Октјабр

Давуд падшаһ Јеһованы севирди. Амма бәзән она итаәткар олмаг чәтин олурду. Буна ҝөрә дә Јеһоваја белә дуа етмишди: «Сәнә итаәт етмәјә һәвәс ојат ичимдә» (Зәб. 51:12). Һәрдән итаәткар олмаг бизә дә чәтин олур. Нәјә ҝөрә? Әввәла, она ҝөрә ки, итаәтсизлик бизә ирсән кечиб. Икинҹиси, Шејтан бизи өзүнә охшадыб үсјанкарлыға сөвг етмәк истәјир (2 Кор. 11:3). Үчүнҹүсү, «һал-һазырда итаәтсиз адамларда фәалијјәт ҝөстәрән... руһ», јәни үсјанкарлыг руһу дүнјаны бүрүјүб (Ефес. 2:2). Буна ҝөрә дә Јеһоваја вә Онун сәлаһијјәт вердији кәсләрә итаәт етмәк үчүн ҝәрәк ҝүнаһа мејлимизлә мүбаризә апараг, Иблисин вә онун дүнјасынын тәзјигинә гаршы дураг. w23.10 с. 6, абз. 1

Исанын сују шәраба чевирдији мөҹүзәдән нә өјрәнирик? Онун тәвазөкар олдуғуну. Иса ҝөстәрдији мөҹүзә илә өјүнмәди. Үмумијјәтлә, о һеч вахт етдији шејләрлә өјүнмүрдү. Әксинә, Иса тәвазөкар иди, һәмишә вурғулајырды ки, етдији һәр шејә ҝөрә Атасына борҹлудур (Јәһ. 5:19, 30; 8:28). Биз дә Исадан нүмунә ҝөтүрәрәк тәвазөкар олсаг, етдијимиз шејләрлә өјүнмәјәҹәјик. Ҝәлин өзүмүзлә јох, гуллуг етдијимиз ҝөзәл Аллаһымызла өјүнәк (Әрм. 9:23, 24). Һәмишә Јеһованы уҹалдаг. Ахы Онун көмәји олмадан биз һеч нә едә билмәрик! (1 Кор. 1:26—31). Әҝәр тәвазөкар олсаг, башгаларына јахшылыг едәндә буну инсанлара бәјан етмәјә лүзум ҝөрмәјәҹәјик. Јеһованын етдикләримизи ҝөрмәси вә гијмәтләндирмәси бизим үчүн кифајәт олаҹаг. (Мәтта 6:2—4 ајәләри илә әлагәләндирин; Ибр. 13:16.) Јеһова ҝөрәндә ки, Иса кими тәвазөкарыг, бизимлә гүрур дујур (1 Бут. 5:6). w23.04 с. 4, абз. 9; с. 5, абз. 11, 12

Һәвари Булус Аллаһдан илһам алараг мәсиһиләри тәшвиг етмишди ки, башгаларыны да фикирләшсинләр. Јығынҹаг ҝөрүшләри заманы бу мәсләһәтә неҹә әмәл едә биләрик? Бизим кими башгаларынын да шәрһ вермәк истәдијини унутмамалыјыг. Ҝәлин белә бир нүмунә барәдә дүшүнәк. Достларынызла сөһбәт едәндә анҹаг сиз данышырсыныз, јохса имкан верирсиниз ки, онлар да данышсын? Тәбии ки, истәјәрдиниз ки, онлар да сөһбәтә гошулсунлар. Ејнилә јығынҹагларда да истәјәрдик ки, даһа чох адам шәрһ версин. Әслиндә, баҹы-гардашлары руһландырмағын ән јахшы јолларындан бири онлара иманларыны ифадә етмәјә имкан вермәкдир (1 Кор. 10:24). Буна ҝөрә дә һәмишә чалышын гыса шәрһ верәсиниз, онда башгаларына да шәрһ вермәјә вахт галаҹаг. Гыса шәрһ верәндә белә, чалышын чох фикрә тохунмајасыныз. Әҝәр абзасдакы бүтүн фикирләри вурғуласаныз, онда башгаларына демәјә сөз галмајаҹаг. w23.04 с. 22—23, абз. 11—13

Башгаларына көмәк етмәјин ваҹиблијини унутмамалыјыг. Бунун ән јахшы јолу исә тәблиғ етмәкдир. Тәблиғдә гаршылашдығымыз инсанларын миллијјәти, етигады, фикирләри бир-бириндән фәргләнир. Буна ҝөрә дә биз һамыја ујғунлашмалыјыг. Һәвари Булус бу саһәдә бизим үчүн ҝөзәл нүмунәдир. О «диҝәр халглара ҝөндәрилмиш бир һәвари» иди (Ром. 11:13). Буна ҝөрә дә о, јәһудиләрә, јунанлара, савадлы инсанлара, кәндлиләрә, әсилзадәләрә, падшаһлара тәблиғ едирди. Булус белә фәргли инсанларын үрәјинә неҹә јол тапырды? О, «һәр ҹүр адам үчүн һәр шеј» олурду (1 Кор. 9:19—22). Булус тәблиғ етдији адамларын һаралы олдуғуна, нәјә инандығына фикир верирди вә онларла буна әсасән сөһбәт апарырды. Әҝәр биз фәрасәтли олсаг вә һәр кәс һагда ајры-ајры дүшүнүб буна ујғун сөһбәт етсәк, хидмәтимиз даһа мәһсулдар олар. w23.07 с. 23, абз. 11, 12

