Јахшылығы тәзаһүр етдирмәјә давам един
“Ишығын бәһрәси һәр ҹүр јахшылыг, салеһлик вә һәгигәтдир” (ЕФЕСЛИЛӘРӘ 5:9, И-93).
1. Бу ҝүн милјонларла инсанлар Мәзмур 31:19 ајәсиндәки сөзләрлә разылашдыгларыны неҹә ҝөстәрирләр?
ИНСАНЫН едә биләҹәји ән бөјүк јахшылыг - Аллаһа иззәт ҝәтирмәкдир. Бу ҝүн милјонларла инсанлар, Аллаһа јахшылығына ҝөрә иззәт ҝәтирмәклә буну едирләр. Јеһованын һәдсиз дәрәҹәдә сәдагәтли Шаһидләри олан бизләр, бүтүн үрәкдән мәзмурчунун сөзләри илә разыјыг. О охујурду: “Јахшылығын нә бөјүкдүр! Сәндән горханлар үчүн ону сахладын” (Мәзмур 31:19).
2, 3. Шаҝирдләр һазырламаг ишиндә иштирак едәркән сөзләримизи јахшы давранышларымызла ујғунлашдырмасајдыг нә баш верә биләрди?
2 Јеһованын гаршысында малик олдуғумуз еһтирамлы горху, бизи, јахшылығына ҝөрә Ону иззәтләндирмәјә тәшвиг едир. Бу ҹүр горху, бизи, һәмчинин Јеһоваја “шүкр” етмәјә, Ону “тәгдис” едиб, “Падшаһлығынын иззәти” һагда сөјләмәјә тәшвиг едир (Мәзмур 145:10-13). Буна ҝөрә дә биз, Падшаһлыг һаггындакы тәблиғ ишиндә вә шаҝирдләрин һазырланмасында сә’јлә иштирак едирик (Матта 24:14; 28:19, 20). Тәблиғдә сөјләдикләримизи исә, мүтләг јахшы давранышымызла ујғунлашдырмалыјыг. Әкс тәгдирдә, Јеһованын мүгәддәс исминә хәләл ҝәтирәрик.
3 Бир чох инсанлар Аллаһа ибадәт етдикләрини бәјан едирләр, амма онларын давранышлары Онун илһамланмыш Кәламында изаһ олунан нормалара ујғун ҝәлмир. Јалныз сөздә јахшылыг едән инсанлар һаггында һәвари Павел јазырды: “Бәс нә үчүн сән башгаларыны өјрәдәрәк, өзүнү өјрәтмирсән? Оғурламамағы вә’з едиб, оғурлајырсанмы? “Зина етмә”,- дејәрәк, зина едирсәнми?.. Чүнки јазылдығы кими, сизин үзүнүздән диҝәр халглар арасында Аллаһын адына күфр едилир” (Ромалылара 2:21, 22, 24).
4. Јахшы давранышымыз һансы тә’сирә маликдир?
4 Јеһованын исминә хәләл ҝәтирмәјә дејил, бу исми јахшы давранышымызла иззәтләндирмәјә чалышырыг. Бу, мәсиһчи јығынҹағына мәнсуб олмајан инсанлара мүсбәт тә’сир ҝөстәрир. Илк нөвбәдә исә, бизә мүгавимәт ҝөстәрәнләри сусдурмағымыза көмәк едир (1 Петер 2:15). Ән әһәмијјәтлиси исә одур ки, јахшы давранышымыз инсанлары Јеһованын тәшкилатына ҹәлб едәрәк, онлара да Ону иззәтләндирмәјә вә әбәди һәјаты мирас алмаға имкан верир (Һәвариләрин ишләри 13:48).
5. Инди һансы суаллары мүзакирә етмәлијик?
5 Гејри-камиллијимизә бахмајараг, Јеһованы һөрмәтдән салан вә һәгигәти ахтаранлары бүдрәдән давранышлардан неҹә гачына биләрик? Бәс јахшылыг тәзаһүр етдирмәјә неҹә мүвәффәг ола биләрик?
