Хош хәбәрә һәгигәтән дә иман едирсәнми?
“Аллаһын Падшаһлығы јахынлашды. Төвбә един вә Мүждәјә [“хош хәбәрә”, ЈД] иман един” (МАРК 1:15, И–93).
1, 2. Марк 1:14, 15 ајәләрини неҹә изаһ едәрдиниз?
ЕРАМЫЗЫ 30-ҹу или иди. Иса Мәсиһ Галилејада өзүнүн мәшһур хидмәтинә башламышды. О, “Аллаһын хош хәбәрини” (ЈД) тәблиғ едирди. Онун сөјләдији “вахт тамам олду, Аллаһын Падшаһлығы јахынлашды. Төвбә един вә Мүждәјә [“хош хәбәрә”, ЈД] иман един” сөзләри бир чох галилејалылары һәјәҹанландырырды (Марк 1:14, 15, И–93).
2 Исанын өз хидмәтинә башламасы, халгын исә Аллаһ тәрәфиндән бәјәниләҹәк гәрар гәбул етмәси үчүн ‘вахт тамам олмушду’ (Лука 12:54-56). ‘Аллаһын Падшаһлығы јахынлашмышды’, чүнки Иса, тә’јин олунмуш Падшаһ кими инсанларын арасында иди. Онун тәблиғ хидмәти тәмиз үрәкли инсанлары төвбәјә тәшвиг едирди. Бәс онлар хош хәбәрә иман етдикләрини неҹә тәзаһүр етдирирдиләр? Вә буну биз неҹә едә биләрик?
3. Инсанлар хош хәбәрә иман етдикләрини кечмишдә неҹә ҝөстәрмишләр, онлар буну инди неҹә едирләр?
3 Иса кими, һәвари Петер дә инсанлары төвбәјә тәшвиг едирди. Петер ерамызын 33-ҹү илинин Пентикост ҝүнүндә Јерусәлимдә јашајан јәһудиләрә мүраҹиәт едәрәк деди: “Ҝүнаһларынызын бағышланмасы үчүн төвбә един вә һәр бириниз Иса Мәсиһин ады илә вәфтиз олсун. Вә Мүгәддәс Руһун ән’амыны алаҹагсыныз”. Минләрлә инсанлар төвбә етдиләр вә вәфтиз олунуб Исанын давамчысы олдулар (Һәвариләрин ишләри 2:38, 41; 4:4). Ерамызын 36-ҹы илиндә төвбә едән гејри-јәһудиләр дә бу ҹүр даврандылар (Һәвариләрин ишләри 10:1-48). Бизим ҝүнләримиздә дә, хош хәбәрә иман минләрлә инсанлары ҝүнаһларындан төвбә етмәјә, өзләрини Аллаһа һәср етмәјә вә вәфтиз олунмаға тәшвиг едир. Онлар хилас һаггындакы хош хәбәри гәбул едир вә Исанын фидијә гурбанлығына иман ҝәтирирләр. Бундан әлавә, онлар салеһ һәјат тәрзи сүрүр вә Аллаһын Падшаһлығынын тәрәфини тутурлар.
4. Иман нәдир?
4 Бәс иман нәдир? Һәвари Павел јазырды: “Иман, үмид едилән шејләрә әсаслы е’тимад, ҝөрүнмәз олса белә мөвҹуд олан шејләрин ајдын тәзаһүрүдүр” (Ибраниләрә 11:1, ЈД). Иманымыз сајәсиндә әмин олуруг ки, Аллаһын вә’д етдији һәр шеји артыг јеринә јетмиш һесаб етмәк олар. Бу, мүәјјән мүлкә саһиб олдуғумузу тәсдиг едән сәнәд кимидир. Иман, ејни заманда “мөвҹуд олан шејләрин ајдын тәзаһүрү”, јә’ни ҝөрүнмәјән бир шејин мөвҹудлуғуна әмин олмаг үчүн әсасдыр. Бу ҹүр шејләри ҝөрмәсәк дә, дәрракәмиз вә миннәтдарлыгла долу үрәјимиз онларын реал олдуғуна бизи әмин едир (2 Коринфлиләрә 5:7; Ефеслиләрә 1:18).
