Хиласа һазырлашмысанмы?
«Сән бүтүн аиләнлә бирҝә ҝәмијә ҝир, чүнки бу бәшәр нәсли ичиндә јалныз сәни өнүмдә салеһ ҝөрдүм» (ЈАРАДЫЛЫШ 7:1).
1. Нуһун ҝүнләриндә Јеһова хилас үчүн һансы васитәни тәгдим етмишди?
НУҺУН ҝүнләриндә Јеһова ‘аллаһсызлар дүнјасы үзәринә туфаны ҝәтирди’, ејни заманда, хилас үчүн васитә дә тәгдим етди (2 Петер 2:5). Һәгиги Аллаһ, салеһ Нуһа јер үзүнә ҝәләҹәк дашгындан сағ чыха билмәси үчүн ҝәминин тикилмәсинә даир әтрафлы ҝөстәришләр вермишди (Јарадылыш 6:14-16). Јеһованын итаәткар хидмәтчисиндән ҝөзләнилдији кими, «Нуһ һәр шеји етди: Аллаһ она неҹә әмр етмишдисә, о да һәр шеји еләҹә јеринә јетирди». Бу ҝүн бизим јашамағымызда Нуһун итаәткарлығынын да пајы вар (Јарадылыш 6:22).
2, 3. а) Нуһун мүасирләри онун ишинә неҹә мүнасибәт ҝөстәрирдиләр? б) Нуһ нәјә әмин олараг ҝәмијә минди?
2 Ҝәмини тикмәк асан дејилди. Чох еһтимал ки, Нуһ вә онун аиләсинин мәшғул олдуғу иш мүасирләринин чохунда тәәҹҹүб доғурурду. Лакин ҝәминин тикилиб баша чатдырылмасы белә, һәмин адамлары хилас олмаг үчүн ҝәмијә минмәјин зәрури олдуғуна инандыра билмәди. Нәһајәт, пис дүнјаја гаршы Аллаһын сәбри түкәнди (Јарадылыш 6:3; 1 Петер 3:20).
3 Нуһ вә онун аиләсинин онилликләр әрзиндә ҝөрдүјү ҝәрҝин ишдән сонра Аллаһ она деди: «Сән бүтүн аиләнлә бирҝә ҝәмијә ҝир, чүнки бу бәшәр нәсли ичиндә јалныз сәни өнүмдә салеһ ҝөрдүм». Јеһованын сөзләринә иман ҝәтирәрәк «Нуһ, онун арвады, оғуллары вә ҝәлинләри... бирликдә ҝәмијә миндиләр». Хидмәтчиләрини горумаг үчүн Јеһова ҝәминин гапысыны өртдү. Дашгын јер үзүнә ҝәләндә, ҝәми Аллаһын хилас үчүн тәгдим етдији е’тибарлы бир васитә олду (Јарадылыш 7:1, 7, 10, 16).
Бизим ҝүнләримиз Нуһун ҝүнләринә бәнзәјир
4, 5. а) Иса өзүнүн иштиракыны нә илә мүгајисә етди? б) Нуһун ҝүнләри илә бизим ҝүнләр арасында һансы охшарлыглар вар?
4 «Нуһун ҝүнләри неҹә идисә, Инсан Оғлунун ҝәлиши дә [«иштиракы да», ЈД] елә олаҹагдыр» (Матта 24:37). Иса бу сөзләрлә ҝөстәрди ки, онун ҝөрүнмәз иштиракы Нуһун ҝүнләринә бәнзәјәҹәк вә бу, һәгигәтән дә беләдир. Хүсусилә дә 1919-ҹу илдән е’тибарән, Нуһун хәбәрдарлығына охшар хәбәрдарлыг бүтүн милләтләрә е’лан едилир. Үмумиликдә ҝөтүрәндә, онларын бу хәбәрә олан мүнасибәти Нуһун ҝүнләриндә јашајан инсанларын мүнасибәтиндән фәргләнмир.