Ишығын бәһрәси
6. “Гаранлығын сәмәрәсиз” ишләриндән бә’зиләри һансылардыр, амма мәсиһчиләр арасында һансы бәһрәләр ҝөзә чарпмалыдыр?
6 Һәср олунмуш биз мәсиһчиләр, “гаранлығын сәмәрәсиз” ишләриндән гачынмаг үчүн лазым олан шејләрлә тәҹһиз олунмушуг. “Гаранлығын сәмәрәсиз” ишләринә јалан, оғурлуг, тәһгиредиҹи сөзләр, ҹинси әлагә һаггында јанлыш сөһбәтләр, әдәбсизлик, налајиг зарафатлар вә сәрхошлуг дахилдир (Ефеслиләрә 4:25, 28, 31; 5:3, 4, 11, 12, 18). Биз, бу кими ишләрлә мәшғул олмаг әвәзинә, “ишыг өвладлары кими” давранырыг. Һәвари Павел дејир ки, “ишығын бәһрәси һәр ҹүр јахшылыг, салеһлик вә һәгигәтдир” (Ефеслиләрә 5:8, 9, И-93). Беләликлә, ишыгда јеријәрәк јахшылыг тәзаһүр етдирә биләрик. Бәс бу һансы ишыгдыр?
7. Јахшылыг бәһрәсини тәзаһүр етдирмәји давам етмәк үчүн, биз нә етмәлијик?
7 Гејри-камиллијимизә бахмајараг, руһани ишыгда јеријириксә јахшылыг тәзаһүр етдирә биләрик. Мәзмурчу охујурду: “Сөзүн аддымларым үчүн чыраг вә јолум үчүн ишыгдыр” (Мәзмур 119:105). Әҝәр биз “ишығын бәһрәләрини” “һәр ҹүр јахшылыг”ла тәзаһүр етдирмәк истәјириксә, Аллаһын Кәламында олан, мәсиһчи нәшрләриндә ачыгланан вә јығынҹагларда мүнтәзәм олараг мүзакирә едилән руһани ишыгдан даима истифадә етмәлијик (Лука 12:42; Ромалылара 15:4; Ибраниләрә 10:24, 25). Биз, һәмчинин “дүнјанын Нуру” вә “[Јеһованын] иззәтинин нуру” олан Иса Мәсиһин нүмунә вә тә’лимләринә дә хүсуси диггәт јетирмәлијик (Јәһја 8:12; Ибраниләрә 1:1-3).
Руһун бәһрәси
8. Нәјин сајәсиндә јахшылыг тәзаһүр етдирә биләрик?
8 Јахшылыг тәзаһүр етдирмәкдә, сөзсүз ки, бизә руһани ишыг көмәк едир. Бундан әлавә, бизә Аллаһын мүгәддәс руһу, јә’ни фәал гүввәси јол ҝөстәрдији үчүн, бу кејфијјәти тәзаһүр етдирә билирик. Јахшылыг, “руһун сәмәрәсинин” бир һиссәсидир (Галатијалылара 5:22, 23). Әҝәр Јеһованын мүгәддәс руһунун рәһбәрлијинә табе олуругса, онда бу руһ биздә јахшылыг кими чох ҝөзәл бәһрә јетишдирәҹәк.
9. Исанын, Лука 11:9-13 ајәләриндә јазылан сөзләринә әсасән неҹә даврана биләрик?
