Ата вә аналар, дәјәрли мирасынызы горујун
‘Һикмәт сипәрдир, она саһиб олана һәјат верәр’ (ВАИЗ 7:12).
1. Нәјә ҝөрә валидејнләр өз ушагларына һәдијјә кими јанашмалыдырлар?
ВАЛИДЕЈНЛӘР хариҹи ҝөрүнүшүнә вә хасијјәтинә ҝөрә өзләринә бәнзәјән јени бир инсан дүнјаја ҝәтирирләр. Мүгәддәс Китаб ушаглары Јеһовадан олан мирас адландырыр (Мәзмур 127:3). Јеһова Һәјатверән олдуғу үчүн, демәк олар ки, әслиндә Өзүнә мәхсус оланы валидејнләрә е’тибар етмишдир (Мәзмур 36:9). Аталар вә аналар, Аллаһдан алдығыныз бу дәјәрли һәдијјәјә неҹә мүнасибәт ҝөстәрирсиниз?
2. Маноаһ тезликлә ата олаҹағыны ешидәндә неҹә давранды?
2 Сөзсүз ки, бу ҹүр һәдијјәни һәлимликлә вә миннәтдарлыгла гәбул етмәк лазымдыр. Үч мин ил әввәл исраилли Маноаһ да бу ҹүр давранды. Бир мәләк онун арвадына ушаг доғаҹағыны хәбәр верди. Бу севиндириҹи хәбәри ешидәндә, Маноаһ дуа етди: «Ја Худавәнд, јалварырам, ҝөндәрдијин Аллаһ адамы гој јанымыза јенә ҝәлсин вә доғулаҹаг ушаг барәдә нә едәҹәјимизи бизә өјрәтсин» (Һакимләр 13:8). Аталар вә аналар, Маноаһын нүмунәсиндән нә өјрәнә биләрсиниз?
Аллаһын рәһбәрлијинә бу ҝүн нәјә ҝөрә еһтијаҹ вар?
3. Ушагларын тәрбијәсиндә Јеһованын рәһбәрлијинә нәјә ҝөрә хүсусилә бу ҝүн еһтијаҹ вар?
3 Бу ҝүн ушагларыны тәрбијә етмәк үчүн валидејнләр Јеһованын рәһбәрлијинә хүсусилә еһтијаҹ дујурлар. Нәјә ҝөрә? Шејтан Иблис вә онун мәләкләри ҝөјдән јерә атылмышлар. Мүгәддәс Китаб хәбәрдарлыг едир: «Јерә... вај олсун! Чүнки иблис, вахтынын аз олдуғуну биләрәк, бөјүк гәзәблә јаныныза енди» (Вәһј 12:7-9, 12). Мүгәддәс Китабда изаһ едилир ки, Шејтан «нә’рә чәкән вә ашырмаг үчүн кимисә ахтаран аслан кими ҝәзир» (1 Петер 5:8). Адәтән асланын гурбаны көмәксизләр — зәифләр вә ја ҝәнҹләр олур. Буна ҝөрә дә, мәсиһчи валидејнләр ушагларыны мүдафиә етмәк үчүн Јеһованын рәһбәрлијини ахтарырларса, һикмәтли давранырлар. Бунун үчүн сиз нә гәдәр сә’ј ҝөстәрирсиниз?
4. а) Јахынлыгда асланын ҝәздијини билән валидејнләр дәрһал нә едәҹәкләр? б) Ушаглары горумаг үчүн нә лазымдыр?
4 Әҝәр билсәјдиниз ки, евинизин јахынлығында аслан ҝәзир, дәрһал ушагларынызы неҹә мүдафиә едәҹәјиниз барәдә дүшүнмәздинизми? Шејтан бу јыртыҹыја бәнзәјир. О, Аллаһын хидмәтчиләрини јолдан чыхармаға, бунунла да Онун илтифатындан мәһрум етмәјә чалышыр (Әјјуб 2:1-7; 1 Јәһја 5:19). Ушаглар асан бир һәдәфдир. Иблисин тәләләринә дүшмәмәк үчүн ушаглар Јеһова илә таныш олмалы вә Она гулаг асмалыдырлар. Мүгәддәс Китаб биликләри олдугҹа ваҹибдир. Иса демишдир: «Әбәди һәјат о демәкдир ки, Сәни, ваһид һәгиги Аллаһы вә ҝөндәрдијин Иса Мәсиһи танысынлар» (Јәһја 17:3). Бундан әлавә, ҝәнҹләрин мүдриклијә, јә’ни өјрәндикләрини баша дүшмәк вә тәтбиг етмәк баҹарығына да еһтијаҹлары вар. ‘Һикмәт она саһиб олана һәјат вердији’ үчүн, сиз валидејнләр һәгигәти ушагларынызын үрәјиндә јетишдирмәлисиниз (Ваиз 7:12). Буну неҹә едә биләрсиниз?