5 Јеһова ‘зоракылыгла долан’ дүнјаја гаршы тәдбир ҝөрдү (Јарадылыш 6:13). Әтрафдакы инсанлар ачыг ајдын ҝөрүрдүләр ки, Нуһ аиләси илә бирликдә зоракы әмәлләрлә мәшғул олмур, әксинә, сакитҹә ҝәмини тикмәјә давам едир. Бунда да бизим ҝүнләрлә охшарлыг вар. Сәмими инсанлар ‘салеһлә пис адам, Аллаһа гуллуг едәнлә етмәјән арасындакы фәрги ҝөрүрләр’ (Малаки 3:18). Јеһованын Шаһидләринин дүзҝүнлүјү, хејирхаһлығы, сүлһсевәрлији вә чалышганлығы гәрәзсиз инсанлары валеһ едир вә бу хүсусијјәтләр Аллаһын халгыны үмумиликдә башгаларындан фәргләндирир. Шаһидләр зоракылығын һәр нөвүндән имтина едир вә Јеһованын мүгәддәс руһунун онлара тә’сир етмәсинә јол верирләр. Мәһз буна ҝөрә Шаһидләрин арасында әмин-аманлыг һөкм сүрүр вә онлар салеһлик јолу илә јеријирләр (Јешаја 60:17).
6, 7. а) Нуһун мүасирләри нәји баша дүшә билмәдиләр вә бизим ҝүнләрдә јашајан инсанлар һагда нә демәк олар? б) Һансы нүмунәләр ҝөстәрир ки, инсанлар Јеһованын Шаһидләринин башгаларындан фәргләндијини үмумиликдә е’тираф едирләр?
6 Нуһун мүасирләри Аллаһын она көмәк етдијини вә ҝөрдүјү ишин Аллаһын тапшырығы олдуғуну баша дүшмәдиләр. Буна ҝөрә дә онлар Нуһун хәбәрдарлығына ҹидди јанашмајараг она мүвафиг давранмадылар. Бәс бизим мүасирләримиз һаггында нә демәк олар? Јеһованын Шаһидләринин ҝөрдүкләри иш вә давраныш тәрзләри чохларына хош тәәссүрат бағышласа да, онларын әксәријјәти хош хәбәрә вә Мүгәддәс Китаб хәбәрдарлыгларына ҹидди јанашмыр. Гоншулар, гоһумлар вә ја иш јолдашлары мәсиһчиләри ҝөзәл хүсусијјәтләринә ҝөрә тә’рифләјә биләрләр, лакин сонра тәәссүфлә әлавә едирләр: «Каш ки, онлар Јеһованын Шаһиди олмајајдылар!» Амма бу инсанлар бир шеји нәзәрдән гачырырлар ки, Шаһидләр мәһәббәт, сүлһ, лүтфкарлыг, јахшылыг, һәлимлик вә өзүнә һаким олмаг кими хүсусијјәтләри Аллаһын мүгәддәс руһунун тә’сири илә тәзаһүр етдирирләр (Галатијалылара 5:22-25). Бу факт адамлары, Шаһидләрин тәблиғ етдији хәбәрин һәгиги олдуғуна даһа чох инандырмалыдыр.
7 Мәсәлән, Русијада Јеһованын Шаһидләри Падшаһлыг Залы тикирдиләр. Бир киши ајаг сахлајыб ишчиләрин бириндән сорушду: «Неҹә дә гејри-ади адамлардыр: һеч ким сигарет чәкмир, ичкили дејил вә сөјүш сөјмүр! Сиз тәсадүфән Јеһованын Шаһидләри дејилсиниз?» Гардаш ондан сорушду: «Әҝәр “јох” десәм, сиз мәнә инанарсынызмы?» Киши дәрһал ҹаваб верди: «Әлбәттә ки, јох!» Русијанын диҝәр шәһәриндә Шаһидләрин тәзә Падшаһлыг Залынын тикинтиси мерә дәрин тәәссүрат бағышламышды. О деди ки, әввәлләр бүтүн динләрин бир-бирләриндән фәргләнмәдијини фикирләширди, амма Шаһидләрин сәмимилијини вә тәмәннасызлығыны әмәлдә ҝөрәндә фикрини дәјишди. Бу, Јеһованын халгынын Мүгәддәс Китаб принсипләринә мүвафиг јашамајан инсанлардан фәргләндијини ҝөстәрән јалныз ики нүмунәдир.
8. Бу пис дүнјанын агибәтинә дүчар олмамаг үчүн нә етмәлијик?
8 Дашгында мәһв едилән ‘гәдим дүнјанын’ сону ҝәлмәздән әввәл Нуһ сәдагәтлә ‘салеһлији тәблиғ’ едирди (2 Петер 2:5). Бу системин ахыр ҝүнләриндә Јеһованын халгы Онун салеһ принсипләрини бәјан едир вә сағ галыб јени дүнјада јашамағын мүмкүн олмасы барәдә хош хәбәри тәблиғ едир (2 Петер 3:9-13). Нуһ вә онун Аллаһ горхусуна малик олан аиләси ҝәмидә сығынаҹаг тапдыглары кими, бу ҝүн дә һәр инсанын хиласы онун иман ҝәтирмәсиндән вә Јеһованын тәшкилатынын јерүзү һиссәсинә садиг галмасындан асылыдыр.
