«Мәсиһи һәјаты вә ибадәти. Иш дәфтәри» үчүн мәнбәләр
АВГУСТ
*** w07-Е 15/7 с. 32 ***
«Сәмадакы вәфалы шаһид»
Тәхминән 3000 ил бундан өнҹә Јеһова Аллаһ гәдим Исраилин падшаһы олан Давудла падшаһлыг әһди бағламышды (2 Ишмуил 7:12—16). Бу әһд Давудун варисинә, Иса Мәсиһә әбәди тахта саһиб олмаг үчүн гануни әсас верирди (Әшија 9:7; Лука 1:32, 33). Давудун «өвлад»ынын тахты барәсиндә мәзмурчу демишди: «Сәмадакы вәфалы шаһид кими, ај кими, әбәдилик бәргәрар олаҹаг» (Зәбур 89:36, 37).
Ҝеҹәјә һөкм едән ҹисим, јәни ај Мәсиһин рәһбәрлијинин әбәди олаҹағыны хатырладыр (Јарадылыш 1:16). Дәнјал 7:14 ајәсиндә Мәсиһин идарә едәҹәји Падшаһлыг һагда дејилир: «Онун һакимијјәти сона јетмәјәҹәк әбәди һакимијјәтдир, падшаһлығы әсла дағылмајаҹаг» (Дәнјал 7:14). Ај бир шаһид кими бизә Падшаһлыг вә онун бәшәријјәтә ҝәтирәҹәји немәтләр һагда хатырладыр.
*** w07-Е 15/9 с. 32 ***
«Сачлары ағаранда да бар верәҹәкләр»
Аралыг дәнизи өлкәләриндә инсанлар һәјәтләриндә хурма ағаҹлары әкирләр. Тәхминән јүз ил бар верән бу ағаҹлар чох ҝөзәл олур вә дадлы мејвә ҝәтирирләр.
Гәдим Исраилин падшаһы Сүлејман пејғәмбәр поетик диллә Шулам гызынын гамәтини хурма ағаҹына бәнзәтмишди (Нәғмәләр нәғмәси 7:7). «Мүгәддәс Китабда адлары чәкилән биткиләр» адлы китабда дејилир: «Ибрани дилиндә хурма ағаҹы тамар адланыр... Јәһудиләрдә бу ағаҹ ҝөзәллијин вә зәрифлијин символудур вә әсас етибарилә, гадынлара аид ишләнир» («Plants of the Bible»). Мисал үчүн, Сүлејманын ҝөзәл бир баҹысы вар иди, онун ады Тамар иди (2 Ишмуил 13:1). Бәзи валидејнләр инди дә гызларына бу ады верирләр.
Амма ҝөзәл гадынларла јанашы, салеһ инсанлар да хурма ағаҹына бәнзәдилир. Зәбур 92:12—14 ајәләриндә јазылыб: «Салеһләр хурма ағаҹытәк чичәкләнәҹәк, Ливандакы сидр ағаҹытәк уҹа олаҹаг. Онлар Јеһованын евиндә әкилиб, Аллаһымызын һәјәтиндә чичәк ачыр. Сачлары ағаранда да бар верәҹәкләр, сапсағлам, тәравәтли олаҹаглар».
Гоҹа јашларында Јеһоваја сәдагәтлә хидмәт едәнләр ҝөзәл хурма ағаҹына бәнзәјирләр. Мүгәддәс Китабда дејилир: «Салеһлик јолунда ағаран сачлар ҝөзәллик таҹыдыр» (Мәсәлләр 16:31). Бу јашлы баҹы-гардашларын физики ҝүҹләри ҝет-ҝедә түкәнсә дә, онлар мүнтәзәм олараг Аллаһын Кәламыны охујуб арашдырмагла руһани ҹәһәтдән мөһкәм гала биләрләр (Зәбур 1:1—3; Әрәмја 17:7, 8). Аһыл јашында олан Аллаһын бу садиг бәндәләринин хош сөзләри вә ҝөзәл нүмунәләри башгаларыны руһландырыр вә онлар илбәил бар ҝәтирирләр (Титуса 2:2—5; Ибраниләрә 13:15, 16). Хурма ағаҹы кими јашлы инсанлар һәтта гоҹаланда да чичәк ачыр.
*** ит-1-Е с. 857, 858 ***
Ҝәләҹәји ҝөрмәк, ҝәләҹәји мүәјјән етмәк
Јеһова Аллаһ әввәлҹәдән мүәјјән етмишди ки, Исаны Јәһуда сатаҹаг?
Јәһуда Искәрјутун Иса Мәсиһи сатмасы илә пејғәмбәрлик јеринә јетди вә бу, ону ҝөстәрди ки, Јеһованын, һәмчинин Иса Мәсиһин ҝәләҹәји ҝөрмәк габилијјәти вар (Зб 41:9; 55:12, 13; 109:8; Һв 1:16—20). Амма бу о демәк дејил ки, Јеһова Јәһуданын сатгын чыхаҹағыны габагҹадан мүәјјән етмишди. Пејғәмбәрликдә дејилмишди ки, Иса Мәсиһин достларындан бири сатгын чыхаҹаг. Анҹаг конкрет олараг һансы достунун ону сатаҹағы дејилмәмишди. Әҝәр Аллаһ Исаны мәһз Јәһуданын сатаҹағыны габагҹадан мүәјјән етсәјди, бу, Мүгәддәс Китаб принсипләринә зидд ҝедәрди. Аллаһын тәләбини һәвари Булус белә ифадә етмишди: «Һеч кәсин үзәринә тәләм-тәләсик әл гојма, башгаларынын ҝүнаһларына әлбир олма, паклығыны гору» (1Тм 5:22; мүгајисә ет: 1Тм 3:6). Иса Мәсиһ 12 һәварисинин сечиминә чох ҹидди јанашмышды: о, бүтүн ҝеҹәни Аллаһа дуа етмишди вә сонра өз гәрарыны шаҝирдләринә билдирмишди (Лк 6:12—16). Әҝәр Јеһова Јәһуданын сатгын олаҹағыны габагҹадан мүәјјән етмиш олсајды, О, Өз вердији рәһбәрлијә вә ҝөстәришә зидд ҝедәр вә јухарыда хатырланан тәләбә әсасән, Јәһуданын ҝүнаһына шәрик оларды.
