Бүтүн дүнјада сәсләнән хаһиш

ТӘСӘВВҮР един ки, јүз милјонларла, һәтта милјардларла инсан ејни шеји хаһиш едир. Онлар каинатда ән али һакимијјәтә малик олан шәхсдән хүсуси бир хаһиши јеринә јетирмәји риҹа едирләр. Анҹаг онларын арасында нә һагда хаһиш етдијини биләнләр чох аздыр. Белә шеј мүмкүндүрмү? Әслиндә, бу һәр ҝүн баш верир. Бу инсанларын һамысы нә һагда хаһиш едир? Аллаһын Падшаһлығынын ҝәлмәси һагда!

Бир һесабламаја ҝөрә, Иса Мәсиһи рәһбәр адландыран вә өзләринин мәсиһчи олдуғуну иддиа едән тәгрибән 37 000 дин мөвҹуддур. Бу динләрин 2 милјарддан артыг тәрәфдары вар. Онларын чоху Матта 6:9-13 ајәләриндә јазылан дуаны тәкрарлајырлар. Сиз бу дуаны ешитмисинизми? Исанын шаҝирдләринә өјрәтдији кими, бу дуа белә башланыр: «Еј ҝөјләрдә олан Атамыз, адын мүгәддәс тутулсун. Сәлтәнәтин ҝәлсин. Ҝөјдә олдуғу кими, јердә дә Сәнин ирадән олсун».

Әсрләр бојунҹа Аллаһа инанан инсанлар һәмин сөзләри килсәләрдә еһтирамла тәкрар етмиш, јахшы вә пис ҝүнләриндә аиләликҹә ја да шәхсән сәмими-гәлбдән, һәрарәтлә әзбәрдән сөјләмишләр. Бир чохлары онлары әзбәрләјиб, мәнасына вармадан мүнтәзәм олараг тәкрарлајырлар. Аллаһын Падшаһлығынын ҝәләҹәјинә үмид едән вә бу һагда дуа едән тәкҹә Христиан дүнјасынын үзвләри дејил.

Дини һүдудлары ашан хаһиш

Јәһуди дининдә ҝениш јајылмыш дуа матәм дуасы олан каддишдир. Онун өлүмлә вә кәдәрлә бирбаша әлагәси олмаса да, адәтән ағыр итки үз верән заман сөјләнилир. Дуа едән хаһиш едир: «Гој Аллаһ Өз Падшаһлығыны сән сағ икән [...], һәтта даһа тез гурсун»a. Синагогда охунан башга гәдим дуада Давудун евиндән олан Мәсиһин Падшаһлығына үмид һаггында данышылыр.

Аллаһын Падшаһлығынын ҝәлмәсини башга динләрин тәрәфдарлары да арзу едирләр. Бир гәзетдә Һиндуизм, Христиан вә Ислам динләри арасында үмуми бир шеј тапмаға чалышан, Һиндистанын XIX әсрдә јашамыш ҝөркәмли дин рәһбәринин сөзләри ҝәтирилир: «Нә гәдәр ки, шәрглә гәрб бирләшмәјиб, Аллаһын һәгиги Падшаһлығынын гурулмасы мүмкүн дејил» («The Times of India»). Австралијанын Стратфилд шәһәриндәки Ислам коллеҹинин директору бу јахынларда бир гәзетә јазмышдыр: «Бүтүн мүсәлманлар кими мән дә инанырам ки, Иса гајыдаҹаг вә Аллаһын һәгиги Падшаһлығыны гураҹаг».

Шүбһәсиз, Аллаһын Падшаһлығынын ҝәләҹәјинә үмид едиб, онун үчүн дуа едән инсанларын сајы милјардларладыр. Анҹаг бир мараглы вәзијјәтә нәзәр салаг.

Јәгин билирсиниз ки, бу журналы нәшр едән бизләр, Јеһованын Шаһидләри, сизин әразиниздә евдән-евә тәблиғ едәрәк инсанларла Мүгәддәс Китаб һаггында сөһбәт едирик. Биз бу иши һал-һазырда бүтүн дүнјада, 236 өлкә вә әразидә, о ҹүмләдән, 400-дән артыг дилдә һәјата кечиририк. Тәблиғимизин әсас мөвзусу Аллаһын Падшаһлығыдыр. Нәзәринизә чатдырмаг истәјирик ки, бу журнал там олараг «Ҝөзәтчи Гүлләси Јеһованын Падшаһлығыны елан едир» адланыр. Биз тез-тез инсанлардан һәмин Падшаһлыг һаггында дуа едиб-етмәдикләрини сорушуруг. Әксәријјәти мүсбәт ҹаваб верир. Амма онлардан һәмин Падшаһлығын нә олдуғуну сорушанда, чохлары «билмирәм» дејә ҹаваб верир. Јахуд онларын ҹаваблары гејри-мүәјјән вә анлашылмаз олур.

Нә үчүн бу гәдәр чох инсан баша дүшмәдији шеј һаггында дуа едир? Бәлкә Аллаһын Падшаһлығы мүрәккәб вә чәтин гавранылан анлајыш олдуғу үчүн? Хејр. Мүгәддәс Китаб Падшаһлығын нә олдуғуну ајдын вә һәртәрәфли изаһ едир. Бундан әлавә, Мүгәддәс Китабын Падшаһлыг һаггында дедикләри бу тәлатүмлү зәманәдә сизә һәгиги үмид верә биләр. Нөвбәти мәгаләдә һәмин үмидин нәдән ибарәт олдуғуну Мүгәддәс Китаб әсасында өјрәнәҹәјик. Сонра Исанын Падшаһлығын ҝәлмәси барәдә дуасына нә вахт ҹаваб вериләҹәјини өјрәнәҹәјик.

[Һашијә]