Хилас үчүн иман тәләб олунур
9, 10. Әҝәр биз Шејтанын дүнјасынын мәһвиндән сағ чыхмаг истәјириксә, иман нәјә ҝөрә ваҹибдир?
9 Инсан нә етмәлидир ки, Шејтанын һакимијјәти алтында олан бу дүнјанын гачылмаз мәһви заманы сағ галсын? (1 Јәһја 5:19). Илк нөвбәдә о, мүдафиәјә еһтијаҹы олдуғуну баша дүшмәлидир. Сонра бу мүдафиәдән истифадә етмәлидир. Нуһун мүасирләринин башы ҝүндәлик ишләрә гарышмышды вә јахынлашан фәлакәтдән мүдафиә олунмаг зәрурәтини һисс етмирдиләр. Онларда бир шеј дә чатышмырды — Аллаһа иман.
10 Мүасирләриндән фәргли олараг, Нуһ вә онун аиләси белә бир мүдафиәјә вә хиласа еһтијаҹлары олдуғуну баша дүшүрдү. Онлар һәм дә Каинатын Һөкмдары олан Јеһова Аллаһа иман едирдиләр. Һәвари Павел јазырды: «Иман етмәдән Аллаһа мәгбул олмаг исә гејри-мүмкүндүр. Чүнки Аллаһа јахынлашан иман етмәлидир ки, О вар вә Ону ахтаранлара мүкафат верир». Павел давам едир: «Нуһ иман васитәсилә, һәлә заһир олмајан шејләр һаггында Аллаһ тәрәфиндән хәбәрдар едилиб, өз аиләсини хилас етмәк үчүн ихласкарлыгла ҝәми һазырлады; о, бунунла дүнјаны мәһкум етди вә имандан ирәли ҝәлән салеһлијин вариси олду» (Ибраниләрә 11:6, 7).
11. Гәдим заманларда Јеһованын тәгдим етдији мүдафиә үсулларындан биз нә өјрәнирик?
11 Дүнјанын үзәринә ҝәлән фәлакәтдән сағ чыхмаг үчүн садәҹә онун мәһв едиләҹәјинә инанмаг кифајәт етмир. Биз иман ҝәтирмәли вә Аллаһын хилас үчүн тәгдим етдији васитәләрдән там истифадә етмәлијик. Әлбәттә, Аллаһын Оғлу Иса Мәсиһин фидијә гурбанлығына иман ҝәтирмәјимиз ваҹибдир (Јәһја 3:16, 36). Лакин биз унутмамалыјыг ки, јалныз Нуһун ҝәмисинин ичиндә оланлар дашгындан сағ чыхдылар. Ејнилә, сығынаҹаг шәһәрләр гәдим Исраилдә билмәдән адам өлдүрәнләр үчүн мүдафиә иди. Амма бунун үчүн инсан илк нөвбәдә о шәһәрләрин биринә гачмалы вә баш каһинин өлүмүнәдәк орада галмалы иди (Сајлар 35:11-32). Мусанын ҝүнләриндә Аллаһ мисирлиләрә онунҹу ҹәзаны верәндә онларын илкинләри өлдүрүлдү, исраиллиләринкинә исә һеч бир зәрәр дәјмәди. Нијә? Јеһова Мусаја тапшырмышды: «[Исраиллиләр] гурбанын ганындан [Пасхада кәсилән гузунун ганы] ҝөтүрүб ону јејәҹәкләри евин гапысынын һәр ики јан тахтасына вә үст дирәјинә сүртсүнләр... Сәһәрә гәдәр һеч кәс евинин гапысындан чыхмасын» (Чыхыш 12:7, 22). Мәҝәр исраилли илкинләрдән ким исә Аллаһын ҝөстәришинә е’тинасыз јанашмаға вә гапынын һәр ики јан тахтасына вә үст дирәјинә ган сүртүлән евдән чыхмаға үрәк едәрдими?
12. Һәр биримиз өзүмүзә һансы суалы вермәлијик вә нәјә ҝөрә?
