Аллаһын бирләшдирдијини ајырмајын
«Онлар артыг ики дејил, бир бәдәндирләр. Беләликлә, Аллаһын бирләшдирдијини инсан ајырмамалыдыр» (МАТТА 19:6).
1, 2. Нә үчүн һәм Мүгәддәс Китаб, һәм дә һәјат аилә гуранларын һәрдән проблемләрлә үзләшәҹәјини ҝөстәрир?
ТӘСӘВВҮР един ки, машынла узаг сәјаһәтә чыхмаға һазырлашырсыныз. Чәтинликсиз өтүшәҹәксиниз? Белә фикирләшмәк садәлөвһлүк оларды! Мәсәлән, бирдән һава писләшә биләр вә сүр’әти азалдыб, машыны еһтијатла сүрмәли оларсыныз. Арада исә машын хараб ола биләр вә сизин әлиниздән машыны јолун гырағында сахлајыб, көмәк истәмәкдән башга һеч нә ҝәлмәз. Белә һалларда: «Ҝәрәк сәјаһәтә чыхмаздым, јахшысы будур, машыны гојуб ҝедим», — дејә дүшүнмәк дүз олардымы? Хејр. Сиз баша дүшүрсүнүз ки, узаг сәјаһәт заманы проблемләр гачылмаздыр вә онлары һәлл етмәк үчүн јоллар ахтарардыныз.
2 Никаһда да беләдир. Проблемләр гачылмаздыр. Аилә гурмаға һазырлашанларын һәјатларынын гајғысыз олаҹағыны дүшүнмәләри садәлөвһлүк оларды. Мүгәддәс Китаб 1 Коринфлиләрә 7:28 ајәсиндә ачыг-ајдын дејир ки, әрләрин вә арвадларын «әзијјәти олаҹаг». Сәбәб нәдәдир? Гысаҹа десәк, әр дә, арвад да гејри-камилдир, һәм дә биз ‘чәтин анларда’ јашајырыг (2 Тимотејә 3:1; Ромалылара 3:23). Һәтта бир-бирини јахшы баша дүшән, руһани ҹәһәтдән мөһкәм олан әр-арвад да һәрдән проблемләрлә үзләшәҹәк.
3. а) Индики зәманәдә инсанларын чоху никаһа неҹә јанашыр? б) Мәсиһчиләр нә үчүн аиләни горумаға чалышырлар?
3 Индики зәманәдә бә’зи әр-арвадларын проблемләрлә үзләшән кими ағылларына илк ҝәлән никаһа сон гојмаг олур. Бир чох өлкәләрдә бошанмаларын сајы дурмадан артыр. Лакин һәгиги мәсиһчиләр проблемдән гачмыр, әксинә ону һәлл едирләр. Нијә? Чүнки онлар никаһа Јеһованын мүгәддәс ән’амы кими бахырлар. Иса никаһда оланлар һаггында демишди: «Аллаһын бирләшдирдијини инсан ајырмамалыдыр» (Матта 19:6). Дүздүр, бу принсипә ујғун јашамаг һәмишә асан олмур. Мәсәлән, Мүгәддәс Китаб принсипләрини гәбул етмәјән гоһумлар, мәсләһәтчиләр вә башгалары чох вахт Мүгәддәс Китаб әсасы олмадан әр-арвада ајры јашамағы вә ја бошанмағы мәсләһәт ҝөрүрләрa. Лакин мәсиһчиләр билирләр ки, аиләни тәләсик дағытмагданса, проблемләри һәлл едиб ону горумаг даһа јахшыдыр. Доғрудан да, лап башланғыҹдан һәр шеји инсанларын дејил, Јеһованын мәсләһәтинә ујғун етмәк чох ваҹибдир (Сүлејманын мәсәлләри 14:12).
Чәтинликләри арадан галдырын
4, 5. а) Аиләдә һансы чәтинликләр олур? б) Аллаһын Кәламындакы принсипләр аилә проблемләрини һәлл етмәјә нә үчүн көмәк едир?