5. а) Мүдрик олмағы неҹә өјрәтмәк олар? б) «Сүлејманын мәсәлләри» китабында һикмәтли олмағын дәјәри һаггында нә дејилир?
5 Ушаглара Аллаһын Кәламыны охумаг олар, буну етмәк һәтта ваҹибдир дә. Лакин бу кифајәт дејил. Онлар охудугларыны баша дүшмәлидирләр, чүнки јалныз белә оланда онлар Јеһованы севә вә Она итаәткар ола биләрләр. Бир нүмунәни нәзәрдән кечирәк. Ушаға дејилир ки, күчәни кечмәздән әввәл сола, сонра исә саға бахмаг лазымдыр. Буна бахмајараг, бә’зи ушаглар белә етмирләр. Нәјә ҝөрә? Јәгин ки, машын алтына дүшә биләҹәји ушаға јахшы баша салынмајыб. Буна ҝөрә дә, јолу гачараг кечмәјин онун үчүн тәһлүкәли олдуғуну дәрк етмир. Бу «сәфеһлик» фәлакәтә ҝәтириб чыхара биләр. Мүдрик олмағы өјрәтмәк үчүн вахт вә ҝениш сәбир тәләб олунур. Лакин һикмәт буна дәјәр! Мүгәддәс Китабда онун һаггында дејилир: «Онун јоллары бәјәнилир, бүтүн јоллары әмин-амандыр. Она бағлананлар үчүн о, һәјат ағаҹыдыр, ондан мөһкәм јапышанлар нә бәхтијардыр!» (Сүлејманын мәсәлләри 3:13-18; 22:15).
Һикмәт газандыран тә’лим
6. а) Нәјә ҝөрә ушаглар чох вахт мүдрик давранмырлар? б) Һазырда һансы мүбаризә ҝедир?
6 Чох вахт ушагларын сәһв һәрәкәтләринә сәбәб, валидејнләрин онлара дүзҝүн давранмағы өјрәтмәмәси јох, тә’лимин үрәкләринә чатмамасыдыр. Иблис ҝәнҹләрин үрәкләринә һаким олмаг үчүн мүбаризә апарыр. О, ушагларын бу дүнјанын пис тә’сиринә нә дәрәҹәдә мејлли олдугларыны ҝөрмәјә, һәм дә мирас алдыглары пислик етмәк мејлини өз мәгсәдләриндә истифадә етмәјә чалышыр (Јарадылыш 8:21; Мәзмур 51:5). Валидејнләр баша дүшмәлидирләр ки, онларын ушагларынын үрәкләрини әлә кечирмәк уғрунда әсл мүһарибә ҝедир.
7. Ушаға нәјин јахшы, нәјин пис олдуғуну демәк нәјә ҝөрә кифајәт дејил?
7 Валидејнләр ушаға нәјин јахшы, нәјин пис олдуғуну дејәндә, чох вахт она мүәјјән әхлаг принсипини өјрәтдикләрини дүшүнүрләр. Онлар ушаға јалан данышмағын, оғурламағын вә никаһдан кәнар ҹинси әлагәдә олмағын сәһв һәрәкәт олдуғуну дејә биләрләр. Лакин садәҹә бунлары сөјләмәк кифајәт дејил. Ушағын сөзә бахмасы үчүн даһа ҝүҹлү сәбәб тәләб олунур. Баша салмаг лазымдыр ки, бунлар Јеһованын ганунларыдыр. Ушаг, Аллаһын әмрләринә табе олмағын мүдрик давраныш олдуғуну билмәлидир (Сүлејманын мәсәлләри 6:16-19; Ибраниләрә 13:4).
