (Ибр. 6:15). Амма нәслинин бөјүк халга чеврилдијини вә онларын Вәд едилмиш дијары мирас алдығыны ҝөрмәк Ибраһим пејғәмбәрә нәсиб олмады. Бунунла белә, бу мөмин инсанын Јараданла мөһкәм достлуғу вар иди (Јаг. 2:23). Ибраһим дириләндә биләҹәк ки, онун иманы вә сәбри сајәсиндә јер үзүндәки бүтүн халглар мүбарәк гылыныб (Јар. 22:18). Сөзсүз, о чох севинәҹәк. Бурадан нә өјрәнирик? Биз Јеһованын бүтүн вәдләринин елә индиҹә јеринә јетдијини ҝөрмәсәк дә, әмин ола биләрик ки, Ибраһим пејғәмбәр кими сәбирли олсаг, Јеһова бизә һәм инди мүкафат верәҹәк, һәм дә вәд етдији јени дүнјада даһа чох немәтләр бәхш едәҹәк (Марк 10:29, 30). w23.08 с. 24—25, абз. 14

Ҝәнҹлијиндә Үзијјә тәвазөкар иди. О, Аллаһдан горхмағы өјрәнмишди. Үзијјә 68 ил өмүр сүрмүшдү вә өмрүнүн әксәр һиссәсиндә Јеһова онун ишләрини аванд етмишди (2 Салн. 26:1—4). Үзијјә чохлу дүшмән халглары мәғлуб етмишди вә Јерусәлимин мүдафиә системини мөһкәмләндирмишди (2 Салн. 26:6—15). Сөзсүз ки, о, Јеһованын көмәји илә етдији ишләрә ҝөрә чох севинирди (Ваиз 3:12, 13). Үзијјә бир падшаһ кими башгаларына ҝөстәришләр вермәјә вәрдиш етмишди. Бәлкә дә елә бу сәбәбә ҝөрә дүшүнүрдү ки, үрәји истәјәни едә биләр. Мәсәлән, бир ҝүн о, тәкәббүрлү давраныб «бухур гурбанҝаһында бухур јандырмаг үчүн Јеһованын мәбәдинә» ҝирмишди, һалбуки падшаһларын буну етмәјә ихтијары јох иди (2 Салн. 26:16—18). Баш каһин Әзрија ону сәһв һәрәкәтдән дөндәрмәјә чалышанда Үзијјә бәрк гәзәбләнди. Әфсуслар олсун ки, Үзијјә бунунла сәдагәтлә хидмәт етдији илләри бада верди вә ҹүзама тутулду (2 Салн. 26:19—21). Әҝәр о, тәвазөкар галсајды, һәјаты тамам башга ҹүр оларды! w23.09 с. 10, абз. 9, 10

Һәвари Бутрус мәсһ олунмуш мәсиһи оландан сонра да зәиф ҹәһәтләри илә мүбаризә апарырды. Ерамызын 36-ҹы илиндә Бутрус бир һадисәнин шаһиди олду. Сүннәтсиз олан гејри-јәһуди Корнили мүгәддәс руһла мәсһ олунду. Бу һадисә сүбут етди ки, «Аллаһ ајры-сечкилик етмәјән Аллаһдыр» вә гејри-јәһудиләр дә мәсиһи јығынҹағынын бир һиссәси ола биләр (Һәв. 10:34, 44, 45). Бундан сонра Бутрус һеч вахт етмәдији бир шеј етди: гејри-јәһудиләрлә бир сүфрә архасында јемәк јемәјә башлады. Бунунла белә, бәзи јәһудиләр дүшүнүрдү ки, јәһудиләр гејри-јәһудиләрлә бир сүфрә архасында әјләшә билмәз. Онлардан бәзиләри Антакјаја ҝәләндә Бутрус ҝөрүнүр онларын горхусундан гејри-јәһудиләрлә бир сүфрәјә әјләшмәди. Һәвари Булус бу икиүзлүлүјү ҝөрүб һамынын ҝөзү гаршысында ону данлады (Гал. 2:13, 14). Бутрус сәһв етсә дә, руһдан дүшмәди, хидмәтини дајандырмады. w23.09 с. 22, абз. 8

