Декабр

Јеһова өлүләри дирилтмәјә гадирдир? Әлбәттә. Ахы О, Гүдрәт Саһибидир (Вәһј 1:8). О, истәнилән дүшмәни, һәтта өлүмү мәһв етмәјә гадирдир (1 Кор. 15:26). Јеһованын өлүләри дирилтмәјә гадир олдуғуну сүбут едән башга бир амил дә вар: Онун јаддашынын һәдди-һүдуду јохдур. Јеһова улдузларын һәр бирини ады илә чағырыр (Әшј. 40:26). Ејнилә өлән кәсләрин дә һеч бирини унутмур (Әјј. 14:13; Лука 20:38). Дирилдәҹәји кәсләрлә бағлы һәр шеј — һәм ҝенетик кодлары, һәм һәјатда јашадыглары, һәм дә хатирәләри хырдалығына кими Онун јаддашындадыр. Ҝөрдүјүмүз кими, Јеһованын ҝәләҹәкдә өлүләри дирилдәҹәјинә там әмин ола биләрик. Чүнки О, буну һәм истәјир, һәм дә буна гадирдир. Бу вәдә инанмаг үчүн даһа бир әсасымыз вар: О, гәдимдә өлүләри дирилдиб. Јеһова бир нечә мөмин инсана, еләҹә дә Исаја өлүләри дирилтмәк габилијјәти вермишди. w23.04 с. 9—10, абз. 7—9

Әҝәр нәзакәтлә вә мүлајимликлә данышсаг, ола билсин, инсанлар бизә гулаг асмаг истәјәҹәк вә сөһбәти кәсмәјәҹәк. Әлбәттә, әҝәр киминсә мәгсәди мүзакирәдә һаглы чыхмаг вә ја етигадымызы лаға гојмагдырса, сөһбәти давам етдирмәјә дәјмәз (Мәс. 26:4). Амма белә инсанлар тәк-түк олур. Чох вахт инсанлар мүждәјә гулаг асыр. Ҝөрдүјүнүз кими, мүлајим олмағы гаршыныза мәгсәд гојмаға дәјәр. Кимсә сизә мүбаһисә јарадаҹаг суал верәндә вә ја һагсыз јерә тәнгид едәндә мүлајим ҹаваб вермәк үчүн Јеһовадан ҝүҹ истәјин. Јадда сахлајын ки, сизин мүлајим ҹавабыныз сајәсиндә фикирајрылыглары дејишмәјә ҝәтириб чыхармајаҹаг. Үстәлик, бу, инсана бизә вә Мүгәддәс Китабдакы һәгигәтләрә гаршы фикрини дәјишмәјә көмәк едә биләр. Одур ки, етигадынызы «мүдафиә етмәјә һазыр олун, анҹаг буну һәлимликлә вә дәрин һөрмәтлә един» (1 Бут. 3:15). Гој мүлајимлик сизин ҝүҹүнүз олсун! w23.09 с. 19, абз. 18, 19

Ҝәлин сәбир ҝөстәрмәјин дөрд јолундан данышаг. Биринҹиси, сәбирли инсан тез өзүндән чыхмыр. Стрес алтында оланда вә ја кимсә ону әсәбиләшдирәндә о, сакитлијини горујур вә әвәз чыхмыр (Чых. 34:6). Икинҹиси, сәбирли инсан сакитҹә ҝөзләмәји баҹарыр. Әҝәр нәсә ҝөзләдијиндән узун чәкирсә, о, тәлаш кечирмир, һөвсәләдән чыхмыр (Мәт. 18:26, 27). Үчүнҹүсү, сәбирли инсан тәләскән дејил. Белә инсана һансыса ваҹиб иш тапшырыланда о, тәләм-тәләсик бу ишә башлајыб тез ону башындан етмәјә чалышмыр. Әксинә, лазымынҹа вахт ајырыб едәҹәји иши планлашдырыр. Ишә башлајанда исә ону кејфијјәтли ҝөрмәк үчүн нә гәдәр лазымдырса, о гәдәр вахт ајырыр. Дөрдүнҹүсү, сәбирли инсан шикајәт етмәдән чәтинликләрә дөзүр. Бу ҹүр инсан чалышаҹаг ки, чәтинлијә дөзсүн вә бу заман мүсбәт шејләри ҝөрмәји баҹарсын (Кол. 1:11). Бир мәсиһи кими биз бүтүн бу саһәләрдә сәбир ҝөстәрмәлијик. w23.08 с. 20—21, абз. 3—6

Нәјә ҝөрә мәҹази үрәјимизи горумалыјыг? Әсас сәбәб одур ки, Јеһова үрәјимизи арашдырыр. Бу исә о демәкдир ки, Јеһова бизә баханда инсанларын ҝөрдүјүндән артығыны ҝөрүр. О бизим дахилән неҹә инсан олдуғумузу јахшы билир. Јеһованын бизи севмәсини истәјириксә, ағлымызы әбәди һәјат верән һикмәтлә долдурмалыјыг (Јәһ. 4:14). Беләҹә, Шејтан вә онун дүнјасы ағлымызы нә руһани, нә дә әхлаги ҹәһәтдән зәһәрләјә билмәјәҹәк (1 Јәһ. 5:18, 19). Јеһоваја јахынлашдыгҹа Она севҝимиз вә һөрмәтимиз артаҹаг. Ону кәдәрләндирмәк истәмәдијимиз үчүн ҝүнаһ етмәк фикри ағлымызын уҹундан белә кечмәјәҹәк. Хорватијада јашајан Марта адлы баҹы аз гала әхлагсызлыг едәҹәкди. О јазмышды: «Ајдын дүшүнмәк вә ҝүнаһдан ани һәзз алмаг истәјини боғмаг чох чәтин иди, амма Јеһовадан горхмаг мәни горуду». Аллаһ горхусу ону неҹә горумушду? Марта дејир ки, верәҹәји сәһв гәрарын нәтиҹәси үзәриндә дүшүндү. Биз дә ејни шеји едә биләрик. w23.06 с. 20—21, абз. 3, 4