Беләликлә, бундан ајдын ҝөрүнүр ки, Јәһуда һәвари сечиләндә онун үрәјиндә сатгын олаҹағына һансыса әламәт јох иди. Лакин о јол верди ки, «зәһәрли көк» бој атсын; нәтиҹәдә, о, Аллаһдан үз дөндәрди вә Шејтана ујараг оғру вә сатгын олду (Иб 12:14, 15; Јһ 13:2; Һв 1:24, 25; Јг 1:14, 15; мүгајисә ет: ЈӘҺУДА, 14). Бир мүддәт сонра Јәһуда елә һәддә чатды ки, һәтта Иса онун үрәјинин вәзијјәтини ҝөрдү вә ону сатаҹағыны деди (Јһ 13:10, 11).
Јәһја 6:64 ајәсинә дејилир ки, Исанын тәлимләринә ҝөрә бәзи шаҝирдләри бүдрәјәндә «Иса кимләрин инанмадығыны вә кимин ону сатаҹағыны габагҹадан билирди». «Габагҹадан», «башланғыҹдан» (јун. архе) сөзүнә 2 Бутрус 3:4 ајәсинин орижинал мәтниндә дә раст ҝәлинир. Бу сөз јарадылышын башланғыҹына аид ишләнсә дә, ону башга дөврләрә аид дә ишләтмәк олар (Лк 1:2; Јһ 15:27). Мәсәлән, һәвари Бутрус: «Онлара, лап башланғыҹда бизә верилдији кими, мүгәддәс руһ верилди» дејәркән, ҝөрүнүр, өзүнүн шаҝирд вә ја һәвари олдуғу вахтын башланғыҹыны јох, хидмәтинин ваҹиб мәгамыны, мүгәддәс руһун ерамызын 33-ҹү илинин Әллинҹи ҝүн бајрамында мүәјјән мәгсәдлә верилмәјә башладығы дөврү нәзәрдә тутурду. (Һв 11:15; 2:1—4). Ҝәлин ҝөрәк бир мәнбәдә Јәһја 6:64 ајәсинә даир нә дејилир: «[Архе] сөзү алтында метафизикаја (тәбиәтин вә дүнјанын структуру һаггында фәлсәфәнин бөлмәси) әсасән, һәр шејин башланғыҹы јох... Онун [Исанын] онларын һәр бири илә таныш олмасынын башланғыҹы јох... шаҝирдләрини топламасынын вә ја хидмәтинин башланғыҹы јох... [бәзи шаҝирдләрин бүдрәмәсинә сәбәб олан] имансызлығын илк ҹүҹәртиси нәзәрдә тутулур. Беләҹә, о, лап башланғыҹдан билирди ки, Ону ким сатаҹаг» (П. Шаффын тәрҹүмәси вә редактәси. Мүгајисә ет: 1Јһ 3:8, 11, 12).
*** w87-Е 15/3 с. 24 ***
Хошбәхт Аллаһ, хошбәхт халг!
Зәбур 116:3 — «Өлүм ипләри» нәдир?
Санки, өлүм мәзмурчунун әл-голуну елә бағламышды ки, гуртулмаг гејри-мүмкүн иди. Инсанын әл-голуну ипләрлә мөһкәм бағлајанда бу ону инҹидир, әзаб верир. Бу сәбәбдән ибрани дилиндә истифадә олунан «ип» сөзү јунанҹа Септуаҝинтада «әзаб» кими тәрҹүмә едилиб. Иса Мәсиһ өләндә өлүм ипләри она доланды, башга сөзлә десәк, өлүм әзабы ону ағушуна алды. Јеһова исә ону дирилдәрәк «өлүм әзабындан» хилас етди (Һв 2:24).
*** w98-Е 1/12 с. 24 ***
Даһа бөјүк фәалијјәтин астанасында
Даһа сонра мәктәбин үч мүәллими чыхыш етди. Илк олараг Карл Адамс «Јеһоваја нә верә биләрсиниз?» адлы мәрузә илә чыхыш етди. Онун чыхышы 116-ҹы мәзмура әсасланырды. Еһтимал ки, Иса өлүмүндән габаг бу мәзмуру охумушду (Мәтта 26:30, һашијә). Ҝөрәсән, Иса: «Мәнә етдији јахшылыгларын әвәзиндә Јеһоваја нә верә биләрәм?» — сөзләрини охујаркән нә һагда фикирләширди? (Зәбур 116:12). Ола билсин, о, Јеһованын онун үчүн һазырладығы камил бәдән һаггында дүшүнүрдү (Ибраниләрә 10:5). Нөвбәти ҝүн о, өз бәдәнини фидјә олараг гурбан вермәли иди, бунунла да о, мәһәббәтинин нә дәрәҹәдә бөјүк олдуғуну сүбут едәҹәкди. 105-ҹи синфин мәзунлары беш ај әрзиндә Јеһованын онлара ҝөстәрдији хејирхаһлығы өз үзәрләриндә һисс едибләр. Инди исә онларын хүсуси тәјинатлы мүждәчи кими хидмәт едәрәк Аллаһа мәһәббәтләрини ҝөстәрмәк имканлары вар.