Нојабр

Әҝәр валидејнсинизсә, ушагларыныза јашларына ујғун шәрһләр һазырламаға көмәк един. Бәзән әр-арвад проблемләри вә ја әхлаг мәсәләләри кими ҹидди мөвзулар мүзакирә олунур. Амма бу заман да ушагларын шәрһ верә биләҹәји бир-ики абзас тапмаг олар. Һәмчинин ушагларыныза изаһ един ки, һәр әл галдыранда онлара сөз вериләҹәјини дүшүнмәсинләр. Онда онларын јеринә башгасына сөз вериләндә мәјус олмајаҹаглар (1 Тим. 6:18). Һәр биримиз өз шәрһләримизлә Јеһованы уҹалда вә диндашларымызы руһландыра биләрик (Мәс. 25:11). Һәрдәнбир өз башымыза ҝәлмиш һадисәдән данышмаг олар. Амма еһтијатлы олмалыјыг ки, өзүмүз барәдә чох данышмајаг (Мәс. 27:2; 2 Кор. 10:18). Әксинә, чалышаг ки, шәрһләримиз әсас етибарилә Јеһова, Онун Кәламы вә халгы илә бағлы олсун (Вәһј 4:11). w23.04 с. 24—25, абз. 17, 18

Мәһәббәтин ајыг галмағымызда ваҹиб ролу вар (Мәт. 22:37—39). Тәблиғ етдијимиз үчүн биз мүәјјән чәтинликләрлә үзләшә биләрик, амма Аллаһа мәһәббәт буна бахмајараг, хидмәтимизи давам етдирмәјә көмәк едир (2 Тим. 1:7, 8). Мәһәббәти иманымыза шәрик олмајан инсанлара да ҝөстәрдијимиз үчүн тәблиғ етмәјә давам едирик, үстәлик, телефон вә мәктуб васитәсилә шаһидлик веририк. Биз инсанларын бир ҝүн дәјишиб дүзҝүн давранаҹагларына үмидимизи итирмирик (Һизг. 18:27, 28). Биз һәм дә баҹы-гардашларымызы севирик. Онлары севдијимизи неҹә ҝөстәририк? Бир-биримизә тәсәлли вермәклә вә мөһкәмләндирмәклә (1 Салон. 5:11). Дөјүшдә јан-јана вурушан әсҝәрләр кими биз дә бир-биримизә дајаг олуруг. Биз һеч вахт биләрәкдән баҹы-гардашларымызы инҹитмәрик, јахуд пислијә писликлә ҹаваб вермәрик (1 Салон. 5:13, 15). Мәһәббәт ҝөстәрмәјин диҝәр јолу рәһбәрлик едән гардашлара һөрмәт етмәкдир (1 Салон. 5:12). w23.06 с. 9—10, абз. 6; с. 10—11, абз. 10, 11

Иманымызы артырмағын бир јолу фидјә барәдә фикирләшмәкдир. Фидјә Аллаһын вәдләринин ҝерчәкләшәҹәјинә бир зәманәтдир. Фидјәнин нәјә ҝөрә верилдији вә бунун Јеһова үчүн нә гәдәр бөјүк гурбан олдуғу һагда дүшүнәндә иманымыз мөһкәмләнир. Даһа да әмин олуруг ки, Аллаһын вәди ҝерчәкләшәҹәк вә биз ҝөзәл дүнјада сонсуз өмүр сүрәҹәјик. Нәјә ҝөрә белә дејә биләрик? Бир дүшүнүн, фидјәни өдәмәк Јеһоваја нәјин баһасына баша ҝәлиб? Јеһова Она әзиз олан илк Оғлуну, ән јахын әмәкдашыны ҝөјдән јер үзүнә ҝөндәрди вә о, камил инсан кими доғулду. Јер үзүндә оларкән Исанын үзләшмәдији чәтинлик галмады. Сонра она ишҝәнҹә верилди вә о, әзаб чәкәрәк өлдү. Ҝөрүн Јеһова бизим үчүн неҹә бөјүк дәјәр өдәјиб! Јеһова нәјә ҝөрә белә едиб? Бизим садәҹә даһа јахшы, амма гыса өмрүмүз олсун дејә? Хејр. Мәһәббәтли Аллаһымыз әзиз Оғлунун бундан өтрү әзаб чәкиб өлмәсинә изин вермәзди (Јәһ. 3:16; 1 Бут. 1:18, 19). Демәли, Јеһова бу ҹүр бөјүк дәјәри бизим јени дүнјада әбәди јашамағымыз үчүн өдәјиб. w23.04 с. 27—28, абз. 8, 9

Јараданымыз өлүләри дирилтмәк истәјир? Әлбәттә. О, Мүгәддәс Китабын бир нечә јазарына өлүләри дирилдәҹәји илә бағлы вәдини јаздырыб (Әшј. 26:19; Вәһј 20:11—13). Јеһова сөз верәндә ону јеринә јетирир, О, сөзүнүн ағасыдыр (Јуш. 23:14). Аллаһымыз өлүләри һәјата гајтараҹағы ҝүнү һәсрәтлә ҝөзләјир. Ҝәлин Әјјуб пејғәмбәрин сөзләринә нәзәрә салаг. О әмин иди ки, өлсә белә Јеһова ону дирилдәҹәји ҝүнүн һәсрәтини чәкәҹәк (Әјј. 14:14, 15). Јеһова бүтүн өлән хидмәтчиләринә ејни һиссләри бәсләјир. Јеһова онлары хошбәхт, сағлам һәјата гајтармағы арзулајыр. Бәс Ону танымадан өлән милјардларла инсан барәдә нә демәк олар? Аллаһымызын онларла бағлы нијјәти нәдир? Мәһәббәтли Јараданымыз онлары да һәјата гајтараҹаг (Һәв. 24:15). Јеһова истәјир ки, һәмин инсанларын да онунла дост олмаг, јер үзүндә әбәди јашамаг фүрсәти олсун (Јәһ. 3:16). w23.04 с. 9, абз. 5, 6

