Ијул

Исанын дедији вә етдији һәр шеј, о ҹүмләдән ҝөстәрдији мөҹүзәләр Атасынын дүшүнҹәсини вә һиссләрини әкс етдирирди (Јәһ. 14:9). Исанын мөҹүзәләриндән нә өјрәнә биләрик? Иса вә Атасы бизи чох севир. Иса Мәсиһин инсанлары севдији нәдән ҝөрүнүр? Мәсәлән, о, јер үзүндә оларкән инсанларын әзабына сон гојмаг үчүн мөҹүзәләр ҝөстәрирди. Бир дәфә ики кор киши Исадан хаһиш етмишди ки, онлары сағалтсын (Мәт. 20:30—34). Исанын «бу адамлара јазығы ҝәлди» вә онлары сағалтды. «Јазығы ҝәлмәк» кими тәрҹүмә олунан јунан феили дахилдән ҝәлән дәрин шәфгәт һиссини билдирир. Бу ҹүр шәфгәт һисси мәһәббәтдән гајнагланыр. Бу һисс Исаны һәмчинин тәшвиг етмишди ки, аҹлары дојурсун вә ҹүзамлы адамы сағалтсын (Мәт. 15:32; Марк 1:41). Әмин ола биләрик ки, рәһмли Аллаһымыз Јеһова вә Оғлу бизи севир вә әзабларымызы ҝөрмәк онлара гәлб ағрысы верир (Лука 1:78; 1 Бут. 5:7). Онлар бәшәријјәтә зүлм верән бүтүн бәлалара сон гојмағы һәсрәтлә ҝөзләјирләр! w23.04 с. 3, абз. 4, 5

Әлиниздән ҝәләни един ки, Шејтан дүнјасында ҝениш јајылмыш фикирләрә даһа аз мәруз галасыныз. Һәмчинин Мүгәддәс Китабы мүталиә едәрәк ағлынызы сағлам фикирләрлә долдурун. Бунунла јанашы, јығынҹаг ҝөрүшләриндә вә тәблиғдә иштирак етмәк дә дүшүнҹәнизи горумаға көмәк едәҹәк. Јеһова исә гојмајаҹаг ки, сиз «ҝүҹүнүз чатмајан сынаглара мәруз галасыныз» (1 Кор. 10:12, 13). Биз сон дәрәҹә чәтин бир вахтда јашајырыг. Буна ҝөрә дә садиг галмаг үчүн һәр биримизин дуа етмәјә инди даһа чох еһтијаҹы вар. Јеһова истәјир ки, дуа едиб үрәјимизи Она ачаг (Зәб. 62:8). Дуада Јеһованы мәдһ един, ҝөрдүјү ишләрә ҝөрә миннәтдарлығынызы билдирин. Хидмәтдә ҹәсарәтли олмаг үчүн көмәк диләјин. Јеһоваја јалварын ки, истәнилән проблемә таб ҝәтирмәк вә нәфслә мүбаризә апармаг үчүн сизә ҝүҹ версин. Гојмајын ки, нәсә вә ја кимсә сизин Јеһоваја мүнтәзәм дуа етмәјинизә мане олсун. w23.05 с. 7, абз. 17, 18

Биз јығынҹаға нијә ҝәлирик? Әввәла, Јеһованы уҹалтмаг үчүн (Зәб. 26:12; 111:1). Һәмчинин бу чәтин дөврдә бир-биримизи мөһкәмләндирмәк үчүн (1 Салон. 5:11). Әл галдырыб шәрһ вермәклә һәр ики мәгсәдә чатмыш олуруг. Амма бәзән шәрһ вермәк чәтин олур. Һәјәҹанландығымыз үчүн шәрһ верә билмирик, јахуд шәрһ вермәји чох истәјирик, амма әлимизи галдыранда бәзән гардашлар бизә сөз вермир. Бәс бу чәтинликләрин өһдәсиндән неҹә ҝәлә биләрик? Һәвари Булус демишди ки, әсас мәгсәдимиз бир-биримизи руһландырмаг олмалыдыр. Әҝәр јадда сахласаг ки, садә шәрһләримизлә дә бир-биримизи руһландыра биләрик, онда шәрһ вермәкдән чәкинмәјәҹәјик. Диҝәр тәрәфдән дә, истәдијимиз гәдәр шәрһ верә билмәсәк дә, севинәҹәјик ки, башгалары даһа чох шәрһ верә билди (1 Бут. 3:8). w23.04 с. 20—21, абз. 1—3

Аләмә хәбәр јајылыб! 70 илә јахындыр Бабилдә әсир олан јәһудиләр азадлыға бурахылды. Онлар өз вәтәнләринә — Исраилә ҝери гајыда биләрләр (Үзр. 1:2—4). Белә бир шеј јалныз Јеһованын сајәсиндә мүмкүн иди. Чүнки адәтән бабиллиләр әсирләрини азад етмирди (Әшј. 14:4, 17). Амма Бабил сүгута уғрады вә јени һөкмдар јәһудиләрә билдирди ки, өлкәләринә гајыда биләрләр. Һәр бир јәһуди, хүсусилә дә аилә башчылары гәрар вермәли иди: Бабилдә галсынлар, јохса ҝетсинләр? Бу гәрары вермәк һеч дә асан дејилди. Чүнки бәзиләри јаша долмушду, онлар узун сәфәрә чыхмаға еһтијат едирди. Әксәр јәһудиләр исә Бабилдә дүнјаја ҝәлмишди. Онлар Бабилдән гыраға чыхмамышдылар. Буна ҝөрә дә Исраил онлар үчүн садәҹә ата-бабаларынын јурду иди. Бәзи јәһудиләр исә Бабилдә варланмышды. Бу сәбәбдән раһат ев-ешикләрини, ишләрини гојуб намәлум бир дијара ҝетмәк онлар үчүн чәтин иди. w23.05 с. 14, абз. 1, 2

