Сизә аидијјәти олан мәсәлә
ЈӘГИН аилә үзвләри вә ја достларыныздан киминләсә хүсусилә јахынсыныз. Тәсәввүр един ки, кимсә өз хејринизи ҝүддүјүнүз үчүн онларла јахынлыг етдијинизи сөјләјир. Мәҝәр бу сизә пис тә’сир етмәздими? Бәлкә дә гәзәбләндирәрди. Шејтан Иблис Јеһова Аллаһла јахын мүнасибәти оланлара гаршы мәһз бу иттиһамы ирәли сүрүб.
Илк инсанлар, Адәмлә Һәвва Шејтанын тәһрики илә Аллаһын ганунуну позуб, Она гаршы үсјан галдырдылар. Бунун нә демәк олдуғу барәсиндә бир дүшүнүн. Доғруданмы, инсанлар јалныз өзләринә хејир едәндә Јеһова Аллаһа итаәт едәҹәкләр? (Јарадылыш 3:1-6). Адәмин Аллаһдан үз дөндәрмәсиндән тәхминән 2 500 ил сонра Шејтан, Әјјуб адлы адамла бағлы ејни мүбаһисәли суалы галдырды. Ҝәлин Мүгәддәс Китабын бу парчасына диггәт јетирәк.
‘Нөгсансызлығымдан әл чәкмәјәҹәјәм’
Әјјуб гүсурсуз, ‘әмәлисалеһ, Аллаһдан горхан вә өзүнү шәрдән узаг сахлајан бир адамдыр’. Шејтан исә Әјјубун салеһлијини шүбһә алтына алыр. О, Јеһовадан сорушур: «Әјјуб Аллаһдан бош јерәми горхур?» Сонра Шејтан һәм Аллаһа, һәм дә Әјјуба бөһтан атыр. Онун сөзләриндән елә чыхыр ки, Јеһова Әјјубу мүдафиә едиб хејир-дуаландырмагла онун сәдагәтини сатын алыр. Шејтан Аллаһа мејдан охујур: «Инди бир әл узадыб онун вар-јохуну әлиндән ал, о, ҝөзүнүн габағында мүтләг Сәнә лә’нәт едәҹәк» (Әјјуб 1:8-11).
Шејтанын ирәли сүрдүјү иддиалара ҹаваб вермәк үчүн Јеһова Аллаһ Әјјубун имтаһана чәкилмәсинә иҹазә верир. Иблис бу салеһ инсаны Аллаһдан дөндәрмәк үчүн онун башына бир-биринин ардынҹа бәлалар ҝәтирир. Әјјубун мал-гарасы оғурланыр, мәһв едилир, нөкәрләри гылынҹдан кечирилир, ушаглары тәләф олур (Әјјуб 1:12-19). Бәс о, мәгсәдинә наил олурму? Сөзсүз ки јох! Әјјуб бу сынагларын сәбәбкарынын Аллаһ олдуғуну дүшүнсә дә, дејир: «Верән дә Рәбдир, алан да Рәбдир. Рәббин исминә алгыш олсун!» (Әјјуб 1:21).
Мүәјјән вахтдан сонра Шејтан јенә дә Јеһованын һүзуруна ҝәлир. Аллаһ она дејир: ‘Мәни вадар етдин ки, бош јерә Әјјубу мәһв едим, амма о һәлә камил [«нөгсансыз», ЈД] олараг галыб’ (Әјјуб 2:1-3). Бу һадисәдә ән әсасы Әјјубун нөгсансызлығыдыр. Нөгсансызлыг Аллаһа там садиг олмаг вә Онун салеһ нормаларына мүвафиг јашамаг демәкдир. Бәли, Әјјуб нөгсансызлығындан дөнмүр, анҹаг Шејтан да өз мәгсәдиндән әл чәкмир.