8. Һансы тә’лим ушаға мүдрик давранмагда көмәк едә биләр?
8 Каинатын мүрәккәб гурулушу, ҹанлы тәбиәтин мүхтәлифлији, фәсилләрин бир-бирини әвәз етмәси — бунларын һамысы ушаға мүдрик Јараданын мөвҹуд олдуғуну баша дүшмәјә көмәк едә биләр (Ромалылара 1:20; Ибраниләрә 3:4). Бундан әлавә, ушаға Аллаһын ону севдијини, әбәди јашаја билмәси үчүн Оғлуну онун уғрунда гурбан вердијини вә итаәткарлығы илә Аллаһы севиндирә биләҹәјини демәк лазымдыр. Беләликлә, Иблисин мане олмаг ҹәһдләринә бахмајараг, ушаг, еһтимал ки, Јеһоваја хидмәт етмәк истәјәҹәк (Сүлејманын мәсәлләри 22:6; 27:11; Јәһја 3:16).
9. а) Һәјати ваҹиб тә’лим үчүн нә тәләб олунур? б) Аталара нә етмәләри тапшырылыр вә бураја нә дахилдир?
9 Ушағы горујан вә ону дүзҝүн давранмаға тәшвиг едән тә’лим вахт, диггәт вә јахшы бир план гурмағы тәләб едир. Бу мәсәләдә валидејнләрин Аллаһын рәһбәрлијинә риајәт етмәләри ваҹибдир. Мүгәддәс Китабда дејилир: «Еј аталар... онлары [ушаглары] Рәббин тәрбијә вә нәсиһәти илә бөјүдүн» (Ефеслиләрә 6:4). Бу нә демәкдир? «Нәсиһәт» кими тәрҹүмә олунан јунан сөзү «ағыл гојмаг» мә’насыны дашыјыр. Буна ҝөрә дә, хүсусилә аталар ушагларынын зеһнинә Јеһованын ағлыны вә дүшүнҹә тәрзини гојмаға тәшвиг едилирләр. Бу, ҝәнҹләр үчүн ҝөзәл мүдафиәдир! Әҝәр ушаглара Аллаһын дүшүнҹә тәрзи ашыланарса, онлар пис әмәлләр төрәтмәк истәмәјәҹәкләр.
Мәһәббәтә әсасланан истәк
10. Ушағынызы јахшы тәрбијә етмәк үчүн нәји билмәлисиниз?
10 Ушағыныза јахшы тәрбијә вермәк истәјирсинизсә, һәрәкәтләриниз мәһәббәтә әсасланмалыдыр. Бурада јахшы үнсијјәт бөјүк рол ојнајыр. Ушағынызын һәјаты илә марагланын, онун дүшүнҹә тәрзини баша дүшмәјә чалышын. Онунла сакит шәраитдә сөһбәт едәрәк, үрәјини бошалтмасына көмәк един. Еһтимал ки, онун һансыса сөзләри сизин үчүн ҝөзләнилмәз олаҹаг. Гызғын реаксија ҝөстәрмәјин. Бунун әвәзинә, јахшы-јахшы динләмәјә чалышын.
11. Аллаһын дүшүнҹә тәрзини ушағынызын зеһнинә неҹә гоја биләрсиниз?
11 Јәгин ки, сиз, Аллаһын ҹинси әхлагсызлығы гадаған едән ганунларыны ушағынызла бирликдә Мүгәддәс Китабдан дәфәләрлә охумусунуз (1 Коринфлиләрә 6:18; Ефеслиләрә 5:5). Еһтимал ки, ушаг Аллаһа нәјин мәгбул олуб-олмадығыны мәнимсәмишдир. Лакин Аллаһын дүшүнҹә тәрзини ушағын зеһнинә гојмаг үчүн даһа чох шеј тәләб олунур. Јеһованын ганунларынын дәјәрини анламагда ушағын јардыма еһтијаҹы вар. О, бу ганунларын мүдрик вә фајдалы, онлара итаәт етмәјин исә мәһәббәтин сүбуту олдуғуна әмин олмалыдыр. Ушағынызла Мүгәддәс Јазыларын әсасында мүлаһизә јүрүдүн вә она Аллаһын нөгтеји-нәзәрини гәбул етмәјә көмәк един. Аллаһын дүшүнҹә тәрзини ушағын зеһнинә јалныз белә гојмаг олар.