Мүлајим инсан зәиф јох, ҝүҹлү инсандыр. Ҝәрҝин вәзијјәтдә сакитлији горумаг үчүн дахилән ҝүҹлү олмалысан. Мүлајимлик «руһун бәһрәси»нә дахилдир (Гал. 5:22, 23). «Мүлајимлик» кими тәрҹүмә олунан јунан сөзү адәтән әһлиләшдирилмиш вәһши аты тәсвир етмәк үчүн истифадә олунурду. Бу ҹүр аты тәсәввүрүнүздә ҹанландырын. О артыг сакит олса да, һәлә дә ҝүҹлүдүр. Бәс бизимлә бағлы нә демәк олар? Биз неҹә едә биләрик ки, һәм мүлајим олаг, һәм дә ҝүҹлү? Тәбии ки, инсанын ирадәси нә гәдәр мөһкәм олса да, бу хүсусијјәти тәкбашына јетишдирә билмәз. Бунун бир јолу вар: Аллаһа дуа едиб Ондан мүлајим олмаг үчүн көмәк истәмәк. Чох баҹы-гардашын нүмунәсиндән ҝөрмәк олар ки, бу, мүмкүндүр. Кимсә онларла мүбаһисә етмәјә чалышанда онлар мүлајим ҹаваб верибләр вә бунун сајәсиндә Јеһованын Шаһидләри һагда ҝөзәл тәәссүрат ојадыблар (2 Тим. 2:24, 25). w23.09 с. 14—15, абз. 3

Һәвари Јәһја она назил олан бир мөһтәшәм вәһјдә ҝөрүр ки, 24 ағсаггал Јеһоваја сәҹдә гылыр. Онлар Јеһованы мәдһ едиб дејирдиләр ки, О, «шана, шәрәфә, гүдрәтә» лајигдир (Вәһј 4:10, 11). Ејнилә садиг мәләкләрин дә Јеһованы вәсф етмәк үчүн сәбәбләри чохдур. Онлар ҝөјдә Јеһованын јанындадырлар, Ону јахшы таныјырлар, Јеһованын һәр ишиндә Онун хүсусијјәтләрини ајдын ҝөрүрләр. Јеһованы мүшаһидә етдикҹә Ону даһа чох уҹалтмаг истәјирләр (Әјј. 38:4—7). Биз дә дуаларымызда Јеһованы мәдһ етмәлијик. Дуада Ону нә үчүн севдијимизи, нәјә ҝөрә Она валеһ олдуғумузу дејә биләрик. Мүгәддәс Китабы мүталиә едән заман Јеһовада ән чох бәјәндијиниз хүсусијјәтләри тапмаға чалышын (Әјј. 37:23; Ром. 11:33). Сонра исә Она бу хүсусијјәтләринә ҝөрә үрәјиниздән кечәнләри дејин. Јеһованы һәм бизим, һәм дә халгы уғрунда етдикләринә ҝөрә дә вәсф едә биләрик (1 Ишм. 2:1, 2). w23.05 с. 3—4, абз. 6, 7

1919-ҹу илдә Бөјүк Бабил Аллаһын халгы үзәриндә сәлаһијјәтини итирди. Һәмин ил «садиг вә ағыллы нөкәр» фәалијјәтә башлады. Бу, дүз вахтында иди. Садиг нөкәр тәзәҹә ачылмыш Мүгәддәслик јолунда јеримәк истәјән сәмими-гәлбли инсанлара көмәк етди (Мәт. 24:45—47; Әшј. 35:8). Бу јола гәдәм гојанлар онун һазырлығында әмәји кечән инсанларын зәһмәтиндән бәһрәләниб Јеһова барәсиндә даһа чох елм ала биләрдиләр (Мәс. 4:18). Һәмчинин онлар һәјатларында дәјишиклик едиб Јеһованын бујругларына ујғун јашаја биләрдиләр. Јеһова халгынын бир ҝүнүн ичиндә дәјишәҹәјини ҝөзләмирди. О, халгыны јаваш-јаваш сафлашдырырды. Ҝүн ҝәләҹәк, һәр бир аддымымыз Јеһованын гәлбини севиндирәҹәк. Онда чох хошбәхт олаҹағыг! Һәр бир јолун вахташыры тәмирә еһтијаҹы вар. 1919-ҹу илдән бәри «Мүгәддәслик јолу»нда ҝедән тәмир ишләри даһа чох инсана Бөјүк Бабилдән чыхмаға имкан јарадыб. w23.05 с. 17—19, абз. 15, 16

Рәһбәрлик Шурасы шәхсән Шуранын мүхтәлиф комитәләринин көмәкчиләринә тәлим верир. Бу көмәкчиләр артыг индидән тәшкилатда бөјүк мәсулијјәт јүкү дашыјыр. Онлар мәсһ олунмушлар ҝөјә галхандан сонра да Мәсиһин давамчыларынын гејдинә галмаға там һазырдырлар. Бөјүк мүсибәтин сонуна јахын јер үзүндә олан мәсһ олмушлардан ахырынҹысы ҝөјә галхандан сонра Аллаһын хидмәтчиләри јенә дә Она пак шәкилдә ибадәт едәҹәкләр. Бу, Рәһбәримиз Иса Мәсиһин сајәсиндә олаҹаг. Дүздүр, һәмин вахт милләтләр бирлији олан Мәҹуҹ өлкәсиндән Јәҹуҹ Аллаһын халгына һүҹум едәҹәк (Һизг. 38:18—20). Амма бу гыса вә уғурсуз һүҹум олаҹаг. О, бөјүк издиһама Аллаһа ибадәт етмәјә мане ола билмәјәҹәк. Јеһова халгыны хилас едәҹәк! Һәвари Јәһја ҝөрүнтүдә Мәсиһин давамчыларындан ибарәт «бөјүк бир издиһам» ҝөрмүшдү вә она дејилмишди ки, бу издиһам «бөјүк мүсибәтдән чыханлардыр» (Вәһј 7:9, 14). Бәли, Јеһова халгыны горујаҹаг! w24.02 с. 5—6, абз. 13, 14