12 Буна ҝөрә бизләрдән һәр биримиз һансы вәзијјәтдә олдуғумуз һагда дүшүнмәлијик. Биз һәгигәтәнми руһани мүдафиә үчүн Аллаһын тәгдим етдији васитәдән там истифадә едирик? Бөјүк мәшәггәт башлајанда вахтилә бу мүдафиәни ахтаранларын үрәкләри миннәтдарлыгла долаҹаг вә ҝөзләриндән севинҹ јашлары ахаҹаг. Башга инсанларын үзүндә исә тәәссүфдән доған аҹы ҝөз јашлары ҝөрүнәҹәк.
Тәшкилатын тәкмилләшмәси бизи хиласа һазырлајыр
13. а) Тәшкилати дәјишикликләр һансы мәгсәдлә едилирди? б) Бә’зи дәјишикликләр һагда данышын.
13 Јеһова тәшкилатынын јердә олан һиссәсиндә тәдриҹән дәјишикликләр едир. Онларын сајәсиндә руһани мүдафиәмиз үчүн олан васитә даһа ҝөзәл, мөһкәм вә е’тибарлы олур. 1870-ҹи илләрдән башлајараг 1932-ҹи иләдәк ағсаггаллар вә јығынҹаг јардымчыларыны јығынҹаг үзвләри сечирдиләр. 1932-ҹи илдә исә јығынҹагларда ағсаггаллар јох, хидмәти комитә сечилмәјә башланды. Бу комитә тә’јин едилмиш хидмәти рәһбәрә көмәк едирди. 1938-ҹи илдә исә јығынҹағын бүтүн хидмәтчиләринин теократик јолла тә’јин едилмәси үчүн мүвафиг дәјишикликләр едилди. 1972-ҹи илдән е’тибарән Јеһованын Шаһидләринин Рәһбәрлик Шурасынын гәрары илә гардашлар хидмәти көмәкчи вә ағсаггал хидмәти үчүн төвсијә едилир. Вә әҝәр онларын намизәдлији гәбул едилирсә, јығынҹаглар бу теократик тә’јинатлар барәдә мәктуб алыр. Рәһбәрлик Шурасынын иши ҝетдикҹә артырды вә онун әмәјини јүнҝүлләшдирмәк үчүн дәјишикликләр едилирди.
14. 1959-ҹу илдә һансы тә’лим програмы јаранды?
14 1950-ҹи илдә Мәзмур 45:16 ајәсинин диггәтлә арашдырылмасы сајәсиндә, бу ҝүнәдәк давам едән тә’лим програмы јарадылды. Һәмин ајәдә дејилир: «Аталарынын јеринә сәнин оғулларын олаҹаг; бүтүн дүнјада онлары рәис едәҹәксән» (КМ). Јығынҹагда рәһбәрлији үзәрләринә ҝөтүрән ағсаггаллар индики вә Һар-Меҝидондан сонракы теократик мәс’улијјәтләри јеринә јетирмәк үчүн тә’лим алырлар (Вәһј 16:14, 16). 1959-ҹу илдән Падшаһлыг Хидмәти Мәктәби кечирилмәјә башланды. Бир ајлыг тә’лим курсу әсас е’тибарилә, о вахтлар јығынҹаг хидмәтчиләри, инди исә сәдрлик едән нәзарәтчи адланан гардашлар үчүн нәзәрдә тутулурду. Һазырда исә бүтүн хидмәти көмәкчиләр вә нәзарәтчиләр бу мәктәбдә тә’лим алырлар. Бу гардашлар, өз нөвбәсиндә, јығынҹагларында Јеһованын ајры-ајры Шаһидләринә тә’лим вермәкдә рәһбәрлији үзәрләринә ҝөтүрүрләр. Беләликлә һамы руһани ҹәһәтдән мөһкәмләнмәк вә Падшаһлыг һаггында хош хәбәри даһа јахшы тәблиғ етмәк үчүн көмәк алыр (Марк 13:10).
15. Мәсиһчи јығынҹағынын тәмизлији һансы ики үсулла горунур?