Имана еһтијаҹымыз вар!
5. Иман етмәк нә үчүн бу гәдәр ваҹибдир?
5 Биз иманла дејил, руһани тәләбатларла доғулуруг. Үстәлик, “һамы иман етмир” (2 Салониклиләрә 3:2). Лакин Аллаһын вә’д етдикләрини мирас алмаг үчүн, мәсиһчиләр имана малик олмалыдырлар (Ибраниләрә 6:12). Павел имана даир ҝөзәл нүмунә верәнләри садалајараг јазмышдыр: “Буна ҝөрә, биз дә әтрафымызда бөјүк шаһидләр булудуна малик олдуғумуз үчүн, бизи асанлыгла чашдыран ҝүнаһы тәрк едиб, гаршымыза гојулан јарышда мәтанәтлә гачаг. Иманымызын Баниси вә Камилләшдириҹиси олан Исаја бахаг” (Ибраниләрә 12:1, 2). “Бизи асанлыгла чашдыран ҝүнаһ” нәдир? Бу, иман чатышмазлығы вә ја бир заманлар малик олдуғумуз иманын итирилмәсидир. Иманымызы мөһкәм сахламаг үчүн ‘Исаја бахмалы’ вә онун нүмунәсини изләмәлијик. Биз, һәмчинин әхлагсызлығы рәдд етмәли, ҹисмани ишләрлә мүбаризә апармалы вә һәрисликдән, дүнјәви фәлсәфәләрдән вә Мүгәддәс Китаба мүвафиг олмајан ән’әнәләрдән гачынмалыјыг (Јәһуда 3, 4; Галатијалылара 5:19-21; Колослулара 2:8; 1 Тимотејә 6:9, 10). Бундан әлавә, Аллаһын бизимлә олдуғуна вә Онун Кәламындакы нәсиһәтләрин һәгигәтән дә фајда ҝәтирдијинә иман етмәлијик.
6, 7. Имана малик олмаг үчүн дуа етмәк нәјә ҝөрә мүнасибдир?
6 Иманы өз ирадәмиз ҝүҹүнә инкишаф етдирә билмәрик. Иман — Аллаһын мүгәддәс руһунун, јә’ни фәал гүввәсинин сәмәрәсинин тәркиб һиссәсидир (Галатијалылара 5:22, 23). Бәс иманымызын мөһкәмләнмәсинә еһтијаҹ дујуругса неҹә? Иса демишдир: “Мадам ки, сиз... өз өвладларыныза јахшы һәдијјәләр верә билирсиниз, Сәмави Атанызын Ондан диләјәнләрә Мүгәддәс Руһу верәҹәји нә гәдәр јәгиндир!” (Лука 11:13). Ҝәлин, мүгәддәс руһу алмаг үчүн дуа едәк, чүнки о биздә, ән чәтин анларда белә Аллаһын ирадәсини јеринә јетирмәмиз үчүн лазыми иманы һасил едә биләр (Ефеслиләрә 3:20).
7 Даһа чох имана малик олмаг үчүн дуа етмәк мүнасибдир. Иса бир ҝәнҹдән ҹини говмаздан әввәл, ҝәнҹин атасы јалварыб деди: “Иман едирәм, ја Рәбб! Имансызлығыма галиб ҝәлмәјимә көмәк ет!” (Марк 9:24). Исанын шаҝирдләри хаһиш етдиләр: “Иманымызы артыр!” (Лука 17:5). Ҝәлин, Аллаһын дуаларымыза ҹаваб верәҹәјинә шүбһә етмәдән, имана малик олмаг үчүн дуа едәк! (1 Јәһја 5:14).
Аллаһын Кәламына иман етмәк олдугҹа ваҹибдир
8. Аллаһын Кәламына иман етмәк бизә неҹә көмәк едә биләр?