Мүгәддәс руһу алмаг үчүн нә етмәлијик? Дуа едиб ону диләмәлијик, Аллаһын руһу илә јазылмыш Кәламы мүталиә етмәлијик вә Аллаһын руһу илә идарә олунан тәшкилата бағлы олмалыјыг. Бүтүн бунлар бизә «руһун бәһрәси»ни јетишдирмәјә көмәк едәҹәк (Гал. 5:22, 23). Аллаһ Өз мүгәддәс руһуну дүшүнҹәсини вә давранышыны тәмиз сахлајанлара верир. Натәмиз фикирләри олан вә бу ҹүр давранан инсана Јеһова даһа мүгәддәс руһуну вермәјәҹәк (1 Салон. 4:7, 8). Биз һәмчинин мүгәддәс руһу алмаг үчүн пејғәмбәрликләрә һәгарәтлә јанашмамалыјыг (1 Салон. 5:20). Бу ајәдә «пејғәмбәрликләр» дејиләндә Аллаһын мүгәддәс руһу илә вердији хәбәрләр нәзәрдә тутулур. Бу хәбәрләрә Јеһованын ҝүнү вә сонун јахын олдуғу илә бағлы мәлуматлар да дахилдир. Биз Армаҝеддонун бизим јашадығымыз дөврдә ҝәлмәјәҹәјини дүшүнәрәк о ҝүнү ағлымыздан узаглашдырмырыг. Әксинә, Јеһованын ҝүнүнү бәрк-бәрк јадда сахлајырыг. Бунун үчүн «мөмин» әмәлләрлә мәшғул олуруг вә давранышымызы тәмиз сахлајырыг (2 Бут. 3:11, 12). w23.06 с. 12—13, абз. 13, 14

Електрон ҹиһазда гаршымыза порнографик шәкилләр чыхса, неҹә давранмалыјыг? Дәрһал ҝөзүмүзү чәкмәлијик. Јеһова илә достлуғумузун һәјатда саһиб олдуғумуз ән дәјәрли шеј олдуғуну јадымыза салсаг, белә давранмаг асан олаҹаг. Һәтта порнографија сајылмајан шәкилләр дә инсанда еһтирас ојада биләр. Нәјә ҝөрә онлара бахмамалыјыг? Чүнки үрәјимиздә зина етмәјә сәбәб олаҹаг кичик аддым белә атмаг истәмирик (Мәт. 5:28, 29). Таиландда ағсаггал кими хидмәт едән Дејвид адлы бир гардаш дејир: «Өз-өзүмә дүшүнүрәм, бу шәкилләр порнографија олмаса да, онлара бахмағым Јеһованын хошуна ҝәләр? Бунлары фикирләшәндә дүзҝүн давранмаг асан олур». Һикмәтли давранмаға бизә нә көмәк едә биләр? Јеһованы наразы салмаг горхусуну јетишдирмәк. Аллаһ горхусу «һикмәтин башы»дыр, јәни тәмәлидир. w23.06 с. 23, абз. 12, 13

Ола билсин, «ичәри отаглар» дејиләндә јығынҹагларымыз нәзәрдә тутулур. Јеһова сөз верир ки, бөјүк мүсибәт заманы диндашларымызын арасында олуб ибадәтимизи давам етдирсәк, О бизи горујаҹаг. Буна ҝөрә дә биз индидән вар ҝүҹүмүзлә чалышмалыјыг ки, баҹы-гардашлара садәҹә дөзмәјәк, онлары севәк. Хиласымыз бундан асылы ола биләр! «Јеһованын мөһтәшәм ҝүнү» бүтүн бәшәријјәт үчүн ағыр дөвр олаҹаг (Сәф. 1:14, 15). Аллаһын халгынын да һәмин вахт чәтинликләри олаҹаг. Амма биз индидән һазырлашсаг, сакитлијимизи горујаҹағыг вә башгаларына көмәк едә биләҹәјик. Биз һәр бир чәтинлик гаршысында дөзүм ҝөстәрәҹәјик. Диндашларымыз әзијјәт чәкәндә әлимиздән ҝәләни едәҹәјик ки, шәфгәт ҝөстәрәрәк вә әл тутараг онларын дәрдини јүнҝүлләшдирәк. Индидән баҹы-гардашлара мәһәббәт јетишдирдијимиз үчүн ҝәләҹәкдә дә онлара јахын олаҹағыг. Онда Јеһова да бизә әбәди һәјат мүкафаты верәҹәк. О заман бүтүн бәлалар вә әзаблар унудулаҹаг (Әшј. 65:17). w23.07 с. 7, абз. 16, 17