15 Мәсиһчи јығынҹағынын үзвү олмаг истәјән һәр адам мүәјјән тәләбләрә ҹаваб вермәлидир. Нуһун ҝүнләриндә ришхәндчиләр үчүн ҝәмидә јер тапылмадығы кими, мәнтигә ујғундур ки, мүасир ришхәндчиләрә дә јығынҹагда јер јохдур (2 Петер 3:3-7). Јеһованын Шаһидләри, хүсусилә 1952-ҹи илдән, јығынҹагларда тәмизлији горумаг үчүн, төвбә етмәјән ҝүнаһкарлары јығынҹагдан кәнар етмәк тәдбиринә даһа чох диггәт јетирмәјә башладылар. Әлбәттә, һәгигәтән төвбә едәнләрә ‘ајаглары үчүн дүз ҹығырлар салмагда’ мәһәббәтлә көмәк едилир (Ибраниләрә 12:12, 13; Сүлејманын мәсәлләри 28:13; Галатијалылара 6:1).
16. Јеһованын халгынын руһани вәзијјәти неҹәдир?
16 Јеһованын халгынын руһани фираванлыг ичиндә јашамасы нә тәәҹҹүблү, нә дә тәсадүфидир. Јешаја пејғәмбәрин васитәсилә Јеһова демишдир: «Гулларым јејәҹәк, сиз исә аҹ галаҹагсыныз, гулларым ичәҹәк, сиз исә сусајаҹагсыныз, гулларым севинәҹәк, сиз исә утанаҹагсыныз. Гулларым шадланыб мәдһијјәләр сөјләјәҹәк, сиз исә үрәк ағрысындан гышгыраҹагсыныз, кәдәрли руһла фәрјад едәҹәксиниз» (Јешаја 65:13, 14). Јеһова бизи вахтлы-вахтында сағлам руһани гида илә бол-бол тә’мин етмәјә давам едир (Матта 24:45).
Хиласа һазыр ол
17. Хиласа һазырлашмаға бизә нә көмәк едәҹәк?
17 Инди ‘бир-биримизи мәһәббәтә вә хејирли ишләрә неҹә тәшвиг едәҹәјимизин гајғысына галмағын, бә’зиләринин адәт етдикләри кими өз јығынҹагларымызы тәрк етмәмәјин, бир-биримизи даһа чох үрәкләндирмәјин’ әсл вахтыдыр (Ибраниләрә 10:23-25). Дүнјада мөвҹуд олан 98 000-дән чох јығынҹағын бири илә сых вә фәал әмәкдашлыг хиласа һазырлашмағымыза көмәк едәҹәкдир. ‘Јени мәнлијин’ хүсусијјәтләрини тәзаһүр етдирмәјә чалышаркән вә башгаларына Јеһованын хилас үчүн тәгдим етдији васитә һаггында өјрәтмәк үчүн әлимиздән ҝәләни едәркән һәмиманлыларымызын дәстәјинә архајын ола биләрик (Ефеслиләрә 4:22-24; Колослулара 3:9, 10; 1 Тимотејә 4:16).
18. Сән нәјә ҝөрә мәсиһчи јығынҹағына бағлы галмағы гәти гәрара алмысан?
18 Шејтан вә онун пис дүнјасы бизи мәсиһчи јығынҹағындан узаглашдырмаға ҹан атыр. Буна бахмајараг, биз јығынҹагда гала вә бу дүнјанын мәһвиндән сағ чыха биләрик. Гој Јеһоваја мәһәббәтимиз вә Онун көмәјинә ҝөрә миннәтдарлығымыз Шејтанын ҹәһдләрини боша чыхармаг гәтијјәтимизи мөһкәмләндирсин! Малик олдуғумуз хејир-дуалар үзәриндә дүшүнмәк бизә көмәк едә биләр. Бу хејир-дуаларын бә’зиләри нөвбәти мәгаләдә мүзакирә едиләҹәк.
Сиз неҹә ҹаваб верәрдиниз?
• Бизим ҝүнләримизлә Нуһун ҝүнләри арасында һансы охшарлыглар вар?
• Хилас үчүн һансы хүсусијјәт ваҹибдир?
• Јеһованын мүдафиәмиз үчүн тәгдим етдији васитә ҝет-ҝедә неҹә тәкмилләшир?
• Бизләрдән һәр биримиз хиласа неҹә һазырлаша биләрик?
[12-ҹи сәһифәдәки шәкил]
Нуһун мүасирләри онун хәбәринә ҹидди јанашмадылар.
[13-ҹи сәһифәдәки шәкил]
Аллаһын хәбәрдарлыгларына ҹидди јанашмаға дәјәр.
[14-ҹи сәһифәдәки шәкил]
Падшаһлыг Хидмәти Мәктәби һансы мәгсәдлә јарадылмышдыр?
[15-ҹи сәһифәдәки шәкил]
Инди мәсиһчи јығынҹағына бағлы галмағын әсл вахтыдыр.