Үмидинизи неҹә мөһкәмләндирә биләрсиниз? Әҝәр јер үзүндә әбәди јашамаға үмид едирсинизсә, Мүгәддәс Китабдан Ҹәннәтлә бағлы јазыланлары охујун вә бу барәдә дүшүнүн (Әшј. 25:8; 32:16—18). Јени дүнјадакы һәјаты хәјалынызда ҹанландырын. Елә тәсәввүр един ки, санки орадасыныз. Әҝәр ҝәләҹәјә үмидимиз даим ағлымызда олса, индики проблемләримиз бизим үчүн «гысамүддәтли вә јүнҝүл» ҝөрүнәҹәк (2 Кор. 4:17). Јеһова вердији үмид васитәсилә сизи ҝүҹлү едәҹәк. О бу ҝүҹү алмағымыз үчүн лазым олан һәр шеји вериб. Ола биләр ки, тәјинатынызы јеринә јетирмәк, сынаға таб ҝәтирмәк, ја да севинҹинизи горумаг сизә чәтин олсун. Бу заман Јеһоваја һәрарәтлә дуа един вә Онун көмәјини ҝөрмәк үчүн фәрди мүталиә един. Баҹы-гардашларын дәстәјини гәбул един. Үмидинизи ағлынызда даима ҹанлы тутун. Онда «һәр шејә севинҹлә вә сәбирлә таб ҝәтирмәк үчүн Онун шанлы гүдрәтиндән бөјүк ҝүҹ» алаҹагсыныз (Кол. 1:11). w23.10 с. 17, абз. 19, 20

Дуада Јеһоваја миннәтдарлығымызы билдирмәк үчүн о гәдәр сәбәбимиз вар ки! Саһиб олдуғумуз һәр бир јахшы шејә ҝөрә Јеһоваја шүкүр едә биләрик. Ахы һәр бир ҝөзәл пајын мәнбәји Одур (Јаг. 1:17). Јеһоваја бу мөһтәшәм Јер күрәсинә ҝөрә вә диҝәр јарадылыш мөҹүзәләринә ҝөрә миннәтдарлығымызы билдирә биләрик. Һәмчинин алдығымыз нәфәсә, аиләмизә, достларымыза вә үмидимизә ҝөрә Она шүкүр етмәји унутмамалыјыг. Ән әсасы да Јеһоваја шүкүр етмәлијик ки, Онунла дост олмағымыза имкан јарадыб. Јеһоваја миннәтдар олмағымызын сәбәбләрини дүшүнмәк үчүн хүсусилә сәј ҝөстәрмәлијик. Әтрафымыз нашүкүр инсанларла долудур. Инсанлар елә һеј нәјисә әлдә етмәк истәјирләр. Онлар саһиб олдуглары шејләрә ҝөрә миннәтдар олмағы унудурлар. Әҝәр бу дүшүнҹә бизим дә зеһнимизә һопса, дуаларымыз хаһишләр сијаһысына чевриләҹәк. Бунун баш вермәмәси үчүн Јеһованын биздән өтрү етдикләринә ҝөрә миннәтдарлығымызы артырмалыјыг вә буну Она билдирмәлијик (Лука 6:45). w23.05 с. 4, абз. 8, 9

Мәһәббәтли Атамыз Јеһоваја бизим әзабларымызы ҝөрмәк хош дејил (Әшј. 63:9). Дүздүр, һәлә ки О бизи ода, чаја бәнзәр проблемләрин һамысындан горумур (Әшј. 43:2). Амма Јеһова бизә бу сынаглардан кечмәјә көмәк едәҹәјинә сөз верир. Јеһова һеч вахт гојмаз ки, үзләшдијимиз сынаглар бизә сағалмаз јара вурсун. Һәм дә О, дөзә билмәјимиз үчүн мүгәддәс руһундан верир (Лука 11:13; Филип. 4:13). Сынаглара дөзмәк, садиглијимизи горумаг үчүн Јеһова бизә нә лазымдырса верәҹәк, буна архајын ола биләрик. Јеһова Она етибар етмәјимизи истәјир (Ибр. 11:6). Бәзән проблемләримиз о гәдәр бөјүк олур ки, бизә ашылмаз сәдд кими ҝөрүнүр. Һәтта ола билсин, Јеһованын бизә көмәк едәҹәјинә үрәјимиздә шүбһә јараныр. Амма Мүгәддәс Китабда јазылыб ки, «Аллаһын ҝүҹү илә сәдләр аша» биләрик (Зәб. 18:29). Буна ҝөрә дә шүбһәләрә јенилмәмәлијик. Әксинә, ҝүҹлү иманла Јеһоваја дуа едиб, дуаларымыза ҹаваб верәҹәјинә әмин олмалыјыг (Јаг. 1:6, 7). w23.11 с. 22, абз. 8, 9