Аллаһын Кәламында Онун садиг хидмәтчиләри ҝүҹлү инсанлар кими тәсвир олунуб. Амма онларын арасындан ән ҝүҹлүләри белә өзләрини һеч дә һәмишә ҝүҹлү һесаб етмирдиләр. Мәсәлән, Давуд падшаһ бәзән өзүнү «дағтәк сарсылмаз» һисс едирди, бәзән исә ҹанына горху дүшүрдү (Зәб. 30:7). Јеһованын руһу Шимшона гејри-ади ҝүҹ верирди. Шимшон баша дүшүрдү ки, Јеһованын вердији ҝүҹ олмаса, о, «ҝүҹдән дүшүб ади адам кими олар» (Һак. 14:5, 6; 16:17). Бу садиг инсанлар Јеһованын сајәсиндә ҝүҹлү иди. Һәвари Булус Јеһовадан ҝәлән ҝүҹә еһтијаҹ дујдуғуну баша дүшүрдү (2 Кор. 12:9, 10). О, сәһһәтиндәки проблемләрлә мүбаризә апарырды (Гал. 4:13, 14). Һәрдән она дүзҝүн давранмаг чәтин олурду (Ром. 7:18, 19). Бәзән исә нараһатлыг, намәлумлуг ону сыхырды (2 Кор. 1:8, 9). Амма Булус зәиф оланда ҝүҹлү иди. Чүнки Јеһова она еһтијаҹ дујдуғу ҝүҹү верирди. w23.10 с. 12, абз. 1, 2

Әҝәр биз һәрдән дәјәрсизлик һисси илә мүбаризә апарырыгса, онда Јеһованын бизи Өзүнә неҹә ҹәлб етдији барәдә дүшүнә биләрик (Јәһ. 6:44). О бизим өзүмүздә ҝөрмәдијимиз јахшы ҹәһәтләримизи ҝөрүр, үрәјимиздәкиләри билир (2 Салн. 6:30). Она ҝөрә дә Јеһованын «сиз дәјәрлисиниз» сөзүнә инанмалыјыг (1 Јәһ. 3:19, 20). Бәзиләримиз һәгигәти өјрәнмәздән әввәл етдијимиз сәһвләрә ҝөрә һәлә дә өзүмүзү ҝүнаһкар һисс едирик (1 Бут. 4:3). Һәтта Јеһоваја сәдагәтлә хидмәт едән мәсиһиләрин арасында да зәифликләри илә мүбаризә апаранлар вар. Бәс сизин дә үрәјиниз нәјәсә ҝөрә сизи гынајыр? Әҝәр еләдирсә, билин ки, Јеһованын диҝәр садиг бәндәләри дә охшар һиссләр кечириб. Мәсәлән, һәвари Булус зәифликләри барәдә дүшүнәндә өзүнү гынајырды (Ром. 7:24). Тәбии ки, о, ҝүнаһларындан төвбә етмишди вә вәфтиз олунмушду. Бунунла белә, јенә дә өзүнү «һәвариләрин ән кичији» вә «ҝүнаһ саһибләриндән ән бетәри» адландырмышды (1 Кор. 15:9; 1 Тим. 1:15). w24.03 с. 27, абз. 5, 6

Јуәс падшаһын сәһвини тәкрарламамаг үчүн нә етмәлијик? Биз Јеһованы севән, Ону разы салмаг истәјән инсанларла достлуг етмәлијик. Онлар бизи јахшы ишләрә тәшвиг едәҹәк. Һәмчинин мүтләг дејил ки, јалныз өз јашыдларымызла достлуг едәк. Билдијимиз кими, Јуәс Јәһјадајдан јашҹа хејли кичик иди. Достларыныз барәдә өзүнүзә бу суаллары верин: «Онлар Јеһоваја иманымы мөһкәмләндирмәјә көмәк едир? Мәни Аллаһын нормаларына ујғун јашамаға тәшвиг едир? Мәнимлә Јеһова вә Онун дәјәрли һәгигәтләри һагда сөһбәт едир? Јеһованын нормаларына һөрмәтлә јанашыр? Садәҹә ешитмәк истәдикләрими дејир, јохса сәһвими дә ҝөстәрир?» (Мәс. 27:5, 6, 17). Ачығы, достларыныз Јеһованы севмирсә, онлар сизә лазым дејил. Амма Јеһованы севирләрсә, онлардан бәрк јапышын, онларын сизә чох көмәји дәјәҹәк! (Мәс. 13:20). w23.09 с. 9—10, абз. 6—7

«Алфа» јунан әлифбасынын биринҹи, «омега» исә ахырынҹы һәрфидир. Јеһова нәјә ҝөрә Өзү илә бағлы бу сөзләри дејир? Чүнки О, башладығы һәр иши мүтләг ахыра чатдырыр. Јеһова Адәмлә Һәвваны јарадандан сонра онлара демишди: «Төрәјиб чохалын, бүтүн јер үзүнү долдурун вә она саһиб олун» (Јар. 1:28). Јеһова бу нијјәтини бәјан етмәклә санки «Алфа» деди. Онун нијјәти ајдын иди: Адәмлә Һәввадан төрәјән камил, итаәткар инсанлар јер үзүнү долдуруб ону ҹәннәтә чевирмәли идиләр. Бу нијјәти јеринә јетәндә О, санки «Омега» дејәҹәк. «Ҝөјүн, јерин вә онларда олан һәр шејин јарадылышы» баша чатандан сонра Јеһова буна зәманәт верди. О, билдирди ки, бәшәријјәтлә вә Јер күрәси илә бағлы нијјәтини јеринә јетирәҹәк вә бу, једдинҹи ҝүнүн сонунда там шәкилдә ҝерчәкләшәҹәк (Јар. 2:1—3). w23.11 с. 4—5, абз. 13, 14