Аллаһын Кәламы бизи тәшвиг едир ки, даим өзүмүздә дөзүм, шәфгәт вә мәһәббәт јетишдирәк. Лука 21:19 ајәсиндә јазылыб: «Дөзүмлә һәјатынызы хилас едәҹәксиниз». Колослулара 3:12 ајәсиндә дејилир: «Шәфгәти... ҝејинин». 1 Салоникилиләрә 4:9, 10 ајәләриндә охујуруг: «Бир-биринизи севмәји сизә Аллаһ өјрәдир... Бунунла белә, гардашлар, сизә төвсијә едирик ки, бу саһәдә даһа да инкишаф едәсиниз». Бу сөзләрин үнванландығы инсанлар артыг дөзүм, шәфгәт вә мәһәббәт ҝөстәрирдиләр. Амма онлар бу хүсусијјәтләри даим инкишаф етдирмәли идиләр. Бу бизә дә аиддир. Буну неҹә едә биләрик? Дүшүнүн ҝөрүн биринҹи әсрдәки мәсиһиләр бу хүсусијјәтләри неҹә тәзаһүр етдирирдиләр. Онлардан нүмунә ҝөтүрмәк вә беләҹә, бөјүк мүсибәтә һазыр олмаг үчүн сиз нә едә биләрсиниз. Беләҹә, бөјүк мүсибәт башлајанда артыг дөзүмлү олмағы өјрәнмиш олаҹагсыныз вә бундан сонра да тәслим олмамаға гәти гәрарлы олаҹагсыныз. w23.07 с. 2, абз. 4; с. 3, абз. 8

Мәсһ олунмуш вә ја «башга гојун» олмағымыздан асылы олмајараг, «Мүгәддәслик јолу»нда галмалыјыг. Чүнки бу јол руһани ҹәннәтдән кечир вә бизи Падшаһлығын ҝәтирәҹәји немәтләрә апарыр (Јәһ. 10:16). Ерамызын 1919-ҹу илиндән бәри милјонларла киши, гадын вә ушаг јалан динин дүнја империјасы олан Бөјүк Бабили тәрк едиб вә бу мәҹази јолда јеримәјә башлајыб. Јәһудиләр Бабили тәрк едәндә Јеһова онларын јолундакы манеәләри арадан галдырмышды (Әшј. 57:14). Бәс бизим дөврүмүздәки «Мүгәддәслик јолу» барәдә нә демәк олар? 1919-ҹу илә гәдәрки әсрләр әрзиндә Јеһова үрәјиндә Аллаһ хофу олан инсанлар васитәсилә Бөјүк Бабилдән чыхан јолу тәмизләди. (Әшија 40:3 ајәси илә әлагәләндирин.) Онлар мәҹази мәнада јолда лазыми һазырлыг ишләри апардылар ки, сонралар салеһ инсанлар Бөјүк Бабилдән чыхыб пак ибадәтин бәрпа олундуғу руһани ҹәннәтә дахил ола билсин. w23.05 с. 15—16, абз. 8, 9

Јеһова истәјир ки, Она севинҹлә, көнүл хошлуғу илә хидмәт едәк (2 Кор. 9:7). Бәс онда көнлүмүздән кечмәјәндә белә, мәгсәдимизә чатмаға чалышмалыјыг? Һәвари Булусун нүмунәсинә бахаг. О демишди: «Бәдәнимә ҹәфа вериб ону көлә кими өзүмә табе етдирирәм» (1 Кор. 9:25—27). Булусун үрәјиндән бәзән башга ҹүр давранмаг кечирди, амма о өзүнү мәҹбур едирди ки, Јеһованын бәјәндији кими даврансын. Бәс Јеһова Булусун хидмәтиндән разы иди? Сөзсүз. Јеһова онун зәһмәтинә бәрәкәт верди (2 Тим. 4:7, 8). Јеһова ҝөрәндә ки, биз дә, һәвәсимиз олмаса белә, мәгсәдимизә чатмаға чалышырыг, чох севинир. Чүнки бәзән ҝөрәҹәјимиз иши севмәсәк дә, Јеһованы севдијимиз үчүн буну едирик. Јеһова һәвари Булусу зәһмәтинә ҝөрә мүкафатсыз гојмады, ејнилә бизи дә мүкафатсыз гојмајаҹаг (Зәб. 126:5). Һәтта ола биләр ки, Јеһованын вердији мүкафатлары ҝөрүб мотивасијамыз артсын. w23.05 с. 29, абз. 9, 10

Һәвари Булус Јеһованын ҝүнүндә хилас ола билмәјәҹәк адамлары јатан адамлара бәнзәдир. Јатан адам әтрафда баш верәнләрдән вә вахтын неҹә кечдијиндән хәбәрсиз олур. Она ҝөрә дә ваҹиб һадисәләри гачырыр. Бу ҝүн дә әксәр инсанлары јатан адамлара бәнзәтмәк олар (Ром. 11:8). Онлар ахырзаманда јашадығымызы вә тезликлә бөјүк мүсибәтин ҝәләҹәјини ҝөстәрән сүбутлара лагејд јанашырлар (2 Бут. 3:3, 4). Амма биз баша дүшүрүк ки, һәр өтән ҝүн ојаг галмаг даһа ваҹибдир (1 Салон. 5:6). Буна ҝөрә дә сакит вә сабит дүшүнҹәни горумалыјыг. Нә үчүн? Сијаси вә сосиал мәсәләләрә гарышмамаг үчүн. Јеһованын ҝүнү јахынлашдыгҹа бу мәсәләләрдә битәрәф галмаг даһа да чәтин олаҹаг. Бунунла белә, тәзјигләр гаршысында неҹә давранаҹағымыза ҝөрә нараһат олмамалыјыг. Јеһованын руһу бизә сакит вә сабит дүшүнҹәни горумаға вә дүзҝүн гәрарлар вермәјә көмәк едәҹәк (Лука 12:11, 12). w23.06 с. 9—10, абз. 6, 7