Бу ајәләрдә мәһәббәт неҹә дә ҝөзәл тәсвир олунуб! Бу сөзләр әр-арвадлары әмин едир ки, мәһәббәтләри түкәнмәз ола биләр. Араларындакы мәһәббәтин өмүр боју давам етмәси үчүн әр дә, арвад да өз тәрәфиндән нәсә етмәлидир. Мәсәлән, ҝөтүрәк тонгалы. О, сонсуза гәдәр јана биләр, амма она даима одун атмаг лазымдыр. Әҝәр нәзарәтсиз галса, алов тәдриҹән сөнәҹәк. Әр-арвадларын да бир-бириләринә олан севҝи тонгалы сонсузадәк јана биләр. Амма бунун үчүн онлар мүнасибәтләрини даима мөһкәмләндирмәлидирләр. Бәзән мадди чәтинликләр, сәһһәтләриндәки проблемләр, ушагларын тәрбијәси илә бағлы нараһатлыглар әр-арвадлары о гәдәр сыхыр ки, араларындакы севҝинин сојудуғуну һисс едирләр. Она ҝөрә дә «Јаһын алову»нун даим јанмасы үчүн әр дә, арвад да Јеһова илә мүнасибәтини мөһкәм сахламалыдыр. w23.05 с. 20—21, абз. 1—3

Ҹәсарәтли олмағы өјрәнмәк үчүн нә етмәлијик? Валидејнләримиз бизә дејә биләр ки, ҹәсарәтли олаг, амма онлар бу хүсусијјәти бизә ирсән өтүрә билмәзләр. Ҹәсарәтли олмағы өјрәнмәк јени баҹарыға јијәләнмәјә бәнзәјир. Адәтән һансыса баҹарыға јијәләнәндә мүәллимимизи диггәтлә изләјирик, сонра исә онун етдикләрини тәкрарлајырыг. Ејнилә ҹәсарәтли олмағы өјрәнмәк үчүн дә бу хүсусијјәтә саһиб олан инсанлары диггәтлә изләмәли вә нүмунәләрини тәглид етмәлијик. Дәнјал пејғәмбәр кими биз дә Аллаһын Кәламына јахшы бәләд олмалыјыг. Јеһова илә тез-тез, сәмими сөһбәт едәрәк Онунла достлуғумузу мөһкәмләндирмәлијик. Һәмчинин Јеһоваја етибар етмәлијик, Онун бизә арха-дајаг олдуғуна әмин олмалыјыг. Онда иманымыз сынананда ҹәсарәтли олаҹағыг. Адәтән башгалары ҹәсарәтли инсанлара һөрмәт гојур. Һәмчинин бу ҹүр инсан сәмими-гәлбли инсанлара Јеһоваја јахынлашмаға көмәк едә биләр. Доғрудан да, ҹәсарәтли олмаға дәјәр! w23.08 с. 2, абз. 2; с. 4—5, абз. 8, 9

«Јохламаг» кими тәрҹүмә олунан јунан сөзү дәјәрли металларын һәгигилијинин јохланылмасына аид истифадә олунан сөз иди. Беләликлә, охудуғумуз вә ешитдијимиз һәр шејин дүзҝүн олуб-олмадығыны јохламалыјыг. Бу, бөјүк мүсибәт јахынлашдыгҹа бизләр үчүн даһа чох ваҹиб олаҹаг. Биз һәр дејилән сөзә инанмырыг, әксинә, ағлымызы ишләдәрәк ешитдијимиз вә охудуғумуз һәр бир шеји Мүгәддәс Китабын вә Јеһованын тәшкилатынын дедикләри илә тутушдуруруг. Бунун сајәсиндә биз ҹинләрин апардығы пропагандаја вә һијләјә алданмајаҹағыг (Мәс. 14:15; 1 Тим. 4:1). Биз билирик ки, Јеһованын халгы бөјүк мүсибәтдән сағ чыхаҹаг. Амма ајры-ајрылыгда сабаһ башымыза нәјин ҝәләҹәјини билмирик (Јаг. 4:14). Истәр бөјүк мүсибәтдән сағ чыхаг, истәрсә дә ондан әввәл өләк, Јеһоваја садиг галсаг, әбәди һәјата говушаҹағыг. Ҝәлин бүтүн диггәтимизи мөһтәшәм үмидимизә ҹәмләјәк вә Јеһованын ҝүнүнә һазыр олаг! w23.06 с. 13, абз. 15, 16

Биз бәзи пејғәмбәрликләрин неҹә јеринә јетәҹәјини билмирик (Дән. 12:8, 9). Амма пејғәмбәрлији ахыра кими баша дүшмәмәјимиз о демәк дејил ки, о, јеринә јетмәјәҹәк. Әмин ола биләрик ки, кечмишдә олдуғу кими инди дә Јеһова мәсләһәт билдији вахтда лазым олан һәр шеји бизә ачыглајаҹаг. Гаршыда һансы пејғәмбәрликләр јеринә јетәҹәк? «Сүлһ вә тәһлүкәсизлик» бәјанаты вериләҹәк (1 Салон. 5:3). Даһа сонра дүнјанын сијаси гүввәләри јалан динә һүҹум едиб ону мәһв едәҹәк (Вәһј 17:16, 17). Бундан сонра онлар Аллаһын халгына һүҹум едәҹәк (Һизг. 38:18, 19). Бу һадисәләр Армаҝеддон адланан сонунҹу мүһарибәјә ҝәтириб чыхараҹаг (Вәһј 16:14, 16). Әминликлә дејә биләрик ки, бүтүн бунлар јахын заманларда баш верәҹәк. О вахта гәдәр исә ҝәлин Мүгәддәс Китабдакы пејғәмбәрликләрә диггәт кәсиләк вә башгаларына да бу саһәдә көмәк едәк. Бунунла сәмави Атамыза миннәтдар олдуғумузу ҝөстәрәҹәјик. w23.08 с. 13, абз. 19, 20