Бабилдән Исраилә чәтин сәфәр тәхминән дөрд ај чәкә биләрди. Амма Јеһова вәд етмишди ки, онларын гајытмасына әнҝәл төрәдән бүтүн манеәләри арадан галдыраҹаг. Иманлы јәһудиләр билирди ки, Исраилә гајытмаг онларын хејринәдир. Бунун үчүн истәнилән гурбаны вермәјә дәјәр. Алаҹаглары ән бөјүк немәт ибадәтләри илә бағлы иди. Бабилдә Јеһоваја ибадәт етмәк үчүн бир дәнә дә олсун мәбәд јох иди. Орада һеч гурбанҝаһ да јох иди ки, Мусанын ганунунда тәләб олундуғу кими исраиллиләр гурбан ҝәтирсинләр. Һәмчинин гурбан тәгдим етмәк үчүн каһинләр тәјин олунмамышды. Үстәлик, бүтпәрәст киши вә гадынларын сајы Јеһованын халгындан гат-гат чох иди, онлар Јеһованын гајда-ганунларыны сајмырдылар. Она ҝөрә дә үрәјиндә Аллаһ хофу олан минләрлә јәһуди өз өлкәләринә гајыдыб пак ибадәти јенидән бәрпа етмәјин интизарында иди. w23.05 с. 14—15, абз. 3, 4

«Нур өвладлары кими» јашамаг үчүн Аллаһын вердији мүгәддәс руһа еһтијаҹымыз вар. Чүнки бу корланмыш дүнјада тәмиз галмаг һеч дә асан дејил (1 Салон. 4:3—5, 7, 8). Мүгәддәс руһ бизә бу дүнјанын тәсиринә, Аллаһын дүшүнҹәсинә зидд олан фәлсәфи фикирләрә вә бахышлара гаршы дурмаға көмәк едир. Һәмчинин мүгәддәс руһ сајәсиндә «јахшылыг, салеһлик» кими нурун бәһрәләрини јетишдирә биләрик (Ефес. 5:9). Мүгәддәс руһу алмағын бир јолу бу барәдә дуа етмәкдир. Иса демишди ки, Јеһова «Ондан истәјәнләрә мүгәддәс руһ» верәҹәк (Лука 11:13). Үстәлик, јығынҹагда диндашларымызла бирҝә Јеһованы мәдһ едәндә дә мүгәддәс руһ алырыг (Ефес. 5:19, 20). Биздә фәалијјәт ҝөстәрән мүгәддәс руһун сајәсиндә Јеһованы разы салан тәрздә јашаја биләҹәјик. w24.03 с. 23—24, абз. 13—15

Сизә даһа чох сәбир лазымдыр? Еләдирсә, бу барәдә Јеһоваја дуа един. Сәбир руһун бәһрәсинин бир һиссәсидир (Гал. 5:22, 23). Буна ҝөрә дә ону јетишдирмәк үчүн Јеһовадан мүгәддәс руһ истәмәлијик. Әҝәр һансыса вәзијјәтдә сәбир касамызын долдуғуну һисс едириксә, Јеһовадан мүгәддәс руһу «дурмадан» диләмәлијик (Лука 11:13). Һәмчинин хаһиш едә биләрик ки, вәзијјәтә Онун кими баха биләк. Дуадан сонра исә һәр ҝүн вар ҝүҹүмүзлә чалышмалыјыг ки, сәбир ҝөстәрәк. Сәбирли олмаг үчүн дуа етдикҹә вә сәбирли олмаға чалышдыгҹа бу хүсусијјәт үрәјимиздә ҝетдикҹә даһа дәрин көк салаҹаг вә бизим хасијјәтимизә чевриләҹәк. Һәмчинин Мүгәддәс Китабдакы нүмунәләр барәдә дәриндән дүшүнүн. Орада сәбирлә давранан чох инсан һагда јазылыб. Онларын нүмунәси барәдә дүшүнмәклә сәбирли олмағын јолларыны өјрәнә биләрик. w23.08 с. 22—23, абз. 10, 11

Иса һәвари Бутрусу Јеһованын она дајаг олаҹағына әмин етмишди. Иса дириләндән сонра Бутруса вә диҝәр һәвариләрә јенә мөҹүзәви шәкилдә балыг тутмаға көмәк етди (Јәһ. 21:4—6). Шүбһәсиз, бу мөҹүзәдән сонра Бутрус әмин олду ки, Јеһова үчүн онун мадди еһтијаҹларыны тәмин етмәк чох асандыр. Бәлкә дә онун јадына Исанын дедији сөзләр дүшмүшдү. О демишди ки, Јеһова Падшаһлығы «һәр шејдән үстүн» тутанлары дарда гојмајаҹаг (Мәт. 6:33). Артыг Бутрус үчүн һәјатда ән үмдә шеј балыгчылыг иши јох, тәблиғ иши иди. О, ерамызын 33-ҹү илинин Әллинҹи ҝүн бајрамында ҹәсарәтлә шаһидлик верди вә бунун нәтиҹәсиндә минләрлә инсан хош мүждәни гәбул етди (Һәв. 2:14, 37—41). Сонра о, сәмәријјәлиләрә вә гејри-јәһудиләрә мәсиһин давамчысы олмаға көмәк етди (Һәв. 8:14—17; 10:44—48). Ајдындыр ки, Јеһова һәр ҹүр инсаны јығынҹаглара ҹәлб етмәк үчүн бир васитәчи кими Бутрусу сечмишди. w23.09 с. 20, абз. 1; с. 23, абз. 11