Шимшон адыны ешидәндә ағлыныза нә ҝәлир? Јәгин, онун гејри-ади ҝүҹү. О, доғрудан да, белә инсан иди. Бунунла белә, Шимшон сәһв гәрар да вермишди вә бунун әзабыны чәкмишди. Амма Јеһова онун илләр әрзиндә сәдагәтлә етдији хидмәти гијмәтләндирирди вә ондан өрнәк алмағымыз үчүн нүмунәсини Кәламына јаздырыб. Јеһова Исраил халгына көмәк етмәк үчүн Шимшон васитәсилә һејрәтли ишләр ҝөрмүшдү. Шимшонун өлүмүндән әсрләр сонра һәвари Булус онун адыны бөјүк иман саһибләринин арасында чәкмишди (Ибр. 11:32—34). Шимшон һәтта ән ағыр вәзијјәтләрдә белә Јеһоваја архаланырды. Шимшондан чох шеј өјрәнә биләрик вә онун нүмунәси бизи руһландыра биләр. w23.09 с. 2, абз. 1, 2

Јеһоваја тез-тез дуа едиб дәрдимизи Онунла бөлүшмәк дөзүмүмүзү мөһкәмләндирәҹәк (1 Салон. 5:17). Ола билсин, һал-һазырда ҹидди проблемләриниз јохдур. Бунунла белә, мәјус, чашгын оланда, нә едәҹәјинизи билмәјәндә көмәк үчүн Јеһоваја үз тутурсунуз? Әҝәр инди ҝүндәлик проблемләриниз заманы Јеһоваја дуа етмәји вәрдиш етсәниз, сабаһ даһа бөјүк проблемләрлә үзләшәндә ағлыныза ҝәлән илк шеј бу олаҹаг. Үрәјиниз дә архајын олаҹаг ки, Јеһова мәсләһәт билдији вахтда сизин үчүн нә лазымдырса едәҹәк (Зәб. 27:1, 3). Әҝәр индики чәтинликләр заманы дөзүм ҝөстәририксә, чох јәгин ки, бөјүк мүсибәт заманы да дөзүмлү ола биләҹәјик (Ром. 5:3). Нәјә әсасән белә дејә биләрик? Чох баҹы-гардашымыз өз тәҹрүбәсиндән ҝөрүб ки, таб ҝәтирдикләри һәр иман сынағы онлара нөвбәти сынаға дөзмәјә көмәк едиб. Дөзүм онлары даһа јахшы инсан едиб. Јеһованын онлара көмәк етмәјә һазыр олдуғуна иманларыны артырыб. Иман да өз нөвбәсиндә онлара нөвбәти сынаға дөзмәјә көмәк едиб (Јаг. 1:2—4). w23.07 с. 3—4, абз. 7, 8

Јеһова лүтфкар вә рәһмли олдуғу үчүн дәрракәлидир, ҝүзәштә ҝедир. Ҝәлин Јеһованын лүтфкар олдуғуну ҝөстәрән бир һадисәни јадымыза салаг. О, Сәдумда јашајан шәр инсанлары мәһв етмәк гәрарына ҝәләндә мәләји васитәсилә Лута демишди ки, дағлара гачсын. Лут исә ора ҝетмәјә горхурду. Она ҝөрә дә Јеһоваја јалварды ки, аиләси илә бирликдә Соһара гачмасына изин версин. Бу, балаҹа бир шәһәр иди вә Јеһова ораны да мәһв етмәк нијјәтиндә иди. Јеһова тәләб едә биләрди ки, Лут нөгтәсинә кими Онун вердији ҝөстәришә ујғун даврансын. Амма О белә етмәди, Лутун хаһишини нәзәрә алды. Һәтта она ҝөрә Соһары мәһв етмәди (Јар. 19:18—22). Әсрләр сонра баш вермиш башга бир һадисәдән Јеһованын рәһмли олдуғуну ҝөрә биләрик. Јеһова Јунус пејғәмбәри Нејнәва шәһәринә ҝөндәрди. Пејғәмбәр бәјан етди ки, бу шәһәр вә онун сакинләри тезликлә мәһв олаҹаг. Амма Јеһова нејнәвалыларын төвбә етдијини ҝөрдү вә онлара јазығы ҝәлди, буна ҝөрә дә бу шәһәрә гыјмады (Јун. 3:1, 10; 4:10, 11). w23.07 с. 21, абз. 5

Јуәс һансы саһәдә бизә ибрәтдир? Јуәс көкү үздә олан, ашмамаг үчүн бир чубуға сөјкәнән ағаҹ кими иди. О, Јәһјадаја сөјкәнмишди. Јәһјадај өлүб ҝедәндән сонра дөнүклүк күләји әсди вә о, јерә ашды. Ола билсин, аиләмиз, јығынҹагдакы баҹы-гардашлар бизим үчүн ҝөзәл өрнәкдир. Амма Јеһоваја итаәтимиз јалныз онларын нүмунәсиндән асылыдырса, бу, чох тәһлүкәлидир. Руһани ҹәһәтдән мөһкәм олмаг үчүн биз Јеһоваја севҝимизи вә һөрмәтимизи артырмалыјыг. Бунун үчүн мүнтәзәм олараг мүталиә етмәк вә дуа етмәк лазымдыр (Әрм. 17:7, 8; Кол. 2:6, 7). Јеһова биздән чох шеј истәмир. Онун бујругларынын мәғзи Ваиз 12:13 ајәсиндә гејд олунуб: «Аллаһдан горх, Онун әмрләрини јеринә јетир. Инсанын вәзифәси будур». Ҝәләҹәкдә башымыза нә ҝәлирсә ҝәлсин, Аллаһ горхусу сајәсиндә биз мөһкәм дајанаҹағыг. Јеһова илә достлуғумузу һеч нә поза билмәјәҹәк. w23.06 с. 19, абз. 17—19