Иса билирди ки, Јеһованын нијјәти Өз адыны бүтүн бөһтанлардан тәмизләмәкдир. Она ҝөрә давамчыларына бу ҹүр дуа етмәји өјрәтмишди: «Ҝөјләрдә олан Атамыз, гој адын мүгәддәс тутулсун» (Мәт. 6:9). Иса баша дүшүрдү ки, бәшәријјәтдә бундан мүһүм мәсәлә јохдур. Каинатда Аллаһын адыны мүгәддәс тутмаг үчүн Иса гәдәр ҹан гојан икинҹи варлыг олмајыб. Бунунла белә, билирсиниз, Иса һәбс олунанда дүшмәнләри ону нәдә иттиһам етдиләр? Аллаһын адына күфр етмәкдә! Атасынын мүгәддәс адыны тәһгир етмәк, Она гара јахмаг Иса үчүн ән ијрәнҹ ҝүнаһ иди. Белә бир ҝүнаһы ишләмәкдә иттиһам олунмасы Иса үчүн чох ағыр иди. Бәлкә дә өлүмүндән бир нечә саат әввәл Исанын «шиддәтли изтираб» чәкмәсинин әсас сәбәби елә бу иди (Лука 22:41—44). w24.02 с. 11, абз. 11

Һәјат уғрунда јарышда биз Јеһованы вә Исаны аилә үзвләримиздән чох севмәлијик (Мәт. 10:37). Амма бу о демәк дејил ки, биз аилә мәсулијјәтләримизи иҹра етмәмәлијик, санки онлар әлимизи-голумузу бағлајыр, Јеһова илә Исаны разы салмаға мане олур. Әксинә, Јеһованы вә Исаны разы салмаг үчүн биз аиләдә үзәримизә дүшән вәзифәни јеринә јетирмәлијик (1 Тим. 5:4, 8). Буну едәндә даһа хошбәхт олуруг. Ахы Јеһованын нијјәтинә әсасән аиләнин хошбәхт олмасы үчүн әрлә арвад бир-биринә мәһәббәт вә һөрмәт ҝөстәрмәлидир, валидејнләр ушагларыны севмәли вә онлара тәрбијә вермәлидир вә ушаглар ата-аналарынын сөзүнә гулаг асмалыдыр (Ефес. 5:33; 6:1, 4). Аиләдәки ролунуздан асылы олмајараг Мүгәддәс Китабда јазылан һикмәтли мәсләһәтләрә әмәл един. Өзүнүзүн дүзҝүн билдији, јашадығыныз әразидә гәбул олунан, јахуд да мүтәхәссисләрин дедији фикирләри бу мәсләһәтләрдән үстүн сајмајын. Мүгәддәс Китаба әсасланан нәшрләрдән јахшыҹа истифадә един. Орада принсипләри тәтбиг етмәјин јоллары изаһ олунур. w23.08 с. 28, абз. 6, 7

Һәр бир мәсиһи баҹы мүәјјән баҹарыглара јијәләнмәлидир. Ҝәнҹ баҹыларын ушаг вахты өјрәндији бәзи баҹарыглар онлара өмүрләри боју хејир ҝәтирәҹәк. Мәсәлән, охумағы вә јазмағы өјрәнин. Бәзи мәдәнијјәтләрдә гадын үчүн охумағы вә јазмағы билмәк елә дә ваҹиб һесаб олунмур. Амма һәр бир мәсиһинин бу баҹарыға јијәләнмәси чох ваҹибдир (1 Тим. 4:13). Бу сәбәбдән манеәләр олса да, өјрәнмәјә давам един. Бәс бунун һансы хејрини ҝөрәҹәксиниз? Мәсәлән, өзүнүзә иш тапа биләҹәксиниз. Аллаһын Кәламыны өјрәнмәк вә башгаларына өјрәтмәк даһа асан олаҹаг. Ән әсасы, Мүгәддәс Китабы охујуб мүталиә едә билдијиниз үчүн Јеһоваја даһа да јахынлашаҹагсыныз (1 Тим. 4:15). w23.12 с. 20—21, абз. 10, 11

Јеһовадан хаһиш един ки, нәфсә үстүн ҝәләсиниз. Ҝүнаһлы олдуғумуз үчүн һәмишә нәфсимизлә мүбаризә апарырыг. Шејтан исә бу мүбаризәмизи даһа да чәтинләшдирир. Мәсәлән, о, әхлагсыз әјләнҹәләрлә зеһнимизи корламаға чалышыр. Бу ҹүр әјләнҹәләр ағлымызда чиркин фикирләр јарадыр. Бу фикирләр бизи Јеһованын ҝөзүндә напак едир вә ҹидди ҝүнаһа сүрүкләјир (Марк 7:21—23; Јаг. 1:14, 15). Јеһованын көмәји илә нәфсимизә үстүн ҝәлә биләрик. Иса давамчыларына өјрәтдији дуаја белә бир хаһиш дахил етмишди: «Гојма јолумузу азаг, бизи Шәрирдән хилас ет» (Мәт. 6:13). Јеһова дадымыза чатмаға һазырдыр, јетәр ки, буну Ондан истәјәк. Бундан әлавә, дуамыза ујғун давранмалыјыг. w23.05 с. 6—7, абз. 15—17