Өзүнүзү дүрүстҹәсинә јохлајын. Ола билсин, мүәјјән зәиф ҹәһәтләринизин олдуғуну ҝөрәҹәксиниз. Руһдан дүшмәјин. Аға хејирхаһдыр, сизә тәкмилләшмәјә көмәк едәҹәк (1 Бут. 2:3). Һәвари Бутрус бизә белә бир әминлик верир: «Аллаһ... тәлиминизи баша чатдыраҹаг, сизи ҝүҹлү... едәҹәк». Бир дәфә Бутрус өзүнү Аллаһын Оғлунун јанында олмаға лајиг ҝөрмәмишди (Лука 5:8). Амма Јеһованын вә Исанын дәстәји сајәсиндә о, Мәсиһин сәдагәтли давамчысы ола билди. Нәтиҹәдә, Јеһова Бутруса «Ағамыз вә Хиласкарымыз Иса Мәсиһин әбәди Падшаһлығынын гапысы»ндан дахил олмаға иҹазә верди (2 Бут. 1:11). Бу чох бөјүк мүкафат иди! Бутрусдан өрнәк алараг сиз дә тәслим олмасаныз вә Јеһовадан тәлим алмаға давам етсәниз, әбәди һәјат мүкафатыны алаҹагсыныз. Сиз «иманынызын һәдәфинә — хиласа» јетишәҹәксиниз (1 Бут. 1:9). w23.09 с. 31, абз. 16, 17

Мүгәддәс чадырын бир һәјәти вар иди. Бу, һасара алынмыш бөјүк бир әрази иди. Бурада каһинләр өз вәзифәләрини иҹра едирдиләр. Һәјәтдә јандырма гурбаны тәгдим етмәк үчүн бөјүк мис гурбанҝаһ вар иди. Һәмчинин орада ичи су илә долу мис чән вар иди. Каһинләр мүгәддәс хидмәтләрини иҹра етмәздән әввәл онун сују илә јујунурдулар (Чых. 30:17—20; 40:6—8). Бу ҝүн Мәсиһин мәсһ олунмуш гардашлары руһани мәбәдин ичәри һәјәтиндә Аллаһа сәдагәтлә гуллуг едирләр. Һәјәтдә бөјүк су чәнинин олмасы мәсһ олунмушлара вә онларын да симасында бүтүн мәсиһиләрә әхлаги вә руһани тәмизлији горумағын ваҹиблијини хатырладыр. Бәс «бөјүк издиһам» Аллаһа һарада ибадәт едир? Һәвари Јәһја ҝөрмүшдү ки, онлар «Аллаһын тахты гаршысындадырлар вә ҝеҹә-ҝүндүз Онун мәбәдиндә Она гуллуг едирләр» (Вәһј 7:9, 13—15). Бөјүк издиһам буну руһани мәбәдин чөл һәјәтиндә — јер үзүндә едир. Јеһоваја шүкүрләр олсун! Она ибадәт едә билмәјимиз үчүн бөјүк руһани мәбәдиндә бизә јер ајырыб! w23.10 с. 28—29, абз. 15, 16