12. Валидејнләр ушағынын ҹинси әлагәләрә даир дүзҝүн нөгтеји-нәзәрә малик олмасына неҹә көмәк едә биләрләр?
12 Ҹинси әлагәләр һаггында данышаркән ушагдан сорушмаг олар: «Јеһованын никаһа гәдәр ҹинси әлагәни гадаған едән гануну һаггында нә дүшүнүрсән? Бу, хошбәхтликдән мәһрум едирми?» Ону нөгтеји-нәзәрини изаһ етмәјә тәшвиг един. Сонра гајғыкеш Јараданын сајәсиндә ушағын дүнјаја мө’ҹүзәли ҝәлишини мүзакирә едәрәк сорушмаг олар: «Сәнҹә, севән Аллаһымыз бизи севинҹдән мәһрум едән ганунлар верәрми? Јохса бу ганунлар бизим хошбәхт олмағымыз вә горунмағымыз үчүндүр?» (Мәзмур 119:1, 2; Јешаја 48:17). Ушағын бу барәдә нә дүшүндүјүнү ајдынлашдырмаға чалышын. Бундан сонра онун диггәтини ҹинси әхлагсызлығын нә гәдәр кәдәр вә изтираб ҝәтирдијини ҝөстәрән һәјати нүмунәләрә јөнәлтмәк олар (2 Шамуел 13:1-33). Аллаһын дүшүнҹә тәрзини ушағынызын зеһнинә гојмаг үчүн Онун нөгтеји-нәзәрини баша дүшмәјә вә гәбул етмәјә көмәк едәрәк, онунла мүлаһизә јүрүтмәк олдугҹа ваҹибдир. Лакин һәр шеј бунунла битмир.
13. Јеһова һаггында нәји баша дүшмәси ушағы Ону динләмәјә хүсусилә тәшвиг едәҹәк?
13 Ушаға садәҹә Јеһоваја итаәтсизлијин нәтиҹәләри һаггында данышмагла кифајәтләнмәјиб, Онун һәјат тәрзимизә е’тинасыз јанашмадығыны изаһ етмәк дә мүдрикликдир. Мүгәддәс Китабын көмәји илә ҝөстәрин ки, Јеһованын ирадәсинә мүвафиг јашамадыгда, Ону кәдәрләндиририк (Мәзмур 78:41). Ондан Јеһованы нә үчүн кәдәрләндирмәк истәмәдијини сорушун вә изаһ един ки, Аллаһын дүшмәни олан Шејтан Аллаһа мәһәббәтдән дејил, худбин мәгсәдләрлә хидмәт етдијимизи иддиа едир. Сонра Әјјубун нөгсансызлығыны горујараг Јеһованы неҹә севиндирдијини вә бунунла Шејтанын јалан иттиһамына ҹаваб вердијини изаһ един (Әјјуб 1:9-11; 27:5). Ушаг баша дүшмәлидир ки, өз һәрәкәтләри илә Јеһованы ја севиндирә, ја да кәдәрләндирә биләр (Сүлејманын мәсәлләри 27:11). Буну вә бир чох башга ибрәт дәрсләрини ушаға «Бөјүк Мүәллимдән өјрән»a китабынын (рус.) васитәсилә изаһ етмәк олар.
Арзу олунан бәһрәләр
14, 15. а) «Бөјүк Мүәллим» китабынын һансы фәсилләри ушаглары дүзҝүн давранмаға тәшвиг едир? б) Бу китабдан истифадә едәрәк һансы мүсбәт нәтиҹәләри әлдә етмисиниз? (26-27-ҹи сәһифәләрдәки чәрчивәјә бахын.)
14 Хорватијада једди јашлы нәвәси илә «Бөјүк Мүәллим» китабыны охујан бир баба јазыр ки, нәвәси она белә демишдир: «Анам нәјисә етмәјими хаһиш етди, мән исә етмәк истәмирдим. Сонра китабдакы “Итаәткарлығын сәни горујур” адлы фәсил јадыма дүшдү. Онда мән анама јахынлашыб дедим ки, онун сөзүнә гулаг асаҹағам». Флоридадан олан бир әр-арвад «Нәјә ҝөрә јалан данышмамалыјыг?» фәслинә даир бунлары демишләр: «Бу фәсилдәки суаллар ушағы үрәјини ачмаға вә башга вахт бојнуна алмајаҹағы шеји е’тираф етмәјә тәшвиг едир».