9 Руһун бәһрәси олан јахшылығы тәзаһүр етдирәрәк Јеһованы гане етмәк истәјимиз, бизи Исанын сөзләринә әсасән давранмаға тәшвиг едәҹәк: “Диләјин, сизә вериләҹәк; ахтарын, тапаҹагсыныз; гапыны дөјүн, сизә ачылаҹаг. Чүнки һәр диләјән алыр, ахтаран тапыр вә гапы дөјәнә ачылыр. Аранызда елә бир ата вармы ки, оғлу чөрәк истәрсә, она даш версин? Јахуд, балыг истәрсә, она балыг әвәзинә илан версин? Јахуд, јумурта истәрсә, она әгрәб версин? Беләликлә, мадам ки, сиз пис олдуғунуз һалда өз өвладларыныза јахшы һәдијјәләр верә билирсиниз, Сәмави Атанызын Ондан диләјәнләрә Мүгәддәс Руһу верәҹәји нә гәдәр јәгиндир!” (Лука 11:9-13). Ҝәлин, руһун бәһрәси олан јахшылығы тәзаһүр етдирмәји давам етдирмәк үчүн, Исанын нүмунәсини тәглид едәрәк, Јеһовадан мүгәддәс руһ диләјәк.
Һәмишә “јахшы иш” ҝөрүн
10. Чыхыш 34:6, 7 ајәләриндә Јеһованын јахшылығынын һансы тәрәфләринә диггәт јетирилир?
10 Аллаһын Кәламындан ҝәлән руһани ишығын вә Онун мүгәддәс руһунун көмәји сајәсиндә, биз һәмишә “јахшы иш”ләр ҝөрә билирик (Ромалылара 13:3). Мүгәддәс Китабы мүнтәзәм олараг өјрәнмәклә, јахшылыг етмәкдә Јеһованы неҹә тәглид етмәји ҝетдикҹә даһа чох өјрәнә биләрик. Әввәлки мәгаләдә, Мусанын Чыхыш 34:6, 7 ајәләриндә гејд етдији, Јеһованын јахшылығынын мүхтәлиф тәрәфләри нәзәрдән кечирилирди. Һәмин ајәләрдә охујуруг: “Јеһова, Јеһова, чох аҹыјан вә лүтф едән, ҝеҹ гәзәбләнән вә инајәти вә һәгигәти чох олан, минләрә инајәтини сахлајан, һагсызлығы вә ҝүнаһы вә сучу бағышлајан вә сучлуну әсла сучсуз чыхармајан” Аллаһдыр. Јеһованын јахшылығынын бу тәрәфләрини әтрафлы нәзәрдән кечирмәклә, һәмишә “јахшы иш” ҝөрмәк үчүн көмәк әлдә едәҹәјик.
11. Јеһованын мәрһәмәтли вә лүтфкар олдуғуну билмәјимиз бизә неҹә тә’сир етмәлидир?
11 Аллаһын бу сөзләри ҝөстәрир ки, мәрһәмәт вә лүтфкарлыгда биз Јеһованы тәглид етмәлијик. Иса демишдир: “Мәрһәмәтли оланлар нә бәхтијардырлар! Чүнки онлара мәрһәмәт едиләҹәкдир” (Матта 5:7; Лука 6:36). Јеһованын лүтфкар олдуғуну биләрәк, биз дә башгалары илә, о ҹүмләдән тәблиғ етдијимиз адамларла мүнасибәтләримиздә лүтфкар вә меһрибан олмаға тәшвиг олунуруг. Бу, Павелин ашағыдакы сөзләринә ујғун ҝәлир: “Гој сөзүнүз һәмишә нәвазишли олсун вә она дуз гатылмыш кими олсун ки, сиз һәр адама неҹә ҹаваб вермәк лазым олдуғуну биләсиниз” (Колослулара 4:6).
12. а) Аллаһын ҝеҹ гәзәбләнән олдуғуну нәзәрә алараг, башгалары илә неҹә рәфтар етмәлијик? б) Јеһованын инајәти бизи нәјә тәшвиг едир?
