Рәһбәрлик шурасы һүгуги шәхсдирми?
ҜӨЗӘТЧИ Гүлләси, Мүгәддәс Китаб вә трактатлар Ҹәмијјәти (Пенсилванија), 1885-ҹи илин јанвар ајындан е’тибарән иллик јығынҹаглар кечирир. XIX јүзиллијин сонунда мәсһ едилмишләрин јығымы давам едирди вә бу корпорасијанын һәм директорларынын, һәм дә рәсми шәхсләринин ҝөјләр үмиди варды. Сонралар аз шеј дәјишилди.
Анҹаг тәк бир истисна һал олмушдур. 1940-ҹы илдә, “башга гојунлар” сырасындан вә о заманлар Ҹәмијјәтин һүгуг мәсләһәтчиси олан Һајден Ковингтон Ҹәмијјәтин директорларындан бири сечилмишди (Јәһја 10:16). О, 1942-ҹи илдән 1945-ҹи илә гәдәр Ҹәмијјәтин витсе-президенти кими хидмәт етмишдир. Ковингтон гардаш, 1945-ҹи илдә директор вәзифәсини тәрк етди; чүнки о заман елә һесаб олунурду ки, Јегованын ирадәсинә ҝөрә, Пенсилванија корпорасијасынын директорлары вә рәсми шәхсләри, мәсһ едилмиш мәсиһчиләрдән олмалыдыр. Директорлар шурасында Һајден Ковингтону Лајман Суингл әвәз етди, витсе-президент вәзифәсинә исә Фредерик Френси сечдиләр.
Нәјә ҝөрә Јегованын хидмәтчиләри елә һесаб едирдиләр ки, Ҝөзәтчи Гүлләси, Мүгәддәс Китаб вә трактатлар Ҹәмијјәтинин (Пенсилванија) бүтүн директорлары вә рәсми шәхсләри мәсһ едилмиш мәсиһчиләр олмалыдыр? Она ҝөрә ки, о вахт, директорлар шурасы вә Пенсилванија корпорасијасынын рәсми шәхсләри, һәмишә мәсһ едилмиш мәсиһчиләрдән ибарәт олан Јегованын Шаһидләринин Рәһбәрлик Шурасы илә демәк олар ки, бәрабәр һесаб олунурдулар.
Тарихи әһәмијјәт дашыјан иллик јығынҹаг
Питтсбургда, 1944-ҹү ил октјабрын 2-дә кечирилән иллик јығынҹагда, Пенсилванија корпорасијасынын үзвләри, корпорасијанын низамнамәсинә дәјишиклик дахил едән алты гәрар гәбул етдиләр. Низамнамәдә нәзәрдә тутулурду ки, сәсвермәдә иштирак етмәк үчүн сәһмләр, Ҹәмијјәт тәрәфиндән кечирилән ишә ианә едән кәсләрә ҝөндәрилсин. Бу вәзијјәт үчүнҹү дәјишикликлә ләғв олунду. Һәмин иллик јығынҹаг һаггындакы һесабатда гејд олунурду: “Ҹәмијјәтин үзвләринин сајы беш јүз нәфәрлә мәһдудлашаҹаг... Сечилән һәр бир кәс Рәббин руһуну тәзаһүр етдирмәли, Ҹәмијјәтин таммүддәтли вә јахуд Јегованын шаһидләри иҹмасынын [јығынҹағынын] таммүддәтли олмајан хидмәтчиси олмалыдыр”.
О вахтдан е’тибарән, Падшаһлығын мәнафеји үчүн нә гәдәр пул ианә етмәләринә бахмајараг, Ҹәмијјәтин директорлары Аллаһа там садиг шәхсләрдән сечилир. Бу, Ишаја 60:17-ҹи ајәсиндә габагҹадан дејилән, ардыҹыллыгла баш верәҹәк тәкмилләшмәләрлә ујғун ҝәлир: “Тунҹ јеринә гызыл ҝәтирәҹәјәм вә дәмир јеринә ҝүмүш вә ағаҹ јеринә тунҹ вә даш јеринә дәмир ҝәтирәҹәјәм. Вә мә’мурларыны сүлһ едәҹәјәм, нәзарәтчиләрини дә әдаләт”. “Мә’мурлар” вә “нәзарәтчиләр” һаггында данышараг, бу пејғәмбәрлик, Јегованын халгынын тәшкилатчылыг гајдаларындакы тәкмилләшмәјә ишарә едир.