Сәмави Аталары илә мүнасибәтләринә дәјәр верән әр-арвадлар ҹанла-башла Онун мәсләһәтләринә әмәл едир. Бунун сајәсиндә онлар мәһәббәтләрини сојудаҹаг проблемләрдән узаг олур вә ја онларын өһдәсиндән ҝәлирләр. Һәмчинин руһани дүшүнҹәли инсан Јеһоваја бәнзәмәјә вә Онун кими хејирхаһ, сәбирли, бағышлајан олмаға чалышыр (Ефес. 4:32—5:1). Әрлә арвадда бу хүсусијјәтләр оланда мәһәббәтләринин ҝетдикҹә артмасы даһа асан олур. 25 илдән чохдур ки евли олан Лена баҹы дејир: «Руһән јеткин инсаны севмәк, она һөрмәт ҝөстәрмәк асандыр». Мүгәддәс Китабдан бир һадисәјә бахаг. Јеһова Давудун нәслиндән о гәдәр адамын ичиндән ҝәләҹәк Мәсиһин валидејнләри кими Јусифлә Мәрјәми сечди. Чүнки онларын һәр икисинин Јеһова илә мөһкәм мүнасибәти вар иди. Јеһова билирди ки, Она мәһәббәт һәмишә никаһларынын мәркәзиндә олаҹаг. w23.05 с. 20—21, абз. 3, 4

Ағамыз Иса камил олса да, рәһбәрлик етмәк үчүн тәјин етдији гардашлар гејри-камилдир. Онлара итаәт етмәк бизә бәзән асан олмур, әсас да онлар истәмәдијимиз бир шеји бизә бујуранда. Бу, бир дәфә Бутруса да чәтин олмушду. Мәләк она демишди ки, Мусанын ганунунда напак һесаб олунан һејванларын әтини јесин, Бутрус исә бундан имтина етмишди, өзү дә бир дәфә јох, дүз үч дәфә (Һәв. 10:9—16). Нәјә ҝөрә? Чүнки јени ҝөстәриш она ағлабатан ҝәлмирди. Инди исә һәвари Булусун неҹә даврандығына бахаг. Јерусәлимдәки ағсаггаллар она демишди ки, өзү илә дөрд нәфәр ҝөтүрүб мәбәдә ҝетсин вә паклансын; һамы ҝөрсүн ки, о, Гануна риајәт едир. Булус мәсиһиләрин артыг Ганунун табелијиндә олмадығыны билирди, һәм дә о, һеч бир сәһв иш ҝөрмәмишди. Амма јенә дә сәһәриси ҝүн «һәмин кишиләри јанына алыб онларла бирликдә пакланды» (Һәв. 21:23, 24, 26). Булусун итаәти сајәсиндә баҹы-гардашлар арасындакы бирлик позулмады (Ром. 14:19, 21). w23.10 с. 10, абз. 15, 16

Бәлкә ағлыныза ҝәлмәз ки, јахшы достлугда горху да олмалыдыр. Амма Јеһова илә мөһкәм достлуг гурмаг үчүн Ондан горхмаг ваҹибдир. Јеһоваја нечә мүддәтдир хидмәт етмәјимиздән асылы олмајараг, һәр биримизин үрәјиндә Аллаһ горхусу олмалыдыр. Бәс Аллаһдан горхмаг нә демәкдир? Аллаһдан горхан инсан Ону севир вә бу достлуға хәтәр јетирәҹәк шејләрдән узаг олур. Иса Мәсиһдә мәһз бу ҹүр горху вар иди (Ибр. 5:7). Бу, ваһимәли горху дејилди (Әшј. 11:2, 3). Әксинә, Иса Јеһованы үрәкдән севирди вә Она итаәт етмәк истәјирди (Јәһ. 14:21, 31). Иса кими биз дә Јеһоваја дәрин һөрмәт вә еһтирам бәсләјирик, чүнки О, мәһәббәтли, һикмәтли, әдаләтли вә гүдрәтлидир. Һәмчинин билирик ки, Јеһова бизи севир вә нәсиһәтләринә мүнасибәтимиз Онун үчүн ваҹибдир. Һәрәкәтләримиз Јеһованы ја кәдәрләндирир, ја да гәлбини севиндирир (Зәб. 78:41; Мәс. 27:11). w23.06 с. 14, абз. 1, 2; с. 15, абз. 5

Үзијјә падшаһ ҝүҹләнәндә унутду ки, әлиндә олан һәр шејә Јеһованын сајәсиндә саһибдир. Бундан нә өјрәнирик? Унутмамалыјыг ки, һәјатда вә хидмәтдә әлдә етдијимиз һәр бир ҝөзәл шеји бизә Јеһова вериб. Буна ҝөрә дә нәјәсә наил оланда бунунла өјүнмәмәлијик, әксинә, һәр шеј үчүн Јеһоваја миннәтдар олмалыјыг (1 Кор. 4:7). Тәвазөкарлыгла гәбул етмәлијик ки, ҝүнаһлыјыг вә дүзәлишә еһтијаҹымыз вар. 60 јашларында олан бир гардаш јазмышды: «Баша дүшдүм ки, өзүм һагда јүксәк фикирдә олмамалыјам. Һансыса ағылсыз һәрәкәтимә ҝөрә мәнә дүзәлиш едиләндә чалышырам, лазыми дәјишикликләр едиб ирәли ҝедим». Јеһовадан горхмағын вә тәвазөкарлығымызы горумағын сајәсиндә хошбәхт өмүр сүрәҹәјик. Бу, данылмаз фактдыр! (Мәс. 22:4). w23.09 с. 10—11, абз. 10, 11

