Мүгәддәс Китабы анламаг сизә мәмнунлуг ҝәтирәҹәк
МҮГӘДДӘС Китаб Аллаһдан олан дәјәрли һәгигәтләрлә долудур. Бу китаб бизә һәјатын мә’насыны, инсанларын башына ҝәлән бәлаларын сәбәбини вә гаршыда бәшәријјәти нәләр ҝөзләдијини ачыглајыр. Мүгәддәс Китаб бизә хошбәхтлији тапмағын, достлар газанмағын вә проблермләри уғурла неҹә һәлл етмәјин ачарыны тәгдим едир. Бундан әлавә, Јараданымыз олан сәмави Атамыз һаггында јалныз бу китабдан өјрәнә биләрик. Бу ҹүр билик бизә севинҹ ҝәтирмәклә јанашы, һәјатымызы мә’на илә долдурур.
Мүгәддәс Китаб Аллаһ һаггында билијә јијәләнмәји гида гәбулу илә мүгајисә едир. Иса демишди: «Инсан јалныз чөрәклә јашамаз, лакин Аллаһын ағзындан чыхан һәр бир сөзлә јашар» (Матта 4:4; Ибраниләрә 5:12-14). Јашамаг үчүн мүнтәзәм олараг гидалы јемәк гәбул етмәк зәрури олдуғу кими, Аллаһын вә’д етдији әбәди һәјаты алмаг үчүн дә Мүгәддәс Јазылары мүнтәзәм олараг охумаг ваҹибдир.
Јеһова бизи елә јарадыб ки, биз гидадан һәзз алаг. Һәмчинин гида бизим јемәјә олан тәләбатымызы да өдәјир. Лакин хошбәхт олмаг истәјириксә, диҝәр ваҹиб бир тәләбатымызын олдуғуну да јаддан чыхармамалыјыг. Иса демишди: «Руһани тәләбатларыны дәрк едәнләр хошбәхтдирләр» (Матта 5:3, ЈД). Бәли, Аллаһын Кәламыны анламагла инсан өз руһани тәләбатыны өдәјир вә бу она һәгиги хошбәхтлик ҝәтирир.
Дүздүр, чохларына елә ҝәлир ки, Мүгәддәс Китабы баша дүшмәк мүшкүл мәсәләдир. Мәсәлән, мәтндә сизә таныш олмајан адәтләр һаггында данышыланда вә ја образлы ифадәләрә раст ҝәләндә, онлары баша дүшмәк үчүн көмәјә еһтијаҹ дуја биләрсиниз. Бундан башга, символик дилдә јазылмыш пејғәмбәрликләр дә вардыр ки, онлары јалныз Мүгәддәс Китабын ејни мөвзуда олан диҝәр мәтнләри илә мүгајисәдә анламаг олар (Даниел 7:1-7; Вәһј 13:1, 2). Буна бахмајараг, сиз Мүгәддәс Китабы анлаја биләрсиниз. Бу неҹә мүмкүндүр?
Һамыја мәмнунлуг ҝәтирә биләр
Мүгәддәс Китаб Аллаһын Кәламыдыр. Онун сәһифәләриндән Аллаһ бизә Өз ирадәсини ачыр. Сизҹә, Аллаһ бәшәријјәтә чәтин баша дүшүлән вә ја јалныз али тәһсилли адамларын анлаја биләҹәји бир китабы верәрдими? Хејр, Јеһова бу гәдәр мәрһәмәтсиз олмазды. Иса Мәсиһ демишди: «Аранызда елә бир ата вармы ки, оғлу... балыг истәрсә, она балыг әвәзинә илан версин? Јахуд, јумурта истәрсә, она әгрәб версин? Беләликлә, мадам ки, сиз пис олдуғунуз һалда өз өвладларыныза јахшы һәдијјәләр верә билирсиниз, Сәмави Атанызын Ондан диләјәнләрә Мүгәддәс Руһу верәҹәји нә гәдәр јәгиндир!» (Лука 11:10-13). Сиз дә Аллаһдан Онун Кәламыны баша дүшмәји сәмими гәлбдән хаһиш етсәниз, Мүгәддәс Китабы анлајаҹағыныза әмин ола биләрсиниз. Аллаһ лазым олан көмәји сиздән әсирҝәмәјәҹәк. Һәтта кичикјашлы ушаглар белә Мүгәддәс Китабын әсас тә’лимләрини баша дүшә биләрләр! (2 Тимотејә 3:15).
Мүгәддәс Китабы баша дүшмәк чохлу сә’ј тәләб етсә дә, иманымызы мөһкәмләндирир, бизә бөјүк севинҹ бәхш едир. Иса, дириләндән сонра шаҝирдләриндән икисинә ҝөрүнәрәк, онларла Мүгәддәс Китаб пејғәмбәрликләриндән данышды. Орада јазылыб: «Муса илә бүтүн пејғәмбәрләрдән башлајараг бүтүн Мүгәддәс Јазыларда Өзү һаггында олан шејләри онлара изаһ етди». Бу һансы нәтиҹәни верди? О ахшам ешитдикләри барәдә дүшүнән шаҝирдләр бир-бирләринә дедиләр: «О, јолда бизимлә данышаркән вә Мүгәддәс Јазылары бизә изаһ едәркән, бизим үрәкләримиз алышыб јанмырдымы?» (Лука 24:13-32). Аллаһын Кәламыны анламалары онлара мәмнунлуг ҝәтирди, Аллаһын вә’дләринә олан инамларыны мөһкәмләндирди вә ҝәләҹәјә үмид верди.
Мүгәддәс Китабы анламаг ағыр јүк дејил. Дадлы вә гидалы јемәк бизә ләззәт вердији кими, Аллаһын Кәламыны анламаг да бизә мәмнунлуг ҝәтирир, фајдалы вә мараглыдыр. Бәс ону анламаг үчүн нә етмәк лазымдыр? Нөвбәти мәгаләдә Аллаһ һаггында билијин сизә неҹә зөвг ҝәтирәҹәји барәдә бәһс едилир (Сүлејманын мәсәлләри 2:1-5).
[4-ҹү сәһифәдәки шәкил]
Јеһова, севән бир ата кими, Мүгәддәс Китабы анламаг үчүн бизә мүгәддәс руһуну верир.