12 Аллаһ ҝеҹ гәзәбләнән олдуғу үчүн, һәмишә “јахшы иш” ҝөрмәк истәји бизи, һәмиманлыларын әһәмијјәтсиз нөгсанларына сәбирлә јанашмаға вә онларын јахшы кејфијјәтләринә диггәт јетирмәјә тәшвиг едир (Матта 7:5; Јагуб 1:19). Јеһованын инајәти исә, һәтта ән чәтин анларда белә бизи дәјишмәз мәһәббәт тәзаһүр етдирмәјә тәшвиг едир. Бу, әлбәттә, олдугҹа арзу олунандыр (Сүлејманын мәсәлләри 19:22).
13. Јеһованын һәгигәтинин чох олдуғуну әкс етдирмәк үчүн, биз неҹә һәрәкәт етмәлијик?
13 Сәмави Атамызын һәгигәти чох олдуғу үчүн, биз өзүмүзү “һәгигәт сөзүндә” “Аллаһын хидмәтчиләри кими тәгдим” етмәјә чалышырыг (2 Коринфлиләрә 6:3-7, И-93). “Јаланчы дил” вә “јаланла нәфәс алан јаланчы шаһид”, Јеһованын ҝөзүндә мәкруһ сајылан једди шејин сырасында дурур (Сүлејманын мәсәлләри 6:16-19). Буна ҝөрә дә биз, Аллаһы гане етмәјә чалышараг, “јаланы кәнара” атыр вә “һәгигәти” сөјләјирик (Ефеслиләрә 4:25). Бу мә’нада һәмишә јахшы олмаг чох ваҹибдир.
14. Биз нә үчүн бағышламалыјыг?
14 Јеһованын Мусаја мүраҹиәти, бизи дә бағышлајан олмаға тәшвиг етмәлидир, ахы Јеһова бағышламаға һазырдыр (Матта 6:14, 15). Јеһова, әлбәт ки, төвбә етмәјән ҝүнаһкарлары ҹәзаландырыр. Буна ҝөрә дә, сөһбәт јығынҹағын тәмизлијиндән ҝедәндә, биз һамымыз Јеһова тәрәфиндән мүәјјән едилмиш јахшылыг нормаларына риајәт етмәлијик (Левилиләр 5:1; 1 Коринфлиләрә 5:11, 12; 1 Тимотејә 5:22).
“Чох диггәт верин”
15, 16. Павелин Ефеслиләрә 5:15-19 ајәләриндә јаздығы нәсиһәти, јахшылыг кејфијјәтини ҝөстәрмәјә давам етмәкдә бизә неҹә көмәк едәр?
15 Бизи әһатә едән пислијә бахмајараг, јахшылыг јолу илә јеримәк үчүн, мүгәддәс руһла “долу” олмалы вә давранышларымыза диггәт јетирмәлијик. Павел Ефесдәки мәсиһчиләри тәшвиг едирди: “Беләликлә, нә ҹүр һәрәкәт етдијинизә чох диггәт верин, һикмәтсиз кими јох, һикмәтли кими јашајын. Һәр фүрсәтдән истифадә един, чүнки јашадығымыз ҝүнләр шәрдир. Буна ҝөрә ағылсыз олмајын, лакин Рәббин ирадәси нәдирсә, ону гаврајын. Вә шәрабла сәрхош олмајын, сәфаһәтә сәбәб одур; лакин Руһла долу олун. Бир-биринизә мәзмурлар, руһани нәғмәләр вә маһнылар охујун, үрәјиниздә Рәббә нәғмә вә мәзмур охујун” (Ефеслиләрә 5:15-19). Бу нәсиһәт, сөзсүз ки, бу ахыр ҝүнләрдә бизим үчүн дә актуалдыр (2 Тимотејә 3:1).