Тәшкилаты теократик гурулуша ҝәтириб чыхаран ваҹиб аддым, Даниел 8:14-дә дејилән “ики мин үч јүз ахшамла сабаһ”ын сонунда атылды. “Мүгәддәс јер дүзҝүн вәзијјәтә ҝәтирилди”.
Лакин 1944-ҹү илдә тарихи иллик јығынҹагдан сонра, ваҹиб бир суал ҹавабсыз галмышды. О заман Рәһбәрлик шурасы, једди үзвдән ибарәт Пенсилванија директорлар шурасы илә, демәк олар ки, бәрабәр иди. Бу о демәк идими ки, Рәһбәрлик шурасынын тәркибинә једди нәфәрдән артыг мәсһ едилмиш мәсиһчи дахил ола билмәз? Бундан әлавә, директорлар, корпорасијанын үзвләри тәрәфиндән сечилдикләри үчүн, һәр дәфә иллик јығынҹагда һәмин корпорасијанын үзвләри Рәһбәрлик шурасынын да үзвләрини сечмиш олмурлармы? Бәс Ҝөзәтчи Гүлләси, Мүгәддәс Китаб вә трактатлар Ҹәмијјәтинин (Пенсилванија) директорлары вә рәсми шәхсләри, Рәһбәрлик шурасынын үзвләри илә ејни, јохса фәргли адамлардыр?
Даһа бир унудулмаз иллик јығынҹаг
Бу суаллара, 1971-ҹи ил, октјабрын 1-дә кечирилән иллик јығынҹагда ҹаваб верилди. Мә’рузәчиләрдән бири гејд етди ки, “садиг вә ағыллы гулун” рәһбәрлик шурасы, Ҝөзәтчи Гүлләси, Мүгәддәс Китаб вә трактатлар Ҹәмијјәтиндән (Пенсилванија) јүз илләр габаг јаранмышдыр (Матта 24:45—47). Мөвҹудлуғуна, Пенсилванија корпорасијасындан 18 әср габаг башлајан Рәһбәрлик шурасы, б. е. 33-ҹү илинин Пентикост ҝүнүндә тәшкил олунмушду. Әввәлҹә рәһбәрлик шурасы 7 нәфәрдән јох, 12 нәфәр һәваридән ибарәт иди. Мә’лум олдуғу кими, сонрадан онун сајы артмышдыр, чүнки Јерусәлимдәки “һәвариләр вә ағсаггаллар” рәһбәрлији өз үзәрләринә ҝөтүрүрдүләр (Һәвариләрин ишләри 15:2).
Һәмин мә’рузәчи 1971-ҹи илдә изаһ етди ки, мәсһ едилмишләрдән ибарәт олан Рәһбәрлик шурасына кимин дахил олаҹағына, Ҝөзәтчи Гүлләси Ҹәмијјәтинин үзвләри сәсвермә јолу илә гәрар верә билмәзләр. Нәјә ҝөрә? “Она ҝөрә ки, “садиг вә ағыллы гулун” рәһбәрлик шурасы инсанлар тәрәфиндән тә’јин олунмур. О... һәгиги мәсиһчи јығынҹағынын Башы, “садиг вә ағыллы гулун” Рәбби вә Саһиби Иса Мәсиһ тәрәфиндән тә’јин олунур”,- дејә мә’рузәчи гејд етди. Бурадан мә’лум олур ки, Рәһбәрлик шурасынын үзвләри, һәр һансы һүгуг органыны тәшкил едән кәсләр тәрәфиндән сечилә билмәз.