Һәвари Булус иман, үмид вә мәһәббәт барәдә данышаркән сөзләринә бу ҹүр јекун вурур: «Мәһәббәт бунларын һамысындан үстүндүр» (1 Кор. 13:13). О нәјә ҝөрә белә демишди? Она ҝөрә ки, ҝәләҹәкдә Јеһованын јени дүнја илә бағлы вәдләринә иман етмәјимизә еһтијаҹ галмајаҹаг. Бу вәдләрин нә вахтса ҝерчәкләшәҹәјинә дә үмид етмәјәҹәјик. Чүнки онлар артыг јеринә јетмиш олаҹаг. Амма Јеһоваја вә инсанлара мәһәббәт ҝөстәрмәк һәмишә лазым олаҹаг. Бәли, бизим онлара мәһәббәтимиз әбәдијјән артмаға давам едәҹәк. Һәмчинин мәһәббәт бизим әсл мәсиһи олдуғумузун ҝөстәриҹисидир. Иса Мәсиһ һәвариләринә демишди: «Аранызда мәһәббәт олса, һамы биләҹәк ки, сиз мәним шаҝирдимсиниз» (Јәһ. 13:35). Бундан әлавә, мәһәббәт арамыздакы бирлији горујур, неҹә ки Булус да демишди: «Мәһәббәт инсанлар арасында камил бирлик јарадыр» (Кол. 3:14). Һәвари Јәһја диндашларына белә јазмышды: «Аллаһы севән гардашыны да севмәлидир» (1 Јәһ. 4:21). Демәли, диндашларымыза олан мәһәббәтимиз Јеһованы севдијимизин сүбутудур. w23.11 с. 8, абз. 1; с. 8, абз. 3

Мүгәддәс Китабда мәсиһинин һәјаты гачыша бәнзәдилир. Финиш хәттини кечәнләр әбәди һәјат мүкафатыны алаҹаг (2 Тим. 4:7, 8). Биз вар ҝүҹүмүзлә гачыб јарышы давам етдирмәлијик. Чүнки финиш хәттинә чатмағымыза чох аз галыб. Һәвари Булусун вердији мәсләһәт бизә көмәк едә биләр. О демишди: «Һәр ҹүр јүкү... кәнара атаг вә гаршымыздакы јарышда дөзүмлә гачаг». Һәвари Булус демәк истәјирди ки, биз һеч бир јүкү дашымамалыјыг? Хејр. Онун сөзүнүн ҹаны о иди ки, биз лазымсыз јүкләрдән азад олмалыјыг. Чүнки бу ҹүр јүкләр сүрәтимизи зәифләдә вә бизи тагәтдән сала биләр. Биз ҹәлд тәрпәниб онлары ајырд етмәли вә кәнара атмалыјыг. Амма еһтијатлы олмалыјыг ки, дашымалы олдуғумуз јүкләри дә атмајаг. Әкс һалда, гачышдан кәнар олунарыг (2 Тим. 2:5). w23.08 с. 26, абз. 1, 2

Дәрракәли олмаг башгаларынын фикрини нәзәрә алмаға көмәк едир. Мәсәлән, бәзиләри макијаж етмәји хошлајыр, бәзиләри исә хошламыр. Бәзиләри гәдәриндә ички ичмәји севир, бәзиләри исә үмумијјәтлә дилинә ички вурмур. Бүтүн мәсиһиләр ҹанларынын сағлам олмасыны истәјир, амма һәрә бир мүалиҹә үсулуну сечир. Әҝәр мәсиһи ән јахшы мүалиҹә үсулуну сечдијини дүшүнүб буну баҹы-гардашлара да јеридирсә, киминсә иманы сарсыла биләр вә јығынҹагда парчаланма јаранар (1 Кор. 8:9; 10:23, 24). Мәсәлән, Јеһова ҝејим мәсәләсиндә бизи дар чәрчивәјә салмајыб, садәҹә мүәјјән принсипләр вериб. Биз Аллаһын хидмәтчисинә јарашан тәрздә ҝејинмәлијик, ҝөрүнүшүмүздән абыр-һәјалы, ағыллы-камаллы, дәрракәли олдуғумуз ҝөрүнмәлидир (1 Тим. 2:9, 10). Биз елә ҝејинмәмәлијик ки, инсанларын фикри јалныз бизим ҝејимимиздә олсун. Мүгәддәс Китабдакы принсипләр ағсаггаллара да көмәк едәҹәк ки, ҝејим вә сач дүзүмү илә бағлы өз гајда-ганунларыны гојмасынлар. w23.07 с. 23—24, абз. 13, 14