4 Һәр аиләдә баш галдыран проблемләри вахташыры мүзакирә етмәк лазымдыр. Әксәр һалларда бу, кичик наразылыглар олур. Бә’зи аиләләрдә елә ҹидди чәтинликләр ортаја чыхыр ки, мүнасибәтләрин тәмәли үчүн тәһлүкә јараныр. Һәрдән сизә тәҹрүбәли аиләли мәсиһчи ағсаггалдан мәсләһәт алмаг лазым ҝәлә биләр. Амма аиләдәки вәзијјәт никаһынызын уғурсуз олдуғуна әсла ишарә етмир. Әксинә, бу ону ҝөстәрир ки, проблемдән чыхыш јолу ахтаранда Мүгәддәс Китаб принсипләринә даһа чох риајәт етмәк ваҹибдир.
5 Јарадан вә никаһын Баниси олараг Јеһова аиләнин хошбәхт олмасы үчүн нә лазым олдуғуну һамыдан јахшы билир. Әсас мәсәлә бизим Онун Кәламындакы мәсләһәтләрә табе олуб-олмајаҹағымыздадыр. Аллаһын сөзүндән чыхмасаг, мүтләг хејир тапаҹағыг. Јеһова гәдимдә Өз халгына демишди: «Аһ, каш ки сән Мәним әмрләримә диггәт јетирәјдин! Онда әмин-аманлығын һеч вахт гурумајан чај кими ахарды, салеһлијин дәниз далғалары кими оларды» (Јешаја 48:18). Мүгәддәс Китабын рәһбәрлијинә риајәт етмәк никаһы уғурлу едәҹәк. Ҝәлин әввәлҹә Мүгәддәс Китабын әрләрә вердији мәсләһәти нәзәрдән кечирәк.
«Арвадларынызы севин»
6. Мүгәддәс Јазылар әрләрә һансы мәсләһәти верир?
6 Һәвари Павел ефеслиләрә јаздығы мәктубунда әрләрә ајдын рәһбәрлик верир: «Әрләр, арвадларынызы севин, неҹә ки, Мәсиһ дә иманлылар ҹәмијјәтини севди вә онун уғрунда Өзүнү фәда етди. Беләҹә әрләр дә өз арвадларыны, өз бәдәнләри гәдәр севмәлидирләр. Өз арвадыны севән өзүнү севир. Чүнки һеч ким һеч заман өз бәдәнинә нифрәт етмәмишдир, лакин Рәбб ҹәмијјәти етдији кими, ону једирир вә бәсләјир, сизә ҝәлинҹә, гој һәр кәс өз арвадыны өзү кими севсин» (Ефеслиләрә 5:25, 28, 29, 33).
7. а) Мәсиһчи никаһынын тәмәлинин ајрылмаз һиссәси нә олмалыдыр? б) Әрин арвадыны даима севмәси нә демәкдир?
7 Павел әрлә арвадын арасында јаранан һәр проблеми мүзакирә етмир, әксинә, о, мәһәббәти — һәр мәсиһчи аиләсинин тәмәлинин ајрылмаз һиссәсини тәшкил етмәли олан мәгамы — вурғулајараг мәсәләнин көкүнә тохунур. Јухарыда ҝәтирилән ајәләрдә севҝи алты дәфә хатырланыр. Орижинал әлјазмалара әсасән, Павел әрләри арвадларыны даима севмәјә чағырыр. Шүбһәсиз, Павел баша дүшүрдү ки, вурулмаг мәһәббәти горумагдан даһа асандыр. Бу, чохларынын «худбин», «барышмаз» олдуғу «ахыр ҝүнләрдә» өзүнү хүсусилә бүрузә верир (2 Тимотејә 3:1-3). Бу кими хошаҝәлмәз хүсусијјәтләр аиләни дахилдән парчалајыб дағыдыр. Анҹаг севән әр дүнјанын сәҹијјәви хүсусијјәти олан худбинлијин онун дүшүнҹә тәрзинә вә давранышына тә’сир етмәсинә јол вермәјәҹәк (Ромалылара 12:2).
Арвадын гајғысына галмаг нә демәкдир?
8, 9. Мәсиһчи әр үчүн арвадынын гајғысына галмаг нә демәкдир?