Вәһј 21:5 ајәси белә сөзләрлә башлајыр: «Тахтда отуран деди». Бу, диггәтчәкән мәгамдыр, чүнки Јеһованын «Вәһј» китабында ҝөрүнтү васитәсилә шәхсән данышдығы үч һадисәдән биридир. Бәли, бу зәманәти верән һансыса гүдрәтли мәләк дејил, һеч Иса да дејил, Јеһованын Өзүдүр. Бу ҝөстәрир ки, Вәһј 21:5, 6 ајәләриндә јазылан сөзләрә там етибар едә биләрик. Чүнки Јеһова «һеч вахт јалан [данышмыр]» (Тит. 1:2). Ајәдәки «будур» сөзүнә бахаг. «Будур» кими тәрҹүмә олунмуш јунан сөзү «Вәһј» китабында тез-тез истифадә едилир. Бу сөздән сонра Јеһова белә дејир: «Мән һәр шеји тәзә едирәм». Дүздүр, бурада Јеһова ҝәләҹәкдә едәҹәји дәјишикликләрдән данышыр. Лакин О бу вәдинин јеринә јетәҹәјинә о гәдәр әминдир ки, онлары һал-һазырда етдијини дејир (Әшј. 46:10). w23.11 с. 3—4, абз. 7, 8

Бутрус бәзән зәифликләринә јенилирди. Бир нечә вәзијјәтә бахаг. Иса Мүгәддәс Китаб пејғәмбәрлијинә әсасән әзаб чәкиб өләҹәјини дејәндә Бутрус она ирад тутмушду (Марк 8:31—33). О, кимин бөјүк олдуғу үстүндә дәфәләрлә һәвариләрлә мүбаһисә етмишди (Марк 9:33, 34). Исанын өлүмүндән бир аз әввәл Бутрус гејри-ихтијари бир нәфәрин гулағыны кәсмишди (Јәһ. 18:10). Елә һәмин ҝеҹә Бутрус горхуја дүшүб Исанын досту олдуғуну үч дәфә данмышды (Марк 14:66—72). Нәтиҹәдә һөнкүр-һөнкүр ағламышды. Иса мәјуслуға гәрг олмуш бу һәварисиндән әлини үзмәди. Дириләндән сонра Бутруса имкан јаратды ки, ону һәлә дә севдијини билдирсин. Иса Бутрусу онун сүрүләринин чобаны олмаға дәвәт етди (Јәһ. 21:15—17). Бутрус да бу дәвәти гәбул етди. Әллинҹи ҝүн бајрамында Бутрус Јерусәлимдә иди вә мүгәддәс руһла мәсһ олунан илк мәсиһиләрдән бири иди. w23.09 с. 22, абз. 6, 7

Һәвари Бутрус ағсаггаллары Аллаһын сүрүсүнү отармаға сәсләмишди (1 Бут. 5:1—4). Әзиз ағсаггаллар, билирик ки, сиз баҹы-гардашлары севирсиниз, истәјирсиниз ки, Јеһова илә мүнасибәтләринин мөһкәм олмасына көмәк едәсиниз. Амма бәзән ола билсин ки, вахтыныз аз олур, јахуд јорғун олурсунуз вә буна ҝөрә бу тәјинатынызы јеринә јетирә билмирсиниз. Бу заман нә едә биләрсиниз? Бүтүн нараһатлыгларынызы Јеһоваја данышын. Бутрус јазмышды: «Хидмәт едән гој Аллаһын вердији ҝүҹә архаланараг хидмәт етсин» (1 Бут. 4:11). Ола билсин, баҹы-гардашларын үзләшдији бәзи проблемләрин бу дүнјада там һәлли јохдур. Амма унутмајын ки, «баш чобан» Иса Мәсиһ онлара сиздән даһа јахшы көмәк едә биләр. О буну һәм бу ҝүн едә биләр, һәм дә ҝәләҹәкдә јени дүнјада. Јеһованын ағсаггаллардан истәји садәҹә одур ки, онлар баҹы-гардашлары севсинләр, онлара руһани ҹәһәтдән дајаг олсунлар вә «сүрүјә нүмунә» гојсунлар. w23.09 с. 29—30, абз. 13, 14

Биз өзүмүзү инсан фикирләриндән горумалыјыг. Әҝәр биз мәсәләјә инсан дүшүнҹәси илә бахсаг, онда Јеһоваја вә Онун ганунларына сајмазјана јанашарыг (1 Кор. 3:19). Чох вахт «бу дүнјанын мүдриклији» бизи ҹисмани арзуларымызы тәмин етмәјә сәсләјир. Пергам вә Тиатирада јашајан бәзи мәсиһиләр орадакы бүтпәрәст вә әхлагсыз инсанларын фикирләринин тәсири алтына дүшмүшдүләр. Иса һәр ики јығынҹағы әхлагсызлыға ҝөз јумдугларына ҝөрә мәзәммәт етмишди (Вәһј 2:14, 20). Бу ҝүн инсанлар чалышыр ки, јанлыш фикирләри бизим бејнимизә јеритсин. Аилә үзвләримиз вә достларымыз биздә елә һисс ојада биләрләр ки, санки биз чох сәрт мөвге тутмушуг вә бизи Аллаһын гајда-ганунуну позмаға тәһрик едә биләрләр. Мәсәлән, онлар дејә биләр ки, тәмиз әхлагы горумағын бир мәнасы јохдур вә Аллаһын Кәламындакы нормалар көһнәлиб. Бәзән бизә елә ҝәлә биләр ки, Јеһованын ҝөстәришләри кифајәт гәдәр ачыг дејил. Һәтта биздә јазыланлардан кәнара чыхмаг истәји ола биләр (1 Кор. 4:6). w23.07 с. 16, абз. 10, 11