Биринҹи әсрдәки мәсиһиләрә дөзүм лазым иди. Чүнки онлар мәсиһи олдуглары үчүн һамынын үзләшдији чәтинликләрдән әлавә, башга сынагларла да үзләширдиләр. Чохларыны јәһуди дин хадимләри вә Рома һөкумәти тәгиб едирди. Бу азмыш кими аилә үзвләри онлара ҝөз вериб ишыг вермирди (Мәт. 10:21). Үстәлик, мәсиһиләр јығынҹағын ичиндә дә чәтинликләр јашајырды: бәзән онлар өзләрини дөнүкләрдән вә онларын сахта тәлимләриндән горумалы олурдулар (Һәв. 20:29, 30). Һәмин мәсиһиләр бүтүн бу чәтинликләрә дөздүләр (Вәһј 2:3). Буну неҹә баҹардылар? Онлар Әјјуб пејғәмбәрин вә дөзүм ҝөстәрән диҝәр мөмин инсанларын нүмунәси үзәриндә дүшүнүрдүләр (Јаг. 5:10, 11). Дуа едиб Јеһовадан ҝүҹ истәјирдиләр (Һәв. 4:29—31). Һәмчинин дөзүм ҝөстәрмәјин ҝәтирәҹәји мүкафат барәдә дүшүнүрдүләр (Һәв. 5:41). Биз дә дөзүмлү ола биләрик. Бунун үчүн Мүгәддәс Китабдан вә нәшрләримиздән дөзүм ҝөстәрән инсанлар барәдә охумалыјыг вә онларын нүмунәси үзәриндә дүшүнмәлијик. w23.07 с. 3, абз. 5, 6

Нә Јеһова, нә дә Иса биздән үмидини үзмүр. Һәвари Бутрус Исаны данандан сонра ики јол арасында галмышды: ја Мәсиһин давамчысы олмаға сон гојаҹагды, ја да давам едәҹәкди. Иса Јеһоваја јалвармышды ки, Бутрусун иманы түкәнмәсин. О белә бир дуа етдијини Бутруса да демишди вә сөјләмишди ки, сонралар Бутрусун диндашларынын иманыны мөһкәмләндирәҹәјинә әминдир (Лука 22:31, 32). Јәгин, Бутрус Исанын бу сөзләрини хатырлајанда чох руһланырды. Бизим дә һәјатда сечим етмәли олдуғумуз мәгамлар олур. Бу заман садиг галмағымыз үчүн Јеһова ағсаггаллар васитәсилә бизә дәстәк ола биләр (Ефес. 4:8, 11). Јеһова һәм Бутрусун, һәм дә диҝәр һәвариләрин мадди тәләбатыны өдәјирди. Тәблиғ ишини һәјатымызда һәр шејдән үстүн тутсаг, О бизим дә гејдимизә галаҹаг. w23.09 с. 24—25, абз. 14, 15

Јеһова бизим башгалары үчүн етдијимиз ән хырда јахшылығы белә ҝөрүр. О буна дәјәрли бир гурбан вә әвәзини верәҹәји бир борҹ кими бахыр. Әҝәр бир вахтлар јығынҹаг хидмәтчиси вә ја ағсаггал кими хидмәт етмисинизсә, билин ки, Јеһова кечмишдә етдијиниз ишләри, ҝөстәрдијиниз мәһәббәти унутмур (1 Кор. 15:58). Елә инди ҝөстәрдијиниз мәһәббәт дә Онун ҝөзүндән јајынмыр. Јеһова истәјир ки, Она вә инсанлара севҝимиз ҝетдикҹә артсын. Јеһоваја мәһәббәтимизи артырмаг үчүн Онун Кәламыны охујуб үзәриндә дүшүнмәли вә мүнтәзәм олараг дуада Онунла сөһбәт етмәлијик. Баҹы-гардашлара мәһәббәтимизи артырмаг үчүн исә мүхтәлиф јолларла онлара көмәк етмәлијик. Севҝимиз артдыгҹа биз һәм Јеһова илә, һәм дә руһани аиләмизлә даһа јахын олаҹағыг вә бу достлуғумуз әбәди сүрәҹәк. w23.07 с. 10, абз. 11; с. 11, абз. 13; с. 13, абз. 18

Һәр бир мәсиһи сағламлығынын гејдинә неҹә галаҹағына өзү гәрар вермәлидир. Мүгәддәс Китабда гәрарымыза тәсир едәҹәк ҹәми бир нечә ганун вар. Мәсәлән, гандан вә ҹиндарлыгдан узаг дурмагла бағлы ганунлар (Һәв. 15:20; Гал. 5:19, 20). Галан саһәләр исә шәхси сечим мәсәләсидир. Һансыса мүалиҹә үсулунун хејирли вә ја зәрәрли олдуғуна әмин олсаг да, баҹы-гардашларын сечим етмәк һүгугуна һөрмәтлә јанашмалыјыг. Бу мәсәләдә нөвбәти дөрд амили јадда сахламалыјыг: 1) Јалныз Аллаһын Падшаһлығы бизи там шәкилдә вә бирдәфәлик сағалдаҹаг (Әшј. 33:24). 2) Һәр мәсиһи онун үчүн һансы мүалиҹә үсулунун даһа јахшы олдуғуна «там әмин» олмалыдыр (Ром. 14:5). 3) Биз башгаларынын гәрарыны нә мүһакимә етмәлијик, нә дә онларын иманыны сарсыдаҹаг бир шеј етмәлијик (Ром. 14:13). 4) Мәсиһиләр бир-бириләринә мәһәббәт ҝөстәрирләр вә баша дүшүрләр ки, јығынҹагдакы бирлик сечим етмәк азадлығындан даһа үстүндүр (Ром. 14:15, 19, 20). w23.07 с. 24—25, абз. 15