Јеһованын бизи мөһкәмләндирмәк үчүн истифадә етдији бир мәнбә ағсаггаллардыр (Әшј. 32:1, 2). Буна ҝөрә дә нәјинсә фикрини чәкәндә дәрдинизи ағсаггаллара данышын. Онлар сизә көмәк тәклиф едәндә буну гәбул един. Јеһова онларын васитәсилә сизи ҝүҹлү едәҹәк. Һәмчинин бизим Мүгәддәс Китаба әсасланан үмидимиз вар: бәзиләримиз јер үзүндә Ҹәннәтдә, бәзиләримиз исә сәмави Падшаһлыгда әбәди јашаја биләрик. Бу үмид бизи гүввәтләндирир (Ром. 4:3, 18, 19). Үмидимиз сајәсиндә бизим сынаглара дөзмәк, хош мүждәни тәблиғ етмәк вә јығынҹагда мүхтәлиф тапшырыглары јеринә јетирмәк үчүн ҝүҹүмүз олур (1 Салон. 1:3). Ҝәләҹәјә үмид һәвари Булусу да ҝүҹләндирмишди. О јазмышды ки, «чашгынлыг» ичиндәдир, ону «сыхышдырырлар», «тәгиб едирләр», «вуруб јерә сәрибләр», һәтта бәзән һәјаты ипдән асылы олуб (2 Кор. 4:8—10). Булус диггәтини үмидинә ҹәмләдији үчүн бу сынаглара таб ҝәтирә билмишди (2 Кор. 4:16—18). Ҝәләҹәкдә ҝөјдә әбәди јашајаҹағы үмиди онун үчүн чох әзиз иди. Булус бу үмиди барәдә чох дүшүнүрдү, бунун да сајәсиндә «ҝүнбәҝүн јениләшир»ди. w23.10 с. 15—16, абз. 14—17

Дуа едәркән бу суал барәдә дүшүнә биләрик: «Јеһова хаһишими инди јеринә јетирмәји мәгбул билир?» Бизә елә ҝәлә биләр ки, дуамыза дәрһал ҹаваб лазымдыр. Амма Јеһова бизә көмәк етмәјин ән јахшы вахтыны билир (1 Бут. 5:6, 7). Дуамызын ҹавабыны һәмин ан алмајанда дүшүнә биләрик ки, Јеһова «јох» ҹавабыны вериб. Амма бәлкә дә О «һәлә јох» дејир. Мәсәлән, бир гардаш хәстәлијиндән сағалмаг үчүн дуа едирди, амма сәһһәтиндә бир ирәлиләјиш олмурду. Әҝәр Јеһова ону мөҹүзәви шәкилдә сағалтсајды, онда Шејтан иддиа едиб дејәрди: «О, сағалдығы үчүн сәнә хидмәт едир» (Әјј. 1:9—11; 2:4). Бундан башга, Јеһова бүтүн хәстәләрә шәфа верәҹәји вахты артыг тәјин едиб (Әшј. 33:24; Вәһј 21:3, 4). Һәмин вахта гәдәр исә мөҹүзәви шәкилдә сағалаҹағымызы ҝөзләмәмәлијик. Буна ҝөрә дә гардаш хәстәлијинә дөзүб хидмәтини давам етдирә билмәси үчүн Јеһовадан ҝүҹ вә гәлб раһатлығы истәјә биләр. w23.11 с. 24, абз. 13

Шимшон ҹидди сәһв етсә дә, тәслим олмады. О, Јеһованын она вердији тапшырығы јеринә јетирмәк, филиштлиләрә гаршы вурушмаг үчүн фүрсәт ахтарды (Һак. 16:28—30). Шимшон филиштлиләрдән һејфини чыхмаг үчүн Јеһовадан көмәк истәди. Јеһова да онун јалварышыны ешидиб она јенидән гејри-ади ҝүҹ верди. Нәтиҹәдә, Шимшон әввәлкиндән дә чох филиштлини гырды. Шимшон сәһвинин аҹысыны чәксә дә, бу она Јеһованын нијјәтини јеринә јетирмәјә мане олмады. Ејнилә, ола билсин, бизә сәһвимизә ҝөрә ирад тутулсун вә ја мәсулијјәтимизи итирәк. Амма биз буна ҝөрә Јеһоваја хидмәтимизи дајандырмамалыјыг. Унутмамалыјыг ки, Јеһова бизи бағышламаға һазырдыр (Зәб. 103:8, 9). Сәһв етсәк дә, Шимшон кими биз дә, Јеһованын ишиндә јарарлы ола биләрик. w23.09 с. 6, абз. 15, 16