Исанын анасы Мәрјәм ҝүҹлү олмалы иди. Чүнки о, әрдә олмаја-олмаја һамилә галаҹагды. Мәрјәм индијә кими ушаг бөјүтмәмишди, амма инди ҝәләҹәк Мәсиһи бөјүтмәли иди. Үстәлик, нишанлысы Јусифлә һамилә олдуғу барәдә данышмалы иди. Ҝөрәсән, бүтүн бунлары она неҹә изаһ едәҹәкди? (Лука 1:26—33). Мәрјәм һарадан ҝүҹ тапды? О башгаларынын көмәјинә үз тутду. Мәсәлән, Ҹәбрајыл мәләкдән бу тапшырыгла бағлы әлавә мәлумат истәди (Лука 1:34). Бундан бир аз сонра Јәһуданын дағлыг бөлҝәсиндә јашајан гоһуму Илсәбаҝилә ҝетди. Илсәба Мәрјәми тәрифләди вә онун һәлә дүнјаја ҝәлмәмиш өвлады барәдә Јеһованын илһамы илә пејғәмбәрлик сөјләди (Лука 1:39—45). Бу пејғәмбәрлик Мәрјәми чох руһландырды. Мәрјәм деди ки, Јеһова «голунун гүввәти илә бөјүк ишләр ҝөрдү» (Лука 1:46—51). Беләликлә, Јеһова Ҹәбрајыл мәләк вә Илсәба васитәсилә Мәрјәмә ҝүҹ верди. w23.10 с. 14—15, абз. 10—12

Мәсиһин давамчыларынын мәһдуд сајы мүгәддәс руһла мәсһ олунуб. Онларын Јеһова илә хүсуси мүнасибәти вар. Бу 144 000 нәфәр ҝөјдә Иса илә бирҝә каһин кими хидмәт едәҹәк (Вәһј 14:1). Чадырын Мүгәддәс јери онларын јер үзүндә оларкән руһани оғуллуға ҝөтүрүлмәләрини тәмсил едир (Ром. 8:15—17). Чадырын Ән мүгәддәс јери ҝөјү — Јеһованын мәскәнини тәмсил едир. Мүгәддәс јери Ән мүгәддәс јердән ајыран «пәрдә» исә Мәсиһин инсан бәдәнинин тимсалыдыр. Бу бәдән она руһани мәбәдә али баш каһин кими дахил олмаға манеә иди. Иса Мәсиһ өз бәдәнини бәшәријјәт уғрунда гурбан вермәклә бүтүн мәсһ олунмуш мәсиһиләрин ҝөјләр һәјатына дахил олмасы үчүн јол ачды. Онлар ҹисмани бәдәнләрини тәрк едәндән сонра ҝөјләр мүкафатыны ала биләҹәкләр (Ибр. 10:19, 20; 1 Кор. 15:50). w23.10 с. 28, абз. 13

Әфраимлиләр Ҹәдуну гынајанда о, мүлајимликлә ҹаваб верә билди, өзүндән чыхмады (Һак. 8:1—3). Ҹәдун онларын ҝилеј-ҝүзарына гулаг асды, мүлајим данышараг арадакы ҝәрҝинлији азалтды. Бунунла да тәвазөкар олдуғуну ҝөстәрди. Ағсаггаллар да Ҹәдунун нүмунәсини изләјәрәк гынағы динләјиб мүлајим ҹаваб верирләр, бунунла да јығынҹагда сүлһү горујурлар (Јаг. 3:13). Ҹәдуну Мәдјән үзәриндә чалдығы гәләбәјә ҝөрә тәрифләјәндә о, шәрәфи Јеһоваја вермишди (Һак. 8:22, 23). Мәсул гардашлар Ҹәдунун нүмунәсини неҹә изләјә биләр? Онлар бүтүн наилијјәтләринә ҝөрә Јеһованы уҹалтмалыдырлар (1 Кор. 4:6, 7). Тутаг ки, һансыса ағсаггалы тәлим вермәк баҹарығына ҝөрә тәрифләјирләр. О, вердији тәлимин Јеһованын Кәламына әсасландығыны вурғулаја биләр, јахуд да Јеһованын тәшкилатындан алдығы тәлим сајәсиндә буну баҹардығыны дејә биләр. Ағсаггаллар диггәти өзләринә чәкиб чәкмәдикләрини вахташыры јохламалыдырлар. w23.06 с. 4, абз. 7, 8

Әҝәр дуамыза ҹаваб алмырыгса, өзүмүздән соруша биләрик: «Мән дүзҝүн шеј барәдә дуа едирәм?» Чох вахт бизә елә ҝәлир ки, нәјин хејримизә олдуғуну билирик. Амма бәлкә, истәдијимиз шеј һеч дә бизим хејримизә дејил? Ја да ола билсин, дуа едиб Јеһовадан проблемимизи филан ҹүр һәлл етмәсини хаһиш едирик. Һалбуки мәсәләнин бизим дүшүндүјүмүздән даһа јахшы һәлл јолу ола биләр. Бундан әлавә, хаһиш етдијимиз шеј Јеһованын ирадәсинә мүвафиг олмаја биләр (1 Јәһ. 5:14). Мәсәлән, тутаг ки, бир әр-арвад Јеһовадан өвладынын һәгигәтдә галмасы үчүн дуа едир. Бу ҹүр дуа етмәкдә сәһв бир шеј јохдур. Бунунла белә, Јеһова һеч кәси Она хидмәт етмәјә мәҹбур етмир. О истәјир ки, ушаглар да дахил олмагла һәр кәс Она ибадәт етмәји өзү сечсин (Ган. 10:12, 13; 30:19, 20). Она ҝөрә дә һәмин валидејнләр Јеһовадан ушагларынын гәлбинә јол тапмағы хаһиш едә биләр. Беләҹә, ушағын үрәјиндә Јеһоваја мәһәббәт ојанар вә Онун досту олмаға ҹан атар (Мәс. 22:6; Ефес. 6:4). w23.11 с. 21, абз. 5; с. 23—24, абз. 12