15 «Бөјүк Мүәллим» китабында 230-дан артыг шәкил вар. Онларын һәр бири үчүн шәкилалты имза вә ја изаһат верилир. Бу нәшрә ҝөрә миннәтдар олан бир ана јазмышдыр: «Чох вахт сәһифәни чевирмәк вахты чатанда белә, оғлум ҝөзүнү шәкилләрдән чәкә билмир. Шәкилләр гәшәнҝ олмагла јанашы, һәм дә ушаглара нә исә өјрәдир, узаг башы, суаллар вермәјә тәшвиг едир. Гаранлыг отагда телевизора бахан ушағын тәсвир едилдији шәклә бахараг оғлум сорушду: “Анаҹан, о нә едир?” — вә сәсинин тонундан ајдын иди ки, бурада нәјин исә сәһв олдуғуну баша дүшүр». Шәклин үзәриндә «Етдијимиз һәр шеји ким ҝөрүр?» сөзләри јазылыб.
Ваҹиб тә’лим
16. Ушаглара һансы ваҹиб тә’лими вермәк лазымдыр вә нәјә ҝөрә?
16 Ушаг ҹинсијјәт органларынын неҹә истифадә олунуб-олунмајаҹағыны билмәлидир. Лакин бу һагда данышмаг һәмишә асан олмур. Бир журналист гадын ҹинсијјәт органларынын адыны чәкмәјин ајыб һесаб олундуғу бир зәманәдә јашадығыны сөјләјир. Өз ушагларынын тәрбијәсинә даир исә деди ки, «утанҹаглыг һиссинин өһдәсиндән ҝәлмәли олаҹағам». Валидејнләр утандыглары үчүн ушаглары илә ҹинси әлагәләр һаггында данышмагдан гачынырларса, әслиндә бу, ушағы мүдафиә етмир. Ушаглары јолдан чыхаранлар онларын мә’луматсызлығындан истифадә едир. «Бөјүк Мүәллимдән өјрән» китабында бу мөвзу әдәбли вә һөрмәтҹил тәрздә мүзакирә олунур. Ушаглара ҹинси әлагәләр һаггында данышмаг онларын исмәтини позмаг демәк дејил. Әксинә, әҝәр суссаг, бу, онларын исмәтини итирмәләринә сәбәб ола биләр.
17. «Бөјүк Мүәллим» китабы ушагларына ҹинси тәрбијә вермәкдә валидејнләрә неҹә көмәк едир?
17 Пис мәләкләрин јерә енәрәк нәһәнҝләрин аталары олдуглары һагда бәһс едән 10-ҹу фәсилдә ушагдан сорушулур: «Сән ҹинси әлагәләр һагда нә билирсән?» Китабда бу суалын садә вә лајигли изаһы верилир. Сонра, 32-ҹи фәсилдә, ушагларын онларын әхлагыны поза биләҹәк инсанлардан неҹә горуна биләҹәкләри изаһ едилир. Чохсајлы мәктублардан ҝөрүнүр ки, бу ҹүр тә’лим һәгигәтән дә ваҹибдир. Мәктублардан бириндә дејилир: «Кечән һәфтә оғлум Ҹаван ушаг һәкиминин гәбулунда олмушдур. Һәким онунла ҹинсијјәт органларынын дүзҝүн тә’јинаты барәдә данышыб-данышмадығымызы сорушду. Бу суалы јени китабымызын көмәји илә мүзакирә етдијимизи биләндә тәәҹҹүбләнди».
18. «Бөјүк Мүәллим» китабында дөвләт рәмзләринин гаршысында баш әјмәк барәдә нә дејилир?