8 Иса һәјатыны гурбан вермәздән бир аз габаг шаҝирдләринә демишди: “Үрәјиниз нараһат олмасын; Аллаһа иман един, Мәнә дә иман един” (Јәһја 14:1). Мәсиһин давамчылары кими биз Аллаһа вә Онун Оғлуна иман едирик. Бәс Аллаһын Кәламына? Әҝәр бизә ән јахшы өјүд вә рәһбәрлији тәгдим етдијинә там әмин олараг, Аллаһын Кәламыны өјрәниб һәјата кечиририксә, әлбәттә ки, о бизим һәјатымыза ҝүҹлү вә фајдалы тә’сир ҝөстәрмәјә габилдир (Ибраниләрә 4:12).
9, 10. Јагуб 1:5-8 ајәләриндә иман һаггында дејиләнләри неҹә изаһ едәрдиниз?
9 Биз гејри-камил инсанларыг вә һәјатымыз чәтинликләрлә долудур. Лакин Аллаһын Кәламына иман етмәк бизә бөјүк көмәк ола биләр (Ејуб 14:1). Фәрз едәк ки, һәр һансы сынағын өһдәсиндән неҹә ҝәләҹәјимизи билмирик. Аллаһын Кәламы бизә мәсләһәт едир: “Әҝәр сизләрдән биринин һикмәти әксикдирсә, һәр кәсә ҹомәрдликлә вә ҝилејләнмәјәрәк верән Аллаһдан диләсин, она вериләҹәкдир. Амма гој иманла диләсин, һеч шүбһә етмәсин. Чүнки шүбһә едән, күләјин галдырдығы вә тәлатүмә ҝәтирдији дәниз далғасына бәнзәр. Гој белә бир адам дүшүнмәсин ки, Рәббдән бир шеј алаҹагдыр. Мүтәрәддид адам етдији һеч бир шејдә сабит дејил” (Јагуб 1:5-8).
10 Һикмәтимизин әксик олдуғундан дуа етдијимизә ҝөрә, Јеһова Аллаһ бизи гынамајаҹаг. Әксинә, гаршылашдығымыз сынаглара дүзҝүн јанашмағымыза көмәк едәҹәкдир. Бу заман һәмиманлыларымыз диггәтимизи лазыми ајәләрә јөнәлдә биләрләр, ја да ки, биз өзүмүз Мүгәддәс Китабы өјрәнәркән бу ҹүр ајәләрә диггәт јетирә биләрик. Јахуд да, ола билсин, Јеһованын мүгәддәс руһунун рәһбәрлији неҹәсә башга ҹүр тәзаһүр олунсун. Әҝәр ‘иманла, шүбһә етмәдән’ диләјириксә, сәмави Атамыз сынагларын өһдәсиндән ҝәлмәјимиз үчүн лазыми һикмәти верир. Әҝәр биз күләјин совурдуғу дәниз далғалары кимијиксә, Аллаһдан нә исә алаҹағымыза үмид етмәмәлијик. Нәјә ҝөрә? Она ҝөрә ки, бу бизим мүтәрәддид вә дуаларда, јахуд башга ишләрдә, һәтта иманы тәзаһүр етдирмәкдә белә гәрарсыз олдуғумузу ҝөстәрәрди. Демәли, биз Аллаһын Кәламына вә орада верилән рәһбәрлијә мөһкәм иман етмәлијик. Аллаһын Кәламынын бизә неҹә көмәк етдијинә вә јол ҝөстәрдијинә даир бир нечә нүмунәјә бахаг.
Иман вә ҝүндәлик тәләбатларымыз
11. Аллаһын Кәламына иман етмәјимиз, ҝүндәлик тәләбатларымыза даир бизи нәјә әмин едир?