Нәјә ҝөрә тәсәлли вермәк диндашларымыза мәһәббәт ҝөстәрмәјин ваҹиб бир јөнүдүр? Мүгәддәс Китаб үзрә бир елми мәнбәјә әсасән Булусун истифадә етдији «тәсәлли» сөзү «ҹидди проблемләри олан инсанын јанында дајаныб она үрәк-дирәк вермәк» мәнасыны дашыјыр. Бизим тәсәллимиз сајәсиндә дәрди олан диндашымыз јенидән ајаға галхыб әбәди һәјата апаран јолда јеримәјә давам едә биләр. Һәр дәфә кәдәрли анларында диндашларымыза тәскинлик верәндә онлары севдијимизи ҝөстәририк (2 Кор. 7:6, 7, 13). Шәфгәт һисси вә тәсәлли вермәк бир-бири илә бағлыдыр. Һансы мәнада? Шәфгәтли инсан башгаларына тәсәлли вермәјә сөвг олунур. Онларын ағры-аҹысыны диндирмәјә чалышыр. Демәли, биздә биринҹи шәфгәт һисси јараныр, бу исә бизи башгаларына тәсәлли вермәјә тәшвиг едир. Фикир верин, Булус Јеһованын шәфгәти илә инсанларын тәсәлли вермәси арасында һансы әлагәни јарадыр. О, Јеһованын «мәрһәмәтли Ата вә һәр ҹүр тәсәлли Аллаһы» олдуғуну дејир (2 Кор. 1:3). w23.11 с. 9—10, абз. 8—10

Мәсиһин бүтүн давамчылары әзијјәтләрлә үзләшәҹәјини ҝөзләмәлидир. Һәвари Булусу јадымыза салаг. О, Салоникидәки мәсиһиләрә демишди: «Јанынызда оланда да бүтүн бу әзијјәтләрин баш верәҹәјиндән сизи хәбәрдар едирдик. Билдијиниз кими, белә дә олду» (1 Салон. 3:4). Коринфлиләрә исә о јазмышды: «Гардашлар, сизи... башымыза ҝәлән бәладан бихәбәр гојмаг истәмирик... Һәтта сағ галаҹағымыза... үмид етмирдик» (2 Кор. 1:8; 11:23—27). Бу ҝүн дә мәсиһиләр әзијјәтләринин олаҹағыны билир (2 Тим. 3:12). Бәлкә дә Исаја иман едиб онун шаҝирди олдуғунуз үчүн достларыныз, гоһумларыныз сизә дүшмән кәсилиб. Јахуд һәр саһәдә дүрүст олмағыныз ишдә мүәјјән проблемләр јарадыб (Ибр. 13:18). Ја да ки, үмидиниз барәдә инсанларла данышдығыныз үчүн һөкумәт тәрәфиндән тәгиб олунмусунуз. Амма һансы әзијјәтләрлә үзләшмәјимиздән асылы олмајараг, Булус демишди ки, биз севинмәлијик. w23.12 с. 10—11, абз. 9—10

Јагубун чохлу проблемләри вар иди. Онун ики оғлу Шәмун вә Лави һәм аиләләринин, һәм дә Јеһованын адына ләкә ҝәтирмишдиләр. Үстәлик, Јагубун севимли арвады Рәһилә икинҹи өвладларыны дүнјаја ҝәтирәркән вәфат етмишди. Һәлә бу азмыш кими, Јагуб аҹлыг уҹбатындан гоҹа јашында Мисирә көчмәли олмушду (Јар. 35:16—19; 37:28; 45:9—11, 28). Башына бу гәдәр бәлалар ҝәлсә дә, Јагуб һеч вахт Јеһоваја вә Онун вәдләринә иманыны итирмәди. Јеһова да Јагуба ҝөстәрди ки, ондан разыдыр. Мәсәлән, Јеһова Јагуба бәрәкәт верирди; онун мал-мүлкү артдыгҹа артырды. Даһа сонра о, өлмүш билдији оғлу Јусифә говушду. Ҝөрүн о буна ҝөрә Јеһоваја неҹә миннәтдар иди! Јагуб бүтүн бу чәтинликләрә Јеһова илә мөһкәм достлуғун сајәсиндә таб ҝәтирди (Јар. 30:43; 32:9, 10; 46:28—30). Ејнилә, биз дә Јеһова илә мөһкәм мүнасибәтләримизи горујуб сахламағын сајәсиндә ҝөзләнилмәз чәтинликләр гаршысында мәтин гала биләрик. w23.04 с. 15, абз. 6, 7