Јеһова бизим ҝәләҹәјимизи ҝөзәл ҝөрмәк истәјир. Һај-күј салан ахмаг гадынын сәсинә һај верәнләр әхлагсызлығын анҹаг «ширин» тәрәфини ҝөрүрләр, хәлвәтдә әхлагсызлыгдан һәзз алмаг истәјирләр. Онларын ахыры мәзардыр (Мәс. 9:13, 17, 18). Һәгиги һикмәтин дәвәтини гәбул едәнләри исә тамамилә фәргли ҝәләҹәк ҝөзләјир! (Мәс. 9:1). Биз Јеһованын севдији шејләри севмәји, нифрәт етдији шејләрә исә нифрәт етмәји өјрәнирик (Зәб. 97:10). Чох хошбәхтик ки, һәгиги һикмәтдән өјрәнмәјә башгаларыны да дәвәт етмәк фүрсәтимиз вар. Санки биз шәһәрин һүндүр јерләриндә дуруб: «Ҹаһилләр бура ҝәлсин»,— дејә ҹар чәкирик. Һәм бу дәвәтә һај верәнләр, һәм дә биз һикмәтин хејрини тәкҹә инди ҝөрмүрүк. Бунун фајдасы сонсуздур, чүнки «дәрракә јолу илә» јеријиб әбәди јашамағымыза јол ачыр (Мәс. 9:3, 4, 6). w23.06 с. 24—25, абз. 17, 18

Нә вахтса иш јолдашыныз вә ја синиф јолдашыныз етигадыныз барәдә сизә суал вериб? Бу заман һансы һиссләри кечирмисиниз? Чохумуз белә анларда һәјәҹанланырыг. Әслиндә, бу суалын сајәсиндә һәмин инсанын нә дүшүндүјүнү, нәјә инандығыны өјрәниб онунла хош мүждәни бөлүшмәк олар. Амма бәзән инсан суалы хошаҝәлмәз тәрздә верир. Бу бизи тәәҹҹүбләндирмәмәлидир. Чүнки чохлары бизим һаггымызда јанлыш фикирләр ешидиб (Һәв. 28:22). Һәм дә биз ахырзаманда јашајырыг. Бу дөвр һагда дејилиб ки, инсанлар «барышмаз» вә «залым» олаҹаг (2 Тим. 3:1, 3). Ола билсин, дүшүнүрсүнүз: «Кимсә етигадыма ҝөрә мәнимлә мүбаһисә етмәјә чалышырса, онунла неҹә нәзакәтлә, хош даныша биләрәм?» Билирсиниз, сизә нә көмәк едә биләр? Бир сөзлә десәк, мүлајимлик. Мүлајим инсаны кимсә өзүндән чыхармаға чалышанда вә ја она неҹә ҹаваб верәҹәјини билмәјәндә тез өзүндән чыхмыр, әксинә, тәмкинини горујур. w23.09 с. 14, абз. 1, 2

Бәзән тәшкилат бизи маддијјатдан вә Аллаһын ганунуну позмаға сөвг едән ишләрдән горумаг үчүн мүәјјән нәсиһәтләр верир. Бу саһәләрлә бағлы верилән ҝөстәришләрә әмәл етмәк бизә хејир ҝәтирир (Әшј. 48:17, 18; 1 Тим. 6:9, 10). Шүбһәсиз ки, Јеһова бөјүк мүсибәт заманы вә Мәсиһин миниллик һакимијјәти дөврүндә дә бизә инсанлар васитәсилә ҝөстәришләр вермәјә давам едәҹәк. Бәс биз бу ҝөстәришләрә ујғун давранаҹағыг? Әҝәр индидән бу ҹүр давранырыгса, ҝәләҹәкдә дә Јеһованын ҝөстәрдији јолла ҝетмәк даһа асан олаҹаг. Она ҝөрә дә ҝәлин һәмишә Јеһованын вердији ҝөстәришләрә әмәл едәк. Бура бизә рәһбәрлик етмәк үчүн тәјин едилән гардашларын вердији мәсләһәтләр дә дахилдир (Әшј. 32:1, 2; Ибр. 13:17). Биз Бәләдчимиз Јеһоваја там етибар едә биләрик. О бизи тәһлүкәләрдән јан кечирәрәк мәнзилбашына — әбәди һәјата доғру апарыр. w24.02 с. 25, абз. 17, 18

Һәвари Булус Јеһоваја хидмәт етмәкдән севинҹ дујурду, амма бу о демәк дејил ки, онун чәтинликләри јох иди. Булус тез-тез узун сәјаһәтләрә чыхырды. Амма һәмин дөврдә сәјаһәт етмәк һеч дә асан дејилди. О, бәзән «чајларда тәһлүкә» илә, «гулдурларын әлиндән тәһлүкә» илә үзләширди. Һәтта елә олурду ки, дүшмәнләри ону дөјүрдү (2 Кор. 11:23—27). Бәзән исә Булус баҹы-гардашларын уғрунда чәкдији зәһмәтин гаршылығында һеч «чох сағ ол» да ешитмирди (2 Кор. 10:10; Филип. 4:15). Бәс Булуса хидмәтини давам етдирмәјә нә көмәк етмишди? О һәм Мүгәддәс Јазылардан охудугларындан, һәм дә шәхси тәҹрүбәсиндән Јеһова һагда чох шеј өјрәнмишди. Булус әмин олмушду ки, Јеһова Аллаһ ону севир (Ром. 8:38, 39; Ефес. 2:4, 5). Елә о өзү дә Јеһованы севирди. Буну мүгәддәсләрә хидмәт етмәклә ҝөстәрирди (Ибр. 6:10). w23.07 с. 9, абз. 5, 6