11 Әҝәр һал-һазырда еһтијаҹ вә јохсуллуг ичиндә јашајырыгса, онда неҹә? Аллаһын Кәламына олан иманымыз биздә, Јеһованын ҝүндәлик тәләбатларымызын гејдинә галаҹағына, нәтиҹәдә исә Ону севәнләрин һамысына бол-бол хејир-дуалар верәҹәјинә даир әсаслы үмид һасил едир (Мәзмур 72:16; Лука 11:2, 3). Аҹлыг заманы Јеһованын өз пејғәмбәри Илјасы гида илә неҹә тә’мин етдијинин үзәриндә дүшүнмәјимиз, бизи руһландыра биләр. Даһа сонра Аллаһ ун вә јағ еһтијатларыны мө’ҹүзәли шәкилдә артырараг, бир гадынын, онун оғлунун вә Илјасын һәјатыны горуду (1 Краллар 17:2-16). Буна бәнзәр шәкилдә, Јерусәлим бабиллиләр тәрәфиндән мүһасирәјә алынан заман, Јеһова Јеремја пејғәмбәрин еһтијаҹларыны тә’мин едирди (Јеремја 37:21). Јеремјанын вә Илјасын јемәкләри чох аз олса да, Јеһова онларын гејдинә галырды. О, бу ҝүн дә Она иман едәнләрин гејдинә галыр (Матта 6:11, 25-34).
12. Чөрәк пулу газанмагда бизә нә көмәк едәҹәкдир?
12 Иман вә Мүгәддәс Китаб принсипләринә риајәт етмәк бизи мадди ҹәһәтдән зәнҝинләшдирмәјәҹәк, лакин чөрәк пулу газанмағымыза көмәк едәҹәкдир. Нүмунә үчүн: Мүгәддәс Китаб бизи дүзҝүн, баҹарыглы вә әмәксевәр олмаға чағырыр (Сүлејманын мәсәлләри 22:29; Ваиз 5:18, 19; 2 Коринфлиләрә 8:21). Әҝәр бир ишчи кими јахшы ад газанмышыгса, буну лазымынҹа гијмәтләндирмәмәк олмаз. Һәтта јахшы иш тапмаг мүмкүн олмајан јерләрдә белә, дүзҝүнлүјү севән, баҹарыглы вә чалышган ишчиләрин вәзијјәти даһа үстүн олур. Онлар боллуг ичиндә јашамасалар да, ән ваҹиб тәләбатларыны өдәјир вә өз зәһмәтләри илә газандыглары чөрәји јемәкдән мәмнунлуг дујурлар (2 Салониклиләрә 3:11, 12).
Иман, кәдәрә таб ҝәтирмәјимизә көмәк едир
13, 14. Иман кәдәрә таб ҝәтирмәјимизә неҹә көмәк едир?
13 Аллаһын Кәламы ајдын сурәтдә ҝөстәрир ки, әзизләримизин өлүмүндән кәдәрләнмәк тамамилә тәбиидир. Садиг гәбилә башчысы Ибраһим, севимли арвады Саранын өлүмү үчүн ҝөз јашы ахыдырды (Тәквин 23:2). Давуд, оғлу Абшаломун өлдүјүнү ешидәндә чох кәдәрләнмишди (2 Самуел 18:33). Һәтта камил инсан олан Иса белә досту Лазар өләндә ағламышды (Јәһја 11:35, 36). Әзиз адамын өлүмү биздә бөјүк кәдәрә сәбәб олур, лакин Аллаһын Кәламындакы вә’дләрә иман етмәк, бу кәдәрә таб ҝәтирмәјимизә көмәк едәр.
14 Павел демишдир: “Аллаһа үмид едирәм ки, һәм салеһ, һәм дә салеһ олмајан өлүләрин дирилмәси олаҹагдыр” (Һәвариләрин ишләри 24:15). Биз Аллаһын милјонларла инсанлары дирилтмәк нијјәтинә иман етмәлијик (Јәһја 5:28, 29). Онларын арасында Ибраһим вә Сара, Исһаг вә Ребека, Јагуб вә Леа да олаҹагдыр; онлар инди өлүм јухусундадырлар вә Аллаһын јени дүнјасында дириләҹәкләри вахты ҝөзләјирләр (Тәквин 49:29-32). Бизә әзиз олан инсанлар јер үзүндә јашамаг үчүн өлүм јухусундан ајылдыглары заман, неҹә дә севиндириҹи олаҹагдыр! (Вәһј 20:11-15). Инди иман бүтүн кәдәримизи тамамилә арадан галдыра билмәсә дә, о, ағыр иткиләрә таб ҝәтирмәјимизә јардым едән Аллаһла јахын олмағымыза имкан јарадаҹагдыр (Мәзмур 121:1-3; 2 Коринфлиләрә 1:3).