23-ҹү мәзмурда Давуд Јеһованын ону севдијинә, онун гајғысына галдығына олан әминлијини ифадә едир. О бу мәзмурда Јеһованы «Чобаным» адландырыр. Онунла арасындакы мөһкәм достлуг телләриндән данышыр. Давуд Јеһованын ону јөнләндирмәсинә изин вермәклә өзүнү тәһлүкәсизликдә һисс едирди. О, тамамилә Јеһоваја бел бағлајырды. Давуд һәр ҝүн Јеһованын мәһәббәтини дујаҹағына әмин иди. Бу әминлик онда һарадан иди? Давуд һеч нәдән корлуг чәкмирди. Чүнки Јеһова онун зәрури еһтијаҹларыны һәмишә өдәјирди. Давуд билирди ки, Јеһова кими досту вар вә Јеһова ондан разыдыр. Буна ҝөрә дә ҝәләҹәкдә нә баш верир версин, Давуд Јеһованын бундан сонра да онун гејдинә галаҹағына әмин иди. Давудун Јеһованын мәһәббәтинә олан етибары кечирдији нараһатлыглардан даһа ҝүҹлү иди. Бу да она хошбәхтлик вә гәлб раһатлығы верирди (Зәб. 16:11). w24.01 с. 28—29, абз. 12, 13

Икинҹи Дүнја мүһарибәсиндән бәри Јеһованын халгы бир чох өлкәдә Онун сөзүнү сәрбәст шәкилдә мүждәләјир. Беләҹә, тәблиғ иши ҝетдикҹә шахәләнир вә даһа чох инсанын Јеһованы танымаг имканы олур. Бу ҝүн Рәһбәрлик Шурасынын үзвләри Мәсиһин рәһбәрлијинә табе олмаға давам едирләр. Онлар истәјирләр ки, гәрарлары Јеһова вә Исанын гәрарларыны әкс етдирсин. Рәһбәрлик Шурасы ҝөстәришләрини рајон нәзарәтчиләри вә ағсаггаллар васитәсилә јығынҹаглара чатдырыр. Мәсһ олунмуш ағсаггаллар, ҝениш мәнада исә бүтүн ағсаггаллар Мәсиһин «сағ әлиндә»дирләр (Вәһј 2:1). Дүздүр, онлар гејри-камилдирләр вә сәһвләр едирләр. Амма белә бахсаг, бәзән Муса пејғәмбәр, Јушә, һәтта һәвариләр дә сәһвләр едирди (Сај. 20:12; Јуш. 9:14, 15; Ром. 3:23). Бунунла белә, Иса Мәсиһ садиг вә ағыллы нөкәрә, еләҹә дә тәјин олунмуш ағсаггаллара истигамәт верир вә бундан сонра да верәҹәк. Одур ки, Мәсиһин рәһбәрлик едән гардашлар васитәсилә вердији ҝөстәришләрә шәкк-шүбһәсиз етибар едә биләрик. w24.02 с. 23—24, абз. 13, 14

Сөзләримиздән Јеһоваја миннәтдарлығымыз вә мәһәббәтимиз ҝөрүнәндә О севинир. Тәблиғдә оларкән әсас мәгсәдимиз инсанлары Јеһоваја јахынлашдырмаг, еләҹә дә онлара бизим кими Аллаһы севмәјә көмәк етмәк олмалыдыр (Јаг. 4:8). Инсанлара Мүгәддәс Китабдан Јеһова барәдә, Онун мәһәббәти, әдаләти, һикмәти, гүдрәти вә диҝәр ҝөзәл хүсусијјәтләри һагда јазыланлары ҝөстәрәндә севинҹ дујуруг. Һәмчинин Јеһованын нүмунәсини изләмәјә чалышмагла да Ону мәдһ едирик вә гәлбини севиндиририк (Ефес. 5:1). Белә едәндә бу шәр дүнјада башгаларындан сечилирик. Ола билсин, инсанлар бизим фәргли олдуғумузу ҝөрүб бунун сәбәбини өјрәнмәк истәсин (Мәт. 5:14—16). Ҝүндәлик һәјатда бу ҹүр инсанларла сөһбәт едән заман онлара белә давранмағымызын сәбәбини ачыглаја биләрик. Нәтиҹәдә, сәмими-гәлбли инсанлар Аллаһа јахынлаша биләр. Јеһованы бу јолларла мәдһ едәндә Онун гәлбини фәрәһләндиририк (1 Тим. 2:3, 4). w24.02 с. 10, абз. 7

Јеткин мәсиһи гардаш олмаг үчүн бәзи баҹарыглара јијәләнмәлисиниз. Онлар сизә јығынҹагда үзәринизә мәсулијјәт ҝөтүрмәјә, өзүнүзү вә аиләнизи тәмин етмәк үчүн иш тапмаға, инсанларла ҝөзәл мүнасибәт гурмаға көмәк едәҹәк. Мәсәлән, охумағы вә јазмағы өјрәнин. Мүгәддәс Китабда дејилир ки, Аллаһын Кәламыны һәр ҝүн охујуб үзәриндә дүшүнән инсан хошбәхтдир вә һәр ишиндә уғур газанар (Зәб. 1:1—3). Белә инсан Мүгәддәс Китабы һәр ҝүн охумагла Јеһованын дүшүнҹә тәрзини гаврајаҹаг. Беләҹә, о, ајдын дүшүнәҹәк вә Мүгәддәс Китаб ајәләрини неҹә тәтбиг едә биләҹәјини өјрәнәҹәк (Мәс. 1:3, 4). Диндашларымызын Мүгәддәс Китаба әсасланан ҝөстәришләр вә мәсләһәтләр верән баҹарыглы гардашларын көмәјинә еһтијаҹы вар. Охумағы вә јазмағы јахшы билмәјин сајәсиндә сиз инсанлара фајда ҝәтирән, еләҹә дә онларын иманыны мөһкәмләндирән нитгләр вә шәрһләр һазырлајаҹагсыныз. Һәмчинин мараглы фикрә раст ҝәләндә гејдләр апара биләҹәксиниз. Бу гејдләрин сајәсиндә һәм өз иманынызы артыраҹагсыныз, һәм дә башгаларыны руһландыраҹагсыныз. w23.12 с. 26—27, абз. 9—11