16 Әҝәр һәмишә јахшы олмаг истәјириксә, диггәт јетирмәлијик ки, јухарыдан назил олан һикмәтин сөјләдији кими давранаг (Јагуб 3:17). Ҹидди сәһвләрә јол вермәмәлијик, мүгәддәс руһла долмалы вә онун бизи идарә етмәсинә јол вермәлијик (Галатијалылара 5:19-25). Мәсиһчи јығынҹагларында вә конгресләрдә ешитдијимиз руһани нәсиһәтләрә риајәт едәрәк, даһа сонра да јахшы ишләр ҝөрмәјә давам едә биләрик. Павелин ефеслиләрә үнванланмыш сөзләри бизә хатырладыр ки, ибадәт үчүн мүәјјән едилмиш ҝөрүшләрин чохунда, диггәти јахшылыг кејфијјәтинә јөнәлдән “руһани нәғмәләри” үрәкдән охумаг кими гијмәтли имканымыз вар.
17. Ҹидди хәстәлији олан вә ҝөрүшләрә мүнтәзәм ҝәлә билмәјән мәсиһчиләр нәјә шүбһә етмәјә биләрләр?
17 Бәс ҹидди хроники хәстәликләр уҹбатындан мәсиһчи ҝөрүшләринә мүнтәзәм олараг ҝәлә билмәјән һәмиманлыларымыз нә етмәлидирләр? Руһани баҹы-гардашларын әһатәсиндә олараг Јеһоваја һәмишә ибадәт етмәк имканында олмадыглары үчүн, онлар өзләрини үзҝүн һисс едә биләрләр. Лакин гој онлар һеч заман шүбһә етмәсинләр ки, Јеһова онларын вәзијјәтини баша дүшүр вә онлара бундан сонра да өз ишығыны, мүгәддәс руһуну верәҹәк вә һәмишә јахшы иш ҝөрмәкдә көмәк едәҹәк (Ишаја 57:15).
18. Јахшылыг јолу илә јеримәкдә бизә нә көмәк едәр?
18 Јахшылыг јолу илә ҝедә билмәмиз үчүн, кимләрлә үнсијјәтдә олдуғумуза да диггәт јетирмәли вә “јахшылығын дүшмәни” оланлардан кәнар ҝәзмәлијик (2 Тимотејә 3:2-5; 1 Коринфлиләрә 15:33). Бу нәсиһәтә риајәт етмәклә, “Аллаһын Мүгәддәс Руһуну”, Онун рәһбәрлијинә зидд ҝедән һәрәкәтләрлә кәдәрләндирмәјәҹәјик (Ефеслиләрә 4:30). Бундан әлавә, Јеһованын мүгәддәс руһу илә һәрәкәт едән вә јахшылыг кејфијјәтини севдикләрини һәјат тәрзләри илә ҝөстәрән кәсләрлә јахын мүнасибәтдә оларыгса, јахшылыг етмәк бизә дә асан олаҹаг (Амос 5:15; Ромалылара 8:14; Галатијалылара 5:18).
Јахшылыг ҝөзәл бәһрәләр ҝәтирир
19-21. Јахшылығын неҹә тә’сир етдијини ҝөстәрән һадисәләр данышын.
19 Әҝәр руһани ишыгда ҝәзир, Аллаһын руһунун рәһбәрлијинә табе олур вә давранышымыза диггәт јетиририксә, пис һәрәкәтдән гачынмаг вә һәмишә “јахшы иш” ҝөрмәк бизә асан олаҹаг. Бу исә, өз нөвбәсиндә ҝөзәл бәһрәләр ҝәтирәҹәкдир. Ҹәнуби Африка Республикасындан олан Јеһованын Шаһиди Зонҝезиленин нүмунәсинә бахаг. Бир ҝүн сәһәр мәктәбә ҝедәркән, банкда һесабында олан пулун мигдарыны јохламаг гәрарына ҝәлди. Банкдан алдығы чекдә исә, сәһвән 42 мин ранд (6 000 АБШ доллары), артыг мәбләғ ҝөстәрилирди. Һәм банкын ҝөзәтчиси, һәм дә башгалары мәсләһәт ҝөрдүләр ки, һәмин мәбләғи һесабындан чыхарыб башга банка гојсун. Һәмин пула тохунмадығы үчүн, ону јалныз јашадығы евин саһибләри - Шаһид әр-арвад тә’рифләдиләр.