8 Әҝәр сән евли мәсиһчисәнсә, худбинликлә неҹә мүбаризә апарар вә арвадыны һәгигәтән севдијини неҹә ҝөстәрә биләрсән? Јухарыда ситат ҝәтирилән ајәләрдә Павел ики мәгамы вурғулајыр: арвадын гајғысына галмаг вә өз бәдәнини бәсләдији кими ону бәсләмәк. Һәјат јолдашынын гајғысына неҹә гала биләрсән? Мәсәлән, онун мадди, јә’ни физики еһтијаҹларыны өдәмәклә. Павел Тимотејә јазырды: «Ким өз јахынларынын, хүсусән аилә үзвләринин гејдинә галмырса, о, иманы инкар етмиш вә имансыздан да бетәрдир» (1 Тимотејә 5:8).
9 Анҹаг гида, палтар вә башын үстүндә дам олмагла һәр шеј битмир. Нә үчүн? Чүнки ола биләр ки, арвадын мадди еһтијаҹларыны өдәмәкдә әрә сөз јохдур, анҹаг онун мә’нәви вә руһани тәләбатлары өдәнилмәмиш галыр. Садаланан бу ики тәләбатын гајғысына галмаг хүсусилә ваҹибдир. Дүздүр, бир чох мәсиһчи кишиләрин үзәринә јығынҹагда чохлу мәс’улијјәтләр дүшүр. Лакин бу о демәк дејил ки, буна ҝөрә әр Аллаһын аилә башчысы кими онун үзәринә гојдуғу өһдәчиликләрә биҝанә јанашмалыдыр (1 Тимотејә 3:5, 12). Бу мәсәләјә даир бир нечә ил әввәл бу журналда дејилирди: «Мүгәддәс Китабын тәләбләринә ујғун олараг белә гәнаәтә ҝәлирик ки, “отармаг евдән башлајыр”. Әҝәр ағсаггал аиләсинә биҝанә јанашырса, онун бундан сонра да ағсаггал кими хидмәт етмәси суал алтына дүшүр»b. Шүбһәсиз, һәјат јолдашынын мадди, мә’нәви вә ән әсасы руһани еһтијаҹларынын гајғысына галмаг сон дәрәҹә ваҹибдир.
Арвады бәсләмәк нә демәкдир?
10. Әр арвадыны неҹә бәсләјә биләр?
10 Арвады бәсләмәк ону севдијин үчүн гајғысына галмаг демәкдир. Буну неҹә етмәк олар? Биринҹиси, јолдашынла кифајәт гәдәр вахт кечир. Әҝәр белә етмәсән, онун сәнә севҝиси ҝетдикҹә сојујаҹаг. Унутма ки, арвадынын вахта вә диггәтә олан еһтијаҹы сәнин дүшүндүјүнлә ејни олмаја биләр. Арвады садәҹә ‘бәсләјирәм’ демәк кифајәт дејил. О буну һисс етмәлидир. Павел јазмышдыр: «Һәр кәс өзүнүн мәнфәәтини дејил, башгасынынкыны ахтарсын» (1 Коринфлиләрә 10:24). Арвадыны севән әр онун әсл еһтијаҹларыны баша дүшмәјә чалышыр (Филипилиләрә 2:4).
11. Әрин арвады илә рәфтары онун Аллаһла мүнасибәтинә вә јығынҹагдакы мөвгејинә неҹә тә’сир едир?
11 Әр арвадыны бәсләдијини һәм сөзләриндәки, һәм дә һәрәкәтләриндәки инҹә рәфтары илә ҝөстәрә биләр (Сүлејманын мәсәлләри 12:18). Павел колослулара јазмышдыр: «Еј әрләр, өз арвадларынызы севин вә онларла сәрт давранмајын» (Колослулара 3:19). Бир китаба әсасән, «сәрт давранмајын» ифадәсини «онунла кәниз кими рәфтар етмәјин» вә ја «ону гул етмәјин» кими тәрҹүмә етмәк олар. Истәр тәкликдә, истәрсә дә адам ичиндә арвады илә амансыз рәфтар едән әр, әлбәттә ки, ону бәсләдијини ҝөстәрмир. Арвады илә кобуд рәфтар етмәклә о, Аллаһла мүнасибәтләрини корлаја биләр. Һәвари Петер әрләрә јазырды: «Арвадларынызла илтифатлы давранын. Онлар зәиф ҹинс вә һәјат ән’амынын һәмварисләри олдугларындан онлара һөрмәт ҝөстәрин ки, дуаларыныза манечилик төрәдилмәсин»c (1 Петер 3:7).
12. Исанын мәсиһчи јығынҹағы илә рәфтарындан мәсиһчи әр нә өјрәнә биләр?