Даһа сонра мә’рузәчи ваҹиб бәјанат верди: “Ҹәмијјәтин директорлар шурасындан фәргли олараг, Рәһбәрлик шурасынын рәсми шәхсләри, јә’ни президенти, витсе-президети, хәзинәдар катиби вә онун көмәкчиси кими үзвләри јохдур. Рәһбәрлик шурасынын јалныз сәдри вар”. Чох илләр бојунҹа Пенсилванија корпорасијасынын президенти, ејни заманда, Рәһбәрлик шурасынын габагҹыл үзвү олмушдур. Амма артыг һәр шеј дәјишилиб. Инди, Рәһбәрлик шурасынын үзвләри тәҹрүбә вә ја габилијјәтләринә ҝөрә бәрабәр сәвијјәдә олмасалар да, онларын мәс’улијјәтләри ејнидир. Мә’рузәчи әлавә етди: “Рәһбәрлик шурасынын һәр бир үзвү, Ҹәмијјәтин... президенти олмадан... Рәһбәрлик шурасынын сәдри ола биләр. Рәһбәрлик шурасынын үзвләри нөвбә илә шуранын сәдри тә’јин олунурлар”.
1971-ҹи илин унудулмаз иллик јығынҹағында, Рәһбәрлик шурасынын мәсһ едилмиш үзвләри илә Пенсилванија корпорасијасынын директорлары арсында ачыг-ашкар фәрг гојулду. Бунунла белә, Рәһбәрлик шурасынын үзвләри, Ҹәмијјәтин директорлары вә рәсми шәхсләри кими хидмәт етмәјә давам едирдиләр. Лакин бу ҝүн белә бир суал мејдана чыхыр: Ҝөзәтчи Гүлләси, Мүгәддәс Китаб вә трактатлар Ҹәмијјәти (Пенсилванија) директорларынын, мүтләг Рәһбәрлик шурасынын үзвләриндән олмаларына аид Мүгәддәс Китаба әсасланан сәбәб вармы?
Белә бир сәбәб јохдур. Пенсилванија корпорасијасы - Јегованын Шаһидләри тәрәфиндән истифадә едилән јеҝанә һүгуг органы дејилдир. Башгалары да вардыр. Онлардан бири - Ҝөзәтчи Гүлләси, Мүгәддәс Китаб вә трактатлар (Нју-Јорк) Ҹәмијјәтидир. Бу Ҹәмијјәт, Бирләшмиш Штатлардакы ишләримизи јүнҝүлләшдирир. Директорларынын вә рәсми шәхсләринин әксәријјәти “башга гојунлардан” олса да, Јегованын хејир-дуасынын бу корпорасијанын үзәриндә олмасына шүбһә јохдур. Бөјүк Британијада Мүгәддәс Китабын Тәдгигатчыларынын Бејнәлхалг Иттифагы вардыр. Диҝәр өлкәләрдә Падшаһлығын мәнафејинә башга һүгуг органлары көмәк едир. Онларын һамысы хош хәбәрин бүтүн Јер үзүндә јајылмасында бирҝә иштирак едир вә бу ишдә мүәјјән рол ојнајырлар. Бу органларын һарада јерләшмәсиндән, директор вә рәсми шәхсләринин ким олмасындан асылы олмајараг, онлар Рәһбәрлик шурасы тәрәфиндән теократик тәрздә идарә вә истифадә олунурлар. Јә’ни онларын һәр биринә, Падшаһлығын мәнафеләринин ирәлиләмәси илә әлагәдар тапшырыглар һәвалә олунур.
Һүгуг органларымыз да аз фајда ҝәтирмирләр. Онлар имкан јарадырлар ки, јерли ганунлара вә өлкәнин ганунларына, Аллаһын Кәламынын тәләб етдији кими риајәт едәк (Јеремја 32:11; Ромалылара 13:1). Һүгуг органлары, Мүгәддәс Китаблар, журналлар, брошүралар, китаблар вә башга әдәбијјатлар нәшр етмәкдә, бунунла да Падшаһлыг һаггындакы мүждәни јајмагда ишимизи асанлашдырырлар. Һәмчинин, бу органлар мүлки һүгуг, фәлакәтә мә’руз галмышлара көмәк ҝөстәрмәк, конгресләр үчүн јер иҹарә етмәк вә с. ишләрлә әлагәдар һүгуг мәсәләләрини һәлл едирләр. Биз, һүгуг органларымызын етдикләри хидмәтә ҝөрә онлара миннәтдарыг.