20 Банк ачылан кими, Зонҝезиле баш верән јанлышлыг һаггында хәбәр верди. Мә’лум олду ки, онун һесаб нөмрәси варлы бир бизнесменин нөмрәси илә охшар олдуғу үчүн, бизнесмен сәһвә јол вермишдир. Һәмин мәбләғә тохунмадығыны билән бизнесмен, Зонҝезиледән сорушду: “Сән һансы динә мәнсубсан?” Зонҝезиле Јеһованын Шаһиди олдуғуну билдирди. Банкын мүдиријјәти ону тә’рифләјиб деди: “Арзу едәрдик ки, бүтүн инсанлар Јеһованын Шаһидләри кими виҹданлы олсунлар”. Бәли, виҹдан вә јахшылыг һаггында шәһадәт едән ишләр, башгаларыны Јеһованы иззәтләндирмәјә тәшвиг едә биләр (Ибраниләрә 13:18).
21 Јахшылыг әкс етдирән ишләр ҝөзәл бәһрәләр ҝәтирсин дејә, мүтләг бөјүк ишләр ҝөрмәк лазым дејил. Ајдынлыг ҝәтирмәк үчүн бир нүмунәјә диггәт јетирәк. Самоа адаларында таммүддәтли хидмәтдә чалышан ҝәнҹ бир Шаһид хәстәханаја ҝетмәли олду. Һәкимин гәбулуна нөвбә вар иди. Шаһид фикир верди ки, онун архасынҹа дуран јашлы гадын өзүнү пис һисс едир. Гадына тә’ҹили тибби јардым ҝөстәрилсин дејә, Шаһид өз нөвбәсини она верди. Бир гәдәр вахтдан сонра Шаһид һәмин гадынла базарда гаршылашды. Гадын Шаһиди вә онун етдији јахшы һәрәкәти хатырлајыб деди: “Инди мән билирәм ки, Јеһованын Шаһидләри өз јахынларыны һәгигәтән дә севирләр”. Бу гадын әввәлләр Падшаһлыг һаггындакы хәбәри динләмәк истәмәсә дә, Шаһидин етдији јахшылыг она мүсбәт тә’сир ҝөстәрди. Гадын Мүгәддәс Китабы өјрәнмәјә разы олду вә Аллаһын Кәламындан билик әлдә етмәјә башлады.
22. Һәмишә “јахшы иш” ҝөрмәјин һансы үсулу хүсусилә ваҹибдир?
22 Еһтимал ки, јахшылығын әһәмијјәтини ҝөстәрән һадисәләри сиз дә билирсиниз. Һәмишә “јахшы иш” ҝөрмәк үчүн, Аллаһын Падшаһлығы һаггындакы хош хәбәрин тәблиғиндә иштирак етмәк хүсусилә ваҹибдир (Матта 24:14). Хүсусән дә тәблиғә һај верәнләрә јахшылыг етдијимизи анлајараг, бу шәрәфли ишлә мәшғул олмағы бундан сонра да сә’јлә давам етдирәк. Ән әсасы одур ки, јахшылығын мәнбәји олан Јеһованы хидмәтимизлә вә јахшы давранышымызла иззәтләндиририк (Матта 19:16, 17).
“Јахшы иш” ҝөрмәјә давам един
23. Мәсиһчи хидмәтини нәјә ҝөрә јахшы иш адландырмаг олар?