Сизин дөзүмүнүз «Аллаһын разылығыны» газандырыр. Бу о демәк дејил ки, әзаб чәкдијинизи ҝөрмәк Аллаһа хошдур. Әксинә, Јеһоваја хош олан сизин садиг галмағыныздыр. Бәли, дөзүмүнүзлә Аллаһын гәлбини шад едирсиниз. Бундан ҝөзәл нә ола биләр?! (Зәб. 5:12). Ҝәлин Ибраһим пејғәмбәри јадымыза салаг. О да чохлу чәтинликләрлә үзләшмишди, амма садиг галдығы үчүн Јеһованын разылығыны газаныб, Онун досту олмушду вә салеһ сајылмышды (Јар. 15:6; Ром. 4:13, 22). Биз дә онун кими ола биләрик. Јеһованын разылығыны газанмаг Онун јолунда нә гәдәр иш ҝөрмәјимиздән, тәјинатларымыздан асылы дејил. О, сәдагәтлә дөзүм ҝөстәрдијимизә ҝөрә биздән разы галыр. Јашымыздан, вәзијјәтимиздән, баҹарығымыздан асылы олмајараг, һамымыз дөзүм ҝөстәрә биләрик. Бәлкә дә, һал-һазырда һансыса сынағыныз вар вә сәдагәтлә дөзүрсүнүз. Әмин олун ки, Јеһова сиздән чох разыдыр. Буну биләндә ҝәләҹәјә үмидиниз даһа да мөһкәмләнир. w23.12 с. 11—12, абз. 13, 14

Мәсиһи гардаш јахшы үнсијјәт гурмағы өјрәнмәлидир. Јәни о башгаларынын фикирләринә гулаг асмалы, һиссләрини баша дүшмәлидир (Мәс. 20:5). Һәмчинин гардаш гаршысындакы инсанын сәс тонундан, үз ифадәсиндән вә бәдән дилиндән онун кечирдији һиссләри охумағы өјрәнмәлидир. Инсанларла вахт кечирмәдән бунлары өјрәнмәк мүмкүн дејил. Әҝәр үнсијјәт гурмаг үчүн електрон почт, месаж вә бу кими васитәләрдән мүнтәзәм истифадә едирсинизсә, инсанларла үз-үзә сөһбәт етмәк сизә чәтин олаҹаг. Она ҝөрә дә инсанларла ҹанлы сөһбәт етмәјә чалышын (2 Јәһ. 12). Јеткин мәсиһи гардаш һәм өзүнү, һәм дә аиләсини доландырмалыдыр (1 Тим. 5:8). Мүәјјән баҹарыға јијәләнмәк јахшыдыр, чүнки бу сизә иш тапмаға көмәк едәҹәк (Һәв. 18:2, 3; 20:34; Ефес. 4:28). Гој башгалары сизи зәһмәткеш, ишини ахыра чатдыран инсан кими танысын. Бунун сајәсиндә иш тапмаг сизин үчүн даһа асан олаҹаг. w23.12 с. 27—28, абз. 12, 13

Мүгәддәс Китабда «Јеһованын ҝүнү» дејиләндә Онун дүшмәнләрини мәһв етдији вә халгына гуртулуш вердији вахт нәзәрдә тутулур. Гәдимдә Јеһова бәзи халглар үзәриндә һөкмүнү иҹра етмишди (Әшј. 13:1, 6; Һизг. 13:5; Сәф. 1:8). Бизим дөврдә «Јеһованын ҝүнү» Бөјүк Бабилә һүҹум илә башлајыб Армаҝеддон мүһарибәси илә битәҹәк. Һәмин ҝүн хилас олмаг үчүн биз артыг индидән һазырлашмалыјыг. Иса да демишди ки, биз бөјүк мүсибәтә һазыр олмалыјыг. О бу сөзләрлә бир дәфә јох, даима һазыр олмағы нәзәрдә тутурду (Мәт. 24:21; Лука 12:40). Һәвари Булус салоникилиләрә јаздығы биринҹи мәктубда бир нечә нүмунә чәкмишди. Бу нүмунәләрлә мәсиһиләрә Јеһованын һөкм ҝүнүнә һазыр олмаға көмәк етмишди. Булус билирди ки, Јеһованын ҝүнү елә бу дәгигә ҝәлмәјәҹәк (2 Салон. 2:1—3). Амма јенә дә онлары тәшвиг етмишди ки, һәмин ҝүн сабаһ ҝәләҹәкмиш кими она һазырлашсынлар. Бу мәсләһәт бизә дә аиддир. w23.06 с. 8, абз. 1, 2