Чох адам гәбул едир ки, өлкәни идарә едән «һөкумәт» олмалыдыр вә онун гојдуғу гајдаларын һеч олмаса бәзиләринә әмәл етмәк лазымдыр. Амма бәзән елә һәмин адамлар бәјәнмәдикләри, онлара ағыр ҝәлән ганунлара әмәл етмир. Мүгәддәс Китабдан ҝөрмәк олар ки, биз инсан һөкумәтләри уҹбатындан әзаб чәкирик, онлары Шејтан идарә едир вә онлар тезликлә мәһв едиләҹәк (Зәб. 110:5, 6; Ваиз 8:9; Лука 4:5, 6). Амма орада һәмчинин јазылыб ки, «һөкумәтә гаршы чыхан Аллаһын тәсис етдији гурулуша гаршы чыхыр». Һөкумәтләр Аллаһын низам-интизамы горумаг үчүн тәсис етдији мүвәггәти гурулушдур вә биздән онлара нисби табечилик ҝөзләнилир. Одур ки, биз «һәр кәсә һаггыны» вермәлијик. Бура верҝи өдәмәк, һөрмәт ҝөстәрмәк вә итаәт етмәк дахилдир (Ром. 13:1—7). Ола билсин, һансыса ганун бизә һагсыз ҝөрүнсүн, раһатлығымызы позсун вә ја она итаәт етмәк бизә баһа-баша ҝәлсин. Буна бахмајараг, Јеһованын хатиринә биз һөкумәтин ганунларына табе олаҹағыг. Амма әлбәттә ки, Јеһованын әмрини позмағы тәләб едән ганунлар бура аид дејил (Һәв. 5:29). w23.10 с. 8—9, абз. 9, 10

Шимшон дүнјаја ҝәлән вахт исраиллиләр филиштлиләрин табелијиндә иди (Һак. 13:1). Онлар исраиллиләрә чох зүлм верирдиләр. Буна ҝөрә дә Јеһова исраиллиләри филиштлиләрдән гуртармаг үчүн Шимшону сечди (Һак. 13:5). Бунун үчүн Шимшон Јеһоваја етибар етмәли иди. Бир дәфә филиштлиләр Шимшону тутмаг үчүн Леһијә, еһтимал ки, Јәһудаја ҝәлмишди. Јәһудалылар горхуја дүшүб Шимшону онлара тәслим етмәк гәрарына ҝәлди. Онлар ики тәзә кәндирлә онун әл-голуну бағлајыб филиштлиләрин јанына ҝәтирди (Һак. 15:9—13). Амма «Јеһованын руһу Шимшона ҝүҹ верди» вә о, әлләринин буховуну ачды. Сонра «о, тәзә өлмүш бир ешшәјин чәнә сүмүјүнү тапды» вә онунла мин филиштлини гырды (Һак. 15:14—16). w23.09 с. 2—3, абз. 3, 4

Мүгәддәс Китабда јазылыб ки, Јеһованын нијјәти «әбәдидир» (Ефес. 3:11). Јеһоваја нијјәтинә чатмаға һеч нә мане ола билмәз, О буна истәнилән јолла чата биләр. Ахы О, «һәр шеји Өз мәгсәди үчүн гуруб» (Мәс. 16:4). Онун ҝерчәкләшдирдији һәр бир шеј әбәди галаҹаг. Бәс Јеһованын нијјәти нәдир? О, нијјәтини јеринә јетирмәк үчүн нәләри дәјишиб? Јеһова Адәм вә Һәвваја онларла бағлы нијјәтини билдирмишди. Онлара демишди: «Төрәјиб чохалын, бүтүн јер үзүнү долдурун вә она саһиб олун... Јердәки диҝәр ҹанлыларын үзәриндә һөкмранлыг един» (Јар. 1:28). Лакин Адәмлә Һәвва Јеһоваја үсјан етди вә бәшәр аиләсинә ҝүнаһ дахил олду. Амма бу, Јеһоваја нијјәтини һәјата кечирмәјә мане олмады. Јеһова нијјәтини һәјата кечирмәк үчүн башга јол сечди. О, дәрһал гәрар верди ки, бир Падшаһлыг гурсун; бу Падшаһлыг Онун инсанларла вә Јер күрәси илә бағлы әзәли нијјәтини јеринә јетирсин (Мәт. 25:34). w23.10 с. 19—20, абз. 6, 7

Јеһова бизә тәслим олмамаға көмәк едә биләр. Дүздүр, әҝәр һансыса зәифлијимизлә узун мүддәтдир мүбаризә апарырыгса, јолумуза давам етмәк чәтин ола биләр. Һәтта бәзән дүшүнә биләрик ки, һәвари Бутрусун зәиф ҹәһәтләри бизимки илә мүгајисәдә һеч нәдир. Амма әлимизин-голумузун јана дүшмәмәси үчүн Јеһова бизә ҝүҹ верә биләр (Зәб. 94:18, 19). Мәсәлән, бир гардаш һәгигәтә ҝәлмәздән әввәл узун илләр һомосексуал олуб. Амма о, гәти шәкилдә натәмиз әмәлләринә сон гојду. Бунунла белә, һәрдәнбир онда јанлыш истәкләр баш галдырырды. Она зәифлијинә јенилмәмәјә нә көмәк етмишди? О белә демишди: «Јеһова мәнә ҝүҹ верир... Онун мүгәддәс руһунун көмәји илә өјрәндим ки, һәгигәт јолунда јеримәк мүмкүндүр... Јеһованын јолунда јарарлыјам вә ҝүнаһларыма рәғмән, О, һәлә дә мәни мөһкәмләндирир». w23.09 с. 23—24, абз. 12