23 Шүбһәсиз, бизим хидмәтимиз јахшы ишдир. Бу ишдә иштирак едәрәк, биз һәм өзүмүзү, һәм дә Мүгәддәс Китабын хәбәринә гулаг асараг әбәди һәјат јолуна гәдәм гојан инсанлары хилас едә биләрик (Матта 7:13, 14; 1 Тимотејә 4:16). Гәрар гәбул етмәк лазым ҝәлдикдә, јахшылыг етмәк истәји өзүмүзә ашағыдакы суаллары вермәјә тәшвиг едир: Бу гәрар, Падшаһлыг һаггындакы тәблиғ фәалијјәтимә неҹә тә’сир едәҹәк? Мәним гәрара алдығым иш һәгигәтән дә фајдалыдырмы? Ҝөрмәк истәдијим бу иш, “әбәди... Мүждәни” гәбул етмәкдә вә Јеһова Аллаһла сых мүнасибәт јаратмагда инсанлара көмәк етмәк тапшырығымы јүнҝүлләшдирәҹәкми? (Вәһј 14:6). Падшаһлығын хејринә гәрар гәбул етмәклә, әсл хошбәхтлик әлдә едәҹәјик (Матта 6:33; Һәвариләрин ишләри 20:35).
24, 25. Јығынҹагда јахшылығы неҹә тәзаһүр етдирә биләрик вә әҝәр һәмишә јахшылыг тәзаһүр етдирәриксә нәдә әмин ола биләрик?
24 Ҝәлин, јахшылығын ҝөзәл сәмәрәләрини һеч заман унутмајаг. Мәсиһчи јығынҹагларында даима иштирак етмәклә вә онун мараглары вә фајдасы үчүн әлимиздән ҝәләни етмәклә, бу кејфијјәти тәзаһүр етдирә биләрик. Мәсиһчи јығынҹагларына даим ҝәлмәклә вә онларда иштирак етмәклә биз, шүбһәсиз ки, јахшылыг едирик. Јалныз бу ҝөрүшләрә ҝәлишимиз һәмиманлыларымызы руһландырыр, јахшы һазырладығымыз шәрһләр исә онлары руһән мөһкәмләндирир. Өз мадди имканларымызы Падшаһлыг Залларынын еһтијаҹларына истифадә едәркән вә онлары сәлигәли сахламаға көмәк едәркән дә јахшылыг едирик (2 Краллар 22:3-7; 2 Коринфлиләрә 9:6, 7). Бәли, “нә гәдәр фүрсәтимиз варса, һамыја, хүсусән иманлылар аиләсинә јахшылыг” едәҹәјик (Галатијалылара 6:10).
25 Јахшылыг тәзаһүр етдирмәк лазым ҝәлән бүтүн вәзијјәтләри садаламаг мүмкүн дејил. Јени чәтинликләрлә гаршылашаркән, Мүгәддәс Јазылара јолумузу ишыгландырмаға имкан верәҹәјик, бизә мүгәддәс руһ вермәси үчүн Јеһоваја дуа едәҹәјик вә Онун “јахшы... вә камил ирадәсини” јеринә јетирмәк үчүн әлимиздән ҝәләни әсирҝәмәјәҹәјик (Ромалылара 2:9, 10; 12:2). Шүбһә етмәмәк олар ки, әҝәр һәмишә јахшылыг тәзаһүр етдирәриксә, Јеһова бизә бол-бол хејир-дуалар верәҹәк.
Сиз неҹә ҹаваб верәрдиниз?
• Едә биләҹәјимиз ән бөјүк јахшылыг нәдән ибарәтдир?
• Нәјә ҝөрә јахшылыг “ишығын бәһрәси” адланыр?
• Нәјә ҝөрә јахшылыг “руһун сәмәрәсиндән” бири адланыр?
• Јахшы давранышымыз һансы бәһрәләри ҝәтирир?
[25-ҹи сәһифәдәки шәкил]
Аллаһын Кәламы вә мүгәддәс руһу, јахшылыг тәзаһүр етдирмәкдә бизә көмәк едир.
[26-ҹы сәһифәдәки шәкилләр]
Јахшылыг тәзаһүр етдирмәк ҝөзәл бәһрәләр ҝәтирир.