Јеһованы чох истәјирсиниз? Буна шүбһә јохдур. Елә гәдим дөврдән бу јана сизин кими Јеһова илә мүнасибәтләрини гијмәтләндирән чох адам олуб (Зәб. 104:33, 34). Бәзиләри Јеһоваја ибадәт етмәкдән өтрү гурбанлар вериб. Гәдим Исраилдә јашамыш нәзириләри, башга сөзлә, һәср олунмуш кәсләри буна мисал чәкмәк олар. Нәзириләр Јеһоваја хүсуси шәкилдә хидмәт етмәк үчүн мүәјјән гурбанлар верән исраиллиләр иди. Мусанын ганунуна әсасән киши дә, гадын да Јеһова илә хүсуси әһд бағлајыб бир мүддәт нәзири кими јашамағы сечә биләрди (Сај. 6:1, 2). Бу әһди верәнләр диҝәр исраиллиләрдән тәләб олунмајан гајдалара әмәл етмәли иди. Бәс онлары белә бир әһд вермәјә нә тәшвиг едирди? Ҝөрүнүр, онлар буну Јеһоваја мәһәббәтдән ирәли ҝәләрәк едирдиләр, вердији бол немәтләрә ҝөрә Она миннәтдарлыгларыны билдирмәк истәјирдиләр (Ган. 6:5; 16:17). w24.02 с. 14, абз. 1, 2

Мүгәддәс Китабда «сәдагәт» вә ја «мәһәббәт» кими тәрҹүмә олунан ибрани сөзү чох вахт Аллаһын Өз хидмәтчиләринә бәсләдији исти мүнасибәти вә бағлылығы билдирир. Һәмчинин ејни сөз Аллаһын хидмәтчиләринин бир-биринә бәсләдији мәһәббәтә аид дә ишләнир (2 Ишм. 9:6, 7). Сәдагәтимиз ҝүнү-ҝүндән даһа мөһкәм ола биләр. Буну Дәнјалын нүмунәсиндән ајдын ҝөрә биләрик. Онун һәјатында Јеһоваја садиглијини сүбут етдији чохлу һадисәләр олуб. Амма о ән бөјүк сынагла тәхминән 90 јашында үзләшмишди. Сарај әјанларынын Дәнјалы ҝөрәси ҝөзү јох иди вә онун ибадәт етдији Аллаһы сајмырдылар. Буна ҝөрә дә онлар Дәнјалы өлдүрмәк үчүн тәдбир төкдүләр. Онлар шаһа фәрман имзалатдылар. Бунунла Дәнјалын шаһа, јохса Аллаһа садиг галаҹағы бәлли олаҹагды. Шаһа сәдагәтини сүбут етмәк үчүн Дәнјал садәҹә 30 ҝүн Јеһоваја дуа етмәмәли иди. Амма о, Јеһоваја сәдагәтиндән дөнмәди (Дән. 6:12—15, 20—22). w23.08 с. 5, абз. 10—12

Јеһова истәјир ки, диндашларымыза олан мәһәббәтимиз түкәнмәсин. Әҝәр кимдәсә мәсиһи хүсусијјәтләриндән бәзиләринин чатышмадығыны ҝөрсәниз, нәзәрә алын ки, о да Мүгәддәс Китаб принсипләринә ујғун давранмаг истәјир. Садәҹә һәмин вахт дүшүнүлмәмиш һәрәкәт едиб (Мәс. 12:18). Јеһова садиг хидмәтчиләрини зәифликләринә рәғмән севир. Сәһвләр едәндә дәрһал бизи силиб атмыр, јахуд бизә аҹыглы галмыр (Зәб. 103:9). Нә јахшы ки, Јеһова бағышлајан Аллаһдыр. Биз дә Ондан өрнәк ҝөтүрүб, башгаларыны бағышламалыјыг! (Ефес. 4:32—5:1). Бир мәгамы да унутмајын: бу шәр дүнјанын сону јахынлашдыгҹа баҹы-гардашларымызла мүнасибәтимизи мөһкәмләндирмәлијик. Биз гаршыда тәгибләрин артаҹағына һазырлыглы олмалыјыг. Һәтта иманымыза ҝөрә һәбсә дә дүшә биләрик. Әҝәр белә бир шеј баш версә, баҹы-гардашларымыза һәмишәкиндән даһа чох еһтијаҹымыз олаҹаг (Мәс. 17:17). w24.03 с. 15—16, абз. 6, 7