Сонра Шејтан бүтүн бәшәријјәти бу мәсәләјә гатыр. О Јеһоваја дејир: «Дәри әвәзинә дәри! Инсан ҹанына ҝөрә һәр шејини верәр. Әлини узадыб онун әтинә вә сүмүјүнә тохун, о, ҝөзүнүн габағында мүтләг Сәнә лә’нәт едәҹәк» (Әјјуб 2:4, 5). «Әјјуб» әвәзинә «инсан» демәклә, Шејтан һәр бир адамын нөгсансызлығыны шүбһә алтына алыр. Онун сөзүнүн ҹаны о иди ки, инсан өз һәјаты уғрунда нәјә десән ҝедәр. Шејтан иддиа едирди ки, она имкан верилсә, һамыны Аллаһдан узаглашдыра биләр. Ҝөрәсән вәзијјәтиндән вә јашадығы дөврдән асылы олмајараг, Аллаһа садиг галан олаҹагмы?
Јеһова Шејтана иҹазә верир ки, Әјјубу ағыр хәстәлијә дүчар етсин. Әјјуб о гәдәр әзаб чәкир ки, Аллаһдан өлүм арзулајыр (Әјјуб 2:7; 14:13). Бунунла белә, о дејир: «Сон нәфәсимә гәдәр камиллијимдән [«нөгсансызлығымдан», ЈД] әл чәкмәјәҹәјәм» (Әјјуб 27:5). Әјјуб Аллаһы севдији үчүн һеч нә ону нөгсансызлығындан дөндәрә билмир. Аллаһа ҝәлдикдә исә, Мүгәддәс Китаб нәгл едир: «Рәбб Әјјубун ахыр ҝүнләрини әввәлки ҝүнләриндән даһа чох бәрәкәтли етди» (Әјјуб 42:10-17). Бәс тарихдә Әјјуб кимиләри олубму? Заман нә дејир?
Мүбаһисәли мәсәләнин һәлли
Мүгәддәс Јазыларын «Ибраниләрә мәктуб» китабынын 11-ҹи фәслиндә һәвари Павел Нуһ, Ибраһим, Сара вә Муса да дахил олмагла, гәдимдә јашамыш садиг адамларын адыны чәкәрәк дејир: «[Башгалары] һаггында нәгл етмәк үчүн вахтым чатмаз» (Ибраниләрә 11:32). Аллаһын садиг хидмәтчиләринин сајы о гәдәр чохдур ки, Павел онлары ‘бөјүк шаһидләр булуду’ адландырыр (Ибраниләрә 12:1). Әсрләр боју сајсыз-һесабсыз инсан өз хошу илә Јеһованын тәрәфини тутмуш вә сәдагәтлә Она хидмәт етмишдир (Јешуа 24:15).
Инсанлары Јеһовадан дөндәрәҹәјини иддиа едән Шејтана гәти ҹавабы Аллаһын Оғлу Иса Мәсиһ верди. Һәтта ишҝәнҹә дирәјиндә әзаблы өлүмә мә’руз галанда да, Иса нөгсансызлығындан әл чәкмәди. О, сон нәфәсиндә демишди: «Еј Ата! Өз руһуму Сәнин әлләринә верирәм» (Лука 23:46).
Заман ҝөстәрди ки, Шејтан һәр кәси һәгиги Аллаһдан дөндәрмәјә гадир дејил. Сонсуз сајда инсан Јеһова илә таныш олмуш вә ‘Аллаһы бүтүн үрәјилә, бүтүн ҹаны илә вә бүтүн дүшүнҹәси илә’ севмишдир (Матта 22:37). Онларын Јеһоваја сарсылмаз садиглији инсанын нөгсансызлығыны горумајаҹағыны иддиа едән Шејтанын јаланчы олдуғуну сүбута јетирмишдир. Сиз дә нөгсансызлығынызы горумагла Шејтанын сәһв олдуғуну сүбут едә биләрсиниз.
Сиз нә етмәлисиниз?
Аллаһын ирадәси ондан ибарәтдир ки, «бүтүн инсанлар хилас олуб, һәгигәти дәрк етсинләр» (1 Тимотејә 2:4). Һәгигәти неҹә дәрк етмәк олар? Мүгәддәс Китабы арашдырмаға вахт ајырыб ‘ваһид һәгиги Аллаһ вә Онун ҝөндәрдији Иса Мәсиһ’ һаггында билик әлдә един (Јәһја 17:3).