18 Башга бир фәсилдә Бабил дөвләтинин рәмзи олан һејкәлә баш әјмәк истәмәјән Шадрак, Мешак, Авед-Него адлы үч ҝәнҹ ибранидән бәһс едилир (Даниел 3:1-30). «Бөјүк Мүәллим» китабында дејилир ки, буну һамы е’тираф етмәсә дә, һејкәлә баш әјмәклә бајраға тә’зим етмәк арасында бирбаша әлагә вар. Лакин јазычы Едвард Геффнинин бир журнала вердији мүсаһибәсиндәки сөзләр диггәтә лајигдир. Онун гызы мәктәбә ҝетдији илк ҝүндән сонра онлара јени дуа өјрәтдикләрини сөјләди. Атасы ондан бу дуаны сөјләмәји хаһиш едәндә, гыз әлини үрәјинин үстүнә гојуб гүрурла деди: «Бајраға садиг галмаға анд ичирәм...». Геффни дејир: «Онда баша дүшдүм ки, Јеһованын Шаһидләри һаглы имишләр. Мәктәбләримиздә ушаглара еркән јашларындан дөвләтә там вә һәдсиз сәдагәт ашыланыр — бунун өзү дә бир нөв диндир» («U.S. Catholic»).
Бүтүн сә’јләрә дәјәр
19. Ушагларын тәрбијәси нә дәрәҹәдә мүкафатландырыҹы ола биләр?
19 Шүбһәсиз ки, ушагларынызын тәрбијәси ҝөстәрдијиниз бүтүн сә’јләрә дәјәр. АБШ-нын Канзас штатында јашајан бир ана оғлунун јаздығы мәктубу охујанда ағлады. Оғлу јазмышдыр: «Мә’нәви сағламлығыма имкан јарадан мүһитдә тәрбијә едилдијим үчүн һәгигәтән дә хошбәхтәм. Сәнә вә атама чох миннәтдарам» (Сүлејманын мәсәлләри 31:28). «Бөјүк Мүәллимдән өјрән» китабы һәлә чох валидејнләрә өз ушагларына тәрбијә верәрәк, бу дәјәрли мирасы горумаға көмәк едәҹәк.
20. Валидејнләр һәмишә нәји јадда сахламалыдырлар вә бу онларын үзәринә һансы мәс’улијјәти гојур?
20 Ушагларымыз лајигдирләр ки, онлара баҹардыгҹа даһа чох вахт, гүввә вә диггәт ајыраг. Ушаглыг дөврү бир ҝөз гырпымында кечиб ҝедир. Ушагларынызла олмаг вә онлара јардым етмәк үчүн һәр бир имкандан истифадә един. Буна ҝөрә һеч вахт пешман олмајаҹагсыныз. Онлар исә сизә өз мәһәббәтләрини бәхш едәҹәкләр. Һәмишә јадда сахлајын ки, ушагларыныз Аллаһдан олан һәдијјәдир. Бу, дәјәрли мирасдыр! (Мәзмур 127:3-5). Вә сиз онлара ҝөрә Аллаһын гаршысында ҹавабдеһсиниз!
[Һашијә]
a Јеһованын Шаһидләри тәрәфиндән чап олунуб. «Аллаһы неҹә севиндирә биләрик?» адлы 40-ҹы фәслә бахын.
Неҹә ҹаваб верәрдиниз?
• Нәјә ҝөрә валидејнләр ушагларыны хүсусилә инди мүдафиә етмәлидирләр?
• Ушаға мүдрик олмағы неҹә өјрәтмәк олар?
• Ушагларла һансы ваҹиб мөвзулары мүзакирә етмәк лазымдыр?
• «Бөјүк Мүәллим» китабы ушагларын тәрбијәсиндә валидејнләрә неҹә көмәк едир?
[26 вә 27-ҹи сәһифәләрдәки чәрчивә/шәкилләр]
Һамы үчүн олан китаб
«Бөјүк Мүәллимдән өјрән» китабы Иса Мәсиһин тә’лимләрини ушагларла охујуб мүзакирә етмәк истәјән валидејнләрә вә диҝәр бөјүкләрә көмәк етмәк үчүн чап едилмишдир. Бу китабы охујан бөјүкләр дә, орадан өјрәндикләри үчүн дәрин миннәтдарлыгларыны билдирдиләр.
Техасдан (АБШ) олан бир киши деди: «“Бөјүк Мүәллимдән өјрән” китабы тә’сирли вә садә диллә јазылыб вә јашындан асылы олмајараг, һәр бир инсана тә’сир едир. Мән Јеһоваја ҝәнҹ јашларымдан хидмәт едирәм вә һазырда 76 јашым вар. Сизә дәрин тәшәккүрүмү билдирирәм!»