Әзиз ҝәнҹ гардашлар, јеткин мәсиһи олмаг өз-өзүнә баш верән просес дејил. Бунун үчүн јахшылардан өрнәк ҝөтүрмәли, сағламдүшүнҹәли, етибарлы олмалы, мүәјјән баҹарыглара јијәләнмәли вә ҝәләҹәк мәсулијјәтләринизә һазырлашмалысыныз. Јәгин, фикирләширсиниз: «Мән нә гәдәр шејин үзәриндә ишләмәлијәм!» Нараһат олмајын, сиздә алынаҹаг. Унутмајын, Јеһова сизә көмәк етмәји чох истәјир (Әшј. 41:10, 13). Сөзсүз, јығынҹагдакы баҹы-гардашларын да дәстәјинә архалана биләрсиниз. Артыг јеткин мәсиһи оланда һәјатыныз долғун, мәналы олаҹаг. Әзиз ҝәнҹ гардашлар, биз сизи чох севирик. Гој Јеһова јеткин мәсиһи олмаг үчүн ҝөрдүјүнүз һәр бир иши аванд етсин! w23.12 с. 29, абз. 19, 20

Тәсәввүр един ки, бир нечә баҹы-гардашла бирҝә гонаглыгдасыныз. Ҝөзәл вахт кечирирсиниз вә јығышыб шәкил чәкдирирсиниз. Ишдир, бирдән биринҹиси јахшы чыхмаз дејә һәр еһтимала ики дәнә дә шәкил чәкдирирсиниз. Сонра ҝөрүрсүнүз ки, шәклин бириндә бир гардаш гашгабаглы дүшүб. Јәгин, һәмин шәкли силәрсиниз, чүнки диҝәр ики шәкилдә гардаш да дахил олмагла һәр кәс ҝүлүмсәјир. Бу шәкилләри хатирәләримизә бәнзәтмәк олар. Һәр биримизин баҹы-гардашларла хош хатирәләри вар. Амма ола билсин, һансыса бир вәзијјәтдә киминсә сөзү вә ја һәрәкәти бизә хош олмајыб. Бәлкә, бу вәзијјәти хатирә кими јаддашымызда сахламајыб һәмин шәкил кими силәк? (Ефес. 4:32). Буну едә биләрик, ахы онларла бағлы јетәринҹә хош хатирәләримиз вар. Һамымыз мәһз бу ҹүр хатирәләри горујуб сахламаг истәјәрик. w23.11 с. 12—13, абз. 16, 17

Бурада истифадә едилән јунан сөзләри о демәкдир ки, мәсиһи баҹынын ҝејиминдән башгаларына һөрмәт етдији, онларын фикирләрини вә һиссләрини нәзәрә алдығы ҝөрүнмәлидир. Бу мәсләһәтә гулаг асыб ләјагәтли ҝејинән баҹыларымызла фәхр едирик! Бәсирәтли олмаг һәр бир јеткин мәсиһи баҹынын јијәләнмәли олдуғу икинҹи кејфијјәтдир. Бәсирәт нәдир? Бәсирәт јахшы илә писи ајырд едиб јахшыны сечмәк габилијјәтидир. Абигајилин һадисәси јадыныздадыр? Онун әри бир пис гәрары илә бүтүн ев әһлини аз гала фәлакәтә сүрүкләјирди. Абигајил буну биләндә ҹәлд һәрәкәтә кечди. О, бәсирәти сајәсиндә хејли инсанын һәјатыны хилас етди (1 Ишм. 25:14—23, 32—35). Бәсирәтли олмагла биз дә данышмағын вә сусмағын вахтыны мүәјјән едә биләрик. Һәмчинин бу кејфијјәт бизә көмәк едир ки, инсанларла сөһбәт едәркән һаггымыз чатмајан вә ја онлары пис вәзијјәтдә гојаҹаг суаллар вермәјәк (1 Салон. 4:11). w23.12 с. 20, абз. 8, 9

Һәвари Булус бу сөзләри Ромадакы јығынҹаға үнванламышды. Орадакы баҹы-гардашлар Јеһова вә Иса һагда өјрәнмиш, иман јетишдирмиш вә мәсиһи олмушдулар. Јеһова иманларына ҝөрә онлары салеһ сајмыш вә мүгәддәс руһла мәсһ етмишди (Ром. 5:1). Бәли, онлар ҹанлы, мөһтәшәм үмидә саһиб олмушдулар. Булус сонралар Ефесдәки мәсһ олунмуш мәсиһиләрә Аллаһын онлара вердији үмид барәдә јазмышды. Бу үмид мүгәддәсләрә «мирас кими» верилмишди (Ефес. 1:18). Колослулара јаздығы мәктубда исә Булус мәсһ олунмуш мәсиһиләрә үмидләринин һарада ҝерчәкләшәҹәјини демишди. О бу үмидин онлар үчүн «ҝөјләрдә» горунуб сахланылдығыны билдирмишди (Кол. 1:4, 5). Демәли, мәсһ олунмуш мәсиһиләр ҝөјдә әбәди һәјат үчүн дирилиб Мәсиһлә бирҝә һакимијјәт сүрәҹәкләринә үмид едирләр (1 Салон. 4:13—17; Вәһј 20:6). w23.12 с. 9, абз. 4, 5