Иман, мә’јус оланлары мөһкәмләндирир
15, 16. а) Нә үчүн демәк олар ки, Аллаһа иман едәнләрин мә’јуслуг кечирмәләриндә гејри-ади бир шеј јохдур? б) Мә’јуслугла мүбаризә апармагда нә көмәк едә биләр?
15 Аллаһын Кәламы ҝөстәрир ки, һәтта Аллаһа иман едәнләр дә мә’јуслуг кечирә вә депрессијадан әзијјәт чәкә биләрләр. Ағыр сынаглара мә’руз галан заман, Ејуб Аллаһын ону тәрк етдијини дүшүнүрдү (Ејуб 29:2-5). Јерусәлимин вә онун диварларынын виран олмасы Неһемјаны кәдәрләндирирди (Неһемја 2:1-3). Петер, Исаны инкар етдикдән сонра елә кәдәрләнди ки, “һөнкүр-һөнкүр ағлады” (Лука 22:62). Павел исә Салоник јығынҹағындакы һәмиманлыларыны “ҹәсарәтсизләри [“кәдәрли оланлары”, ЈД] руһландыр”маға чағырырды (1 Салониклиләрә 5:14). Ҝөрдүјүмүз кими, Аллаһа иман едәнләрин мә’јуслуг һисси кечирмәләриндә гејри-ади бир шеј јохдур. Бәс мә’јуслуғун өһдәсиндән неҹә ҝәлмәк олар?
16 Бир сыра ҹидди проблемләрлә гаршылашдыгда мә’јуслуға гапыла биләрик. Лакин бүтүн бу проблемләри бөјүк бир фәлакәт кими гәбул етмәк әвәзинә, Мүгәддәс Китаб принсипләрини тәтбиг едәрәк, ола билсин, онлары бир-бир һәлл едә биләрик. Беләликлә, мә’јуслугдан мүәјјән дәрәҹәдә азад олмаг олар. Бундан әлавә, ишләримиздә таразлығы горумаг вә кифајәт гәдәр истираһәт етмәк дә фајдалы ола биләр. Бир шејә шүбһә етмәјә биләрик: Аллаһа вә Онун Кәламына иман руһани рифаһымыза көмәк едир. Чүнки иманын сајәсиндә Аллаһын гајғымыза галдығына әминлијимиз мөһкәмләнир.
17. Јеһованын бизим гајғымыза галдығыны һарадан билирик?
17 Петер зәманәтвериҹи сөзләрлә бизә тәсәлли верир: “Аллаһын ҝүҹлү әлинин һимајәси алтында тәвазөкар олун ки, О Өз вахтында сизи уҹалтсын. Бүтүн гајғынызы Онун үзәринә гојун, чүнки сизин гајғыныза галан Одур” (1 Петер 5:6, 7). Мәзмурчу тәрәннүм едирди: “Рәбб бүтүн јыхыланлара дәстәк олар вә бүтүн әјилмиш оланлары дүзәлдәр” (Мәзмур 145:14). Бизим бу сөзләрә инанмаг үчүн там әсасымыз вар, чүнки онлар Аллаһын Кәламында јазылыб. Әҝәр мә’јуслуг кечиб ҝетмирсә, бүтүн гајғыларымызы севән сәмави Атамызын үзәринә гоја биләҹәјимизи билмәк, иманымызы неҹә дә мөһкәмләндирир!