Јегованын адына бөјүк әһәмијјәт верилир
1944-ҹү илдә Ҝөзәтчи Гүлләси, Мүгәддәс Китаб вә трактатлар Ҹәмијјәти (Пенсилванија) низамнамәсинин ЫЫ маддәсиндә, корпорасијанын вәзифәләрини гејд едән дүзәлишләр апарылмышды. Низамнамәјә әсасән, Ҹәмијјәтин мәгсәдләринә нөвбәти әсас мәгсәд дахилдир: “Гүдрәтли ЈЕГОВА Аллаһын адына, кәламына вә үстүнлүјүнә шәһадәтлик едәрәк, Аллаһын, Мәсиһ Исанын рәһбәрлији алтындакы Падшаһлығы һаггында мүждәни бүтүн милләтләрә тәблиғ етмәк”.
1926-ҹы илдән е’тибарән “садиг... гул” Јегованын адына бөјүк әһәмијјәт верирди. Јегованын Шаһидләри адыны гәбул едән Мүгәддәс Китабын Тәдгигатчылары үчүн 1931-ҹи ил, әламәтдар ил олмушдур (Ишаја 43:10—12). Ҹәмијјәтин, Аллаһын адынын мә’насыны гејд едән нәшрләриндән “Јегова” (1934), “Исмин мүгәддәс тутулсун” (1961) вә ““Милләтләр биләҹәкләр ки, Мән - Јеговајам”. Неҹә?” (1971) китабларынын адыны чәкмәк олар.
1960-ҹы илдә инҝилис дилиндә бүтүнлүклә нәшр олунмуш “Мүгәддәс Јазыларын Јени Дүнја Тәрҹүмәси”ни хүсуси олараг хатырлатмаг лазымдыр. Орада Јегованын ады Ибраниҹә Мүгәддәс Јазыларда тетраграмматонун олдуғу һәр јердә вар. Һәмчинин бу тәрҹүмәдә, Јунанҹа Мүгәддәс Јазыларда Аллаһын адына 237 дәфә раст олунур; бу ад, мәтнин дәгиг анализинин ҝөстәрдији кими, лазыми јерләрдә дурур. Биз чох миннәтдарыг ки, Јегова өз адынын бүтүн Јер үзүндә јајылмасы үчүн, “гула” вә онун Рәһбәрлик шурасына чап васитәләриндән вә һүгуг органларындан мүхтәлиф үсулларла истифадә етмәјә имкан верир!
Аллаһын Кәламынын јајылмасына көмәк
Јегованын хидмәтчиләри Онун ады һаггында даима шәһадәлик етмишләр вә инди дә едирләр. Онлар Мүгәддәс Китаба әсасланан милјонларла нәшрләри, һәмчинин Мүгәддәс Китабын өзүнү чап етмәклә вә онлары пајламагла Аллаһын Кәламыны мүдафиә едирләр. ХХ әсрин әввәлләринә јахын Ҝөзәтчи Гүлләси Ҹәмијјәти, Бенҹамин Уилсонун “The Emphatic Diaglott” адлы Јунанҹа Мүгәддәс Јазыларын јунанҹа-инҝилисҹә мәтнинин һәрфи тәрҹүмәсинин нәшри үчүн мүәллифлик һаггыны газанды. Мүгәддәс Китабын Тәдгигатчылары шәхси нәшријјатларында 500 сәһифәлик әлавә илә “Крал Јаковун Мүгәддәс Китабы”ны нәшр етдиләр. Ҹәмијјәт 1942-ҹи илдә, кәнарларында гејдләри олан “Крал Јаковун Мүгәддәс Китабы”ны дәрҹ етди. Ҹәмијјәт 1944-ҹү илдә, Аллаһын адынын истифадә олундуғу, 1901-ҹи илин “American Standard Version” тәрҹүмәсини чап етмәјә башлады. 1972-ҹи илдә Ҹәмијјәт тәрәфиндән нәшр олунан, Стивен Баингтонун “Ҹанлы инҝилис дилиндә Мүгәддәс Китаб” адлы китабында да Јегованын ады истифадә олунур.