Мүгәддәс Китабда Јеһоваја јахынлашан, Онун рәғбәтини газанан вә долғун өмүр сүрән ҝәнҹләрдән данышылыр. Онлардан бири Давуд иди. О та ушаглыгдан Јеһоваја ибадәт етмәјә гәрар вермишди. Сонралар исә садиг падшаһ олду (1 Пад. 3:6; 9:4, 5; 14:8). Давудун нүмунәсини арашдырсаныз, Јеһоваја сәдагәтлә гуллуг етмәк истәјәҹәксиниз. Һәмчинин Маркын вә ја Тимутинин һәјаты барәдә даһа чох шеј өјрәнә биләрсиниз. Ҝөрәҹәксиниз ки, онлар Јеһоваја ушаглыгдан хидмәт етмәјә башламышдылар вә ахырадәк сәдагәтлә өмүр сүрмүшдүләр. Бунунла онлар Јеһованын гәлбини севиндирмишдиләр. Ҝәләҹәјиниз һәјатынызы бу ҝүн неҹә гурмағыныздан асылыдыр. Әҝәр өз ағлыныза јох, Јеһоваја ҝүвәнсәниз, О сизин аддымларынызы јөнәлдәҹәк. Сиз хошбәхт, долғун өмүр сүрә биләрсиниз. Унутмајын ки, Јеһова Онун јолунда етдијиниз һәр бир шеји гијмәтләндирир. Һәјатынызы Јеһоваја хидмәтә сәрф етмәкдән даһа јахшы нә ола биләр? w23.09 с. 13, абз. 18, 19

Һәвари Булус диндашларынын гејри-камил олдуғунун фәргиндә иди. Мәсәлән, әввәл-әввәл јығынҹагда бәзиләри онун Мәсиһин шаҝирди олдуғуна шүбһә илә јанашырды (Һәв. 9:26). Сонралар исә бир башгалары онун архасынҹа данышыб адына гара јахмаға чалышырдылар (2 Кор. 10:10). Һәмчинин Булус бир ағсаггалын баҹы-гардашларын бүдрәмәсинә сәбәб ола биләҹәк јанлыш һәрәкәтини дә ҝөрмүшдү (Гал. 2:11, 12). Бундан әлавә, Булусун әмәкдашларындан бири олан Марк ону чох мәјус етмишди (Һәв. 15:37, 38). Бәһс етдијимиз бу вәзијјәтләрин һәр бириндә Булус ону инҹидән кәсләрдән јан ҝәзә биләрди. Амма о, баҹы-гардашларла јахшы мүнасибәтини позмады вә Јеһоваја фәал шәкилдә хидмәтини давам етдирди. Бәс Булуса руһдан дүшмәмәјә нә көмәк етди? Булус баҹы-гардашлары севирди. Бу мәһәббәт она диггәтини диндашларынын сәһвләринә јох, мүсбәт хүсусијјәтләринә ҹәмләмәјә көмәк етмишди. Һәмчинин мәһәббәти сајәсиндә ҝүнүн ајәсиндә јазылан сөзләрә ујғун даврана билмишди. w24.03 с. 15, абз. 4, 5

Мүгәддәс Китабда мүлајим олмағын дәјәрини ҝөстәрән чох һадисә јазылыб. Онлардан бири дә Исһаг иди. О, филиштлиләрин әразиси олан Гәрарда јашајанда гоншулары пахыллыгдан атасынын нөкәрләринин газдығы гујулары торпагла долдурмушдулар. Амма Исһаг онларла бу гујуларын давасыны дөјмәди. О, ев әһлини дә ҝөтүрүб орадан көчдү вә башга гујулар газды (Јар. 26:12—18). Амма филиштлиләр бу әразидәки суларын да онлара мәхсус олдуғуну дедиләр. Буна бахмајараг, Исһаг онларла дава етмәди (Јар. 26:19—25). Башгалары ону өзүндән чыхармаға нә гәдәр чалышса да, о, мүлајим галды. Нәјин сајәсиндә? Сөзсүз ки, валидејнләри она бу саһәдә ҝөзәл нүмунә гојмушдулар. О, Ибраһимин сүлһпәрвәр, Саранын исә «сакит вә һәлим руһ»лу олмасындан чох шеј өјрәнмишди (1 Бут. 3:4—6; Јар. 21:22—34). w23.09 с. 15, абз. 4

Јеһова тәјин етдији вахтда Оғлуну јер үзүнә ҝөндәрди. Иса Падшаһлыг һагда тәблиғ етди вә инсанлары ҝүнаһдан, өлүмдән хилас етмәк үчүн өз һәјатыны гурбан верди. Сонра Иса дирилди вә Аллаһын Падшаһлығынын Падшаһы тәјин олунду. Јеһова Исанын идарә етдији Падшаһлыг васитәсилә јер үзү илә бағлы нијјәтини јеринә јетирәрәк адына бәраәт газандыраҹаг. Бу, Мүгәддәс Китабын әсас мөвзусудур. Јеһованын нијјәти дәјишилмәздир. О, сөз вериб ки, һәр шеј дедији кими олаҹаг (Әшј. 46:10; Ибр. 6:17, 18). Јер күрәси Ҹәннәтә чевриләҹәк. Адәмлә Һәвванын камил, салеһ нәсли әбәди јашајаҹаг (Зәб. 22:26). Амма Јеһованын даһа ҝениш мәгсәди вар. Онун әсас нијјәти одур ки, ҝөјдә вә јердә олан бүтүн шүурлу варлыгларын арасында бирлик јаратсын. Онда онларын һамысы Јеһованын рәһбәрлијини гәбул едиб Она сәдагәтлә гуллуг едәҹәк (Ефес. 1:8—11). Доғрудан да, Јеһова Өз нијјәтини мөһтәшәм шәкилдә һәјата кечирир. Буна валеһ олмамаг мүмкүн дејил. w23.10 с. 20, абз. 7, 8