12 Һеч вахт фикирләшмә ки, арвадында сәнә гаршы мәһәббәт өз-өзүнә јараныр. Севдијинә ону һәмишә әмин ет. Исанын мәсиһчи јығынҹағы илә рәфтары әрләрә нүмунәдир. Давамчыларынын пис хүсусијјәтләри дәфәләрлә өзүнү бүрузә верәндә белә, о өз мүлајимлијиндә вә хејирхаһлығында галыр, онлары бағышлајырды. Буна ҝөрә Иса демишди: «Мәним јаныма ҝәлин... Чүнки Мән һәлим вә гәлбдән тәвазөкарам; вә ҹаныныза раһатлыг тапарсыныз» (Матта 11:28, 29). Исадан нүмунә ҝөтүрән мәсиһчи әр арвады илә Исанын јығынҹагла рәфтар етдији кими давраныр. Сөздә вә әмәлдә һәјат јолдашыны һәгигәтән дә бәсләдијини ҝөстәрән кишинин јанында арвады өзүнү раһат һисс едәҹәк.
Мүгәддәс Китаб принсипләри илә јашајан гадынлар
13. Мүгәддәс Китабда гадынлар үчүн һансы принсипләр вардыр?
13 Мүгәддәс Китабда гадынлар үчүн дә принсипләр јазылыб: «Гадынлар! Рәббә табе олур кими, әрләринизә табе олун. Чүнки бәдәнин хиласкары олан Мәсиһ иманлылар ҹәмијјәтинин Башы олдуғу кими, әр дә арвадын башыдыр. Амма ҹәмијјәт Мәсиһә табе олдуғу кими, арвадлар да һәр шејдә өз әрләринә табе олсунлар... Арвад исә әринә еһтирам етсин» (Ефеслиләрә 5:22-24, 33).
14. Нә үчүн Мүгәддәс Јазыларын табечилик принсипи гадыны алчалтмыр?
14 Диггәт јетирин ки, Павел табечилији вә еһтирамы хүсуси олараг вурғулајыр. Гадына әринә табе олмағы хатырладыр. Бу, Аллаһын гурулушуна ујғундур. Ҝөјдә вә јердә олан һәр ҹанлы мәхлуг кимәсә табедир. Һәтта Иса да Јеһова Аллаһа табедир (1 Коринфлиләрә 11:3). Әлбәттә, әр дүзҝүн башчылыг едәндә арвад үчүн дә она табе олмаг асанлашыр.
15. Мүгәддәс Китаб гадынлара һансы мәсләһәти верир?
15 Павел һәм дә дејир ки, гадын ‘әринә еһтирам етмәлидир’. Мәсиһчи гадын әринин нүфузуну шүбһә алтына алмамалы вә ја сәрбәстлијә ҹан атмамалыдыр, әксинә, ‘һәлим вә сакит руһ’ тәзаһүр етдирмәлидир (1 Петер 3:4). Аллаһдан горхан гадын аиләсинин рифаһы үчүн чалышаҹаг вә евин башчысына шәрәф ҝәтирәҹәк (Титуса 2:4, 5). О, әри һаггында јахшы данышаҹаг вә ону башгаларынын ҝөзүндә һөрмәтдән салмајаҹаг. Һәмчинин әринин гәрарларынын һәјата кечмәси үчүн вар ҝүҹү илә чалышаҹаг (Сүлејманын мәсәлләри 14:1).
16. Мәсиһчи гадынлар Сара вә Ривганын нүмунәсиндән нә өјрәнә биләрләр?
16 Һәлим вә сакит олмаг о демәк дејил ки, мәсиһчи гадынын өз фикри ола билмәз вә ја онун нөгтеји-нәзәри һеч бир әһәмијјәт дашымыр. Гәдимдә Сара вә Ривга кими иманлы гадынлар һансыса мәсәләјә даир өз фикирләрини чәкинмәдән сөјләмишдиләр вә Мүгәддәс Китаб ҝөстәрир ки, Јеһова онларын һәрәкәтләрини бәјәнмишди (Јарадылыш 21:8-12; 27:46–28:4). Мәсиһчи гадынлар да өз фикирләрини әрләри илә бөлүшә биләрләр. Анҹаг буну алчалдыҹы тонда дејил, нәзакәтлә демәлидирләр. О заман онлар ҝөрәҹәкләр ки, үнсијјәтләри даһа јахшы алыныр.