Шејтан инсанларын Аллаһа сидг үрәклә хидмәт етдијини шүбһә алтына алыб. Буна ҝөрә дә, Аллаһа тәмиз нијјәтлә хидмәт етмәк үчүн билик үрәјә тә’сир етмәлидир. Бунун үчүн садәҹә Мүгәддәс Китабы охумаг кифајәт дејил. Өјрәндикләринизин үзәриндә дүшүнмәји вәрдишә чевирин (Мәзмур 143:5). Мүгәддәс Китабы вә ја она әсасланан әдәбијјаты охујанда өзүнүзә бу суаллары верин: «Бурадан Јеһова һаггында нә өјрәнирәм? Бу парчадан Аллаһын һансы кејфијјәтләри ҝөрүнүр? Һәјатымын һансы саһәсиндә белә давранмалыјам? Аллаһ нәји бәјәнир, нәји бәјәнмир? Бу парча мәндә Аллаһа гаршы һансы һиссләри доғурур?» Белә суаллар үзәриндә дүшүнсәниз үрәјиниз Јарадана гаршы мәһәббәт вә миннәтдарлыгла долаҹаг.
Аллаһ гаршысында нөгсансызлыг тәкҹә е’тигадымызла мәһдудлашмыр (1 Падшаһлар 9:4). Јеһова Аллаһын гаршысында нөгсансыз олмаг үчүн һәјатын һәр саһәсиндә әхлаги тәмизлији горумаг лазымдыр. Амма бу о демәк дејил ки, нөгсансызлыг бизи нәдәнсә мәһрум едир. Јеһова Өзү хошбәхт Аллаһ олдуғу үчүн бизим дә хошбәхтлијимизи истәјир (1 Тимотејә 1:11). Хошбәхт јашамаг вә Аллаһы разы салмаг үчүн мүәјјән һәрәкәтләрдән кәнар дурмалыјыг. Ҝәлин онлардан бир нечәсинә нәзәр салаг.
Налајиг һәрәкәтләрдән гачын
Јеһова Өз Кәламында никаһ барәсиндә белә дејир: «Киши өз ата-анасыны тәрк едиб, гадынына говушаҹаг вә онлар бир бәдән олаҹаг» (Јарадылыш 2:21-24). Бир бәдән олан әр-арвад анҹаг бир-бирилә интим әлагәдә олмагла, Аллаһын әсасыны гојдуғу никаһ гурулушуна һөрмәт етдикләрини ҝөстәрирләр. Һәвари Павел дејирди: «Гој һәр кәс никаһа һөрмәт етсин вә кәбин јатағы ләкәсиз олсун; чүнки Аллаһ, әхлагсызлары вә зинакарлары мәһкум едәҹәкдир» (Ибраниләрә 13:4). «Кәбин јатағы» ифадәси бир-бирилә гануни никаһда олан гадын вә киши арасындакы ҹинси әлагәјә аиддир. Онлар белә әлагәјә башга адамла ҝирсәләр, зина етмиш олурлар вә Аллаһын һөкмүнә мә’руз галаҹаглар (Малаки 3:5).
Никаһдан габаг ҹинси әлагә һаггында нә демәк олар? Бу да Јеһованын гојдуғу әхлаг нормаларына зиддир. Мүгәддәс Китабда јазылыб: «Аллаһын ирадәси будур ки... ҹинси әхлагсызлыгдан имтина едәсиниз» (1 Салониклиләрә 4:3). Һомосексуал мүнасибәтләр, јахын гоһумларла вә һејванла ҹинси әлагә Аллаһа гаршы ҝүнаһдыр (Левилиләр 18:6, 23; Ромалылара 1:26, 27). Аллаһы разы салмаг вә һәјатда хошбәхт олмаг истәјән һәр бир кәс әхлагсыз һәрәкәтләрдән узаг дурмалыдыр.