Бабилдән чыхан јәһудиләр Јерусәлимә гајытдыгдан сонра мадди ҹәһәтдән корлуг чәкмәјә башладылар. Һәмчинин сијаси бахымдан өлкәдә вәзијјәт үрәкачан дејилди вә әтраф халглар онлары тәгиб едирди. Бу гәдәр проблемин ичиндә онлара диггәтләрини Јеһованын мәбәдинин бәрпасына ҹәмләмәк чәтин иди. Елә буна ҝөрә дә Јеһова халгыны руһландырмаг үчүн Һәггајла Зәкәријјә пејғәмбәри ҝөндәрирди вә онлар ишләринин өһдәсиндән јахшы ҝәлдиләр (Һәг. 1:1; Зәк. 1:1). Амма тәхминән 50 ил сонра јәһудиләрин шөвгү јенидән сөндү. Ганунун пешәкар көчүрүҹүсү олан Үзејир халгы руһландырмаг үчүн Бабилдән Јерусәлимә ҝәлди, онлары пак ибадәти һәјатларында һәр шејдән үстүн тутмаға тәшвиг етди (Үзр. 7:1, 6). Һәггај вә Зәкәријјәнин сөјләдији пејғәмбәрликләр исраиллиләрә тәгибләр вахты Јеһоваја етибарларыны горујуб сахламаға көмәк етмишди. Бу пејғәмбәрликләр бу ҝүн бизә дә һәр чәтинлијимиздә Јеһоваја етибарымызы горумаға көмәк едәҹәк (Мәс. 22:19). w23.11 с. 14—15, абз. 2, 3

Диндашларымыза һансы јолларла мәһәббәтимизи ҝөстәрә биләрик? Бунун бир јолу онлара тәсәлли вермәкдир. Үрәјимиздә шәфгәт һисси олса, даима бир-биримизә тәсәлли верә биләҹәјик (1 Салон. 4:18). Бәс диндашларымыза мәһәббәтимизи неҹә мөһкәм сахлаја биләрик? Чәтин олса да, онларын сәһвләрини бағышламагла. Нәјә ҝөрә диндашларымыза мәһәббәт ҝөстәрмәк инди даһа чох ваҹибдир? Ҝөрүн Бутрус нә дејиб: «Һәр шејин сону јахындыр. Буна ҝөрә дә... бир-биринизи һәрарәтлә севин» (1 Бут. 4:7, 8). Бу шәр дүнјанын сонуна даһа да јахынлашдыгҹа нәләр баш верәҹәк? Иса давамчылары барәдә пејғәмбәрлик етмишди: «Мәним адыма ҝөрә бүтүн халглар сизә нифрәт едәҹәк» (Мәт. 24:9). Бу ҹүр мүнасибәт гаршысында мөһкәм дајанмаг үчүн арамызда бирлик олмалыдыр, онда Шејтан нә гәдәр чалышса да, арамызда парчаланма јаратмаға мүвәффәг ола билмәјәҹәк (Филип. 2:1, 2). w23.11 с. 13, абз. 18, 19

Аллаһын Кәламындакы һәгигәтләрин мисилсиз ҝүҹү вар. Инсанлара Јеһова барәдә ҝерчәклији өјрәдәндә мөһтәшәм бир шејин шаһиди олуруг: онларын Шејтанын јаланларындан тутулмуш ҝөзләри јаваш-јаваш ачылыр. Бизим кими онлар да ҝөјдәки Атамызын ҝөзәл хүсусијјәтләрини ҝөрмәјә башлајырлар. Јеһованын сонсуз гүдрәти онлары һејрәтә ҝәтирир (Әшј. 40:26). Онун әдаләтли олдуғуна әмин олурлар (Ган. 32:4). Һикмәтинин бөјүк олдуғуну анлајырлар (Әшј. 55:9; Ром. 11:33). Һәмчинин Јеһованын мәһәббәт олдуғуну билиб тәскинлик тапырлар (1 Јәһ. 4:8). Инсанлар Јеһоваја јахынлашдыгҹа Онун өвлады кими әбәди јашамаг үмидләри даһа ҝерчәк олур. Доғрудан да онлара Аталарына јахынлашмаға көмәк етмәк бизим үчүн бөјүк шәрәфдир! Бу заман Јеһова да бизә «әмәкдашлары» кими бахыр (1 Кор. 3:5). w24.02 с. 12—13, абз. 15

Әҝәр Мүгәддәс Китабы өјрәнирсинизсә, јахуд һәгигәтдә бөјүмүсүнүзсә, вәфтиз олунмаг барәдә дүшүнүрсүнүз? Бу, чох ҝөзәл мәгсәддир! Вәфтиз олунмаздан әввәл сиз өзүнүзү Јеһоваја һәср етмәлисиниз. Бәс һәсролунма неҹә олур? Сиз Јеһоваја дуа едиб сөз верирсиниз ки, јалныз Она ибадәт едәҹәксиниз вә Онун ирадәсини һәјатынызда һәр шејдән үстүн тутаҹагсыныз. Һәмчинин бундан сонра да Јеһованы бүтүн гәлбинизлә, бүтүн варлығынызла, бүтүн ағлынызла вә вар ҝүҹүнүзлә севәҹәјинизә сөз верирсиниз (Марк 12:30). Һәсролунма тәкликдә, Јеһова илә сизин аранызда олур. Амма вәфтиз һамынын ҝөзү өнүндә олур. Инсанлар ҝөрүр ки, сиз өзүнүзү Јеһоваја һәср етмисиниз. Сизин һәсролунма әһдиниз мүгәддәс бир әһддир вә Јеһова вердијиниз әһдә ујғун јашамағынызы истәјир (Ваиз 5:4). w24.03 с. 2, абз. 2; с. 3—4, абз. 5