Бабиллиләр Јерусәлими мәһв едәндән тәхминән ики ил сонра Бабил падшаһы Навуходоносор јухуда нәһәнҝ һејкәл ҝөрмүшдү вә бу ону ваһимәјә салмышды. О, Дәнјал да дахил олмагла, бүтүн мүдрикләрә әмр етди ки, онун јухуда нә ҝөрдүјүнү десинләр вә јозумуну ачсынлар, әкс һалда, һамысы өлдүрүләҹәк (Дән. 2:3—5). Дәнјал ҹәлд һәрәкәт етмәли иди, чүнки бундан инсанларын һәјаты асылы иди. О, «падшаһын һүзуруна ҝәлиб јухуну јозмаг үчүн ондан мөһләт истәди» (Дән. 2:16). Бунун үчүн ҹәсарәт вә иман лазым иди. Мүгәддәс Китабын һеч бир јериндә охуја билмәрик ки, Дәнјал бундан әввәл јуху јозуб. О, достларындан хаһиш етди ки, «ҝөјләрин Аллаһына дуа едиб лүтф диләсинләр» (Дән. 2:18). Јеһова онларын дуасына ҹаваб верди. Онун көмәји илә Дәнјал Навуходоносорун јухусуну јозду. Бунунла Дәнјал һәм өзүнүн, һәм дә достларынын һәјатыны хилас етди. w23.08 с. 2—3, абз. 4

Сәбирли олмағын хејри барәдә дүшүнүн. Сәбирли оланда даһа хошбәхт, даһа сакит олуруг. Буна ҝөрә дә сәбир бизим физики вә емосионал сағламлығымызы јахшылашдырыр. Һәмчинин инсанлара сәбир ҝөстәрәндә онларла арамыздакы мүнасибәт даһа јахшы олур. Јығынҹагда бирлик јараныр. Бизи тәбдән чыхармаға чалышан инсана ујмајыб сакитлијимизи горујанда ҝәрҝинлијин бөјүмәсинин гаршысыны алырыг (Зәб. 37:8, һашијә; Мәс. 14:29). Ән әсасы исә сәмави Атамыза бәнзәјирик вә Она даһа да јахын олуруг. Доғрудан да, сәбир чох ҝөзәл хүсусијјәтдир. Ону јетишдирмәјә дәјәр! Дүздүр, сәбирли олмаг бәзән чәтин олур. Амма Јеһованын көмәји илә өзүмүздә бу хүсусијјәти инкишаф етдирә биләрик. Јени дүнјанын ҝәлишини сәбирлә ҝөзләдијимиз мүддәтдә исә әмин ола биләрик ки, «Јеһованын ҝөзү Ондан горханларын, Ондан мәһәббәт уманларын үзәриндәдир» (Зәб. 33:18). Ҝәлин сәбри ҝејинмәк әзмимизи һеч вахт итирмәјәк! w23.08 с. 22, абз. 7; с. 25, абз. 16, 17

Јагуб гејд едир ки, инсан иманлы олдуғуну десә дә, әмәлләри буну ҝөстәрмәјә биләр (Јаг. 2:1—5, 9). Һәмчинин Јагуб диндашынын палтардан, јемәкдән корлуг чәкдијини ҝөрә-ҝөрә она көмәк етмәјән инсандан данышыр. Һәмин инсан да иманлы олдуғуну сөјләсә дә, әмәлләри бунун әксини дејир. Белә адамда иман јохдур (Јаг. 2:14—16). Јагуб иманыны әмәлдә сүбут етмиш Раһабын нүмунәсини чәкир (Јаг. 2:25, 26). Раһаб Јеһова һагда ешитмишди, Онун исраиллиләрә дајаг олдуғуну билирди (Јуш. 2:9—11). О, иманыны әмәлиндә сүбут етди: һәјаты тәһлүкәдә олан ики исраилли кәшфијјатчыны ҝизләтди. Бахмајараг ки, Раһаб гејри-камил иди, һеч исраилли дә дејилди, Ибраһим пејғәмбәр кими салеһ сајылды. Онун нүмунәси иманы әмәлдә ҝөстәрмәјин ваҹиб олдуғуну вурғулајыр. w23.12 с. 5—6, абз. 12, 13

Мәсиһиләр үчүн Мүгәддәс Китабы јалныз сәтһи баша дүшмәк кифајәт дејил. Биз мүгәддәс руһун көмәји илә «Аллаһын дәрин сирләрини белә» өјрәнмәјә ҹан атырыг (1 Кор. 2:9, 10). Бәлкә, Јеһоваја јахынлашмағыныза көмәк едәҹәк мөвзулары арашдырасыныз? Мәсәлән, арашдыра биләрсиниз ки, Јеһова гәдимдә хидмәтчиләринә Өз мәһәббәтини неҹә ҝөстәрмишди вә бу Онун сизи дә севдијини неҹә сүбут едир. Һәмчинин Јеһованын гәдимдә һансы ибадәти тәсис етдијини арашдырмаг вә ону индики ибадәтинизлә мүгајисә етмәк олар. Јахуд Иса Мәсиһин үзәриндә јеринә јетмиш пејғәмбәрликләри дәриндән өјрәнә биләрсиниз. Бу мөвзулары арашдырмаг сизә бөјүк севинҹ ҝәтирәҹәк. Бунлары «Ҝөзәтчи гүлләси нәшрләринин индекси» (түрк.) вә «Јеһованын Шаһидләринин нәшрләри үзрә ахтарыш» вәсаитинин көмәји илә едә биләрсиниз. Дәрин мүталиә иманынызы мөһкәмләндирәҹәк вә сиз «Аллаһын елминә» јетишәҹәксиниз (Мәс. 2:4, 5). w23.10 с. 18—19, абз. 3—5