Бәс никаһда олмајан адамларын бир-бирилә еһтирас ојадан һәрәкәтләрә јол вермәсинә неҹә бахмаг олар? Јеһова буна пис бахыр (Галатијалылара 5:19). Биз ағлымызы натәмиз фикирләрлә дә мурдарламамалыјыг. Иса демишдир: «Бир гадына шәһвәтлә бахан һәр адам, артыг үрәјиндә онунла зина етмиш олур» (Матта 5:28). Бу принсип ејнилә журналларда, телевизор вә интернетдә порнографијаја бахмаға, сексдән бәһс едән бәдии әдәбијјат охумаға вә сөзләри еһтирас ојадан маһнылара гулаг асмаға да аиддир. Инсан белә шејләрдән гачынмагла Аллаһы севиндирәр вә мә’нәви ҹәһәтдән сағлам һәјат сүрәр.
Ешгбазлыг һаггында нә демәк олар? Ешгбазлыг ҹидди нијјәт ҝүдмәдән өзүнүн кимәсә вурулдуғуну ҝөстәрмәк вә ја башгасында өзүнә гаршы романтик мараг ојатмаг демәкдир. Аиләли инсанын өз һәјат јолдашындан башга кимәсә бу ҹүр мараг ҝөстәрмәси Мүгәддәс Китаб принсипләринә зиддир вә Јеһоваја гаршы һөрмәтсизлијин әламәтидир (Ефеслиләрә 5:28-33). Субајларын да әјләнмәк хатиринә гаш-ҝөз ојнатмасы, сөз атмасы вә саирә һәрәкәтләрә јол вермәси дүзҝүн дејил! Бирдән кимсә буну ҹидди гәбул етди? Ешгбазлығын үрәјә неҹә јаралар вурдуғу һаггында бир дүшүнүн. Һәм дә унутмајын ки, ешгбазлыг зина вә ја ҹинси әхлагсызлыға да ҝәтириб чыхара биләр. Әкс ҹинс илә тәмиз даврананда исә инсанын өзүнә гаршы һөрмәти артыр (1 Тимотејә 5:1, 2).
Һәјатын диҝәр саһәләриндә Аллаһы неҹә разы салмаг олар?
Бир чох өлкәләрдә спиртли ичкиләри асанлыгла әлдә етмәк олар. Бәс ички ичмәк ҝүнаһдырмы? Мүгәддәс Китаб шәраб, пивә вә ја башга спиртли ичкиләри ичмәји гадаған етмир, анҹаг ҝәрәк инсан өзүнү идарә етсин (Мәзмур 104:15; 1 Тимотејә 5:23). Һәддиндән артыг ичмәк вә сәрхошлуг Аллаһын ҝөзүндә ҝүнаһдыр (1 Коринфлиләрә 5:11-13). Сөзсүз ки, сиз ичкинин уҹбатындан сағламлығынызын позулмасыны, аиләнизин дағылмасыны истәмәздиниз (Сүлејманын мәсәлләри 23:20, 21, 29-35).
Јеһова ‘һәгигәт Аллаһыдыр’ (Мәзмур 31:5, КМ). Мүгәддәс Китабда јазылыб ки, ‘Аллаһын јалан данышмасы гејри-мүмкүндүр’ (Ибраниләрә 6:18). Аллаһы разы салмаг истәјән адам јалан данышмајаҹаг (Сүлејманын мәсәлләри 6:16-19; Колослулара 3:9, 10). Мүгәддәс Китаб Аллаһын хидмәтчиләринә мәсләһәт верир: «Һәр бириниз өз гоншусуна һәгигәти сөјләсин» (Ефеслиләрә 4:25).
Гумар ојунлары, ҝениш јајылмасына бахмајараг, тамаһкарлыгдан башга бир шеј дејил. Чүнки гумар ојнајан башгасынын зәрәри һесабына пул газанмаг истәјир. Јеһова ‘биабырчы газанҹа һәрис оланлары’ севмир (1 Тимотејә 3:8). Аллаһы разы салмаг истәјән адам лотереја, лото вә диҝәр гумар ојунлары ојнамыр вә аиләсини доландырмаға да даһа чох пулу галыр.
