Исадан нә өјрәнирик?

Һәгиги Аллаһ һаггында

Аллаһын ады вармы?

Иса Аллаһын адынын олдуғуну өјрәдирди. О демишди: «Сиз белә дуа един: “Еј ҝөјләрдә олан Атамыз, адын мүгәддәс тутулсун”» (Матта 6:9). Мүгәддәс Китабда Аллаһын адынын Јеһова олдуғу дејилир (Јешаја 42:8, КМ). Иса шаҝирдләри үчүн етдији дуаларын бириндә Атасына демишди: «Сәнин адыны онлара билдирдим» (Јәһја 17:26).

Јеһова кимдир?

Јеһова Јарадан олдуғу үчүн Иса Ону ‘ваһид һәгиги Аллаһ’ адландырмышды (Јәһја 17:3). Иса демишди: «Охумамысынызмы ки, Јарадан башланғыҹдан “онлары киши вә гадын јаратды”?» (Матта 19:4). Иса һәмчинин демишдир ки, «Аллаһ руһдур» (Јәһја 4:24). Буна ҝөрә дә биз Аллаһы ҝөрә билмирик (Чыхыш 33:17-20).

Аллаһ биздән нә ҝөзләјир?

Бир нәфәр Исадан һансы әмрин ән бөјүк олдуғуну сорушанда, о белә ҹаваб верди: «Әмрләрин ән биринҹиси: “Динлә, еј Исраил! Аллаһымыз Рәбб, бир олан Рәбдир. Вә Аллаһын олан Рәбби бүтүн үрәјинлә, бүтүн ҹанынла, бүтүн дүшүнҹәнлә вә бүтүн гүввәтинлә сев”... Икинҹиси буна бәнзәрдир: “Гоншуну өзүн кими сев”» (Марк 12:28-31).

Аллаһы севдијимизи неҹә ҝөстәрә биләрик?

Иса демишди: «Мән Атаны севирәм». Бәс о, мәһәббәтини неҹә тәзаһүр етдирирди? О деди: «Ата Мәнә неҹә әмр етмишсә, елә дә иҹра едирәм» (Јәһја 14:31). Иса белә дә демишди: «Мән даим Онун хошуна ҝәлән ишләри ҝөрүрәм» (Јәһја 8:29). Биз Аллаһы Онун һаггында өјрәнмәклә севиндирә биләрик. Иса шаҝирдләри үчүн дуа едәркән демишди: «Әбәди һәјат о демәкдир ки, Сәни, ваһид һәгиги Аллаһы... танысынлар» (Јәһја 17:3; 1 Тимотејә 2:4).

Аллаһ һаггында неҹә өјрәнә биләрик?

Аллаһы танымағын бир үсулу Онун јаратдыгларыны мүшаһидә етмәкдир. Мәсәлән, Иса демишди: «Ҝөјүн гушларына бахын, онлар нә әкир, нә бичир, нә дә амбарларда топлајырлар; вә сәмави Атаныз онлары једиздирир. Сиз онлардан даһа дәјәрли дејилсинизми?» Иса бу сөзләрлә бизә нәји өјрәтмәк истәјирди? Физики еһтијаҹлара ҝөрә нараһатчылығын Аллаһа хидмәтимизә мане олмасына јол вермәмәлијик (Матта 6:26-33).

Јеһованы танымағын ән јахшы үсулу Онун Кәламы олан Мүгәддәс Китабы өјрәнмәкдир. Иса Мүгәддәс Јазылары ‘Аллаһ кәламы’ адландырды (Лука 8:21). Иса Аллаһа демишди: «Сәнин сөзүн һәгигәтдир» (Јәһја 17:17; 2 Петер 1:20, 21).

Иса адамлара Јеһова һаггында һәгигәти өјрәнмәјә көмәк едирди. Шаҝирдләриндән бири онун һаггында демишди: «О, јолда бизимлә данышаркән вә Мүгәддәс Јазылары бизә изаһ едәркән, бизим үрәкләримиз алышыб јанмырдымы?» (Лука 24:32). Аллаһ һаггында билик әлдә етмәк үчүн биз тәвазөкар вә өјрәнмәјә мејлли олмалыјыг. Иса гејд етмишди: «Әҝәр сиз дөнүб көрпә ушаглар кими олмасаныз, Сәмави Сәлтәнәтә әсла ҝирә билмәзсиниз» (Матта 18:3).

Нә үчүн Аллаһ һаггындакы билик хошбәхтлик ҝәтирир?

Һәр биримиз һәјатын мәнасыны анламаға еһтијаҹ дујуруг вә бу ишдә Аллаһ бизә көмәк едир. Иса демишди: «Руһән јохсуллар нә бәхтијардырлар!» (Матта 5:3). Јеһова бизә ән ҝөзәл һәјат јолуну өјрәдир. Иса демишдир: «Аллаһын сөзүнү динләјиб она әмәл едәнләр бәхтијардыр» (Лука 11:28; Јешаја 11:9).

Даһа чох мәлумат алмаг үчүн «Мүгәддәс Китаб әслиндә нә өјрәдир?»* нәшринин биринҹи фәслинә бахын.

[Һашијә]

Јеһованын Шаһидләри тәрәфиндән дәрҹ едилиб.

[16-ҹы сәһифәдәки шәкил]

«Сәнин адыны онлара билдирдим» (Јәһја 17:26)

[16 вә 17-ҹи сәһифәләрдәки шәкилләр]

Јеһова һаггында Онун јаратдыгларындан вә Мүгәддәс Китабдан өјрәнә биләрик