Никаһ өһдәчиликдир
17, 18. Әр-арвад Шејтанын тә’сиринә бахмајараг, аиләни неҹә горуја биләр?
17 Никаһ өмүрлүк өһдәчиликдир. Буна ҝөрә дә һәм әр, һәм дә арвад никаһларынын уғурлу олмасыны сәмими гәлбдән арзуламалыдырлар. Ачыг үнсијјәт олмаса, наразылыглар артаҹаг вә проблемләр дәринләшәҹәк. Чох вахт проблем бөјүјүб инҹиклик јарананда, әр-арвад бир-бири илә данышмыр. Бә’зиләри, һәтта евлилик һәјатларына сон гојмаг истәјәрәк башгасы илә романтик мүнасибәтләр јарада биләрләр. Анҹаг Иса хәбәрдарлыг етмишди: «Бир гадына шәһвәтлә бахан һәр адам, артыг үрәјиндә онунла зина етмиш олур» (Матта 5:28).
18 Һәвари Павел, аиләлиләр дә дахил олмагла, бүтүн мәсиһчиләрә мәсләһәт верирди: «Гәзәбләнәндә ҝүнаһ ишләмәјин; гој сиз гәзәбләниркән ҝүнәш батмасын, вә иблисә јер вермәјин» (Ефеслиләрә 4:26, 27). Бизим баш дүшмәнимиз Шејтан мәсиһчиләр арасындакы наразылыглардан өз хејринә истифадә етмәјә чалышыр. Она истәдијинә наил олмаға имкан вермәјин! Проблемләр јарананда Мүгәддәс Китаба әсасланан нәшрләрдән истифадә едәрәк Јеһованын бу мәсәләјә даир нөгтеји-нәзәрини өјрәнмәјә чалышын. Проблеми сакит вә ачыг мүзакирә един. Јеһованын нормалары һаггында билдикләринизә ујғун давранын (Јагуб 1:22-25). Гурдуғунуз никаһа ҝәлдикдә исә, бундан сонра да аиләви олараг Аллаһла јеримәјә әзмли олун. Һеч нәјин вә һеч кимин Аллаһын бирләшдирдијини ајырмасына јол вермәјин! (Микеја 6:8).
[Һашијәләр]
a «Ојанын!» журналынын 2002-ҹи ил 8 феврал сајынын 10-ҹу сәһифәсиндәки (рус.) «Бошанма вә ајры јашама» адлы чәрчивәјә бахын. Јеһованын Шаһидләри тәрәфиндән дәрҹ едилмишдир.
b «Ҝөзәтчи Гүлләси»нин 1989-ҹу ил 15 октјабр сајынын 12-ҹи сәһифәсинә (рус.) бахын.
c Мәсиһчи јығынҹағында мәс’улијјәтләр алмаг үчүн киши «давакар» олмамалы, јә’ни башгаларыны дөјмәмәли, һәдә-горху ҝәлмәмәлидир. «Ҝөзәтчи Гүлләси»нин 1990-ҹы ил 1 сентјабр сајынын 25-ҹи сәһифәсиндә (рус.) јазылыб: «Евдә зүлмкар олан, башга јердә исә өзүнү Аллаһдан горхан ҝөстәрән киши јығынҹагда мәс’улијјәт алмаға лајиг дејил» (1 Тимотејә 3:2-5, 12).
Хатырлајырсынызмы?
• Нәјә ҝөрә һәтта мәсиһчи аиләсиндә дә проблемләр јараныр?
• Әр арвадынын гајғысына галдығыны вә ону бәсләдијини неҹә ҝөстәрә биләр?
• Гадын әринә еһтирамыны неҹә ҝөстәрә биләр?
• Әрлә арвад өз никаһыны неҹә мөһкәмләндирә биләр?
[24-ҹү сәһифәдәки шәкил]
Әр арвадынын јалныз мадди дејил, һәмчинин руһани тәләбатларынын гејдинә галмалыдыр.
[25-ҹи сәһифәдәки шәкил]
Арвадыны бәсләјән әрин јанында гадын өзүнү раһат һисс едир.
[27-ҹи сәһифәдәки шәкил]
Мәсиһчи гадынлар өз фикирләрини һөрмәтлә билдирирләр.