Оғурлуг, јә’ни башгасынын әшјасыны ҝөтүрмәк дә тамаһдан доған һәрәкәтдир. Аллаһ әмр едир: «Оғурлуг етмә» (Чыхыш 20:15). Биләрәкдән оғурлуг мал алмаг, о ҹүмләдән башгасынын әшјасыны иҹазәсиз ҝөтүрмәк дүзҝүн дејил. Мүгәддәс Китабда јазылыб: «Оғурлуг едән артыг оғурламасын; әксинә, өз әлләринин әмәји илә јахшы иш ҝөрсүн ки, еһтијаҹы оланларла бөлүшдүрмәјә бир шеји олсун» (Ефеслиләрә 4:28). Јеһованы севәнләр иш вахтыны бош јерә сәрф етмир, әксинә ондан даһа сәмәрәли истифадә едир, иши виҹданла ҝөрүрләр. Онлар ‘һәр ҹәһәтҹә өзләрини јахшы апармаға ҹан атырлар’ (Ибраниләрә 13:18). Тәмиз виҹдан инсана гәлб раһатлығы ҝәтирир.
Аллаһ өзүндән тез чыхан адамлара неҹә јанашыр? Мүгәддәс Китаб хәбәрдарлыг едир: «Тез гәзәбләнәнә јолдаш олма, кәмһөвсәлә илә јола чыхма» (Сүлејманын мәсәлләри 22:24). Инсан гәзәбләнәндә өзүнү идарә етмәзсә, бу, зоракылыға ҝәтириб чыхарар (Јарадылыш 4:5-8). Гисас барәдә Мүгәддәс Китабда дејилир: «Һеч кимә пислик әвәзинә пислик етмәјин, лакин бүтүн инсанларын гаршысында јахшы шејләрә диггәт јетирин. Мүмкүнсә, әлиниздән ҝәлдији гәдәр бүтүн адамларла сүлһдә олун. Еј севимлиләр, гисас алмајын, анҹаг Аллаһын гәзәбинә јол верин. Чүнки јазылмышдыр: “Рәбб дејир: Гисас Мәнимдир, әвәзини Мән верәҹәјәм”» (Ромалылара 12:17-19). Бу мәсләһәтләрә әмәл етсәк, башгалары илә сүлһдә олаҹағыг, бу да өз нөвбәсиндә һәјатымыза севинҹ гатаҹаг.
Нөгсансызлығы горумаг мүмкүндүр
Сынаглара бахмајараг, Аллаһ гаршысында нөгсансызлығы горумаг мүмкүндүрмү? Бәли, мүмкүндүр. Унутмајын, Аллаһ истәјир ки, Шејтанын нөгсансызлыгла бағлы ирәли сүрдүјү иддиаларын јалан олдуғуну сиз һәјат тәрзинизлә сүбут едәсиниз. Аллаһ дејир: «Оғлум, һикмәтли ол, гој гәлбим севинсин, онда мәни утандырана ҹаваб верә биләрәм» (Сүлејманын мәсәлләри 27:11).
Јеһованын ҝөзүндә дүзҝүн олан ишләри ҝөрмәк үчүн дуада Аллаһдан ҝүҹ диләјин (Филипилиләрә 4:6, 7, 13). Аллаһын Кәламыны өјрәнмәји гаршыныза мәгсәд гојун. Мүгәддәс Китабдан өјрәндикләриниз үзәриндә миннәтдарлыгла дүшүндүкҹә Аллаһы даһа чох севәҹәк вә Ону разы салмаға чалышаҹагсыныз. 1 Јәһја 5:3 ајәсиндә јазылыб: «Аллаһы севмәк, Аллаһын әмрләринә риајәт етмәк демәкдир. Онун әмрләри исә ағыр дејилдир». Јахынлығынызда јашајан Јеһованын Шаһидләри мәмнунијјәтлә сизә Мүгәддәс Китабы өјрәнмәјә көмәк едәҹәкләр. Сиз онларла вә ја бу журналы нәшр едәнләрлә әлагә сахлаја биләрсиниз.
[3-ҹү сәһифәдәки шәкил]
Әјјуб сынагларла үз-үзә галанда белә, Аллаһ гаршысында садиглијини горуду.
[5-ҹи сәһифәдәки шәкил]
Аллаһын Кәламыны өјрәнмәк дүзҝүн һәрәкәт етмәјинизә көмәк едәҹәк.