Һәвари Бутрусун истифадә етдији «һәрарәт» сөзү һәрфән «дартмаг» мәнасыны дашыјыр. Ајәнин икинҹи һиссәсиндә исә һәрарәтли севҝинин бизи нәјә тәшвиг етдији вурғуланыр. Бу ҹүр севҝи баҹы-гардашларымызын ҝүнаһынын үстүнү өртүр. Ҝәлин белә бир нүмунәјә бахаг: Тәсәввүр един, бир парча ҝөтүрүб, үстүндә ләкәләр, чапыглар олан масаны өртмәјә чалышырсыныз. Бу заман гүсурлар там өртүләнә гәдәр парчаны кәнарларындан тутуб дартырсыныз. Беләҹә, бүтүн гүсурлары өртмүш олурсунуз. Ејнилә диндашларымызы һәрарәтлә севириксә, онларын бир-ики ҝүнаһынын јох, чохлу ҝүнаһынын үстүнү өртәҹәјик, башга сөзлә, онлары бағышлајаҹағыг. Диндашларымыза севҝимиз о гәдәр ҝүҹлү олмалыдыр ки, һәтта бәзән чәтин олса да, онларын сәһвләрини бағышлаја биләк (Кол. 3:13). Биз бағышлајанда мәһәббәтимизин мөһкәм олдуғуну вә Јеһованы разы салмаг истәдијимизи ҝөстәририк. w23.11 с. 11—12, абз. 13—15

Јушијјә падшаһ 26 јашында мәбәди тәмир етмәјә башлады. Бу заман мәбәддә «Јеһованын Муса васитәсилә вердији Төврат» тапылды. Падшаһ орада јазыланлары ешидәндә онлара әмәл етмәк үчүн дәрһал һәрәкәтә кечди (2 Салн. 34:14, 19—21). Бәс сиз Мүгәддәс Китабы мүнтәзәм мүталиә етмәк истәјәрдиниз? Бәлкә дә артыг буну етмәјә чалышырсыныз. Бәс мүталиәниз неҹә ҝедир? Сизә шәхсән көмәк едәҹәк ајәләри гејд едирсиниз? Јушијјә 39 јашында һәјаты баһасына баша ҝәлән бир сәһв етди. О, Јеһованын фикрини өјрәнмәк әвәзинә, өз билдији кими давранды (2 Салн. 35:20—25). Бурадан нә өјрәнирик? Фәрги јохдур, јашымыз нә гәдәр чохдур, нечә мүддәтдир һәгигәтдәјик, биз һәмишә Јеһованы ахтармалыјыг. Бәс бу нә демәкдир? Јәни биз һәмишә дуа едиб Ондан мәсләһәт истәмәлијик, Кәламыны мүталиә етмәлијик вә јеткин мәсиһиләрин мәсләһәтинә гулаг асмалыјыг. Бунун сајәсиндә һәјатда ҹидди сәһвләр етмәјәҹәјик вә даһа хошбәхт олаҹағыг (Јаг. 1:25). w23.09 с. 12—13, абз. 15, 16

Мүгәддәс Китабда Јеһованы севән, Она хидмәт едән чохлу мөмин гадынлардан данышылыр. Бу гадынлар «һәр шејдә [һәдд билән]» вә «һәр саһәдә сәдагәтли» идиләр (1 Тим. 3:11). Һәмчинин ҝәнҹ баҹыларымыз јығынҹагларында хидмәт едән руһән јеткин баҹылардан да чох шеј өјрәнә биләрләр. Әзиз ҝәнҹ баҹыларымыз, фикирләшин ҝөрүн һансы јеткин баҹылардан нүмунә ҝөтүрә биләрсиниз? Онларын ҝөзәл кејфијјәтләрини мүшаһидә един. Сонра исә дүшүнүн: сиз неҹә онлар кими даврана биләрсиниз? Тәвазөкарлыг руһән јеткин мәсиһи олмаг үчүн ваҹиб хүсусијјәтдир. Әҝәр гадын тәвазөкардырса, Јеһова илә мүнасибәти мөһкәм олаҹаг вә башгалары илә јахшы јола ҝедәҹәк. Мәсәлән, Јеһованы севән гадын Онун тәсис етдији башчылыг принсипинә тәвазөкарлыгла табе олур (1 Кор. 11:3). Баҹы бу принсипин јығынҹагда вә аиләдә неҹә тәтбиг олундуғуну билмәлидир. w23.12 с. 18—19, абз. 3—5

Јеһова әрдән арвадыны севмәји, онун физики, емосионал вә руһани тәләбатларынын гајғысына галмағыны ҝөзләјир. Сағламдүшүнҹәли олмаг, гадынлара һөрмәт гојмаг, етибарлы олмаг сизә јахшы әр олмаға көмәк едәҹәк. Евләнәндән сонра, ола билсин, ушағыныз олсун. Јахшы ата олмагла бағлы Јеһовадан чох шеј өјрәнә биләрсиниз (Ефес. 6:4). Јеһова Оғлу Исаја ону севдијини, ондан разы галдығыны демишди (Мәт. 3:17). Ата олсаныз, ушагларыныза һәмишә онлары севдијинизи дејин. Јахшы ишләринә ҝөрә онлары тез-тез тәрифләјин. Јеһовадан өрнәк ҝөтүрән аталар өвладларына јеткин мәсиһи олмаға көмәк едирләр. Она ҝөрә дә нә гәдәр ки субајсыныз, индидән аилә үзвләринизин, јығынҹагдакы баҹы-гардашларын гајғысына галын, онлара севҝинизи, миннәтдарлығынызы билдирмәји өјрәнин (Јәһ. 15:9). w23.12 с. 28—29, абз. 17, 18