1978-ҹи илдә Токиода 60 мәртәбәли ҝөјдәлән инша едилирди. Инсанлары марагландырырды ки, ҝөрәсән, бу бојда бина тез-тез баш верән зәлзәләләрә неҹә таб ҝәтирәҹәк. Мүһәндисләр бинаны елә лајиһәләндирмишдиләр ки, о һәм мөһкәм, һәм дә еластик олсун вә беләҹә, сејсмик тәканлар заманы учмасын. Мәсиһиләр дә бу ҝөјдәләнә бәнзәјирләр. Һансы мәнада? Мәсиһи мәтин олмалыдыр, амма ејни заманда вәзијјәтә ујғунлашмағы да баҹармалыдыр. О, мөһкәм вә сарсылмаз олмалыдыр ки, Аллаһын гајда-ганунларына әмәл етсин. О, «итаәткардыр» вә әгидәсиндән бир аддым белә ҝери чәкилмир. Ејни заманда о, «мүлајимдир», јәни мүмкүн, јахуд лазым олдуғу һалда вәзијјәтә ујғунлашмағы баҹарыр (Јаг. 3:17). Таразлы олмағы өјрәнән мәсиһи нә чох сәрт олаҹаг, нә дә һәддән артыг јумшаг. w23.07 с. 14, абз. 1, 2

Шејтан Иблис Исаны сынаға чәкмишди. Һәтта она ачыг демишди ки, Аллаһа хәјанәт етсин. Иса бу сынагдан да үзүағ чыхмышды (Мәт. 4:1—11). Шејтан дәридән-габыгдан чыхырды ки, Иса ҝүнаһ етсин вә беләҹә, фидјә өдәнилмәсин. Јер үзүндә хидмәт едәркән исә Исанын башга сынаглары да олмушду. Дүшмәнләри ону тәгиб едирди, һәтта ону өлдүрмәјә ҹәһд етмишдиләр (Лука 4:28, 29; 13:31). Бундан башга, Иса шаҝирдләринин сәһвләринә дә дөзмәли олмушду (Марк 9:33, 34). Һәјатынын һәлл олундуғу мәһкәмәдә Исаја ишҝәнҹә вериб әлә салмышдылар. Сонра исә о, әзаблы, алчалдыҹы шәкилдә едам едилмишди (Ибр. 12:1—3). Иса ишҝәнҹә дирәјиндә чәкдији әзаблара тәкбашына, Јеһованын мүдафиәси олмадан дөзмәли олмушду (Мәт. 27:46). Ајдындыр ки, Иса Мәсиһ фидјәни тәгдим етмәк үчүн чох әзаба гатлашыб. Исанын биздән өтрү нәләри гурбан вердији барәдә дүшүнәндә она мәһәббәтимиз даһа да артыр. w24.01 с. 10—11, абз. 7—9.