Бүтүн аиләләрдә чәтинликләр вар. Мүгәддәс Китабда ајдын шәкилдә дејилир ки, евләнәнләр «һәјатда јени чәтинликләрлә үзләшәҹәкләр» (1 Кор. 7:28). Чүнки әр дә, арвад да гејри-камилдир вә хасијјәтләри, севиб-севмәдији шејләр бир-бириндән фәргләнир. Онларын алдығы тәрбијә, бөјүдүјү мәдәнијјәт дә фәргли ола биләр. Вахт кечдикҹә, ола билсин, онлар никаһдан әввәл бир-бириләриндә ҝөрмәдикләри хүсусијјәтләри сезсинләр. Бу кими шејләр әрлә арвад арасында сөз-сөһбәтә ҝәтириб чыхара биләр. Һәр икисиндә дә сәһв олдуғу һалда, онлар проблеми һәлл етмәк јеринә, ола билсин, бир-бириләрини ҝүнаһландырсынлар. Һәтта вәзијјәт о һәддә чата биләр ки, онлар мәсәләнин һәллини ајры јашамагда вә ја бошанмагда ҝөрсүнләр. Бәс бу јахшы һәлл јолудур? Хејр. Јеһова истәјир ки, әр дә, арвад да никаһа һөрмәт етсин, һәтта һәјат јолдашы чәтин адам олса да. w24.03 с. 16, абз. 8; с. 17, абз. 11

Һәср олунуб вәфтиз олунандан сонра да Јеһованы даһа јахындан таныдығыныз вә јеткинләшдијиниз үчүн јер үзүндә әбәди јашамаг үмидиниз бөјүмәјә давам етди (Ибр. 5:13—6:1). Јәгин, Ромалылара 5:2—4 ајәләриндә јазыланлары өз тәҹрүбәниздә јашамысыныз. Јәни сиз мүхтәлиф әзијјәтләрлә үзләшмисиниз, амма дөзүм ҝөстәриб Аллаһын разылығыны газанмысыныз. Буну биләндән сонра исә Аллаһын вәд етдији шејләри алаҹағынызы ҝөзләмәк үчүн даһа чох сәбәбиниз јараныб. Үмидиниз әввәлкиндән дә мөһкәм олуб. Артыг о сизин үчүн даһа ҝерчәк, даһа реалдыр. Саһиб олдуғунуз үмид һәјатынызын һәр саһәсинә ҝүҹлү тәсир едир, мәсәлән, аиләнизлә рәфтарыныза, вердијиниз гәрарлара вә вахтыныздан неҹә истифадә етмәјинизә. Һәвари Булус Аллаһын разылығыны газанандан сонра саһиб олдуғунуз үмид барәдә ваҹиб бир фикри вурғулајыр. О сизи үмидинизин ҝерчәкләшәҹәјинә әмин едир (Ром. 15:13). w23.12 с. 12—13, абз. 16—19

Ҹидди сынагла үзләшәндә һиссләримиз, фикирләримиз, давранышымыз һәмишәки кими таразлы олмаја биләр. Ҝәмини атыб тутан далғалар кими биз дә һәмин ан гарышыг һиссләр кечирә биләрик, бир һиссдән о бири һиссә дүшә биләрик. Бу кими һиссләр бизи боғанда Јеһова бизә неҹә көмәк едир? Аллаһ бизә сәбатлы, јәни мөһкәм галмаға көмәк едәҹәјинә сөз верир. Ҝәми фыртынаја дүшәндә о јана бу јана бәрк јырғаланмаға башлајыр. Ҝәмини стабил сахламаг үчүн онун һәр ики тәрәфинә адәтән сабитләјиҹи гурғу гурашдырылыр. Онлар ҝәминин бәрк јырғаланмасынын гаршысыны хејли алыр. Бунун сајәсиндә ҝәмидәкиләр даһа тәһлүкәсизликдә олур вә сәјаһәт раһат кечир. Адәтән бу сабитләјиҹи гурғуларын ҝәми һәрәкәтдә оланда даһа чох көмәји дәјир. Ејнилә биз дә чәтин анларымызда хидмәтимизи давам етдирсәк, Јеһова бизә сабит галмаға көмәк едәҹәк. w24.01 с. 22, абз. 7, 8

Сизи горху бүрүјәндә бу суал үзәриндә дүшүнүн: «Јеһова кечмишдә һансы ишләри ҝөрүб?» Онун јаратдыгларына нәзәр салын. Мәсәлән, ҝүлләрә, гушлара «фикир верин». Онлар Јеһованын бәнзәриндә јарадылмасалар да, Она ибадәт едә билмәсәләр дә, Јеһова онларын гајғысына галыр. Мәҝәр Јеһова сизин гејдинизә даһа чох галмаз? Бу барәдә дүшүнмәк Аллаһа етибарынызы артыраҹаг (Мәт. 6:25—32). Һәмчинин Јеһованын Өз хидмәтчиләри үчүн нәләр етдији барәдә дә дүшүнә биләрсиниз. Бунун үчүн ҝүҹлү иман ҝөстәрән һансыса персонаж барәдә, јахуд Јеһованын мүасир дөврдә јашамыш хидмәтчиләри барәдә охумаг олар. Бундан башга, Јеһованын шәхсән сизин гејдинизә неҹә галдығыны јадыныза салын. О сизин һәгигәтә ҝәлмәјинизә неҹә көмәк едиб? (Јәһ. 6:44). Дуаларыныза неҹә ҹаваб вериб? (1 Јәһ. 5:14). Әзиз Оғлунун фидјә гурбанлығы сајәсиндә һәр ҝүн һансы немәтләри әлдә едирсиниз? (Ефес. 1:7; Ибр. 4:14—16). w24.01 с. 4, абз. 6; с. 7, абз. 17