Биз Јеһованын садиг хидмәтчиләри олсаг да, һамы кими һәјатда чәтинликләрлә үзләширик, хәстәләнирик. Бундан савајы, Аллаһын халгына нифрәт едән инсанлар бизи тәгиб едирләр. Дүздүр, Јеһова бу ҝүн бизи бу кими бәлалардан горумур, амма О бизә көмәк едәҹәјинә сөз верир (Әшј. 41:10). Онун көмәји илә севинҹимизи горујаҹағыг, дүзҝүн гәрарлар верәҹәјик вә һәтта һәјатымызын ән чәтин анларында белә садиг галаҹағыг. Јеһова бизә Өз сүлһүнү верәҹәјини вәд едир (Филип. 4:6, 7). Аллаһын сүлһү Онунла мөһкәм достлугдан гајнагланан сакитлик вә һүзур һиссидир. Бу сүлһ «һәр бир ағылдан үстүн»дүр, ағлымыза ҝәлмәјәҹәк гәдәр һејрәтамиздир. Һеч олуб ки, Јеһоваја дурмадан дуа етмисиниз, сонра да дахилиниздә гејри-ади бир сакитлик дујмусунуз? Бах бу, Аллаһын сүлһүдүр. w24.01 с. 20, абз. 2; с. 21, абз. 4

Аллаһа мәһәббәт мөмин инсанлары Онун адына үрәкдән алгыш охумаға сөвг едир. Давуд падшаһ билирди ки, Јеһованын адына алгыш едәндә елә Онун өзүнә алгыш едир. Јеһованын ады ҝәләндә тәсәввүрүмүздә Онун неҹә варлыг олдуғу, Онун хүсусијјәтләри, ҝөрдүјү мөһтәшәм ишләр ҹанланыр. Давуд Јеһованын адыны мүгәддәс тутмаг вә Ону уҹалтмаг истәјирди. О буну бүтүн вүҹуду илә, бүтүн варлығы илә етмәјә чалышырды. Ејнилә лавилиләр дә Јеһованын адыны уҹалдырдылар, бу саһәдә өндә ҝедирдиләр. Онлар тәвазөкарлыгла гәбул едирдиләр ки, дејәҹәкләри һеч бир сөз Аллаһын мүгәддәс адыны мәдһ етмәјә јетмәз (Нәһ. 9:5). Шүбһәсиз, бу ҹүр тәвазөкар, үрәкдән ҝәлән тәриф сөзләрини ешидәндә Јеһованын гәлби севинҹлә долурду. w24.02 с. 9—10, абз. 6

Ола билсин, сизин үчүн әлчатмаз олан мәгсәддән ваз кечмисиниз. Бу заман дүшүнмәјин ки, Јеһованын ҝөзүндән дүшәҹәксиниз (2 Кор. 8:12). Нәсә мәгсәдинизә чатмаға мане оланда бундан нәтиҹә чыхарын. Наил олдуғунуз мәгсәдләр барәдә дүшүнүн. Мүгәддәс Китабда јазылыб: «Аллаһ әдаләтсиз дејил ки,.. чәкдијиниз зәһмәти унутсун» (Ибр. 6:10). Сиз дә унутмамалысыныз. Индијә кими чатдығыныз мәгсәдләри јадыныза салын. Мәсәлән, Јеһова илә дост олмусунуз, башгаларына Онун һаггында данышырсыныз, вәфтиз олунмусунуз вә ја башга һансыса мәгсәдинизә чатмысыныз. Индијә гәдәр аддым-аддым мәгсәдләринизә чатдығыныз кими индән белә дә һазыркы мәгсәдинизә чата биләрсиниз. Бу, Јеһованын көмәји илә мүмкүндүр. Мәгсәдинизә апаран сәјаһәтдән севинҹ дујмаг үчүн јол боју Јеһованын сизә неҹә дајаг олдуғуну ҝөрмәјә чалышын (2 Кор. 4:7). Тәслим олмасаныз, даһа да бөјүк немәтләр алаҹагсыныз (Гал. 6:9). w23.05 с. 31, абз. 16—18

Халгына онлары севдијини, онлардан мәмнун галдығыны билдирмәк Јеһоваја хошдур. Мүгәддәс Китабдан ҝөрүрүк ки, Јеһова ики дәфә Исаны «севимли Оғлум» адландырмышды вә ондан разы галдығыны демишди (Мәт. 3:17; 17:5). Јеһованын сиздән дә разы галдығыны ешитмәк истәјәрдиниз? О бизимлә бирбаша данышмаса да, Өз Кәламы васитәсилә һиссләрини билдирир. Исанын мүждәләрдә јазылмыш сөзләрини охујанда, санки Јеһованын бизә дедији сөзләри «ешидирик». Иса Атасынын хүсусијјәтләрини мүкәммәл шәкилдә әкс етдирирди. Буна ҝөрә дә онун гејри-камил, лакин сәдагәтли давамчыларына дедији разылыг сөзләрини охујаркән тәсәввүр едә биләрик ки, Јеһова бу сөзләри бизә дејир (Јәһ. 15:9, 15). Чәтинликләрлә үзләшмәјимиз о демәк дејил ки, биз Јеһованын разылығыны итирмишик. Әксинә, бу бизә Јеһованы дәрин мәһәббәтлә севдијимизи, Она етибар етдијимизи сүбут етмәк үчүн имкан јарадыр (Јаг. 1:12). w24.03 с. 28, абз. 10, 11