Сәбир башгалары илә јахшы мүнасибәти горумаға көмәк едир. Бу хүсусијјәтин сајәсиндә кимсә данышанда биз диггәтлә гулаг асырыг (Јаг. 1:19). Инсанларла арамызда меһрибан мүнасибәт олур. Сәбир көмәк едир ки, ҝәрҝин вәзијјәт јарананда тез реаксија вермәјәк вә хошаҝәлмәз ифадәләр ишләтмәјәк. Һәмчинин сәбирли олсаг, башгасы хәтримизә дәјәндә гәзәбләнмәјәҹәјик. Ондан әвәз чыхмајаҹағыг, әксинә, бир-биримизә гаршы һәмишә сәбирли олуб бир-биримизи үрәкдән бағышлајаҹағыг (Кол. 3:12, 13). Сәбир хүсусијјәти даһа јахшы гәрарлар вермәјә дә көмәк едир. Бунун сајәсиндә тез-тәләсик, һиссләрә гапылыб гәрар вермәјәҹәјик. Әксинә, мүхтәлиф вариантлары ҝөтүр-гој едәҹәјик вә онларын ичиндән ән јахшысыны сечәҹәјик. Мәсәлән, әҝәр иш ахтарырыгса, ола билсин, гаршымыза чыхан илк иши гәбул етмәк истәјәк. Амма сәбирлијиксә, биз вахт ајырыб мүәјјән амилләри өлчүб-бичәҹәјик. Мәсәлән, бу иш аиләмизә вә Јеһова илә мүнасибәтимизә неҹә тәсир едәҹәк? Сәбирли олмағын сајәсиндә јанлыш гәрар вермәјәҹәјик. w23.08 с. 22, абз. 8, 9

Әҝәр ҝүнаһа мејилинизә ҝөрә руһдан дүшмүсүнүзсә, өзүнүзү Јеһоваја һәср едәркән вердијиниз вәди хатырлајын. Бу сизә нәфслә мүбаризәни давам етдирмәјә ҝүҹ верәҹәк. Неҹә? Јеһоваја һәср олунанда сиз өзүнүзү инкар етмиш олурсунуз. Бу о демәкдир ки, сиз Јеһованы наразы салаҹаг арзу вә истәкләринизә јох дејирсиниз (Мәт. 16:24). Јәни һансыса бир сынагла үзләшәндә «нә едим?», «неҹә едим?» дејиб, баш сындырмалы олмајаҹагсыныз. Чүнки сиз гәрарынызы бәри башдан вермисиниз — Јеһоваја садиг галмағы сечмисиниз. Буна ҝөрә дә Ону разы салмаға гәтијјәтли олаҹагсыныз. Бунунла да бир нөв Әјјуб пејғәмбәр кими давранаҹагсыныз. О, чох ҝүҹлү сынагларла үзләшсә дә, гәтијјәтлә демишди: «Мән сон нәфәсимәдәк садиг галаҹағам!» (Әјј. 27:5). w24.03 с. 9, абз. 6, 7

«Мәһәббәт... Аллаһы» Јеһова бизимләдир! (2 Кор. 13:11). О бизимлә шәхсән марагланыр. Әминик ки, Онун мәһәббәти бизи әһатә едир (Зәб. 32:10). Јеһованын севҝисини һансы јолларла ҝөстәрдији барәдә даһа чох дүшүнсәк, гајғымыза галдығына даһа да әмин олаҹағыг, өзүмүзү Она јахын һисс едәҹәјик. Биз Јеһоваја чәкинмәдән дуа едә биләрик, севҝисинә нә гәдәр еһтијаҹ дујдуғумузу дејә биләрик. Бүтүн нараһатлыгларымызы Онунла бөлүшә биләрик, чүнки әминик ки, О бизи баша дүшүр вә бизә көмәк етмәк истәјир (Зәб. 145:19). Сојуг һавада оҹаг бизи иситдији кими чәтинликләрлә, сынагларла үзләшәндә дә Јеһованын мәһәббәти гәлбимизи исиндирир. О бизи овудур, бизә гәлб раһатлығы верир, одур ки, севинин! Онун мәһәббәтинин гаршылығында сиз дә белә дејин: «Јеһованы севирәм»! (Зәб. 116:1). w24.01 с. 31, абз. 19, 20