Орижинал мәтндә «горујаҹаг» ифадәси һәрби терминдир. Бу ифадә әсҝәрләрин шәһәри һүҹумлардан горумасына аид ишләнирди. Мүһафизәдә олан шәһәр сакинләри раһат јатырдылар, билирдиләр ки, дарвазада онларын кешијини чәкән әсҝәрләр вар. Ејнилә Аллаһын сүлһү үрәјимизи вә фикирләримизи горујанда сакит, архајын олуруг (Зәб. 4:8). Һәннә кими бизим дә вәзијјәтимиз дәрһал дәјишмәсә дә, јенә дә үрәјимиз раһат олур (1 Ишм. 1:16—18). Инсан сакит оланда исә она ајдын дүшүнмәк, дүзҝүн гәрарлар вермәк даһа асан олур. Нараһатлығын өһдәсиндән ҝәлмәк үчүн нә едә биләрсиниз? Мәҹази диллә десәк, «кешикчиләри» чағырын. Буну неҹә етмәк олар? Дахилиниздә Аллаһын сүлһүнү дујана гәдәр дуа един (Лука 11:9; 1 Салон. 5:17). Әҝәр сиз дә мүсибәтли анлар јашајырсынызса, дурмадан дуа един. Онда Јеһованын сүлһүнүн үрәјинизи вә фикирләринизи горудуғуну дујаҹагсыныз (Ром. 12:12). w24.01 с. 21—22, абз. 5, 6

Иса Мәсиһ Аллаһын адыны уҹалтмагдан өтрү һәр ҹүр ишҝәнҹәјә, тәһгирә, бөһтана дөзмүшдү. О билирди ки, һәр аддымында Атасына итаәт едиб, буна ҝөрә дә һеч нәдән утанмамалыдыр (Ибр. 12:2). Һәмчинин һәјатынын бу гаранлыг дөнәминдә бирбаша Шејтанын һүҹумуна мәруз галдығынын да фәргиндә иди (Лука 22:2—4; 23:33, 34). Шејтан Исанын сәдагәтини сындыра биләҹәјинә әмин иди, амма онун үмидләри пуч олду! Иса бирдәфәлик сүбут етди ки, Шејтан мәнфур јаланчыдыр вә Јеһованын Она ән ағыр сынаглар гаршысында белә сәдагәтини горујан садиг хидмәтчиләри вар! Падшаһымызын разылығыны газанмаг истәјирсиниз? Еләдирсә, даима Јеһованын адыны мәдһ един. Инсанлара Онун неҹә ҝөзәл Аллаһ олдуғу барәдә данышын. Белә етмәклә Исанын нүмунәсини изләмиш олурсунуз (1 Бут. 2:21). Сиз дә онун кими Јеһованын гәлбини севиндирирсиниз вә дүшмәни олан Шејтанын арсыз јаланчы олдуғуну сүбут едирсиниз! w24.02 с. 11—12, абз. 11—13

Сон беш ил әрзиндә бир милјондан чох инсан Јеһованын Шаһиди кими вәфтиз олунуб. Өзүнүзү Јеһоваја һәср едәндә сиз Мәсиһин шаҝирди олмағы вә Аллаһын ирадәсини јеринә јетирмәји һәјатда һәр шејдән үстүн тутмағы өһдәнизә ҝөтүрүрсүнүз. Бир мәсиһи кими һәср олунмаг нә демәкдир? Иса демишди: «Ким ардымҹа ҝәлмәк истәјирсә, гој өзүнү инкар етсин» (Мәт. 16:24). «Гој өзүнү инкар етсин» ифадәсини јунанҹадан «гој өзүнә “јох” десин» кими дә тәрҹүмә етмәк олар. Јеһованын һәср олунмуш бир хидмәтчиси кими сиз Онун ирадәсинә зидд ҝедән һәр бир шејә «јох» демәлисиниз (2 Кор. 5:14, 15). Бура «ҝүнаһлы бәдәнин әмәлләри», јәни ҹинси әхлагсызлыг да дахилдир (Гал. 5:19—21; 1 Кор. 6:18). Бәс бу ҹүр мәһдудијјәтләр сизин һәјатынызы чәтинә салаҹаг? Әҝәр Јеһованы севирсинизсә вә Онун ганунларынын сизин хејринизә олдуғуна әминсинизсә, онда һәјатыныз һеч дә чәтин олмајаҹаг (Зәб. 119:97; Әшј. 48:17, 18). w24.03 с. 2, абз. 1; с. 3, абз. 4

Јеһова разы галдығы кәсләрә мүгәддәс руһ верир (Мәт. 12:18). Бу суалын үзәриндә дүшүнүн: «Руһун бәһрәсинә аид олан һансыса хүсусијјәтләри тәзаһүр етдирирәм?» Сизҹә, Јеһованы танымаздан әввәл даһа сәбирли идиниз, јохса инди? Руһун бәһрәсинә аид олан хүсусијјәтләри өзүнүздә нә гәдәр чох инкишаф етдирсәниз, Јеһованын сиздән разы галдығына бир о гәдәр чох әмин олаҹагсыныз. Јеһова фидјә гурбанлығы әсасында разы галдығы кәсләрин ҝүнаһларыны бағышлајыр (1 Тим. 2:5, 6). Ола билсин, фидјәјә инанырсыныз вә вәфтиз олунмусунуз, амма јенә дә үрәјиниздә Јеһованын сиздән разы галдығына шүбһә едирсиниз. Унутмајын ки, өз һиссләримизә һәмишә етибар едә билмәсәк дә, Јеһоваја һәмишә етибар едә биләрик. Јеһова фидјәјә иман едән кәсләри салеһ сајыр вә онлары мүбарәк гылаҹағына сөз верир (Зәб. 5:12; Ром. 3:26). w24.03 с. 30, абз. 15; с. 31, абз. 17