Башга сынаглар заманы иманын көмәји
18, 19. Хәстәликләрә таб ҝәтирмәкдә вә хәстә олан һәмиманлыларымыза тәсәлли вермәкдә иман бизә неҹә көмәк едир?
18 Бизим вә ја әзизләримизин ҹидди хәстәлији уҹбатындан иманымыз сәрт сынагларла үзләшә биләр. Мүгәддәс Китабда Епафродит, Тимотеј вә Трофим кими мәсиһчиләрин мө’ҹүзә васитәсилә сағалдыглары дејилмәсә дә, шүбһәсиз ки, Јеһова таб ҝәтирмәләри үчүн онлара ҝүҹ верирди (Филипилиләрә 2:25-30; 1 Тимотејә 5:23; 2 Тимотејә 4:20). Бундан әлавә, мәзмурчу “дүшкүнләрә бахан” һәр бир кәс һаггында тәрәннүм едирди: “Тагәтсизлик дөшәјиндә Рәбб она дәстәк олар; хәстәлијиндә бүтүн јатағыны сән дүзәлдәрсән” (Мәзмур 41:1-3). Мәзмурчунун сөзләри, хәстә олан һәмиманлыларымыза тәсәлли вермәкдә бизә неҹә көмәк едә биләр?
19 Хәстә оланлара руһани ҹәһәтдән јардым ҝөстәрмәк үчүн онларла бирликдә вә онлар үчүн дуа етмәк олар. Биз Аллаһдан кимәсә мө’ҹүзәли тәрздә шәфа вермәсини диләмәсәк дә, онларын хәстәликләрә вә һәјатларынын бу ҹүр чәтин анларына таб ҝәтирә билмәләри үчүн еһтијаҹ дујдуглары руһани ҝүҹү вермәсини хаһиш едә биләрик. Јеһова онлара көмәк едәҹәк, онларын иманы исә, ‘орада јашајанын: Хәстәјәм, демәјәҹәји’ бир вахтын интизарында мөһкәмләнәҹәк (Ишаја 33:24). Бүтүн итаәткар инсанларын, дирилдилмиш Иса Мәсиһ вә Аллаһын Падшаһлығы васитәсилә ҝүнаһдан, хәстәликләрдән вә өлүмдән һәмишәлик азад олаҹагларыны билмәк неҹә дә тәсәлливериҹидир! Бу ҝөзәл ҝәләҹәк үчүн, “бүтүн хәстәликләри јахшы едән” Јеһова Аллаһа миннәтдарыг (Мәзмур 103:1-3; Вәһј 21:1-5).
20. Нәјә ҝөрә демәк олар ки, иман, гоҹалыг дөврүнүн “пис ҝүнләр”инә таб ҝәтирмәкдә бизә көмәк едир?
20 Иман, һәмчинин сағламлығын вә ҝүҹүн олмадығы гоҹалыг дөврүнүн “пис ҝүнләр”инә таб ҝәтирмәкдә дә көмәк едир (Ваиз 12:1-7). Буна ҝөрә дә јашлы баҹы вә гардашларымыз, тәрәннүм едән аһыл јашлы мәзмурчунун сөзләрини тәкрар едә биләрләр: “Үмидим сәнсән, ја Рәбб Јеһова... Ихтијарлыг заманында мәни өзүндән атма; гүввәтим түкәндији заман, мәни бурахма” (Мәзмур 71:5, 9). Мәзмурчунун Јеһованын көмәјинә еһтијаҹы варды. Бу көмәјә, узун илләр Аллаһа хидмәт етмиш, инди исә аһыл јашында олан һәмиманлыларымыз да еһтијаҹ дујурлар. Онлар имана маликдирләр, буна ҝөрә дә Јеһованын “әбәди әлләр”инин әзмли көмәјинә шүбһә етмәјә биләрләр (Тәснијә 33:27).
Аллаһын Кәламына олан иманынызы горујун
21, 22. Иман Аллаһла олан мүнасибәтимизә неҹә тә’сир ҝөстәрир?