Јегованын Шаһидләри тәрәфиндән истифадә олунан һүгуг органлары, Мүгәддәс Китабын бүтүн бу тәрҹүмәләринин нәшр едилмәсиндә вә пајланмасында көмәк едибләр. Анҹаг даһа чох мараг ојадан, Ҝөзәтчи Гүлләси Ҹәмијјәти илә “Јени Дүнја Тәрҹүмәси” Комитәсини тәшкил едән Јегованын мәсһ едилмиш Шаһидләринин групу арасындакы сых әмәкдашлыгларыдыр. Биз шадыг ки, бу тәрҹүмә, һал-һазырда бүтүнлүклә вә ја гисмән 38 дилдә, 106 400 000 нүсхә чап олунубдур. Ҝөзәтчи Гүлләси, Мүгәддәс Китаб вә трактатлар Ҹәмијјәти - һәгигәтән дә Мүгәддәс Китаб ҹәмијјәтидир!
“Садиг... гул” ағасынын “бүтүн маликанәси” үзәринә тә’јин едилибдир. Ағанын маликанәсинә, Нју-Јорк штатында јерләшән мәркәзи идарә вә һал-һазырда бүтүн дүнјада фәалијјәт ҝөстәрән 110 филиал дахилдир. Гул синфинин үзвләри, онлара һәвалә олунанлардан неҹә истифадә етдикләри һагда һесабат верәҹәкләрини билирләр (Матта 25:14—30). Лакин бу, “башга гојунлар” сырасындан олан мүнасиб гардашлара һүгуги вә инзибати еһтијаҹларын гајғысына галмағы е’тибар етмәкдә “гула” мане олмур. Бундан әлавә, Рәһбәрлик шурасына “дуа етмәк вә Аллаһын кәламыны јајмаг ишинә” даһа артыг вахт һәср етмәјә имкан верир (Һәвариләрин ишләри 6:4).
Дүнјадакы шәраит һүгуг органларындан истифадә етмәјә имкан веринҹәјә гәдәр, “садиг вә ағыллы гулу” тәмсил едән Рәһбәрлик шурасы буну едәҹәкдир. Онлар ишимизи јүнҝүлләшдирирләр, лакин фәалијјәтимиз там шәкилдә онлардан асылы дејил. Әҝәр дөвләт тәрәфиндән бу вә ја диҝәр һүгуг органын фәалијјәтинә сон гојуларса, тәблиғ иши јенә дә давам едәҹәкдир. Һәтта инди ишимизә мәһдудијјәтләр гојулан вә һеч бир һүгуг органы фәалијјәт ҝөстәрмәјән өлкәләрдә белә, Падшаһлыг һаггында мүждә е’лан едилир, шаҝирдләр һазырланыр вә теократијада артым мүшаһидә олунур. Бу она ҝөрә баш верир ки, Јегованын Шаһидләри әкир вә суварырлар, “Аллаһ” исә “бөјүдүр” (1 Коринфлиләрә 3:6, 7).
Биз әминик ки, Јегова ҝәләҹәкдә дә өз халгынын руһани вә мадди тәләбатларынын гејдинә галмаға давам едәҹәкдир. О вә Оғлу Иса Мәсиһ, Падшаһлыг һаггында мүждәнин тәблиғинин сона чатмасы үчүн, ҝөјдән лазыми рәһбәрлији вә көмәклији бундан сонра да ҝөстәрәҹәкләр. Әлбәттә, Аллаһын хидмәтчиләри кими һәјата кечирдијимиз һәр иш “гүдрәтлә дејил, гүввәтлә дејил”, анҹаг Јегованын Руһу илә едилмәкдәдир (Зәкарја 4:6). Буна ҝөрә дә, биз Аллаһдан көмәк диләјир вә билирик ки, бу ахыр заманда бизә һәвалә етдији иши Ондан алдығымыз ҝүҹ сајәсиндә баша чатдыра биләҹәјик.