Сизи горху бүрүјәндә Јеһованын ҝәләҹәкдә сизин үчүн едәҹәји ишләр барәдә дүшүнүн. О заман артыг Шејтан олмајаҹаг. 2014-ҹү илин реҝионал топлантысында бир сәһнәҹик ҝөстәрилмишди. Һәмин сәһнәҹикдә ата 2 Тимутијә 3:1—5 ајәләрини аиләси илә мүзакирә етмишди. О бу ајәләрин Ҹәннәтә аид ишләнсә, неҹә сәсләнәҹәји илә бағлы демишди: «Јени дүнја ән хошбәхт бир дөвр олаҹаг. Чүнки инсанлар бир-бирини севән, руһани шејләри дәјәрләндирән, садә, һәлим, Аллаһа алгыш охујан, валидејнләринә итаәт едән, миннәтдар, вәфалы, доғмаларыны севән, үзүјола, башгалары һагда јахшы шејләр данышан, өзүнә һаким олан, мүлајим, јахшылығы севән, етибарлы, ҝүзәштә ҝедән, тәвазөкар, ејш-ишрәтдән чох Аллаһы севән, һәгигәтән мөмин олаҹаг. Беләләриндән бәрк јапыш». Бәс сиз аиләнизлә вә ја диндашларынызла јени дүнјада һәјатын неҹә олаҹағыны мүзакирә едирсиниз? w24.01 с. 6, абз. 13, 14

Јеһованын Өз халгындан разы олдуғуну билмәк неҹә дә хошдур. Мүгәддәс Китабда дејилир: «Јеһова халгындан зөвг алыр» (Зәб. 149:4). Бунунла белә, һәрдән бәзиләриндә бу ҹүр нараһатлыг олур: «Ҝөрәсән, Јеһова шәхсән мәндән разыдыр?» Мүгәддәс Китабда ады чәкилән бир чох мөмин инсанда да бәзән бу ҹүр нараһатлыглар баш галдырырды (1 Ишм. 1:6—10; Әјј. 29:2, 4; Зәб. 51:11). Аллаһын Кәламында ајдын шәкилдә ҝөстәрилир ки, гејри-камил инсанлар Онун разылығыны газана биләр. Бунун үчүн Иса Мәсиһә иман етмәк вә вәфтиз олунмаг лазымдыр (Јәһ. 3:16). Беләҹә, һамы ҝөрәҹәк ки, биз ҝүнаһларымыздан төвбә етмишик вә Јеһоваја Онун ирадәсини јеринә јетирәҹәјимизә даир сөз вермишик (Һәв. 2:38; 3:19). Јеһова илә дост олмаг үчүн бу аддымлары атанда Онун гәлбини севиндиририк. Һәср олунма әһдимизә ујғун јашамаг үчүн әлимиздән ҝәләни едәндә Јеһова биздән разы галыр вә бизи Өзүнә јахын дост һесаб едир (Зәб. 25:14). w24.03 с. 26, абз. 1, 2

Һөкумәт гадаған етсә дә, тәблиғ етмәјә давам етмәклә Исанын шаҝирдләринин нүмунәсини изләјә биләрик. Әмин ола биләрик ки, Јеһова бизә хидмәтимизи иҹра етмәјә көмәк едәҹәк. Она ҝөрә дә дуада Ондан ҹәсарәт вә һикмәт диләјин. Һәмчинин проблемләринизә дөзмәк үчүн Јеһовадан көмәк истәјин. Чохларымыз хәстәликләр, емосионал проблемләр, әзизләримизин иткиси, аилә дахили чәтинликләр, тәгибләр вә диҝәр проблемләрлә үзләширик. Һәлә бир пандемијалар вә мүһарибәләр оланда бу шејләрә дөзмәк даһа да чәтин олур. Бу заман үрәјинизи Јеһоваја бошалдын. Јахын достунуза өзүнүзлә бағлы нә дејәрдинизсә, ејни шејләри Јеһоваја да дејин. Әмин олун ки, Јеһова сизин ишинизи јолуна гојаҹаг (Зәб. 37:3, 5). Даима дуа етмәк бизә чәтинликләрә синә ҝәрмәјә көмәк едәҹәк (Ром. 12:12). Јеһова хидмәтчиләринин нәләр јашадығыны јахшы билир, онларын фәрјадларыны ешидир (Зәб. 145:18, 19). w23.05 с. 5—6, абз. 12—15

Ваҹиб гәрар вермәли оланда Јеһованын ирадәсини мүәјјән етмәли вә она ујғун давранмалыјыг (Ефес. 5:17). Вәзијјәтимизә даир Мүгәддәс Китаб принсипи ахтармагла ҝөстәририк ки, Јеһованын һәмин мәсәләјә бахыш тәрзи бизим үчүн өнәмлидир. Тапдығымыз принсипләри тәтбиг етсәк, даһа јахшы гәрарлар верәҹәјик. Дүшмәнимиз Шејтан истәјир ки, биз дүнјәви ишләрдән башымызы галдыра билмәјәк, Аллаһа ајыраҹаг вахтымыз галмасын (1 Јәһ. 5:19). Мәсиһи еһтијатлы олмаса, диггәтини Аллаһа хидмәт етмәк үчүн фүрсәтләр ахтармаг јеринә пула, тәһсилә, ишә ҹәмләјә биләр. Белә бир шеј баш верибсә демәли, о, дүнјанын тәсири алтына дүшүб. Тәбии ки, бу шејләр өз-өзлүјүндә пис дејил, амма јол вермәмәлијик ки, бунлар һәјатымызда өн плана кечсин. w24.03 с. 24—25, абз. 16, 17