Лондондан (Инҝилтәрә) олан бир гадын јазыр: «Шүбһә јохдур ки, ҝөзәл шәкилләр һәм ушагларын, һәм дә валидејнләринин хошуна ҝәләҹәк. Китабын тәртибаты вә ичиндәки суаллар чох ҝөзәлдир. “Аллаһ Исаны неҹә горуду?” адлы 32-ҹи фәсилдә олдуғу кими, һәтта интим мәсәләләр дә нәзакәтлә мүзакирә едилир». Мәктуб бу сөзләрлә битир: «Бу китаб илк нөвбәдә Јеһованын Шаһидләринин ушаглары үчүн нәзәрдә тутулса да, дүшүнүрәм ки, мүәллимләр вә бир чох башгалары бу китабы әлдә етмәјә шад олаҹаглар. Ону мәмнунијјәтлә истифадә едәҹәјәм!»
Массачусетс штатындан (АБШ) бир гадын «јахшы дүшүнүлмүш шәкилләр» барәдә разылығыны билдирмиш вә һәмчинин гејд етмишдир: «Бу китаб ушаглар үчүн һазырланса да, орада мүзакирә олунан мөвзулар Јеһова илә мүнасибәтләримиз үзәриндә дүшүнмәк үчүн биз бөјүкләрә дә көмәк едә биләр».
Мен штатындан (АБШ) олан бир гадын нида едәрәк деди: «Неҹә дә ә’ла китабдыр! О јалныз балаҹа ушаглар үчүн нәзәрдә тутулмајыб, ахы бизим һамымыз Аллаһын өвладларыјыг! Бу китаб мәндә һеч вахт кечирмәдијим һиссләри ојатды, әввәлҹә һәјәҹанландырды, сонра исә елә сакитләшдирди ки, үрәјимдә раһатлыг дујдум. Өзүмү Јеһова Атама чох јахын һисс едирәм. О, илләр әрзиндә чәкдијим бүтүн аҹылары мәндән узаглашдырды вә Өз нијјәтинин нәдән ибарәт олдуғуну ајдын шәкилдә ҝөстәрди». Гадын һамыны бу китабы охумаға чағырыр.
Киотода (Јапонија) јашајан бир гадын јазыр ки, бу китабы нәвәләринә охујанда онлар белә суаллар верирдиләр: «“Бу оғлан нә илә мәшғулдур? Бу гызы нәјә ҝөрә данлајырлар? Бу ана нә едир? Бәс бу аслан бурада нә едир?” Бу китаб бизә һәгигәтән дә мараглы олан шејләри өјрәдир, буна ҝөрә дә ону китабханадакы башга китаблардан даһа чох севирәм».
Калгаридән (Канада) олан бир ата дејир ки, бу китабы алан кими ону 6 јашлы гызына вә 9 јашлы оғлуна охумаға башлады. О дејир: «Бу китаб онларын чох хошуна ҝәлди. Ушаглар диггәтлә гулаг асыр вә суаллара сәмими ҹаваб верирдиләр. Өзләрини санки өјрәндикләри мөвзуларын ҹанлы иштиракчылары кими һисс едирдиләр, буна ҝөрә дә фикирләрини сәрбәст сөјләјирдиләр. Бу онлары елә һәвәсләндирди ки, гызым бу китабы һәр ахшам өјрәнмәк истәдијини сөјләди».
Оғлу илә кечирдији нөвбәти өјрәнмәдән сонра бир ата демишдир: «Оғлумла мән Јеһова вә Онун нијјәтләри һаггында бир нечә саат данышдыг. Охудугларымыз онда хејли суал ојатды. Мәнә ширин јуху арзуладыгдан сонра “ај ата, бу китабы јенә охујаҹағыгмы? Ахы мәним чохлу суалларым вар, мән Јеһова һаггында һәр шеји билмәк истәјирәм” демәси мәни лап көврәлтди».
[25-ҹи сәһифәдәки шәкилләр]
«Бөјүк Мүәллим» китабындакы шәкилләр вә онлары изаһ едән јазылар ушаглара тә’лим вермәкдә чох көмәк едир.
Һананја Петери неҹә алдатды?
Етдијимиз һәр шеји ким ҝөрүр?