Иса инсанлара садәҹә олараг Аллаһын адынын Јеһова олдуғуну демирди. Јәһудиләр Аллаһын адыны онсуз да билирди. Иса онлара Аллаһы таныдырды (Јәһ. 1:17, 18). Мәсәлән, Төвратда ачыгланыр ки, Јеһова рәһмли вә мәрһәмәтли Аллаһдыр (Чых. 34:5—7). Амма Иса Јеһованын белә бир Аллаһ олдуғуну даһа ајдын ҝөстәрмәк үчүн итмиш оғул вә ата илә бағлы мәсәл чәкмишди. Биз атанын төвбә едән оғлуну «һәлә узагда икән» ҝөрдүјүнү, габағына гачыб онун бојнуна сарылдығыны, ону үрәкдән бағышладығыны охујанда Јеһованын нә гәдәр рәһмли вә мәрһәмәтли олдуғуну даһа јахшы баша дүшүрүк (Лука 15:11—32). Иса Аллаһын әслиндә неҹә варлыг олдуғуну баша дүшмәјә көмәк едирди. w24.02 с. 10, абз. 8, 9

Јеһова да сынагларла үзләшәнләрә мәһз бу ҹүр тәравәт, тәсәлли верир. Бәс биз Јеһовадан өрнәк ҝөтүрүб неҹә шәфгәтли ола биләрик вә башгаларына неҹә тәсәлли верә биләрик? Бунун бир јолу өзүмүздә башгаларына тәсәлли вермәјә көмәк едәҹәк хүсусијјәтләр јетишдирмәкдир. Мәсәлән, һансы хүсусијјәтләр? Диндашларыныза һәр ҝүн мәһәббәт ҝөстәрмәјә вә «даима бир-биринизә тәсәлли» вермәјә сизә нә көмәк едәҹәк? (1 Салон. 4:18). Бунун үчүн бир-биринизин дәрдинә шәрик, гардашсевән вә хејирхаһ олмалысыныз (Кол. 3:12; 1 Бут. 3:8). Нәјә ҝөрә бу кејфијјәтләрә јијәләнмәк лазымдыр? Шәфгәт хүсусијјәти вә бунунла бағлы диҝәр хүсусијјәтләр сизин шәхсијјәтинизин бир һиссәсинә чевриләндә әзаб чәкән инсана тәсәлли вермәк дахилиниздән ҝәләҹәк. Исанын да дедији кими «инсан үрәјиндә ашыб-дашан фикирләри дилә ҝәтирир. Јахшы адам өзүнүн јахшы хәзинәсиндән јахшы шејләр чыхарыр» (Мәт. 12:34, 35). Бәли, дарда олан баҹы-гардашларымыза тәсәлли вермәк онлара севҝимизи ифадә етмәјин мүһүм јолларындан биридир. w23.11 с. 10, абз. 10, 11

Пејғәмбәрликләри баша дүшмәк үчүн көмәјә еһтијаҹымыз вар. Белә бир нүмунәјә бахаг: Тутаг ки, сиз һеч вахт олмадығыныз бир јерә ҝетмисиниз. Амма јаныныздакы достунуз һәмин әразиләри јахшы таныјыр. О билир ки, сиз инди һарадасыныз вә һансы јол һара апарыр. Јәгин, онунла јола чыхдығыныза ҝөрә севинәрсиниз. Јеһова да белә бир достдур. О, һансы заман кәсијиндә јашадығымызы вә гаршыда бизи нәләрин ҝөзләдијини јахшы билир. Буна ҝөрә дә пејғәмбәрликләри баша дүшмәк үчүн Ондан көмәк истәмәлијик (Дән. 2:28; 2 Бут. 1:19, 20). Һәр бир валидејн истәјәр ки, ушагларынын ҝөзәл ҝәләҹәји олсун. Јеһова да буну истәјир (Әрм. 29:11). Амма инсанлардан фәргли олараг, Јеһова ҝәләҹәјимизин неҹә олаҹағыны дәгигликлә дејә биләр. Баш верәҹәк ваҹиб һадисәләри бизим дә билмәјимиз үчүн Јеһова Кәламына пејғәмбәрликләр јаздырыб (Әшј. 46:10). w23.08 с. 8—9, абз. 3, 4