21 Хош хәбәрә вә үмумијјәтлә Аллаһын Кәламына иман етмәк, Јеһоваја даһа чох јахынлашмағымыза көмәк едир (Јагуб 4:8). Бәли, О, Һөкмдар Аллаһдыр, һәмчинин Јараданымыз вә Атамыздыр (Ишаја 64:8; Матта 6:9; Һәвариләрин ишләри 4:24). Мәзмурчу охујурду: “Сәнсән Атам, Аллаһым вә гуртулушумун гајасы” (Мәзмур 89:26). Әҝәр Јеһоваја вә Онун Кәламына иман едириксә, биз дә Ону ‘гуртулушумузун гајасы’ һесаб едә биләрик. Бу неҹә дә руһландырыҹы шәрәфдир!
22 Јеһова — руһдан доғулмуш мәсиһчиләрин вә онларын јер үзүндә јашамаг үмидинә малик олан һәмкарларынын Атасыдыр (Ромалылара 8:15). Сәмави Атамыза иман етдијимиз үчүн һеч вахт мә’јус олмајаҹағыг. Давуд демишдир: “Анам вә атам мәни бурахдыглары заман, Рәбб мәнә һимајәчилик едәр” (Мәзмур 27:10). Бундан әлавә, Мүгәддәс Јазылар бизи әмин едир: “Рәбб халгыны өз бөјүк ады наминә бурахмајаҹагдыр” (1 Самуел 12:22).
23. Јеһова илә мүнасибәтләримизин мөһкәм олмасы үчүн нә тәләб олунур?
23 Јеһова илә мүнасибәтләримизин мөһкәм олмасы үчүн, әлбәттә, хош хәбәрә иман етмәли вә Мүгәддәс Јазылары әслиндә олдуғу кими — Аллаһын Кәламы олараг гәбул етмәлијик (1 Салониклиләрә 2:13). Биз бүтүнлүклә Јеһоваја е’тибар етмәли вә Онун Кәламынын јолумузу ишыгландырмасына имкан вермәлијик (Мәзмур 119:105; Сүлејманын мәсәлләри 3:5, 6). Јеһоваја, Онун шәфгәтинә, мәрһәмәтинә вә көмәјинә әмин олараг дуа едириксә, иманымыз мөһкәмләнәҹәк.
24. Ромалылара 14:8 ајәсиндә һансы тәсәлливериҹи фикир ифадә олунур?
24 Иман бизи, Аллаһа һәмишәлик һәср олунмаға тәшвиг етмишдир. Иманымыз мөһкәмдирсә, өлсәк белә, биз Онун, дирилмәк үмидинә малик олан вә һәср олунмуш хидмәтчиләри олараг галырыг. Бәли, “јашајырыгса да, өлүрүксә дә, һәмишә Рәббиник” (Ромалылара 14:8). Ҝәлин бу тәсәлливериҹи фикри үрәјимиздә сахлајаг вә Аллаһын Кәламына е’тибарымызы вә хош хәбәрә олан иманымызы бундан сонра да горујаг.
Сиз неҹә ҹаваб верәрдиниз?
• Иман нәдир вә биз бу кејфијјәтә нә үчүн еһтијаҹ дујуруг?
• Хош хәбәрә вә үмумијјәтлә Аллаһын Кәламына иман етмәјимиз нәјә ҝөрә олдугҹа ваҹибдир?
• Мүхтәлиф сынаглара таб ҝәтирмәкдә иман бизә неҹә көмәк едир?
• Иманымызы горумаға бизә нә көмәк едәҹәкдир?
[8-ҹи сәһифәдәки шәкилләр]
Јеремја вә Илјас имана малик олдуглары үчүн, Јеһова онлары тәрк етмәди.
[9-ҹу әһифәдәки шәкилләр]
Ејуб, Петер вә Неһемја мөһкәм имана малик идиләр.
[10-ҹу сәһифәдәки шәкилләр]
Јеһова илә мүнасибәтләримизин мөһкәм олмасы үчүн, хош хәбәрә иман етмәлијик.